SAN MATEO 18

1Tipau̶ caãno jãã, Jesús cũ̶ cabuerã cũ̶tu̶ etarã, atore bairo jãã ĩ jẽniñawũ̶: --¿Ni majũ cũ̶ ãnicu̶ti jĩcãũ̶ Dios cũ̶ carotimasĩrĩpau̶ macããcũ̶, caãnimajũũ̶rẽ bairo caãcũ̶? —jãã ĩ jẽniñawũ̶ Jesure. 2Jesús pu̶ame bairo jãã caĩjẽniñarõ tũ̶go, jĩcãũ̶ cawĩmau̶rẽ cũ̶ piijowĩ. Cũ̶ piijo yua, jãã watoapu̶ cawĩmau̶rẽ cũ̶ nu̶cõwĩ. 3Bairo átiri, atore bairo jãã ĩwĩ: —Cariape mu̶jããrẽ ñiña: Mu̶jãã, yu̶ cabuerã, ãni cawĩmau̶rẽ bairo tũ̶goñarĩqũẽ cu̶tiri mu̶jãã yerire mu̶jãã cawasoaeticõãta, Dios cũ̶ carotimasĩrĩpau̶re mu̶jãã jããetigarã. 4Ãni, cawĩmau̶ pu̶ame cũ̶ pacu̶ mena tũ̶goñatutuamajũcõãñami. Cũ̶rẽ bairo Dios mena mu̶jãã cabairo yu̶ boya. Bairi ni jĩcãũ̶ ũcũ̶ Dios mena cũ̶ catũ̶goñatutuanemoata, Dios pu̶ame cũ̶ carotimasĩrĩpau̶re caãnimajũũ̶ cũ̶ ãnio joroque cũ̶ átigu̶mi. 5Tunu bairoa ni jĩcãũ̶ ũcũ̶, yu̶ yaye quetire tũ̶gou̶sari, ãni cawĩmau̶rẽ bairo caãcũ̶rẽ cũ̶ camaiata, yu̶re camairẽ bairo cũ̶ ñiñagu̶. 6“Ni jĩcãũ̶ ũcũ̶ apei yu̶ mena catũ̶goñatutuajũ̶gou̶re, cũ̶ tũ̶gomawijiao joroque cũ̶ caápata, roro majũ baigu̶mi Dios cũ̶ caĩñabesepa rũ̶mu̶ caetaro. Jĩcãũ̶, ũ̶tãã capairica mena cũ̶ wãmu̶arẽ jiyaturi, ria capairiyapu̶ na carurocaricu̶re bairo netõjãñurõ popiye baigu̶mi cũ̶ ũcũ̶ ti rũ̶mu̶rẽ. 7¡Ati yepapu̶ mu̶jãã catũ̶goñarĩjẽ mu̶jããrẽ caroyeturije capee niña! Bairoa nicõãgaro tocãnacã rũ̶mu̶ ati yepapu̶ mu̶jãã caãno. ¡Bairo cabairo jũ̶gori bopacooro netõrõ na baio joroque na átigu̶mi Dios ati yepapu̶re camasãrẽ roro cajũ̶goátiri majã roquere! 8“Bairi mu̶jããrẽ ñinemoña tunu: Ni mu̶jãã mena macããcũ̶ cũ̶ wãmorĩ mena jũ̶gori carorije jetore átinucũũ̶mi. O cũ̶ ru̶pori mena jũ̶gori caroropu̶ ánucũũ̶mi. Bairo cũ̶ wãmorĩ mena jũ̶gori roro caátipai, o cũ̶ ru̶po mena jũ̶gori carorije caána na caãnopu̶ caápai cũ̶ caãmata, apei cũ̶ wãmorĩrẽ, o cũ̶ ru̶porire capajurere ecoricu̶re bairo cũ̶ caãno, ñuña. Cũ̶ rupau̶ macããjẽ cũ̶goetimicũ̶ã, rupa tutua Diotu̶ cũ̶ caátó, ñujãñuña. Peeropu̶ roro cũ̶ caábujiorijere cũ̶ netõõgu̶mi Dios, tore bairo roro cũ̶ cabairijere cũ̶ caátijãnata yua. Cũ̶ wãmorĩ, o cũ̶ ru̶pori roro cũ̶ átio joroque caátie mena cũ̶gori roro peeropu̶ cũ̶ capopiye tãmu̶oata roque, ñuetibujioro, yu̶ra. 9Tunu bairoa ni jĩcãũ̶ ũcũ̶ mu̶jãã mena macããcũ̶ cũ̶ caapee mena jũ̶gori carorije macããjẽ jetore ĩñanucũũ̶mi. Bairo cũ̶ caapee mena jũ̶gori carorije macããjẽrẽ caĩñapai cũ̶ caãmata, apei cũ̶ caapeere cawerocaecoricu̶re bairo cũ̶ caãno, ñuña. Bairo jĩcã ũno caapea cũ̶goetimicũ̶ã, Diotu̶ cũ̶ caátó ñujãñuña. Peeropu̶ roro cũ̶ caábujiorijere cũ̶ netõõgu̶mi Dios, tore bairo carorije macããjẽrẽ cũ̶ caĩñajãnaata yua. Cũ̶ caapee roro cũ̶ átio joroque caátie mena cũ̶gori roro peeropu̶ cũ̶ capopiye tãmu̶oata roque, ñuetibujioro, yu̶ra. Bairi roro mu̶jãã caátinucũrĩjẽrẽ jãnacõãña. 10“Tunu bairoa mu̶jããrẽ ñiña: Cawĩmarãrẽ, cabu̶goro macããnarẽ bairo na ĩñaeticõãña. Na cũ̶ãrẽ na mu̶jãã canu̶cũ̶bu̶goro boya. Cariape mu̶jããrẽ ñiña: Narẽ caĩñarĩcãnu̶gõrĩ majã ángelea pu̶ame na cabairijere yu̶ pacu̶ Dios u̶mu̶recóo macããcũ̶rẽ cũ̶ quetibu̶ju̶nucũñama. 11Torecu̶, yu̶, Camasã Jũ̶gocu̶, yu̶ apú̶, camasã cayasibujiorãrẽ na netõũ̶ acú̶. 12“Tũ̶gopeoya mai. Jĩcãũ̶, cien ovejare cacotei jĩcãũ̶ na mena macããcũ̶ oveja cũ̶ camawijiayasicoápata, ¿jicoquei cũ̶ macãũ̶ ápéribujiou̶cu̶ti? Jicoquei cũ̶ macãũ̶ ácoabujiou̶mi. Noventa y nueve caãnarẽ ẽñotaricaropu̶ cũcõã, apei cayasiatacu̶re cũ̶ macãũ̶ ábujiou̶mi. 13Bairi oveja cayasiatacu̶re cũ̶ cabocaata, caroaro u̶seanibujiou̶mi. Aperã camawijiaetiatanarẽ na cũ̶ cau̶seanirõ netõrõ cũ̶ u̶seanibujiou̶mi, cayasiatacu̶re cũ̶ cabocaata. 14Torea bairo ãnoa cawĩmarã mena macããcũ̶ jĩcãũ̶ ũcũ̶ cũ̶ cayasiro boetiyami yu̶ Pacu̶ u̶mu̶recóo caãcũ̶ pu̶ame,” jãã ĩ quetibu̶ju̶wĩ Jesús. 15Ĩ quetibu̶ju̶ yaparo, atore bairo jãã ĩ nemowĩ tunu: “Ni jĩcãũ̶ ũcũ̶ mu̶jãã yau̶, roro mu̶jããrẽ cũ̶ caápata, cũ̶tu̶ átíri cũ̶ quetibu̶ju̶ya, aperã na catũ̶goetopu̶. Bairi cũ̶ pu̶ame mu̶jãã caĩrĩjẽrẽ cũ̶ catũ̶gou̶saata, jĩcã yerire bairo cacũ̶gorã mu̶jãã tuagarã yua. 16Bairo mu̶jãã caĩrĩjẽrẽ cũ̶ catũ̶gogaeticõãta roque, apei mu̶jãã yau̶, jĩcãũ̶, o pu̶garãrẽ na piiya. Bairo na caetaro ĩña, na mena átíri, roro mu̶jããrẽ caátiatacu̶re mu̶jãã quetibu̶ju̶ nemogarã tunu, cũ̶ mu̶jãã caĩrĩjẽrẽ aperã pu̶garã, o itiarã na catũ̶goparore