SAN MATEO 25

1Ĩ quetibu̶ju̶ yaparo, ape wãme ĩcõñarĩ atore bairo jãã ĩnemowĩ tunu: “Dios cũ̶ carotimasĩrĩpau̶ pu̶ame cawãmarã rõmirĩ pu̶ga wãmo cãnacãõ cawãmojiyaenarẽ bairo niña. Bairi na yau̶ cũ̶ cawãmojiyari rũ̶mu̶ caãno cũ̶ bose rũ̶mu̶rẽ ĩñagarã, cũ̶ pacu̶ ya wiipu̶ ásúparã, topu̶ cũ̶, cũ̶ nu̶mo caãnipao mena na caetarore coterã. Bairi ñami caãnoi, na cajĩñabusuri rupaare tocãnacãõpu̶a jeásúparã. 2Bairo na mena macããna jĩcã wãmo cãnacã rõmirĩ catũ̶goñajũ̶goyecu̶perã ãñuparã. Aperã na mena macããna catũ̶goñajũ̶goyecu̶na ãñuparã. 3Catũ̶goñajũ̶goyecu̶perã pu̶ame na cajĩñawonemopee u̶se ape botella mena jeápeyuparã. 4Na bapa pu̶ame camasĩrã ãnirĩ, ape botella u̶sere jeánemoñuparã. 5Bairo cũ̶ nu̶mo caãnipaore caneiátácu̶ pu̶ame tãmurĩ etaesupu̶. Bairi cawãmarã rõmirĩ narẽ wu̶goa caetaro, cãnicoasuparã tie jãã ĩrĩ mee. 6Bairo ñami recomacã cacõñarõ majũ jĩcãũ̶ awajarique mena, ‘¡Jã, ĩñañijate! ¡Atíyami cawãmau̶, cũ̶ nu̶mo caãnipao mena! ¡Cũ̶ marĩ jẽnirápáro!’ ĩñupũ̶. 7Bairo cũ̶ caĩrõ tũ̶go, cawãmarã rõmirĩ nipetirã wãcãrĩ, na cajĩñaworica rupaare qũẽnojũ̶goyuparã tunu. 8Bairo na caqũẽnorõ, catũ̶goñajũ̶goyecu̶perã pu̶ame atore bairo na ĩ jẽniñuparã na baparã rõmirĩrẽ: ‘¡Jãã jĩñaworica rupaa u̶se petiro baiya! Jĩña wotutuaetiya. Bairi mu̶jãã yaye u̶se petoaca jãã joya,’ na ĩñuparã. 9Bairo na caĩrõ tũ̶go, ‘Mu̶jããrẽ jãã jomasĩẽtĩña. Mu̶jããrẽ jãã cajoata, jãã yaye etaetibujioro,’ na ĩñuparã. ‘Bairi wapatirájá u̶sere mu̶jããrẽ caru̶sarijere,’ na ĩñuparã catũ̶goñajũ̶goyecu̶na, na baparã rõmirĩrẽ. 10Bairo na caĩrõ tũ̶go, ‘Jau̶’ ĩ, acoásúparã u̶sere wapatiráná yua. Bairo na caátó bero, cawãmojiyapau̶ pu̶ame etayupu̶. Etari yua, catũ̶goñajũ̶goyecu̶na paijãñurõ cau̶sejeatana rõmirĩ pu̶ame cũ̶, cũ̶ nu̶mo mena cũ̶ pacu̶ ya wiipu̶ jããcoasuparã, u̶garique ju̶ u̶garáná bose rũ̶mu̶ na caqũẽnoatajere. Bairo na cajããrõ bero, ti wii jope pu̶amerẽ biacõãñuparã yua. 11Cabero u̶sere cawapatiratana rõmirĩ jopetu̶ etarã, atore bairo ĩ piiyuparã: ‘¡Jãã Quetiupau̶, jãã jope pããña!’ qũĩmiñuparã. 12Bairo na caĩmiatacũ̶ãrẽ, cawãmojiyaatacu̶ pu̶ame ti jopere pããnemoesupu̶. ‘Cariapea mu̶jããrẽ ñiña: Mu̶jããrẽ yu̶ masĩẽtĩña,’ na ĩñupũ̶ yua,” ĩcõñarĩ jãã ĩ quetibu̶ju̶wĩ Jesús. 