SAN MARCOS 5

1Cabero ti u̶tabu̶cu̶ra ape nu̶gõãpu̶ pẽña etayuparã Jesujãã, Gerasa na caĩrĩ yepapu̶. Bairo eta yua, maa nu̶cãñupũ̶ Jesús. 2Bairo cũ̶ camaa nu̶cãrõ, caũ̶mu̶ jĩcãũ̶, wãtĩ yeri pũna cacũ̶gou̶ pu̶ame cũ̶tu̶ etayupu̶. Camasãrẽ na carerica ũ̶tã wiiripu̶ caãniatacu̶ cũ̶tu̶ etayupu̶. 3Mai, cũ̶ pu̶ame ũ̶tã wiiripu̶ ninucũñupũ̶. Cauwiou̶ majũ ãñupũ̶. Bairi camasã pu̶ame cũ̶ ñesẽãrotietimiñuparã. Cũ̶ wãmorĩrẽ, bairi cũ̶ ru̶pori cũ̶ãrẽ ãpõã wẽẽrĩ mena nairõ cũ̶ jiyanucũmiñuparã. Bairo na caátimiatacũ̶ãrẽ, cũ̶ pu̶ame ãpõã wẽẽrĩrẽ tũ̶gãjure recoanucũñupũ̶. Bairi ni ũcũ̶ cũ̶ átinetõnu̶cã masĩẽsupũ̶. 5Bairi u̶mu̶recóo caãno cãrõ, ñami cũ̶ãrẽ bairo roro ñesẽãcõãnucũñupũ̶ ũ̶tã yucu̶ buiripu̶. Camasãrẽ na carericaropu̶ awaja ñesẽãnucũñupũ̶. Bairi ũ̶tã ruparire ñosẽ ñesẽãnucũñupũ̶. 6Bairo Jesure cayoaropu̶ ĩñajou̶na, cũ̶tu̶ atu̶eta, ru̶popaturi mena etanumuñupũ̶. 7Jesús pu̶ame atore bairo qũĩñupũ̶ wãtĩ yeri pũnarẽ: --¡Wãtĩ, jicoquei cũ̶ witi ácú̶ja! —qũĩñupũ̶. Bairo cũ̶ caĩrõã, wãtĩ yeri pũna cacũ̶gou̶ pu̶ame awajarique mena atore bairo qũĩ awajayupu̶: --¡Mu̶, Dios jõbui macããcũ̶ macũ̶ mu̶ ãniña! ¿Ñerẽ ácu̶ mu̶ atíyati yu̶tu̶re? ¡Popiye yu̶ cabaipeere ápericõãña! —bu̶tioro qũĩñupũ̶. 9Bairo cũ̶ caĩrõ tũ̶go, qũĩ jẽniñañupũ̶ Jesús wãtĩ yeri pũnarẽ: —¿Ñamu̶ mu̶ wãmecu̶tiyati? Bairo cũ̶ caĩrõ tũ̶go, qũĩñupũ̶ wãtĩ yeri pũna Jesure: --Jãã, capããrã jãã niña. Bairi yu̶ wãme, Legión yu̶ ãniña. ¡Jããrẽ ape macãpu̶ jãã mu̶ joepa! —bu̶tioro qũĩñupũ̶ wãtĩ yeri pũna Jesure. 11Mai, totu̶ ũ̶tãũ̶pu̶ capããrã yesea nurĩcãrã u̶garã ásuparã. 12Bairo na cau̶gaãno, wãtĩ yeri pũna pu̶ame atore bairo bu̶tioro qũĩñuparã Jesure: --¡Yeseapu̶re jããrẽ jãárotiya! Napu̶re jãã jããgarã —bu̶tioro qũĩñuparã. 13Bairo na caĩrõ tũ̶go, “¡Jau̶! Topu̶ ánája toroque,” na ĩñupũ̶ Jesús, na ároti yua. Bairo cũ̶ caĩrõ, wãtĩ yeri pũna pu̶ame caũ̶mu̶rẽ cũ̶ witipeticoásúparã. Yeseapu̶re jããrásúparã. Bairo yeseare na cajããrĩpau̶ yua, yesea ũ̶tãũ̶ bui caãnimiatana pu̶ame mecũ̶rã u̶tabu̶cu̶rapu̶ atu̶re ñañuacoásúparã. Bairi yua, ruapeticoasuparã yesea pu̶ame. 14Bairo na cabairo ĩña, yeseare cacotemiatana pu̶ame acu̶ari acoásúparã. Macãpu̶ etacoasuparã. Topu̶ na quetibu̶ju̶yuparã nipetiro yesea na cabaiatajere. Macã tũ̶ni macããna cũ̶ãrẽ na quetibu̶ju̶yuparã. 