SAN MATEO 20

1Ĩ quetibu̶ju̶ yaparo, paabojari majãrẽ ĩcõñarĩ, atore bairo jãã ĩ quetibu̶ju̶nemowĩ tunu: “Dios cũ̶ carotimasĩrĩpau̶ pu̶ame jĩcãũ̶ u̶se wese upau̶, cabusuripau̶ caãno cũ̶ ya wesepu̶ capaabojaparãrẽ camacãũ̶átacu̶re bairo niña. 2Cũ̶ pu̶ame jĩcããrã caũ̶mu̶arẽ na bócari yua, u̶seanirĩ, ‘Jĩcã rũ̶mu̶ paarique wapare tocãrõ majũ mu̶jããrẽ yu̶ wapatigu̶, yu̶ yaye u̶sere mu̶jãã cajebojaata,’ na ĩñupũ̶. Bairo ‘Jau̶,’ na caĩrõ tũ̶go, cũ̶ ya wesepu̶ paarotijoyupu̶. 3Cabero muipu̶ cũ̶ caasitutuatípau̶ caãno macãpu̶ ásúpu̶ tunu. Topu̶ eta yua, ñe ũnie áperã plaza caãnarẽ na ĩñañupũ̶. 4Atore bairo na ĩñupũ̶ na cũ̶ãrẽ: ‘Mu̶jãã cũ̶ã yu̶ ya wesepu̶ paarájá. Bairo mu̶jãã caparãápata, cariape mu̶jããrẽ yu̶ wapatigu̶,’ na ĩñupũ̶. Bairi na cũ̶ã, cũ̶ carotirore bairo cũ̶ wesepu̶ paarã ásúparã. 5Cabero pasaribota caãno macãpu̶ ásúpu̶ tunu. Cabero tres de la tarde caãno ásúpu̶ tunu, aperã cũ̶rẽ capaabojaparãrẽ na macãũ̶ ácú̶. Bairo na bócaetari yua, ‘Cariape mu̶jãã cũ̶ãrẽ yu̶ wapatigu̶,’ na ĩñupũ̶. Bairo cũ̶ caĩrõ, na cũ̶ã, ‘Jau̶,’ ĩñuparã. Bairo na caĩrõ tũ̶go, na paarotiyupu̶ cũ̶ ya wesepu̶re. 6Cabero cinco de la tarde caãno macãpu̶ átu̶sayupu̶ tunu. Topu̶ eta, aperã caũ̶mu̶a ñe ũnie caáperãrẽ na ĩña, atore bairo na ĩñupũ̶: ‘¿Nopẽĩrã bairoa mu̶jãã ĩñacõãnucũ naioañati paari mee?’ na ĩñupũ̶. 7Bairo cũ̶ caĩrõ tũ̶go, atore bairo qũĩñuparã: ‘Ñamu̶ ũcũ̶, “Marĩ paáto,” jãã ĩẽtĩñami. Bairi jãã paaetiya,’ qũĩñuparã. Bairo na caĩrõ tũ̶go: ‘Mu̶jãã cũ̶ã paabojaasá yu̶ ya wesepu̶,’ na ĩñupũ̶ ti wese upau̶ pu̶ame. 8“Cabero canaiorĩpau̶ caetaro ti wese upau̶ cũ̶ ũ̶mu̶a quetiupau̶ mayordomorẽ cũ̶ árotiyupu̶ cũ̶ wesepu̶. Atore bairo qũĩñupũ̶: ‘Tocãrõã yu̶ paabojari majãrẽ na piijori na wapatiya. Yu̶ ya wese capaau̶ etatu̶saatacu̶pu̶i na wapatijũ̶goacú̶, capaau̶ etajũ̶goatacu̶pu̶ cũ̶ wapatituya,’ qũĩñupũ̶. 9Bairo cũ̶ caĩrõ, cinco de la tarde caãno capaabojarã etaátana majũ wapa jegarã, quetiupau̶ mayordomotu̶ etayuparã. Bairo caberopu̶ capaarã etaátana nimirãcũ̶ã, jĩcã rũ̶mu̶ paarique wapa jĩcãrõ tũ̶ni ñeñuparã. 10Cabero capaabojarã etajũ̶goatana pu̶ame etarã yua, ‘Na netõjãñurõ marĩrẽ wapatigu̶mi,’ ĩ tũ̶goñañuparã. Bairo na caĩtũ̶goñamiatacũ̶ãrẽ, jĩcãrõ tũ̶nia jĩcã rũ̶mu̶ paarique wapa cãrõ na joyupu̶ na cũ̶ãrẽ. 11Bairo jĩcãrõ tũ̶nia na cũ̶ cawapatiro ĩñarã yua, ‘¡Tame, ñuẽtĩña!’ ãmeo ĩ bu̶su̶paiyuparã na majũ ti wese upau̶ bairo cũ̶ caátirotirijere. 