13Bairo ĩ quetibu̶ju̶ yaparo, atore bairo jãã ĩnemowĩ: “Mu̶jãã, ti rũ̶mu̶ ti hora majũ yu̶ catunuetaparore mu̶jãã masĩẽtĩgarã. Bairi caroaro masacatiri ãnicoteya. Cacãnirãrẽ bairo baieticõãña,” jãã ĩwĩ. 14Ape wãme ĩcõñarĩ tunu atore bairo jãã ĩ quetibu̶ju̶nemowĩ Jesús: “Dios cũ̶ carotimasĩrĩpau̶ pu̶ame jĩcãũ̶ quetiupau̶ cũ̶ cabairiquere bairo niña. Cũ̶ pu̶ame ape yepa cayoaropu̶ águ̶ jũ̶goye, cũ̶ paabojari majãrẽ na piijori, na nuniñupũ̶ tocãnacãũ̶rẽã cũ̶ yaye dinerore, tiere na caqũẽnobojaparore bairo ĩ. 15Bairi na mena macããcũ̶rẽ jĩcã wãmo cãnacã mil moneda tiiri majũ cũ̶ nuniñupũ̶. Apei pu̶amerẽ pu̶ga mil moneda tiiri majũ cũ̶ nuniñupũ̶. Apei pu̶amerẽ jĩcã mil moneda tiiri majũ cũ̶ nuniñupũ̶. Na capaarique na cawapatamasĩrõ cãrõ na joyupu̶ quetiupau̶ cũ̶ ũ̶mu̶a tocãnacãũ̶rẽã. Bairo na nuni yaparo, acoásúpu̶ na quetiupau̶ yua. 16Bairo cũ̶ caátó bero, cũ̶ ũ̶mu̶ jĩcã wãmo cãnacã mil moneda tiiri majũ cũ̶ cajoatacu̶ pu̶ame, ãmeo nuni wapatari yoaro mee apeye jĩcã wãmo cãnacã mil moneda tiiri majũrẽ wapatanemoñupũ̶. 17Torea bairo pu̶ga mil majũ moneda tiiri cũ̶ cajoatacu̶ cũ̶ã apeye pu̶ga mil moneda tiiri majũrẽ wapatanemoñupũ̶. 18Bairo caroaro na cawapatanemomiatacũ̶ãrẽ, jĩcã mil moneda tiiri majũ cũ̶ cajoatacu̶ pu̶ame wapatanemoesupu̶. Cũ̶ quetiupau̶ dinerore cũ̶ canunirõ bero, acoásúpu̶. Á yua, yepa pupeapu̶ ope yesea, cũ̶ quetiupau̶ dinerore topu̶ yacũcõãñupũ̶. 19“Bairo cayoato bero, paabojari majã quetiupau̶ pu̶ame tunuetayupu̶ tunu cũ̶ ya yepapu̶. Bairo tunuetari bero, cũ̶ paabojari majãrẽ na piijoyupu̶, dinerore cũ̶ canunicũrĩcãrãrẽ. ‘¿Nocãrõ majũ na wapataupari tocãnacãũ̶pu̶a?’ ĩ, na piijoyupu̶. 20Bairi cũ̶ paabojari majõcu̶ jĩcã wãmo cãnacã mil moneda tiiri majũ cũ̶ cajoricu̶ pu̶ame cũ̶tu̶ etajũ̶goyupu̶. Eta yua, atore bairo qũĩñupũ̶: ‘Yu̶ quetiupau̶, mu̶ dinerore yu̶ mu̶ cacũrĩqũẽ mena yu̶ wapatanemoapu̶. Mu̶ pu̶ame jĩcã wãmo cãnacã mil moneda tiiri majũrẽ yu̶ mu̶ cacũmiatacũ̶ãrẽ, tunu jĩcã wãmo cãnacã mil moneda tiirire mu̶ yu̶ tunuo buipeogu̶,’ qũĩñupũ̶. 