SAN MATEO 14

1Ti rũ̶mu̶rĩ majũã Herodes, Galilea yepa macããna quetiupau̶ pu̶ame queti tũ̶goyupu̶ Jesús cũ̶ caátimasĩrĩjẽrẽ. 2Bairo tiere tũ̶go, atore bairo na ĩñupũ̶ cũ̶ carotirãrẽ: “Jesús na caĩ, cũ̶ã ãcũ̶mi Juan el Bautista cabaiyasiricu̶ ãnacũ̶ tunu cacati majũ. Bairo cabai ãnirĩ capee átijẽñomasĩĩmi,” na ĩñupũ̶ Herodes. 3Mai, cajũ̶goyepu̶ Herodes pu̶ame Juarẽ ñerotiyupu̶. Bairo cũ̶ ñerotiri bero, ãpõãwẽ mena cũ̶ jiyari, preso jorica wiipu̶ cũ̶ cũrocaroti joyupu̶. Juan cũ̶ caquetibu̶ju̶rijere boesupu̶ Herodes. Mai, “Mu̶ bai Felipe nu̶mo Herodías na caĩõ mena mu̶ caãnie ñuẽtĩña. Carorije niña mu̶ caátie,” cũ̶rẽ cũ̶ caĩquetibu̶ju̶rijere boesupu̶. Bairo boetiri preso jorica wiipu̶ cũ̶ cũrocaroti joyupu̶ Herodes pu̶ame Juarẽ. 5Tunu nipetiro camasã Juarẽ, “Dios cũ̶ caquetibu̶ju̶rotijou̶ ãcũ̶mi,” ĩrã, cũ̶ maijãñuñuparã. Bairi Herodes pu̶ame jicoquei Juarẽ cũ̶ pajĩãroca rotigamicũ̶ã, bairo átiroti masĩẽsupu̶, camasã yu̶ tutirema, ĩ. 6Bairo jĩcã rũ̶mu̶ yua, Herodes cũ̶ cabuiarica rũ̶mu̶ caetaro, bose rũ̶mu̶ qũẽnoñupũ̶. Bairo cũ̶ caqũẽnorõ, Felipe nu̶mo caãnimirĩcõ Herodías cawãmecu̶co macõ pu̶ame basa ĩñoñupõ, Herodes cũ̶ capiijoatana cõ na caĩñaparore bairo ĩõ. Herodes cũ̶ã cõ cabasarijere ĩñajesomajũcõãñupũ̶. 7Bairi nipetirã na catũ̶goro, atore bairo cõ ĩñupũ̶ Herodías macõrẽ Herodes pu̶ame: “Noo, yu̶re mu̶ cajẽnigari wãmerẽ yu̶ jẽniña. Mu̶ yu̶ jomajũcõãgu̶. Ĩtoricaro mano Dios mena ñiña,” cõ ĩñupũ̶. 8Bairo cawãmao pu̶ame tiere tũ̶gori, cõ pacore jẽniñao ásúpo. Cabero yua, cõ paco cõrẽ cõ caĩrotirore bairo qũĩñupõ Herodere: --Bairo yu̶ boya: Ãmeacã Juan el Bautista ru̶poare patanerĩ jotu̶ bapapu̶ jããrĩ, yu̶ mu̶ jowa —qũĩñupõ. 9Bairo cõ caĩrõ tũ̶go, tũ̶goña yapapuacoásupu̶ Herodes pu̶ame. Bairo tũ̶goña yapapuamicũ̶ã, “ ‘¡Dios mena ñiña!’ cõrẽ yu̶ caĩatajere yu̶ tũ̶goama yu̶ capiijoatana,” ĩ yua, cõrẽ cũ̶ caĩatatore bairo átirotiyupu̶. 10Bairi cũ̶ ũ̶mu̶arẽ Juan preso jorica wiipu̶ caãcũ̶rẽ cũ̶ ru̶poa patarotijoyupu̶. 11Bairo cũ̶ caĩrõ tũ̶go, cũ̶ caĩrõrẽ bairo cũ̶ ásuparã Juarẽ. Bairo cũ̶ pajĩã yaparori bero, cũ̶ ãnacũ̶ ru̶poare jotu̶ bapa buipu̶ nejããrĩ, Herodías macõrẽ cõ nuniñuparã. Cõ pu̶ame cõ pacore cũ̶ ru̶poa ãnatõrẽ cõ neásúpo, cũ̶ cayasiro cõ masĩáto, ĩõ. 12Cabero Juan cũ̶ cabuemirĩcãrã pu̶ame bairo cũ̶rẽ na capajĩãrocarijere queti tũ̶gori, preso jorica wiipu̶ etarã, cũ̶ ãnacũ̶ rupau̶re neásúparã, masã opepu̶ cũ̶ yarocagarã. Bairo áti yaparori bero, Jesutu̶ etawã, tie quetire cũ̶ quetibu̶ju̶rã etarã. 