bairo ĩrã. 17Bairo mu̶jãã caquetibu̶ju̶qũẽnogamiatacũ̶ãrẽ, cũ̶ pu̶ame jĩcã nu̶gõã cũ̶ catũ̶gogaeticõãta, ñubueri majãrẽ na quetibu̶ju̶ya. Torea bairo tunu na caquetibu̶ju̶rijere cũ̶ catũ̶gogaeticõãta, Diore camasĩẽcũ̶rẽ bairo qũĩñacõãña yua. O romano majãrẽ camasã yaye dinerore cajejobojari majãrẽ bairo qũĩñacõãña. 18“Cariape mu̶jããrẽ ñiña: Dios cũ̶ carotimasĩrĩpau̶ macããnarẽ caátijũ̶gorã mu̶jããrẽ yu̶ cũña. Bairo caãna ãnirĩ ati yepa ãna, ‘Dios u̶mu̶recóo macããcũ̶ marĩrẽ cũ̶ caátirotirije niña,’ o ‘Dios cũ̶ caátirotietie niña,’ mu̶jãã ĩ masĩgarã Dios yarãrẽ. 19“Apeyera tunu mu̶jããrẽ ñinemoña: Noa ũna mu̶jãã mena macããna pu̶garãpu̶a jĩcã yericu̶narẽ bairo dise ũnie mu̶jãã caborijere Diore mu̶jãã cajẽniata, mu̶jãã caĩrõrẽã bairo mu̶jãã átibojagu̶mi yu̶ Pacu̶ Dios, u̶mu̶recóo macããcũ̶. 20Yu̶ yarã yu̶ yaye bu̶su̶riquere na cañubueneñarõpu̶ caãno cãrõ na mena yu̶ ãnigu̶. Pu̶garã, o itiarã jeto na caãmata cũ̶ãrẽ, na mena yu̶ ãnigu̶,” jãã ĩ quetibu̶ju̶wĩ Jesús. 21Bairo jããrẽ cũ̶ caĩquetibu̶ju̶yaparoro, Pedro pu̶ame Jesutu̶ atí, atore bairo qũĩ jẽniñawĩ: --Jãã Quetiupau̶, yu̶ yau̶ roro yu̶ cũ̶ caápata, ¿nocãnacãni majũ cũ̶ mena yu̶ bu̶su̶qũẽnocu̶ti? ¿Jĩcã wãmo peti pu̶ga pẽnirõ cãnacãni majũ bairo yu̶ áticu̶ti? —qũĩ jẽniñawĩ Pedro Jesure. 22Bairo cũ̶ caĩjẽniñarõ tũ̶go, atore bairo qũĩwĩ Jesús Pedrore: --Baipu̶a, tore bairo mee mu̶jãã yu̶ átirotiya. Siete por setenta cãnacãni majũ cũ̶ mu̶jãã bu̶su̶qũẽnogarã, ñiña —qũĩwĩ. 23Ĩ quetibu̶ju̶ yaparo, ape wãmerẽ ĩcõñarĩ bairo jãã ĩ quetibu̶ju̶wĩ tunu: “Dios cũ̶ carotimasĩrĩpau̶ atore bairo niña: Jĩcãũ̶ quetiupau̶ rey cũ̶ ũ̶mu̶a cũ̶rẽ cawapamorã dinerore na catunuorõ boyupu̶. 24Bairo bou̶, cũ̶tu̶ na piijoneñojũ̶goyupu̶, na mena qũẽnogu̶. Bairi jĩcãũ̶ cũ̶ capiijojũ̶gou̶ pairo capee millones majũ cũ̶ wapamoñupũ̶. 25Cũ̶ pu̶ame dope bairo cũ̶ átiwapatimasĩẽsupũ̶ tie cũ̶ cawapamorĩjẽrẽ cũ̶ quetiupau̶re. Bairo, ‘Yu̶ cũ̶goetiya,’ cũ̶ caĩrõ tũ̶go, quetiupau̶ rey pu̶ame cũ̶ cawapamou̶rẽ, cũ̶ nu̶morẽ, cũ̶ pũnaarẽ, bairi cũ̶ yaye nipetirije cũ̶ cacũ̶gorije ũnie cũ̶ãrẽ aperãrẽ na nunirerotiyupu̶, cũ̶ cawapamorĩjẽrẽ na cajeparore bairo ĩ. 26Cawapamou̶ pu̶ame bairo rey cũ̶ carotiro tũ̶gori, ru̶popaturi mena cũ̶tu̶ etanumurĩ atore bairo bu̶tioro qũĩñupũ̶: ‘Yu̶ Quetiupau̶, jicoquei roro yu̶ mu̶ ápewa. Dinero mu̶ yu̶ cawapamorĩjẽrẽ tocãnacã tiirire cabero mu̶ yu̶ tunuogu̶ baipu̶a,’ qũĩñupũ̶. 