SAN MATEO 16

1Bairi Magadán yepapu̶ cũ̶ caãno, Jesús cũ̶ caátiere ĩñarĩ bu̶su̶jãgamirã, cũ̶tu̶ etawã fariseo, bairi saduceo majã mena. Bairo etarã, dise ũnie átijẽñorĩqũẽ u̶mu̶recóo macããjẽrẽ Jesure cũ̶ áti ĩñorotimiwã. “¿Cariape Dios cũ̶ carotijoricu̶ majũ cũ̶ ãnicu̶ti?” ĩrã, bairo cũ̶ átirotimiwã. 2Jesús pu̶ame na yeripu̶ roro na catũ̶goñarĩjẽrẽ masĩcõãwĩ. Bairi atore bairo na ĩwĩ: “U̶mu̶recóo cajũãrocajããto ĩñarã, ‘Ñamirõcã caroa rũ̶mu̶ ãnigaro,’ mu̶jãã ĩ masĩña. 3Tunu bairoa cabusuripau̶ caãno, oco buseri cañirõ ĩñarã, ‘Oco rũ̶mu̶ ãnigaro,’ mu̶jãã ĩ masĩña. Bairo caoco ocapeere, bairi caasipee cũ̶ãrẽ bairo caĩñamasĩrã nimirãcũ̶ã, ¿nopẽĩrã Dios ati yu̶teare cũ̶ caátiãnie pu̶amerẽ mu̶jãã masĩẽtĩñati? 4Ati yepa macããna, ãme caãna, caroaro Dios mena ãnimasĩẽtĩñama. Jĩcã rũ̶mu̶ cũ̶ boo, ape rũ̶mu̶ cũ̶ boetiyama. Átijẽño ĩñorĩqũẽ jetore boyama. Bairo na cabomiatacũ̶ãrẽ, tiere na áti ĩñoetigu̶mi Dios. Merẽ na quetibu̶ju̶ cũñupĩ Jonás ãnacũ̶ cũ̶ cabairiquere,” na ĩ quetibu̶ju̶wĩ Jesús. Ĩ quetibu̶ju̶ yaparo, acoámí. 5Cabero Jesús, jãã, cũ̶ cabuerã u̶tabu̶cu̶ra ape nu̶gõãpu̶ jãã ápú̶ tunu. Mai, jãã cau̶gapee, pan rupaare masiriticõãrĩ jãã jeápéwu̶. 6Bairo jãã cabairo, Jesús pu̶ame bairo jãã ĩwĩ: --Tũ̶goya mu̶jãã. Fariseo, saduceo majã yaye levadura, pan pairica na cawauorijere boeticõãña —jãã ĩwĩ. 7Bairo cũ̶ caĩrõ tũ̶go, jãã, cũ̶ cabuerã, atore bairo jãã ãmeo ĩwũ̶ jãã majũ: --¡Pan rupaa marĩ cajeatíbujioatajere marĩ masiriticũũpã! Bairi bairo marĩ ĩĩmi —jãã ãmeo ĩwũ̶. 8Jesús pu̶ame masĩcõãwĩ jãã caãmeoĩrĩjẽrẽ. Bairi atore bairo jãã ĩnemowĩ tunu: --¿Nopẽĩrã, “ ‘Pan rupaa na cajeatíbujioatajere na masiritiupari,’ ĩgu̶ ĩcũ̶mi Jesús,” mu̶jãã ãmeo ĩñati? Bairo mee ĩgu̶ ñiña. ¡Yu̶ mena mu̶jãã tũ̶goña tutuaetimajũcõãña! 9¿Mu̶jãã tũ̶goña masĩẽtĩñati mai? ¿Yoaro mee mu̶jãã masiriticoayati yu̶ caátijẽñorĩqũẽrẽ? Pan rupaa, jĩcã wãmo cãnacã rupaa jetore cũ̶gomicũ̶ã, caũ̶mu̶a jĩcã wãmo cãnacã mil majũ na u̶ga yapicoao joroque na yu̶ ápu̶. Tiere mu̶jãã ĩñawũ̶. Bairo caĩñarĩcãrã ãnirĩ cabero piiripu̶ na cau̶garu̶gariquere, ¿nocãnacã piiri majũ mu̶jãã jejããjirori? ¿Tiere mu̶jãã masiriticoayati? 