SAN MATEO 6

1Ĩ quetibu̶ju̶ yaparo, atore bairo na ĩnemoñupũ̶ tunu: “Ñubueráná caroaro tũ̶goñaña. ‘Capããrã camasã na caneñarõ jetore marĩ ñubuegarã, caroaro marĩ caátiere na caĩñaparore bairo ĩrã,’ ĩ tũ̶goñaeticõãña. Bairo mu̶jãã caĩtũ̶goñaata, marĩ Pacu̶ Dios u̶mu̶recóo macããcũ̶ mu̶jãã cawapatapee mu̶jããrẽ cũ̶ cajopeere mu̶jãã joetigu̶mi. 2“Bairi camasã na cabopacarijere mu̶jãã cajoata, nipetiro camasãrẽ, bairo mu̶jãã caátiere na quetibu̶ju̶ masĩõẽtĩcõãña. Tore bairo átinucũñama caĩtopairã cũ̶ã ñubuerica wii, sinagogare ãna, o maapu̶ áñesẽãrã, nipetiro camasã narẽ na caĩroaparore bairo ĩrã. Cariape mu̶jããrẽ ñiña: Na ũna camasã aperã narẽ na caĩroanucũrĩjẽ netõrõ cũ̶gonemoetigarãma. Dios pu̶ame na ĩroaetiri caroare na joetigu̶mi roro na catũ̶goñarĩjẽ jũ̶gori. 3Bairi mu̶jãã pu̶ame camasã na cabopacarijere mu̶jãã cajoata, ni ũcũ̶ mu̶jãã yau̶ caãnimajũũ̶rẽ cũ̶ quetibu̶ju̶eticõãña. 4Capããrã na caĩñaetopu̶, cabopacarãrẽ na ju̶átinemoña. Tore bairo mu̶jãã caápata, marĩ Pacu̶ Dios yasioropu̶ mu̶jãã caátimiatacũ̶ãrẽ, caĩñau̶ ãnirĩ mu̶jãã jogu̶mi mu̶jãã cawapatapeere. 5“Tunu bairoa Diore jẽnirã, caĩtopairã na cajẽnirõrẽ bairo jẽnieticõãña. Na pu̶ame ñubuerica wiipu̶ ãna, nucũrĩ Diore cũ̶ jẽniu̶seanucũñama. O plaza tũ̶nipu̶ capããrã camasã na caãnopu̶ ãna, bairo átiu̶seanucũñama, nipetiro camasã caroaro na cañubuerijere na caĩñaparorore bairo ĩrã. Cariape mu̶jããrẽ ñiña: Na ũna camasã aperã narẽ na caĩroanucũrĩjẽ netõrõ cũ̶gonemoetigarãma. Dios na ĩroaetiri, caroare na joetigu̶mi, roro na catũ̶goñarĩjẽ jũ̶gori. 6Bairi mu̶jãã pu̶ame Diore cũ̶ mu̶jãã cajẽniata, atore bairo mu̶jãã caáto ñuña: Mu̶jãã ya aru̶a jopere biajãáti, aperã na caĩñaetopu̶ Diore cũ̶ jẽninucũña. Tore bairo mu̶jãã caápata, marĩ Pacu̶ Dios jeto caĩñau̶, mu̶jãã mena caãcũ̶ ãnirĩ caroare mu̶jãã jogu̶mi. 7“Tunu bairoa Diore cũ̶ jẽnirã, nairõ jĩcã wãmea cabu̶goro macããjẽrẽ ĩ bu̶su̶jẽnieticõãña. Torea bairo jeto ĩ jẽninucũñama Diore camasĩẽna. ‘Nairõ jĩcã wãmea cũ̶ marĩ caĩata, caroaro tũ̶gou̶mi Dios,’ ĩ tũ̶goñañama, masĩẽna. 8Marĩ Pacu̶ Dios pu̶ame cũ̶ mu̶jãã cajẽniparo jũ̶goyepu̶a merẽ mu̶jãã cajẽnipeere masĩcõãñami. Bairi narẽ bairo cũ̶ jẽnieticõãña Diore. 9Atore bairo mu̶jãã caĩjẽnirõ boya: ‘Jãã Pacu̶, jõbui macããcũ̶, nipetiro camasã mu̶ wãmerẽ na ĩroáto. 