SAN MATEO 2

1Bairo cabairo bero yua, Jesús buiayupi Belén cawãmecu̶ti macãpu̶, Judea yepapu̶. Rey Herodes cawãmecu̶cu̶ majũ quetiupau̶ cũ̶ caãni yu̶teare buiayupi. Bairo cũ̶ cabuiaro bero, cabu̶toa camasĩrã ñocõãrẽ caĩñacõñamasĩrĩ majã ti yepapu̶ etayuparã. Muipu̶ cũ̶ cawãmu̶atópu̶ caatíatana etayuparã. 2Bairo eta yua, atore bairo na ĩ jẽniñañuparã: --¿Noo cũ̶ ãniñati mu̶jãã, judío majã, quetiupau̶ rey caãnipau̶ cabuiatacu̶? Cũ̶ yau̶ ñocõrẽ jãã ĩñajoapu̶. Ñocõ pu̶ame muipu̶ cũ̶ cawãmu̶atópu̶ buiatuaetami. Bairi cũ̶ãcãrẽ qũĩroagarã jãã atíapu̶ —na ĩ quetibu̶ju̶yuparã cabu̶toa camasĩrã. 3Bairo na caĩquetibu̶ju̶ro tũ̶go, quetiupau̶ rey Herodes pu̶ame tũ̶go acu̶acoasupu̶. To Jerusalén macããna cũ̶ã nipetirã tũ̶go acu̶acoasuparã. 4Bairo Herodes pu̶ame tũ̶goacu̶ari yua, na piijoyupu̶ sacerdote majã quetiuparãrẽ, bairi Moisés ãnacũ̶ cũ̶ caroticũrĩqũẽrẽ cajũ̶gobueri majã cũ̶ãrẽ. Bairo na caneñaetaro ĩña yua, atore bairo na ĩ jẽniñañupũ̶: --¿Dope bairo na ĩ quetibu̶ju̶yupari marĩ ñicũ̶jãã, Mesías cawãmecu̶cu̶ cũ̶ cabuiapeere? ¿Cũ̶ pu̶ame noopu̶ cũ̶ buiagayupari? —na ĩ jẽniñañupũ̶ Herodes cũ̶ capiijoatanarẽ. 5Bairo cũ̶ caĩrõ tũ̶go yua, na pu̶ame qũĩñuparã: --Belén na caĩrĩ macãpu̶ Judea yepapu̶ buiagayupu̶ Mesías. Dios yaye quetire woaturica tutipu̶ atore bairo ĩ woatuyupi profeta Dios cũ̶rẽ cũ̶ caĩquetibu̶ju̶rijere: 6‘Mu̶jãã, Judea yepa, Belén na caĩrĩ macã macããna u̶seanirĩ ãña. Capairi macã macããna mee nimirãcũ̶ã, caãni macã majũ macããna mu̶jãã ãniña. Mu̶jãã mena macããcũ̶ jĩcãũ̶ quetibu̶ju̶ masĩgu̶mi. Yu̶ yarã, Israel yepa macããnarẽ na quetibu̶ju̶ masĩgu̶mi,’ ĩ woatuyupi profeta Dios cũ̶rẽ cũ̶ caĩquetibu̶ju̶rijere —qũĩ quetibu̶ju̶yuparã Herodere cũ̶ capiijoatana pu̶ame. 7Cabero yua, Herodes pu̶ame yasioro na piijoyupu̶ cabu̶toa camasĩrã muipu̶ cũ̶ cawãmu̶atópu̶ caatíatanarẽ. Bairo yasioro na piijori yua, cũ̶ ñocõ cabuiatíatacu̶ na caĩñajũ̶goatajere na jẽniñañupũ̶. 8Bairo tiere cũ̶rẽ na caquetibu̶ju̶yaparoro, Herodes pu̶ame Belẽpu̶ na joyupu̶. Atore bairo na ĩ joyupu̶: --Topu̶ ánája. Cũ̶, cawĩmau̶acarẽ mu̶jãã macãwã. Bairo cũ̶ mu̶jãã cabocaata, yu̶ mu̶jãã quetibu̶ju̶jowa. Yu̶ cũ̶ã, cũ̶ ñiroau̶ águ̶ —na ĩtomiñupũ̶ Herodes cabu̶toa camasĩrĩ majãrẽ. 9Bairo cũ̶ caĩrõ tũ̶go, “Jau̶” qũĩñuparã. Bairi Belẽpu̶ acoásúparã cabu̶toa camasĩrã pu̶ame. Bairo na caátó, ñocõ na caĩñajoatacu̶ pu̶ame tunu buiatuayupu̶. Na riape baujũ̶goyecu̶supu̶. Cawĩmau̶aca cũ̶ caãni wii buipu̶ bauetayupu̶. 10Bairo ñocõ cũ̶ cabairo ĩña, cabu̶toa camasĩrã bu̶tioro u̶seaniñuparã yua. 11Bairo ti wii Jesús cũ̶ caãni wiipu̶re etarã yua, jããñuparã. Bairo jããetarã, Jesure cũ̶ paco María mena qũĩñañuparã. Bairo Jesure qũĩña yua, ru̶popaturi mena etanumurĩ qũĩroayuparã. Bairo áti yaparo, na rocapataarire pããñuparã. Na yaye apeyere cũ̶ nuniñuparã. Bairi orore, werea ũnierẽ, bairi caroaro cajutiñurĩjẽ ũnie cũ̶ãrẽ cũ̶ nuniñuparã. 