13Bairo Jesús na caĩquetibu̶ju̶ro tũ̶go, topu̶ caãniatacu̶ cũmuarẽ ájããrĩ camasã manopu̶ jãã jũ̶goacoámí. Bairo jãã caátíere masĩrĩ yua, ti macãã macããna camasã pu̶ame maapu̶ u̶tabu̶cu̶ra tũ̶ni ásúpa, jãã ẽñota áná. Bairo áná, jãã jũ̶goye etayupa. 14Bairi Jesús u̶tabu̶cu̶ra ape nu̶gõãpu̶ pẽñaeta yua, maanu̶cãwĩ. Maanu̶cãrĩ yua, camasã capããrãrẽ na ĩñawĩ. Bairo na cabairo, bopacooro na ĩñawĩ. Bairi na mena macããna cariayecu̶na na caneatíatanarẽ na catiowĩ. 15Bairo na cũ̶ caáticõãno, ñamicããcã nicoa ápú̶. Bairi jãã, cũ̶ cabuerã pu̶ame Jesutu̶ etari, atore bairo cũ̶ jãã ĩwũ̶: --Merẽ ñamicã majũ niña. Atopu̶re wiiri maniña. Dope camasã capããrãrẽ na marĩ áperã. Bairi ãnoarẽ na mu̶ árotiwa macããpu̶, na majũ na cau̶gapeere na wapatirápáro —jãã ĩwũ̶ Jesure. 16Bairo jãã caĩrõ tũ̶gomicũ̶ã, atore bairo jãã ĩwĩ: --Aperopu̶ na cau̶gapeere na wapatira rotieticõãña. Mu̶jãã majũ na u̶garique nuña —jãã ĩwĩ. 17Bairo cũ̶ caĩrõ tũ̶go, bairo cũ̶ jãã ĩwũ̶: --Jãã, jĩcã wãmo cãrõ pan jororiaca, wai, pu̶garããcã tocãrõã jãã cũ̶goya —cũ̶ jãã ĩwũ̶. 18Bairo jãã caĩrõ: “Ato pu̶ame jeasá,” jãã ĩwĩ. 19Ĩ yaparo, camasã capããrã to caãnarẽ taa yepapu̶ na ruirotiwĩ. Bairo na caruiro ĩña, pan rupaa jĩcã wãmo cãnacã rupaacarẽ, wai pu̶garã mena nee, jõbuire ĩñamu̶gõjori, “Jãã mena mu̶ ñujãñuña,” Diore qũĩ jẽniwĩ. Bairo qũĩ jẽni yaparo, pan rupaare carecomacã peeri, jãã, cũ̶ cabuerãrẽ, jãã nuniwĩ, camasãrẽ jãã cabatoparore bairo ĩ. 20Bairo jãã cabatoro bero yua, nipetiro camasã caroaro u̶gayapicoáma, u̶gariquere narẽ jãã cabatoatajere. Bairo na cau̶gatuaro bero, jãã jejããwũ̶ piiripu̶ na cau̶garu̶garijere. Pu̶ga wãmo peti ru̶pore pu̶ga pẽnirõ cãnacã piiri majũ jãã jejããjirowu̶. 21To caãna cau̶gaatana jĩcã wãmo cãnacã mil majũ camasã ãma, carõmia, bairi cawĩmarã cũ̶ã cõñaña manoa. 22Tipau̶ bero, jãã, cũ̶ cabuerãrẽ cũmuapu̶ jãã ájããrotiwĩ Jesús tunu. Camasãrẽ na cũ̶ caĩñatu̶sajotoye, ti u̶tabu̶cu̶ra jĩnu̶gõãpu̶ cũ̶ jũ̶goye jãã capẽñaátó bowĩ. 23Bairi camasãrẽ na ĩñatu̶sajo yaparo, ũ̶tãũ̶ buipu̶ wãmu̶coásúpi Jesús, Diore cũ̶ jẽniácú̶. Bairi muipu̶ cũ̶ cajããrõ canaioatípau̶, jĩcãũ̶ã ãñupĩ Jesús ti ũ̶tãũ̶ buipu̶. 