10Tunu bairoa mu̶ carotimasĩrĩpau̶ ati yepapu̶ to apáro. Jõbuipu̶ mu̶ carotirorea bairo to baiáto ati yepapu̶ cũ̶ãrẽ. 11Tunu ãme jãã cau̶gapee, jãã caborije, jããrẽ caru̶sarije ũnie cũ̶ãrẽ jãã joya. 12Tunu bairoa roro jãã caátaje cũ̶ãrẽ jãã masiriyobojaya. Camasã roro jããrẽ na caátajere jãã camasiritirorea bairo roro jãã caátaje cũ̶ãrẽ jãã masiriyobojaya mu̶ cũ̶ã. 13Tunu wãtĩ roro jããrẽ cũ̶ caátigarijere jãã ẽñotaya. Jãã netõõña. Mu̶ jeto carotimasĩ mu̶ ãniña. Mu̶ jeto catutuanetõũ̶ mu̶ ãniña. Mu̶ jeto camasã na caĩroapau̶ mu̶ ãniña tocãnacã rũ̶mu̶a. Bairo to baiáto,’ bairo Diore cũ̶ mu̶jãã caĩjẽnipee ñuña,” na ĩ quetibu̶ju̶yupu̶ Jesús. 14Ĩ quetibu̶ju̶ yaparo, atore bairo na ĩnemoñupũ̶ tunu: “Camasã roro mu̶jããrẽ na caátajere na mu̶jãã cabu̶su̶qũẽnoata, marĩ Pacu̶ Dios u̶mu̶recóopu̶ caãcũ̶ cũ̶ã roro mu̶jãã caátajere masiriyobojagu̶mi. 15Bairo roro mu̶jããrẽ na caátajere na mu̶jãã cabu̶su̶qũẽnoeticõãta roque, marĩ Pacu̶ Dios cũ̶ã roro mu̶jãã caátajere masiriyobojaetigu̶mi. 16“Tunu bairoa ape rũ̶mu̶ u̶garique betiri Diore ñubueãna, tũ̶goñarĩqũẽ pairã yapapuarique cu̶narẽ bairã na cabaurore bairo baieticõãña. Tore bairo jeto átiyama caĩtopairã, nipetiro camasã u̶garique betiri Diore na cañubuero na camasĩparore bairo ĩrã. Cariape mu̶jããrẽ ñiña: Camasã na caĩroarije netõrõ cũ̶goetigarãma. Dios na ĩroaetiri caroare na joetigu̶mi, roro na catũ̶goñarĩjẽ jũ̶gori. 17Bairi mu̶jãã pu̶ame u̶garique betiri Diore mu̶jãã cañubueata, atore bairo mu̶jãã caáto ñuña: Mu̶jãã riapére wacoseya. Mu̶jãã poa cũ̶ãrẽ caroaro wu̶gapeoya. 18Bairo ása, ni jĩcãũ̶ ũcũ̶ u̶garique betiri mu̶jãã cañubuerijere cũ̶ camasĩẽtĩparore bairo ĩrã. Atorea bairo mu̶jãã caápata, marĩ Pacu̶ Dios caĩñau̶ jeto mu̶jãã mena caãcũ̶ ãnirĩ caroare mu̶jãã jogu̶mi. 19“Tunu bairoa ati yepa macããjẽ pairo cawapacu̶tiere jeeneñorĩ caroare bairo jecũcũ̶gonetõẽtĩcõãña. Ati yepapu̶ marĩ caãno, moena u̶gareyama ti ũnierẽ. O tie ãpõã ũnie caãmata cũ̶ãrẽ, u̶ta witiri boacoaya. O aperã tiere jerutirecõãñama. 20Caroaro ása, jõbuipu̶ roquere mu̶jãã yaye wapa caãnipeere mu̶jãã cacũ̶gonetõparore bairo. Topu̶ noa ũna moena cau̶garerã mánama. Cau̶tawitiboarije ũnie cũ̶ã mano. Cajerutiri majã cũ̶ã mánama u̶mu̶recóopu̶re. Bairi topu̶ mu̶jãã cacũ̶gopee yasietigaro. 21Ati yepapu̶ macããjẽ jetore mu̶jãã camaitũ̶goñaata, tie jetore mu̶jãã bootũ̶goñagarã. Jõbuipu̶ mu̶jãã cacũ̶gopeere mu̶jãã camaitũ̶goñaata roque, ati yepa macããjẽrẽ bu̶tioro mu̶jãã bootũ̶goñaetigarã. 22“Tunu bairoa mu̶jãã caapee pu̶ame cajĩñaworicare bairo niña mu̶jãã rupau̶re. Mu̶jãã caapee caroaro to caĩñamasĩata, caroaro mu̶jãã ĩñamasĩña. Caroyetuata, caroaro mu̶jãã ĩñamasĩẽtĩña. Tore bairo mu̶jãã, cayeriñurã ãnirĩ cariape mu̶jãã catũ̶goñaata, caroaro mu̶jãã átimasĩgarã. Cayeriñuena mu̶jãã caãmata roque, caroaro mu̶jãã átimasĩẽtĩbujiorã. Dios mu̶jããrẽ cũ̶ camasĩõrĩjẽrẽ mu̶jãã catũ̶gou̶sajãnacõãta, ¡roro majũ ána mu̶jãã átibujiorã! 