21Bairo cũ̶ caĩrõ, cũ̶ quetiupau̶ pu̶ame atore bairo qũĩ yu̶yupu̶: ‘Ñumajũcõãña. Cañuu̶ mu̶ ãniña mu̶a paabojari majõcu̶. Bairi caroaro tũ̶goñarĩqũẽ yeri pũna mena apeye petoaca caãnie ũnierẽ mu̶ caĩñarĩcãnu̶gõmasĩrõ jũ̶gori, paijãñurõ caãnie ũnierẽ caĩñarĩcãnu̶gõpau̶ mu̶rẽ yu̶ cũña. Bairi yu̶ ya wiipu̶ jããũ̶ asá. Yu̶ mena u̶seanirĩ ãña,’ qũĩñupũ̶. 22Cabero cũ̶ paabojari majõcu̶ apei pu̶ga mil moneda tiiri majũrẽ cũ̶ cajoricu̶ cũ̶ã etari, atore bairo qũĩñupũ̶: ‘Yu̶ quetiupau̶, mu̶ dinerore yu̶ mu̶ cacũrĩqũẽ mena yu̶ wapatanemoapu̶. Mu̶ pu̶ame pu̶ga mil moneda tiiri majũrẽ yu̶ mu̶ cacũmiatacũ̶ãrẽ, tunu pu̶ga mil moneda tiirire mu̶ yu̶ tunuo buipeogu̶,’ qũĩñupũ̶. 23Bairo cũ̶ caĩrõ, cũ̶ quetiupau̶ pu̶ame atore bairo qũĩ yu̶yupu̶: ‘Ñumajũcõãña. Cañuu̶ mu̶ ãniña mu̶a paabojari majõcu̶. Bairi caroaro tũ̶goñarĩqũẽ yeri pũna mena apeye petoaca caãnie ũnierẽ mu̶ caĩñarĩcãnu̶gõmasĩrõ jũ̶gori, paijãñurõ caãnie ũnierẽ caĩñarĩcãnu̶gõpau̶ mu̶rẽ yu̶ cũña. Bairi yu̶ ya wiipu̶ jããũ̶ asá mu̶ cũ̶ã. Yu̶ mena u̶seanirĩ ãña,’ qũĩñupũ̶. 24“Bairo na caátimiatacũ̶ãrẽ, apei cũ̶ paabojari majõcu̶ jĩcã mil moneda tiiri majũrẽ cũ̶ cajoricu̶ pu̶ame yua cũ̶tu̶ etari, atore bairo qũĩñupũ̶: ‘Yu̶ quetiupau̶, mu̶a, tutuaro mena caroti mu̶ ãniña. Caoteecu̶ nimicũ̶ã, aperã na caoteriquepu̶re mu̶ jenucũña. Tunu bairoa aperã yayere na mu̶ ẽmanucũña. 25Bairo caácu̶ mu̶ caãnierẽ uwiri caroaro yu̶ qũẽnocũwũ̶ mu̶ dinerore. Yepapu̶ yeseari yu̶ yacũwũ̶ tiere, yasire, ĩ. Ãmerẽ yua, mu̶ yu̶ tunuogu̶ tie mu̶ dinero, yu̶ mu̶ canunimirĩqũẽrẽ.’ 26Bairo cũ̶ caĩrõ tũ̶go, cũ̶ quetiupau̶ pu̶ame qũĩñupũ̶: ‘Mu̶a, paabojari majõcu̶, cañuecũ̶ cateeyepai majũ mu̶ ãniña. ¿Atore bairo yu̶re mi tũ̶goñanucũñati: “Caoteecu̶ nimicũ̶ã, aperã na caoteriquepu̶re jenucũñami. Tunu bairoa aperã yayere na ẽmanucũñami,” yu̶re mi tũ̶goñanucũñati? 27Bairo yu̶re caĩtũ̶goñau̶ nimicũ̶ã, ¿nopẽĩ yu̶ dinerore bancopu̶ mu̶ cũẽtĩ? Bairo cũrĩ, tie dinerore mu̶ cawasorije wapa mu̶ wapatanemobujioricu̶. Tie mena yu̶ mu̶ tunuobujioatacu̶, yu̶ ya wii yu̶ catunuetaro,’ qũĩ tutiyupu̶ quetiupau̶ cũ̶ ũ̶mu̶rẽ. 28Bairo qũĩ yaparori, atore bairo na ĩñupũ̶ aperã cũ̶tu̶ caãnarẽ: ‘Dinero, cũ̶ cacũ̶gorijere