SAN MATEO 28

1Cabero yerijãrĩcã rũ̶mu̶ bero macã rũ̶mu̶, cabusuripau̶aca caãno, ape semana caãni jũ̶gori rũ̶mu̶ majũ, María Magdalena, bairi apeo María cawãmecu̶co mena Jesús rupau̶ri ãnajẽrẽ na cacũrocaatapau̶pu̶ ĩñarásúparã. 2Bairo na caátó, jĩcãũ̶ ángel, Diotu̶ caatíatacu̶ pu̶ame ruietayupu̶. Bairo cũ̶ caruietaro yua, yepa bu̶tioro majũ yuguiyuparo. Bairo cabairo, ángel pu̶ame Jesús rupau̶ri ãnajẽrẽ na cacũrocaatapau̶re etanu̶cãñupũ̶. Bairo etanu̶cã yua, ti opere na cabiaatatiire tunerocacõãñupũ̶. Bairo áti yaparo, ti ũ̶tã tii buire ruiyupu̶. 3Ángel pu̶ame asiyajãñuñupũ̶, bu̶po cũ̶ cayaberijere bairo. Cũ̶ jutii cũ̶ã cabotirije nieve cabaurore bairo bauyuparo. 4Bairi soldaua, bairo cũ̶ cabairo ĩña yua, nanarĩ bu̶tioro cũ̶ uwiyuparã. Cariacoatanarẽ bairo baicũmucoasuparã. 5Bairo na cabaiãno, ángel pu̶ame carõmia topu̶ caĩñarã etarãrẽ atore bairo na ĩñupũ̶: --Mu̶jãã, uwieticõãña. Yu̶ masĩña mu̶jãã caátigarijere. Jesús yucu̶pãĩpu̶ na capapuaturocamiatacu̶re qũĩñagarã mu̶jãã baiya. 6Atore maniñami. Merẽ caticoami tunu, mu̶jããrẽ cũ̶ caĩquetibu̶ju̶ jũ̶goyeticũrĩcãrõrẽ bairo. Atopu̶ asá mai. Ĩñañijate cũ̶rẽ na cacũmiatatore. Catiri, atore maniñami. 7Bairo ĩña yaparori bero, tunu ánája macãpu̶. Cũ̶ cabuerãrẽ atore bairo na quetibu̶ju̶rájá: “Merẽ caticuupi Jesús. Bairi mu̶jãã jũ̶goye Galilea yepapu̶ águ̶mi. Topu̶ mu̶jãã cotegu̶mi,” na ĩ quetibu̶ju̶rájá. Bairo na camasĩpeere yu̶ quetibu̶ju̶ atíapu̶ —na ĩ quetibu̶ju̶yupu̶ ángel María Magdalenajããrẽ. 8Bairo cũ̶ caĩquetibu̶ju̶ro tũ̶go, carõmia pu̶ame yoaro mee acoásúparã. Uwirã, bairi tunu tie quetire tũ̶gou̶seanirĩ atu̶coásúpa, jãã, Jesús cũ̶ cabuerãrẽ quetibu̶ju̶ráná. 9Bairo na caátó, Jesús pu̶ame na jũ̶goye buiaetayupu̶. Bairo buiaetari yua, caroaro mena na jẽniñupũ̶. Bairo cũ̶ caĩrõ tũ̶go, carõmia pu̶ame cũ̶tu̶ na ru̶popaturi mena etanumurĩ cũ̶ ru̶porire pããñarĩ ũpũñuparã, bu̶tioro qũĩroarã. 10Bairo na caáto, atore bairo na ĩñupũ̶ Jesús: --Yu̶ uwieticõãña. Yu̶ bairãrẽ bairo caãnarẽ atore bairo na ĩ quetibu̶ju̶rájá: “Galilea yepapu̶ ánája. Topu̶ Jesure cũ̶ mu̶jãã ĩñagarã,” na ĩ quetibu̶ju̶rájá —na ĩñupũ̶ Jesús. 