24Jãã pu̶ame merẽ cũmua mena tira recomacã majũpu̶ jãã ãmu̶. Bairo jãã caãno, oco turi pu̶ame bu̶tioro jabewu̶. Wĩno cũ̶ã bu̶tioro jãã riape jãã paputunuo pocõãwũ̶. 25Bairo roro jãã cabairo, cabusuparo jũ̶goyeaca oco bui peari jããtu̶ amí Jesús. 26Bairo oco buipu̶ cũ̶ caató ĩña yua, “Apei ũcũ̶ ãcũ̶mi,” ĩrã, jãã, cũ̶ cabuerã uwiri bairo jãã awajawu̶: --¡Ãni, camasocu̶ ãnacũ̶ wãtĩ marĩtu̶ atíyami! —jãã ĩwũ̶. Bu̶tioro cauwirã ãnirĩ bairo jãã awajawu̶ yua. 27Bairo jãã cabairo, Jesús pu̶ame jãã ĩ jowĩ: --¡Tũ̶goñatutuaya yu̶ yarã, Jesua yu̶ ãniña, yu̶ uwieticõãña! —jãã ĩwĩ. 28Bairo cũ̶ caĩrõ tũ̶go, atore bairo qũĩwĩ Pedro Jesure: —Mu̶, jãã Quetiupau̶ cariape mu̶ caãmata, mu̶tu̶ oco buipu̶ yu̶ árotiya. 29Bairo cũ̶ caĩrõ tũ̶go, “Jau̶, yu̶tu̶ asá,” qũĩwĩ Jesús Pedrore. Bairo cũ̶ caĩrõ tũ̶go, Pedro, jãã cũmuapu̶ cajãñaatacu̶ pu̶ame cũmuarẽ ruiri oco buipu̶ Jesutu̶ ámiwĩ. 30Bairo ámasĩmicũ̶ã, wĩno bu̶tioro cũ̶ caĩñarõ capapunemorõ, tũ̶goña uwirique Pedrore etawu̶. Eta yua, ruacõã ruinutuami. Bairi atore bairo qũĩ awajawĩ Pedro Jesure: —¡Yu̶ Quetiupau̶, yu̶re ñei asá! ¡Rua ácú̶ yu̶ baiya! 31Bairo cũ̶ caĩrõ tũ̶go, jicoquei Jesús cũ̶ wãmo ñujori Pedrore cũ̶ ñewĩ. Ñerĩ yua, atore bairo qũĩwĩ: --Yu̶ yau̶, ¡jĩrĩãcã majũ yu̶ mena mu̶ tũ̶goñatutuaya! ¿Nopẽĩ, “Yu̶ ámasĩẽcũ̶,” mi tũ̶goñaati? —qũĩwĩ Jesús Pedrore. 32Bairo cũmuapu̶ na caájããrõ, wĩno pu̶ame papujãnacoapu̶ yua. 33Bairo cabairo ĩña, jãã, cũmuapu̶ caãna pu̶ame Jesutu̶ ru̶popaturi mena etanumurĩ cũ̶ jãã ĩroawu̶: --¡Cariape Dios macũ̶ majũ mu̶ ãniña! —cũ̶ jãã ĩwũ̶ Jesure. 34Bairo pẽñaáná, u̶tabu̶cu̶ra ape nu̶gõãpu̶ jãã etawu̶, Genesaret cawãmecu̶ti yepapu̶. 35Bairo jãã caetaro ĩña, to macããna pu̶ame Jesure qũĩñamasĩwã. Bairi cũ̶ caetarije quetire ti yepa nipetiropu̶ quetibu̶ju̶ batoyupa, cariayecu̶narẽ na caneatíparore bairo ĩrã. 36Bairi na pu̶ame, Jesutu̶ eta, atore bairo tũ̶goñañupã: “Cũ̶ jutiro yapa ũno cũ̶ãrẽ marĩ capãñaata, marĩ caticoagarã,” ĩ tũ̶goñañupã. Bairo pãñarĩqũẽrẽ bu̶tioro cũ̶ jẽniwã. Bairo cariayecu̶na tocãnacãũ̶ã cũ̶ jutiro yapare capãñarã caticoama.

will be added

X\