ẽmarĩ, apei pu̶ga wãmo cãnacã mil majũ moneda tiirire cacũ̶gou̶re cũ̶ joya.’ 29Torea bairo jeto yu̶ átirotigu̶ camasãrẽ. Noa ũna caroaro tũ̶goñarĩqũẽ yeri pũna mena yu̶ cajorijere na caĩñau̶saata, paijãñurõ na yu̶ jonemogu̶ tunu. Aperã caroaro tũ̶goñarĩqũẽ yeri pũna mena yu̶ cajorijere na caĩñau̶saeticõãta, na cacũ̶gomirĩjẽ cũ̶ãrẽ yu̶ ẽmapeyocõãgu̶. 30Bairi ãni, yu̶re capaabojamasĩẽcũ̶rẽ macãpu̶ cũ̶ rocawiyojoya canaitĩãrõpu̶. Topu̶re camasã otigarãma. Na opire bacaru̶potugarãma, bu̶tioro yapapuarã yua,” ĩcõñarĩ jãã quetibu̶ju̶wĩ Jesús. 31Ĩ yaparo, atore bairo jãã ĩnemowĩ Jesús tunu: “Camasã Jũ̶gocu̶, ati yepapu̶ nemo yu̶ catunuetari rũ̶mu̶rẽ caasiyarije mena yu̶ atígu̶. Tunu bairoa yu̶ yarã ángelea majã mena yu̶ atígu̶. Bairo atí yua, trono quetiupau̶ cũ̶ caruiro caroaro majũpu̶ yu̶ ruigu̶. 32Bairo yu̶ caruiro, ati u̶mu̶recóo macããna, tocãnacã poa macããna yu̶ riape neñaetagarãma. Bairo na caneñaetaro ĩña, na ñiñabesegu̶. Jĩcãũ̶ ovejare cacotei cũ̶ yarã nurĩcãrã oveja, bairi cabras na caĩrã cũ̶ãrẽ ricaati jeto cũ̶ cabesecũrõrẽ bairo camasã nipetirore na ñiñabesegu̶. 33Bairi yu̶ yarã, ovejare bairo caãna pu̶amerẽ yu̶tu̶ cariape nu̶gõãrẽ na yu̶ nucũrotigu̶. Aperã yu̶ camasĩẽna, cabrare bairo caãna roquere yu̶tu̶ caãcõ nu̶gõãrẽ na yu̶ nucũrotigu̶. 34“Bairo áticõã, yu̶, Quetiupau̶ Rey, bairo ñigu̶ yu̶ caruiro cariape nu̶gõã caãnarẽ: ‘Yu̶ yarã, yu̶ Pacu̶ caroaro u̶seanirĩqũẽrẽ cũ̶ cajoricarã ãnirĩ, tiaya. Dios cũ̶ carotimasĩrĩpau̶re jããrã asá, ati u̶mu̶recóo caãniparo jũ̶goye mu̶jãã caãnipeere cũ̶ caĩjũ̶goyeticũrĩcãrõrẽã bairo. 35Yu̶ pu̶ame yu̶ caqueyaro, yu̶ mu̶jãã u̶garotiwu̶. Tunu bairoa yu̶ cañemejipiro, yu̶ mu̶jãã etirique nuniwũ̶. Tunu bairoa canucũñesẽãrĩ majõcu̶re bairo yu̶ cabainucũñesẽãrõ, “Jããtu̶ ãña,” yu̶ mu̶jãã ĩwũ̶. 36Tunu bairoa yu̶ cajutii cũ̶goeto, yu̶ mu̶jãã jutii nuniwũ̶. Tunu yu̶ cariaro, mu̶jãã pu̶ame yu̶tu̶ etari caroaro yu̶ mu̶jãã ju̶átinemowũ̶. Torea bairo yu̶ mu̶jãã ápu̶ preso jorica wii yu̶ caãno cũ̶ãrẽ,’ na ñigu̶ nipetirã yu̶ caruiro cariape nu̶gõã caãnarẽ. 