11Bairo carõmia na caátoye, Jesús rupau̶ri ãnajẽrẽ cacotemiatana jĩcããrã na mena macããna macãpu̶ etayuparã. Etarã yua, sacerdote majã quetiuparãrẽ na quetibu̶ju̶yuparã nipetiro narẽ cabaiatajere. 12Bairo na caquetibu̶ju̶ro tũ̶gorã, sacerdote majã pu̶ame ásúparã cabu̶toa camasĩrã tu̶pu̶ jĩcãrõrẽ bairo na catũ̶goñaparore bairo ĩrã. Bairo na mena bu̶su̶ yaparo yua, soldauare pairo dinerore na nuniñuparã. 13Bairo na nuni yua, atore bairo na ĩñuparã: --Atore bairo mu̶jãã cabaiatajere camasãrẽ na mu̶jãã ĩ quetibu̶ju̶garã: “Jãã cãnicoaupa. Bairo jãã cacãnitoye, Jesús cũ̶ cabuerã pu̶ame atí, cũ̶ ãnacũ̶ rupau̶rire yajacũũpã,” mu̶jãã ĩgarã. 14Tunu bairoa quetiupau̶ gobernador bairo mu̶jãã cacãniatajere cũ̶ catũ̶goata, jãã pu̶ame popiye baio joroque mu̶jããrẽ cũ̶ caátipeere jãã ẽñotabojagarã —na ĩ quetibu̶ju̶yuparã sacerdote majã quetiuparãjãã soldauare. 15Bairo na caĩrõ tũ̶go, soldaua pu̶ame, “Jau̶” ĩ, dinerore jeyuparã. Bairi sacerdotea quetiuparã narẽ na caĩrotirorea bairo quetibu̶ju̶ batoyuparã camasãrẽ. Bairi ati rũ̶mu̶rĩ cũ̶ãrẽ torea bairo jeto ãmeo quetibu̶ju̶cõã ninucũñama judío majã. 16Bairi yua, jãã, Jesús cũ̶ cabuerã, pu̶ga wãmo peti ru̶pore jĩcã pẽnirõ cãnacãũ̶ majũ caãna jãã ápú̶ Galilea yepapu̶. Topu̶ etarã, ũ̶tãũ̶, Jesús jããrẽ cũ̶ caĩquetibu̶ju̶ricu̶ majũ cũ̶ jãã bocaetawu̶. 17Bairo qũĩña yua, jãã ru̶popaturi mena etanumurĩ cũ̶rẽ jãã ĩroawu̶. Mai, jĩcããrã jãã mena macããna, “Jesús catiri niñami,” ĩ masĩẽma. 18Bairo jãã cabairo, Jesús pu̶ame jããtu̶ etari, atore bairo jãã ĩwĩ: --Marĩ Pacu̶ Dios yu̶ joyami tocãnacã wãme rotimasĩrĩqũẽrẽ. U̶mu̶recóo, bairi ati yepa cũ̶ã rotimasĩrĩqũẽrẽ yu̶ joyami. 19Bairi camasã tocãnacã poari macããnarẽ noo na caãnopu̶ yu̶ yaye quetire na quetibu̶ju̶ ñesẽãrájá, na cũ̶ã yu̶ yaye quetire na catũ̶gou̶saparore bairo ĩrã. Bairo na catũ̶gou̶saro, na mu̶jãã bautizagarã. Marĩ Pacu̶ Dios ya wãme mena, yu̶, cũ̶ macũ̶ ya wãme mena, bairi tunu Espíritu Santo ya wãme ĩrĩ mena na mu̶jãã bautizagarã. 20Tunu bairoa mu̶jããrẽ yu̶ caátiroticũrĩqũẽ nipetirijere na quetibu̶ju̶netõõña, na cũ̶ã tiere na catũ̶gou̶saparore bairo ĩrã. Yu̶a, mu̶jããrẽ yu̶ aweyoetigu̶. Mu̶jãã mena yu̶ ãnicõã ninucũgu̶ tocãnacã rũ̶mu̶, ati u̶mu̶recóo capetiropu̶ —jãã ĩcũwĩ Jesús, jãã, cũ̶ cabuerãrẽ. Tocãrõã ñiña.

will be added

X\