12Cabero qũẽguerica tutipu̶ na quetibu̶ju̶yupu̶ Dios Herodes roro cũ̶ caátigarijere. Bairi cabu̶toa camasĩrã pu̶ame apewãpu̶ tunucoásúparã, na ya macã tunu áná yua. 13Bairo cabu̶toa camasĩrã na catunuátó bero, marĩ Quetiupau̶ cũ̶ cajou̶ ángel buiaetayupu̶ tunu. José cũ̶ cacãnirõ qũẽguerica tutipu̶ cũ̶tu̶ buiaetayupu̶. Atore bairo qũĩñupũ̶ ángel Josére: --José, wãcãña. Herodes, cawĩmau̶acarẽ cũ̶ pajĩãrocacõãgu̶, mu̶jããrẽ macãũ̶ átiyami. Bairi cawĩmau̶, cũ̶ paco mena cũ̶ jũ̶gorutiácú̶ja Egipto yepapu̶. Topu̶ mu̶jãã ãnicõãwã. Cabero mu̶jãã yu̶ quetibu̶ju̶gu̶ tunu —qũĩñupũ̶ ángel Josére. 14Bairo ángel cũ̶ caĩrõ tũ̶go, cũ̶ caĩrõrẽ bairo baiyupu̶ José. Ti ñamia Jesuaca, bairi cũ̶ paco mena cũ̶ neásúpu̶ Egipto yepapu̶. 15Topu̶re eta, yoaro ãnicõãñuparã. Herodes cũ̶ cariatato beropu̶ tunucoásúparã na ya yepapu̶ tunu. Profetare marĩ Quetiupau̶ cũ̶ caĩjũ̶goyetiricarore bairo baietaro baiyuparo. Atore bairo mai ĩ quetibu̶ju̶yupi Dios profetare tirũ̶mu̶pu̶: “Yu̶ macũ̶ Egiptopu̶ caãniatacu̶re cũ̶ yu̶ piitunuojogu̶,” ĩ quetibu̶ju̶yayupi Dios profetare. 16Mai, Herodes pu̶ame cabu̶toa camasĩrã cũ̶ cabairotirore bairo na cabaieto tũ̶gou̶ yua, bu̶tioro asiajãñuñupũ̶. Bairi cũ̶ ũ̶mu̶arẽ na joyupu̶ Belén macãpu̶, nipetiro cawĩmarã caũ̶mu̶a pu̶ga cũ̶ma cacũ̶gorã, na bairã cũ̶ãrẽ na capajĩãrepeyoparore bairo ĩ. Belén macãtu̶ macããna cũ̶ãrẽ tore bairo na pajĩãrepeyocõãrotiyupu̶. Cabu̶toa camasĩrã na caquetibu̶ju̶riquei jũ̶gori, “Pu̶ga cũ̶ma cacũ̶gou̶ ãcũ̶mi cũ̶ãcã,” ĩ tũ̶goñarĩ bairo na átirotiyupu̶. 17Profeta Jeremías cawãmecu̶cu̶ cũ̶ caĩwoatuyaricarore bairo baiyuparo: 18“Ramá cawãmecu̶ti yepapu̶re otiawajarique ocajogaro bu̶tioro majũ. Raquel nigomo roro yapapuarique mena caotio, cõ pũnaa na cariapetiro ĩñarĩ yua. Bairi, ‘Roro otiecoa. Roro mu̶ cabairije netõcoagaro,’ cõ na caĩrĩjẽrẽ tũ̶gogaetigomo. Oticõã ninucũgomo,” ĩ quetibu̶ju̶ woatuyayupi Jeremías ãnacũ̶ cabaipeere. 19Cabero Herodes pu̶ame riacoásúpu̶. Bairo cũ̶ cariaro ĩña, ángel pu̶ame Josére cũ̶ buiaetayupu̶ tunu. Egipto yepapu̶ José qũẽguerica tutipu̶ cũ̶ caãno, cũ̶ buiaetayupu̶. Bairo buiaeta yua, atore bairo qũĩñupũ̶ Josére: 20--Wãcãña José. Cawĩmau̶acarẽ capajĩãgamirĩcãrã merẽ riapeticoama. Bairi cũ̶, cawĩmau̶, cũ̶ paco mena cũ̶ neácú̶ja tunu mu̶jãã ya yepa, Israel yepapu̶ —qũĩñupũ̶ ángel Josére. 21Bairi ángel cũ̶ caĩrõrẽ bairo ásupu̶ José. Jesús, bairi cũ̶ paco mena cũ̶ neásúpu̶ Israel yepapu̶a tunu. 22Mai, topu̶ ãcũ̶, quetire tũ̶goyupu̶ José. “Herodes ãnacũ̶ macũ̶, Arquelao cawãmecu̶cu̶ Judea yepa macããna quetiupau̶ merẽ jããũpũ̶,” ĩrĩqũẽ quetire tũ̶goyupu̶. Bairo tũ̶go yua, uwi, ti yepare tunuágaetimiñupũ̶. Bairo qũẽguerica tutipu̶ Dios cũ̶ caquetibu̶ju̶atacu̶ ãnirĩ, Galilea yepapu̶ roque na jũ̶goásúpu̶ José. 23Bairo Galilea yepapu̶re etau̶, na jũ̶goãnicõãñupũ̶ Nazaret cawãmecu̶ti macãpu̶. Profeta majã Jesure na caĩwoatujũ̶goyetiricarore bairo baietaro baiyuparo: “Jesús, Nazaret macããcũ̶ na caĩ nigu̶mi,” ĩ woatuyupa mai profeta majã.

will be added

X\