37Bairo yu̶ caĩrõ tũ̶go, atore bairo ñi jẽniñagarãma na, carorije wapa cacũ̶goena yu̶ caĩñarã pu̶ame: ‘Jãã Quetiupau̶, ¿dipau̶ ũno mu̶ caqueyaro, mu̶rẽ jãã u̶garotiri? Tunu, ¿dipau̶ ũno mu̶ cañemejipiro, mu̶rẽ etirique jãã nunirĩ? 38Tunu, ¿dipau̶ ũno canucũñesẽãrĩ majõcu̶re bairo mu̶ cabainucũñesẽãrõ, “Jããtu̶ ãña,” mu̶rẽ jãã ĩrĩ? Tunu, ¿dipau̶ ũno mu̶ cajutii cũ̶goeto, mu̶rẽ jutii jãã nunirĩ? 39Tunu, ¿dipau̶ ũno majũ mu̶ cariaro, o preso jorica wii mu̶ caãno, mu̶tu̶ etari mu̶rẽ jãã ju̶átinemoñuparĩ?’ ñi jẽniñagarãma yu̶tu̶ cariape nu̶gõãrẽ caãna pu̶ame. 40Bairo na caĩjẽniñarõ tũ̶go, atore bairo ñigu̶ yu̶, Quetiupau̶ Rey: ‘Cariape mu̶jããrẽ niña: Yu̶ yarã cabu̶goro macããna cũ̶ãrẽ caroaro na mu̶jãã caju̶átinemorõĩ, yu̶pu̶re ju̶átinemorã mu̶jãã ápu̶,’ ñigu̶ yu̶tu̶ cariape nu̶gõã caãnarẽ. 41“Ĩ yaparo, yu̶, Quetiupau̶ Rey, ñinemogu̶ tunu caãcõ nu̶gõã pu̶ame caãnarẽ: ‘Mu̶jãã, popiye mu̶jãã baio joroque mu̶jãã átigu̶mi Dios cũ̶ caĩquetibu̶ju̶ jũ̶goyeticũrĩcãrõrẽã bairo. Bairi ánája mu̶jãã caũ̶petietopu̶. Wãtĩ, cũ̶ yarã ángelea cañuena mena Dios narẽ cũ̶ cacũjũ̶goricaropu̶ ánája. 42Yu̶ pu̶ame yu̶ caqueyaro yu̶ mu̶jãã u̶garotiepu̶. Tunu bairoa yu̶ cañemejipiro, yu̶ mu̶jãã etirique nuniepũ̶. 43Tunu bairoa canucũñesẽãrĩ majõcu̶re bairo yu̶ cabainucũñesẽãrõ, “Jããtu̶ ãña,” yu̶ mu̶jãã ĩẽpũ̶. Tunu bairoa yu̶ cajutii cũ̶goeto, yu̶ mu̶jãã jutii nuniepũ̶. Tunu yu̶ cariaro, bairi preso jorica wiipu̶ yu̶ caãno cũ̶ãrẽ, yu̶tu̶ etari caroaro yu̶ mu̶jãã ju̶átinemoepu̶,’ ñigu̶ yu̶tu̶ caãcõ nu̶gõã caãnarẽ. 44Bairo yu̶ caĩrõ tũ̶go, atore bairo ñi jẽniñagarãma: ‘Jãã Quetiupau̶, ¿dipau̶ ũno mu̶ caqueyaro, o mu̶ cañemejipiro, o jãã ya macãpu̶ mu̶ caetaro, o mu̶ cariaro, o preso jorica wiipu̶ mu̶ caãno jãã ju̶átinemoesuparĩ? Bairo mu̶ cabairo jãã ĩñaepũ̶,’ ñigarãma. 45Bairo na caĩrõ, atore bairo na ñigu̶, yu̶, Quetiupau̶ Rey: ‘Cariape mu̶jããrẽ ñiña: Yu̶ yarã cabu̶goro macããna cũ̶ãrẽ na mu̶jãã caju̶átinemoetoi, yu̶pu̶re ju̶átinemoena mu̶jãã ápu̶,’ na ñigu̶ yu̶tu̶ caãcõ nu̶gõã caãnarẽ. 46Bairi na pu̶ame popiye bairique capetietopu̶ ágarãma yua. Carorije cacũ̶goenarẽ bairo yu̶ caĩñarã pu̶ame yu̶ mena u̶seanirĩ ãnicõã ninucũgarãma tocãnacã rũ̶mu̶a,” jãã ĩ quetibu̶ju̶wĩ Jesús.

will be added

X\