12Atore bairo qũĩñuparã: ‘Ãnoa caberopu̶ capaabojarã etaátana pu̶ame jĩcã horaaca jeto paarã etaama. Jãã pu̶ame roque, ati rũ̶mu̶rẽ jãã paanaiocoápu̶ caasiro watoare. Bairi, ¿nopẽĩ na netõjãñurõ jããrẽ mu̶ wapa joetiyati?’ qũĩñuparã. 13Bairo na caĩrõ tũ̶go, jĩcãũ̶ na mena macããcũ̶rẽ atore bairo qũĩñupũ̶ ti wese upau̶ pu̶ame: ‘Yu̶ yau̶, mu̶rẽ ricaati roro yu̶ áperiya. Mu̶rẽ yu̶ caĩrõrẽã bairo mu̶ yu̶ wapatiya, jĩcã rũ̶mu̶ wapa majũrẽ. 14Bairi mu̶ cawapatarijere jecoácú̶ja. Caberopu̶ capaabojarã etaátanarẽ jĩcãrõ tũ̶ni na yu̶ cawapatiata, ñujãñuña. 15Yu̶ majũã yu̶ yaye dinerore yu̶ caborore bairo yu̶ átimasĩña. Bairi dopẽĩrã, ¿Cabopacarãrẽ na yu̶ caĩñamairĩjẽrẽ roro mu̶jãã ĩñatutiyati?’ qũĩñupũ̶ ti wese upau̶ cajũ̶goye capaabojau̶ etaátacu̶re,” ĩcõñarĩ jãã ĩ quetibu̶ju̶wĩ Jesús. 16Ĩ yaparo, atore bairo jãã ĩnemowĩ tunu: “Torea bairo ãmerẽ camasã caãnimajũrã nimirãcũ̶ã, caberopu̶ cabu̶goro macããna nigarãma. Tunu bairoa ãmerẽ camasã cabu̶goro macããna nimirãcũ̶ã, caberopu̶ caãnimajũrã nigarãma,” jãã ĩwĩ. 17Bairo cabero Jesús Jerusalén caátíwãpu̶ ácú̶, jãã, cũ̶ cabuerã pu̶ga wãmo peti ru̶pore pu̶ga pẽnirõ cãnacãũ̶ majũ camasã watoa caãnarẽ, jãã piiwu̶ojori, atore bairo jãã ĩwĩ: 18--Jerusalẽpu̶ marĩ caátíere merẽ mu̶jãã masĩña. Topu̶ ti macã macããna pu̶ame yu̶, Camasã Jũ̶gocu̶re, yu̶ ñerĩ, yu̶ jogarãma sacerdote majã quetiuparãrẽ, bairi Moisés ãnacũ̶ cũ̶ caquetibu̶ju̶cũrĩqũẽrẽ cajũ̶gobueri majãrẽ. Bairo na caáto, sacerdote majã quetiuparãjãã pu̶ame yu̶ pajĩãroca rotigarãma. 19Bairo átirotiri yua, ape yepa macããnarẽ yu̶ nunirocacõãgarãma. Roro ñiepegarãma. Roro yu̶ bape epegarãma. Bairo átieperi, yucu̶pãĩpu̶ yu̶ papuatu rocagarãma. Bairo yu̶re na caátimiatacũ̶ãrẽ, itia rũ̶mu̶ bero caãno yu̶ pu̶ame yu̶ caticoagu̶ tunu —jãã ĩwĩ. 20Cabero Zebedeo nu̶mo cõ pũnaa mena Jesutu̶ etari, cõ ru̶popaturi mena etanumuñupõ, qũĩ jẽniñago. 21Bairo cõ caáto ĩña, “¿Ñerẽ mu̶ yu̶ caáto mu̶ boyati?” cõ ĩ jẽniñañupũ̶. Cõ pu̶ame bairo qũĩñupõ: --Ati yepare mu̶ carotimasĩrĩpau̶ caetaro, yu̶ pũnaa mu̶tu̶ na mu̶ caruirotiro yu̶ boya. Jĩcãũ̶ cariape nu̶gõã, apei caãcõ nu̶gõã na mu̶ caruirotiro yu̶ boya. “Jau̶,” miwã —qũĩñupõ Juan, Santiago paco pu̶ame Jesure. 22Bairo cõ caĩrõ tũ̶go, atore bairo na ĩñupũ̶ Jesús cõ pũnaarẽ: --Mu̶jãã cabaipeere masĩẽtĩmirãcũ̶ã, yu̶re mu̶jãã jẽniña. Bu̶tioro popiye bairicarore mu̶jãã jẽnimiña. Yu̶ pu̶ame popiye yu̶ baigu̶. Yu̶re bairo mu̶jãã cũ̶ã popiye mu̶jãã cabaiata, ¿mu̶jãã nu̶cãmasĩrãti? —na ĩñupũ̶ Jesús Juarẽ, bairi Santiago cũ̶ãrẽ. Bairo cũ̶ caĩrõ tũ̶go: --Mu̶rẽ bairo jãã nu̶cãmasĩña —qũĩñuparã. 