10Tunu bairoa ape rũ̶mu̶ pan rupaa, jĩcã wãmo peti pu̶ga pẽnirõ cãnacã rupaa jetore cũ̶gomicũ̶ã, caũ̶mu̶a baparicãnacã mil majũ na u̶ga yapicoao joroque na yu̶ ápu̶. Tie cũ̶ãrẽ mu̶jãã ĩñawũ̶. Bairo caĩñarĩcãrã ãnirĩ cabero piiripu̶ na cau̶garu̶gariquere, ¿nocãnacã piiri majũ mu̶jãã jejããjirori? ¿Tiere mu̶jãã masiriticoayati? 11Mu̶jãã masiritiena. Bairi, ¿nopẽĩrã, “ ‘Pan rupaa na cajeatíbujioatajere na masiritiupari,’ ĩgu̶ ĩcũ̶mi Jesús,” caĩrãrẽ bairo mu̶jãã ãmeo ĩñati? —jãã ĩwĩ. 12Bairo cũ̶ caĩrõ tũ̶go, jãã tũ̶goñamasĩwũ̶ cũ̶ caĩgarijere: “ ‘Fariseo, saduceo majã mena levadura, pan pairica na cawauorijere mu̶jãã boepa,’ ĩrĩcãrõ ũnorẽã, ‘Ricaati na caquetibu̶ju̶rijere mu̶jãã boepa,’ marĩ ĩgu̶ ĩcũ̶mi Jesús,” jãã ĩ tũ̶goñamasĩwũ̶, jãã, Jesús cũ̶ cabuerã yua. 13Cabero Cesarea de Filipo na caĩrĩ yepapu̶ Jesús etari bero, atore bairo, jãã, cũ̶ cabuerãrẽ jãã ĩwĩ: --¿Noa ãcũ̶mi Camasã Jũ̶gocu̶re, yu̶ na ĩnucũñati? —jãã ĩ jẽniñawĩ. 14Bairo cũ̶ caĩrõ tũ̶go, atore bairo cũ̶ jãã ĩwũ̶: --Jĩcããrã ĩñama: “Juan el Bautista ãcũ̶mi.” Aperã ĩnucũñama: “Elías ãnacũ̶ tunu catiri ãcũ̶mi,” miñama. Aperã ĩnucũñama: “Jeremías, o apei profeta ãnacũ̶ tunu catiri ãcũ̶mi Jesús,” minucũñama —cũ̶ jãã ĩ quetibu̶ju̶wu̶ Jesure. 15Bairo cũ̶ jãã caquetibu̶ju̶ro bero, atore bairo jãã ĩ jẽniñanemowĩ tunu: --¿Mu̶jãã ate? ¿Noa ãcũ̶mi yu̶ mu̶jãã ĩnucũñati? —jãã ĩwĩ. 16Bairo cũ̶ caĩrõ tũ̶go, Simón Pedro pu̶ame bairo qũĩwĩ Jesure: --Mu̶a, Mesías, Dios macũ̶, tocãnacã rũ̶mu̶ caãnicõãninucũũ̶ macũ̶ majũ mu̶ ãniña —qũĩwĩ. 17Bairo cũ̶ caĩrõ tũ̶go, atore bairo qũĩwĩ Jesús Pedrore: --Cũ̶ã yu̶ ãniña. Camasã pu̶ame yu̶ caãnierẽ mu̶ masĩõẽtĩñama. Yu̶ Pacu̶, u̶mu̶recóo macããcũ̶ roque mu̶ masĩõñupĩ tiere. Bairi u̶seanirĩ ãña mu̶, Simón, Jonás macũ̶. 18Tunu atore bairo mu̶rẽ ñiña: Ãmea, “Pedro” mu̶ yu̶ wãmetiya. Mu̶ wãme cawãma wãme pu̶ame Pedro “ũ̶tã” ĩgaro ĩña. Bairi noa ũna mu̶rẽ bairo catũ̶goñatutuarã ũna, yu̶ ya poa macããna na ãnio joroque na yu̶ átigu̶. Bairo caãna ãnirĩ yasietigarãma. Yu̶ mena ãnicõãnucũgarãma tocãnacã rũ̶mu̶a. 19Tunu Dios cũ̶ carotiripau̶ macããnarẽ caátijũ̶gou̶ majũ mu̶ yu̶ cũgu̶. Bairo caãcũ̶ ãnirĩ ati yepa ãcũ̶, “Dios u̶mu̶recóo macããcũ̶ marĩrẽ cũ̶ caátirotirije niña,” o “Cũ̶ caátirotietie niña,” mi quetibu̶ju̶ besemasĩgu̶ Dios yarãrẽ —qũĩwĩ Jesús Pedrore. 