24“Tunu bairoa ni jĩcãũ̶ ũcũ̶, pu̶garãpu̶a cũ̶ quetiuparã na caĩrõrẽ bairo átimasĩẽtĩñami, jĩcãrõrẽã bairo na carotimasĩẽtĩcõãta. Bairo na cabaiata, jĩcãũ̶rẽ qũĩroabujiou̶mi. Apeire qũĩroaetibujiou̶mi. Jĩcãũ̶ mena yeri ñugu̶mi. Apeire qũĩñategu̶mi. Torea bairo mu̶jãã cũ̶ã dinerore mu̶jãã cabotũ̶goñaata, Dios yaye mu̶jããrẽ cũ̶ caátirotirijere mu̶jãã ĩñatebujiorã,” na ĩ quetibu̶ju̶yupu̶ Jesús. 25Ĩ quetibu̶ju̶ yaparo, atore bairo na ĩnemoñupũ̶ tunu: “Mu̶jãã yeri pũna pu̶ame, mu̶jãã cau̶gapee, bairi mu̶jãã cajãñapee netõjãñurõ caãnimajũrĩjẽ niña. Bairi mu̶jããrẽ ñiña: Ati yepa macããjẽrẽ bu̶tioro bootũ̶goñaeticõãña. Mu̶jãã cau̶gapeere, mu̶jãã caetipeere, bairi mu̶jãã cajãñapee cũ̶ãrẽ bu̶tioro tũ̶goña macãẽtĩcõãña. Minia na caátiãnierẽ mu̶jãã masĩña. Na cau̶gapeere oteetiyama. Tunu na cau̶gapeere cabu̶tiro ĩña, jeetiyama. Na cau̶gapeere jeri wiipu̶ qũẽnocũẽtĩnucũñama. Bairo na caáperimiatacũ̶ãrẽ, na cau̶gapeere jonucũñami Dios. ¡Mu̶jãã roquere minia netõrõ mu̶jãã maiñami Dios! Bairi ãme mu̶jãã caãnierẽ tũ̶goña macãẽtĩcõãña. 27Ni ũcũ̶ mu̶jãã mena macããcũ̶, cũ̶ catũ̶goñamacãrĩjẽ jũ̶gori, ‘Yu̶ bu̶tinemogu̶ jĩcã metro recomacã majũ, ũ̶mu̶au̶ ãnigu̶,’ ĩ masĩẽtĩñami. Mu̶jãã catũ̶goñamacããrĩjẽ jũ̶gori mu̶jãã átimasĩẽtĩña. 28“Bairi, ¿nopẽĩrã mu̶jãã cajãñapeere mu̶jãã tũ̶goñarĩqũẽ paiyati? Oó, tataboaro macããjẽ cabairije cũ̶ãrẽ mu̶jãã masĩña. Oó pu̶ame paaetinucũña. Eetinucũña. 29Bairo áperimirõcũ̶ã, caroa bauya. Quetiupau̶ rey Salomón ãnacũ̶ caroa majũ cũ̶ cajutii jãñarĩqũẽ netõjãñurõ caroa bauya oó pu̶ame. 30Bairo tie taa ũnie Dios cũ̶ caqũẽnorĩqũẽ jĩcã rũ̶mu̶ caroa cabaumiatacũ̶ãrẽ, ape rũ̶mu̶ peeropu̶ joeyama camasã, peero riorã. Mu̶jããrẽ taa ũnie netõjãñurõ mu̶jãã maiñami Dios. Bairi mu̶jãã cajãñapeere mu̶jãã jogu̶mi yua. ¡Mu̶jãã, Dios mena catũ̶goñatutuaenarẽ bairo majũ mu̶jããrẽ ñiñaña! 31Bairi mu̶jãã cabopacarijere tũ̶goña macãẽtĩcõãña. ‘¿Ñerẽ marĩ u̶garãati?’ o ‘¿Ñerẽ marĩ etirãati?’ o ‘¿Nerẽ marĩ jãñarãati?’ ĩ tũ̶goña macãẽtĩcõãña. 32Diore caĩroaena pu̶ame na cau̶gapeere, bairi na caetipee cũ̶ãrẽ tũ̶goña macãnucũñama. Mu̶jãã roque narẽ bairo baieticõãña. Marĩ Pacu̶ Dios u̶mu̶recóo macããcũ̶ marĩ cabopacarijere masĩpeyocõãñami. Bairi tũ̶goña macãẽtĩcõãña. 33Dios cũ̶ carotimasĩrĩpau̶ roquere tũ̶goñaña. Dios cũ̶ carotirore bairo ása. Bairo mu̶jãã caápata, ati yepa macããjẽ nipetirije mu̶jãã cabopacarije cũ̶ãrẽ mu̶jãã jogu̶mi Dios. 34Tocãnacã rũ̶mu̶ ricaati capee wãme baicõã niña. Bairi ñamirõcã mu̶jãã caátipeere tũ̶goña macãẽtĩcõãña. Ñamirõcã caetaro roque mu̶jãã caátipee ũnierẽ mu̶jãã masĩgarã,” na ĩ quetibu̶ju̶yupu̶ Jesús.

will be added

X\