23Bairi Jesús pu̶ame atore bairo na ĩñupũ̶: --Mu̶jãã caĩrõrẽ bairo popiye mu̶jãã baigarã. Baipu̶a, yu̶ majũ yu̶re caju̶rotiparã, yu̶tu̶ cariape nu̶gõã, bairi caãcõ nu̶gõã caruiparãrẽ na yu̶ besemasĩẽtĩña. Yu̶ Pacu̶ pu̶ame roque bairo caãniparãrẽ na besemasĩñami —na ĩñupũ̶ Jesús, Juarẽ bairi Santiago cũ̶ãrẽ. 24Cabero jãã, Jesús cũ̶ cabuerã pu̶ga wãmo cãnacãũ̶ majũ caãna Santiago, Juan mena Jesure na caĩjẽniñaatajere catũ̶goatana ãnirĩ na mena jãã asiacoapu̶. 25Jesús pu̶ame tiere ĩña, nipetirã jããrẽ cũ̶tu̶ piijori atore bairo jãã ĩwĩ: --Merẽ mu̶jãã masĩña ati u̶mu̶recóo macããna na caátiãnierẽ. Ati yepa macããna Diore caĩroaena quetiuparã reyre bairo caãna tutuaro mena rotiepeyama na roca macããnarẽ. Popiye na baio joroque na rotiepeyama. 26Mu̶jãã pu̶ame roquere tore bairo baietirotiya. Bairo pu̶ame bairotiya mu̶jããrẽ: Mu̶jãã mena macããcũ̶, caãnimajũũ̶rẽ bairo caãnigau̶, mu̶jãã roca netõjãñurõ carotimasĩrẽ bairo ãnirotiya. 27Tunu bairoa mu̶jãã mena macããcũ̶, caroti majũũ̶rẽ bairo caãnigau̶, mu̶jãã ũ̶mu̶rẽ bairo cũ̶ caãno, ñuña. 28Bairi yu̶, Camasã Jũ̶gocu̶ quetiupau̶ majũrẽ bairo yu̶re capaabojaparãrẽ na macãũ̶ acú̶ mee yu̶ apú̶ ati yepare. Camasãrẽ na ju̶átinemou̶ acú̶ yu̶ apú̶ ati yepapu̶re. Tunu bairoa yu̶ cariarije jũ̶gori camasã capããrãrẽ na carorije wapare netõũ̶ acú̶ yu̶ apú̶ —jãã ĩwĩ. 29Cabero jãã, Jesús mena Jericó na caĩrĩ macãpu̶ caãniatana jãã cawitiro, capããrã camasã Jesús berore u̶sawã. 30Bairo jãã caátó, cacaapee ĩñaena pu̶garã, maa tu̶pu̶ ruiyupa. Bairi cacaapee ĩñaena pu̶ame, Jesús cũ̶ canetõátóre tũ̶gorã, bu̶su̶rique tutuaro mena atore bairo qũĩ awajajowã Jesure: --¡Jãã Quetiupau̶, David ãnacũ̶ pãrãmi, bopacooro jãã ĩñaña! —qũĩwã. 31Bairo na caĩrõ, camasã pu̶ame na tutiwã, na awajaeticõãto, ĩrã. Bairo narẽ na caĩmiatacũ̶ãrẽ, jĩrĩã jãñurĩ awajanemowã tunu: —¡Jãã Quetiupau̶, David ãnacũ̶ pãrãmi, bopacooro jãã ĩñaña! 32Jesús pu̶ame bairo na caĩawajarijere tũ̶gori, tuanu̶cãwĩ. Tuanu̶cãrĩ yua, cũ̶tu̶ na piijowĩ. Atore bairo na ĩwĩ: —¿Ñerẽ mu̶jãã yu̶ caáto mu̶jãã boyati? 33Bairo cũ̶ caĩjẽniñarõ tũ̶go, bairo qũĩwã cacaapee ĩñaena Jesure: --Jãã Quetiupau̶, caĩñamasĩẽna ãnirĩ jãã ĩñamasĩgaya tunu —qũĩwã. 34Jesús pu̶ame bopacooro na ĩñarĩ, na caapeere pãñawĩ. Bairo cũ̶ caáto, jicoquei ĩñamasĩcõãma yua. Ĩñamasĩ, Jesús berore u̶sawã yua.

will be added

X\