20Cabero, jãã, nipetiro Jesús cũ̶ cabuerãrẽ atore bairo jãã ĩwĩ: “Mesías yu̶ ãniña. Bairãpu̶a, cũ̶, yu̶ caãnierẽ na quetibu̶ju̶eticõãña aperã camasãrẽ mai,” jãã ĩwĩ. 21Tipau̶ bero, jãã, cũ̶ cabuerãrẽ Jerusalẽpu̶ cũ̶ caápére jãã quetibu̶ju̶ jũ̶gonutuámí. Jãã quetiuparã cabu̶toa camasĩrã, bairi Dios cũ̶ caroticũrĩqũẽrẽ cajũ̶gobueri majã, bairi sacerdote majã quetiuparã cũ̶ã, popiye cũ̶ baio joroque na caátipeere jãã quetibu̶ju̶ jũ̶gonutuámí, cũ̶rẽ na capajĩãrotipee majũrẽ. “Bairo yu̶ na caátimiatacũ̶ãrẽ, itia rũ̶mu̶ bero yu̶ caticoagu̶ tunu,” jãã ĩwĩ. 22Bairo cũ̶ caĩrõ tũ̶go, Pedro pu̶ame jõjãñurõ Jesure cũ̶ neámí. Topu̶ eta, bairo qũĩ jũ̶goyupu̶ Jesure: --¡Yu̶ Quetiupau̶, mu̶ caĩrõrẽ bairo boecu̶mi Dios! ¡Mu̶ caĩrõrẽ bairo to baieticõãto! —qũĩñupũ̶. 23Bairo cũ̶ caĩrõ tũ̶go, Jesús pu̶ame Pedrore cũ̶ ãmejore ĩñarĩ, atore bairo qũĩñupũ̶: --¡Ácú̶ja wãtĩ Satanás! ¡Bairo mu̶ caĩrõ roro yu̶ cabaipeere cabu̶su̶jãnemou̶rẽ bairo miña! Dios cũ̶ catũ̶goñarõrẽ bairo mee, camasã na catũ̶goñarõrẽ bairo mu̶ tũ̶goñaña, bairo yu̶ mu̶ caĩata —qũĩñupũ̶ Jesús Pedrore. 24Cabero Jesús, jãã, cũ̶ buerãrẽ atore bairo jãã ĩwĩ: —Ni cabou̶, yu̶ cabuei caãnigau̶, cũ̶ majũ cũ̶ caátigamirĩjẽrẽ piticõãgu̶mi. Yu̶ carotirore bairo jeto roque átigu̶mi tocãnacã rũ̶mu̶a. Popiye baimicũ̶ã, yu̶ yaye quetire jãnaetigu̶mi yu̶ cabuei caãnigau̶ pu̶ame. 25Bairo tunu caũ̶mu̶ apei cũ̶ caãnie pu̶amerẽ mairĩ, yu̶ yaye quetire jãnacõãgu̶mi. Bairo cabai ãnirĩ yasicoagu̶mi yua. Apei, yu̶ yaye quetire cajãnaecu̶ roque netõcoagu̶mi. Cũ̶rẽ na capajĩãrocacõãmiatacũ̶ãrẽ, caticõã ãninucũgu̶mi tocãnacã rũ̶mu̶a. 26Tunu caũ̶mu̶ apei ati yepa macããjẽ nipetirije merẽ cũ̶goyami, cũ̶ caborije caãno cãrõ. Bairo cũ̶gomicũ̶ã, Diore cũ̶ tũ̶goñaẽtĩñami. Bairo catũ̶goñaecũ̶ ãnirĩ cũ̶ cariaatato bero, Dios mena ãmerĩgu̶mi. Bairi dope baieto pairo cũ̶ cacũ̶gorije pu̶ame. Wapa maa tie ati u̶mu̶recóo macããjẽ, Diore cũ̶ camasĩẽtĩcõãta. 27Yu̶, Camasã Jũ̶gocu̶, ati yepapu̶ yu̶ Pacu̶ cũ̶ camasĩrĩjẽ mena nemo yu̶ tunuetagu̶. Ángelea majã, yu̶ Pacu̶tu̶ macããna mena nemo yu̶ tunuetagu̶. Ti rũ̶mu̶ pu̶amerẽ ati yepa macããna tocãnacãũ̶pu̶rea na caátatorea bairo na cũ̶ãrẽ na yu̶ átigu̶. 28Cariape mu̶jããrẽ yu̶ quetibu̶ju̶ya: Mu̶jãã jĩcããrã, ato caãna, mu̶jãã cariaparo jũ̶goye yu̶, Camasã Jũ̶gocu̶, quetiupau̶ reyre bairo yu̶ caetarore mu̶jãã ĩñamajũcõãgarã.

will be added

X\