27Bairo cũ̶ caĩrõ tũ̶go, bopacooro qũĩñañupũ̶ quetiupau̶ rey cũ̶ ũ̶mu̶rẽ. Bairi, ‘Ñugaro. Caroaro mu̶ tuagu̶. Yu̶ mu̶ cawapamorĩjẽrẽ mu̶ yu̶ masiriyogu̶’ qũĩñupũ̶. Bairo ĩrĩ, caroaro tuao joroque cũ̶ áti, cũ̶ árotiyupu̶. 28“Bairo caroaro cũ̶ caátimiatacũ̶ãrẽ, cawapamomiatacu̶ pu̶ame cabero apei cũ̶ yau̶ petoaca cũ̶rẽ cawapamou̶rẽ bocáetari cũ̶ tutiyupu̶. Bairo cũ̶ tuti yua, roro cũ̶ wãmu̶tutupu̶re ñerĩ atore bairo qũĩñupũ̶: ‘¡Yu̶ mu̶ cawapamorĩjẽrẽ jicoquei yu̶ mu̶ tunuogu̶!’ qũĩñupũ̶. 29Bairo cũ̶ caĩrõ tũ̶go, atore bairo qũĩñupũ̶ cũ̶ bapa cũ̶ cawapamou̶rẽ: ‘Yu̶ yau̶, jicoquei roro yu̶ mu̶ ápewa. Dinero mu̶ yu̶ cawapamorĩjẽ tocãnacã tiirire cabero mu̶ yu̶ tunuogu̶ baipu̶a,’ qũĩñupũ̶. 30Bairo cũ̶ caĩrõ, cũ̶ yu̶esupu̶. Preso jorica wiipu̶ cũ̶ cũrocarotiyupu̶, yu̶ cũ̶ cawapamorĩjẽrẽ cũ̶ jopeyoáto, ĩ. 31Bairo cũ̶ caáto ĩña, aperã cũ̶ mena macããna paabojari majã tũ̶goñarĩqũẽ paiyuparã. Bairo cabairã ãnirĩ na quetiupau̶re cũ̶ quetibu̶ju̶rásúparã. 32Bairo na caĩquetibu̶ju̶ro tũ̶go, quetiupau̶ rey pu̶ame cũ̶ piijorotiyupu̶ tunu cũ̶rẽ cawapamomiatacu̶re. Bairo cũ̶ caetaro ĩña, atore bairo qũĩñupũ̶: ‘Mu̶, yu̶ paabojari majõcu̶, ¡roro majũ mu̶ tũ̶goñaña! Bopacooro yu̶ mu̶ cajẽnirõĩ, pairo yu̶ mu̶ cawapamomiatajere yu̶ masiriyobojaapu̶. 33Bairo yu̶ caátimiatacũ̶ãrẽ, ¿nopẽĩ bopacooro mu̶rẽ yu̶ caĩñaatatorea bairo, apei, mu̶ bapare bopacooro cũ̶ miñaetiati? Roro majũ mu̶ tũ̶goñaña,’ qũĩñupũ̶. 34Bairo qũĩrĩ, netõjãñurõ cũ̶ mena asiari, preso jorica wiipu̶ cũ̶ árotiyupu̶. Topu̶ nicõãñupũ̶ dinero cũ̶ cawapamorĩjẽ cũ̶ catunuopeyoparo jũ̶goye,” ĩcõñarĩ jãã ĩ quetibu̶ju̶wĩ Jesús. 35Bairo ĩ quetibu̶ju̶ yaparo, atore bairo jãã ĩnemowĩ tunu: --Yu̶ Pacu̶ u̶mu̶recóo macããcũ̶ pu̶ame torea bairo átigu̶mi mu̶jãã tocãnacãũ̶rẽ, mu̶jãã yeripu̶ mu̶jãã yarã roro mu̶jããrẽ na caátiere na mu̶jãã camasiriyoepata —jãã ĩwĩ.

will be added

X\