15Bairo tiere tũ̶gori, camasã pu̶ame ĩñarásúparã cabaiatajere. Bairo topu̶ etarã, qũĩña acu̶acoasuparã capããrã wãtĩ yeri pũnarẽ cacũ̶gomiatacu̶re. Cũ̶ pu̶ame jutii jãñarĩ, caroaro tũ̶goñarĩqũẽ mena ruiyupu̶. Bairi dope bairo cũ̶ cabaiatajere masĩẽna, uwijãñuñuparã. 16Bairo baicõã, caĩñaatana pu̶ame, na quetibu̶ju̶yuparã caetarãrẽ. Wãtĩ yeri pũnarẽ cacũ̶gomiatacu̶ cũ̶ cabaiataje, bairi yesea na cabaiataje cũ̶ãrẽ na quetibu̶ju̶yuparã. 17Bairo na caquetibu̶ju̶ro, bu̶tioro Jesure cũ̶ uwiri, atore bairo bu̶tioro qũĩñuparã: “¡Tunu ácú̶ja mu̶ caatíatatopu̶!” qũĩñuparã Jesure to macããna, Gerasa yepa macããna. 18Bairo na caĩrõĩ, Jesús pu̶ame cũmuarẽ ájããñupũ̶ tunu cũ̶ cabuerã mena. Bairo cũ̶ caájããrõ, wãtĩ yeri pũnarẽ cacũ̶gomiatacu̶ pu̶ame bu̶tioro qũĩñupũ̶ Jesure: “¡Jesús, mu̶ mena yu̶ ágaya bu̶tioro!” qũĩñupũ̶. 19Bairo cũ̶ caĩrõ, Jesús qũĩñupũ̶ tunu: --¡Yu̶ yau̶, tuaya! ¡Mu̶ ya macã pu̶ame tunu ácú̶ja! Topu̶ etau̶, mu̶ yarã to macããnarẽ na quetibu̶ju̶ya marĩ Quetiupau̶ Dios mu̶rẽ mairĩ caroaro mu̶ cũ̶ caátiatajere —qũĩñupũ̶. 20Bairo cũ̶ caĩrõ tũ̶go, tunucoásúpu̶ cũ̶ ya macãpu̶. Topu̶ etau̶, nipetirã Decápolis na caĩrĩ macãã macããnarẽ na quetibu̶ju̶yupu̶ Jesús cũ̶ caátiatajere. Tiere tũ̶gori nipetiro camasã tũ̶go acu̶acoasuparã. 21Bairo cabero Jesús ti u̶tabu̶cu̶rare cũ̶ capẽñaetaro, capããrã camasã cũ̶ coteyuparã. Bairo cũ̶ caetaro ĩña, cũ̶ cacoteatana pu̶ame capããrã cũ̶tu̶ neñapoyuparã. 22Bairo Jesús cũ̶ camaa nu̶cãrõ, cũ̶tu̶ etayupu̶ caũ̶mu̶ jĩcãũ̶, Jairo cawãmecu̶cu̶. Jairo pu̶ame camasã na cañubueri wii sinagoga quetiupau̶ ãñupũ̶. Torecu̶ cũ̶tu̶ eta, ru̶popaturi mena eta numurĩ Jesure qũĩroayupu̶. 23Atore bairo qũĩñupũ̶: —¡Jesús, yu̶ macõ riácópu̶ baiamo! Mu̶ wãmo mena cõrẽ ñigã peoñau̶ asá, cõ cacaticoaparore bairo ĩ. 24Bairo cũ̶ caĩrõ tũ̶go, Jairo mena acoásúpu̶ Jesús. Bairo cũ̶ caátó, camasã pu̶ame u̶tabijaro majũ cũ̶ u̶sayuparã Jesure. 25Mai, na mena macããcõ jĩcãõ cariíjãnaecõ ãñupõ. Yoaro, pu̶ga wãmo peti ru̶pore pu̶ga pẽnirõ cãnacã cũ̶marĩ majũ tiere riayupo. 26Capããrã cau̶cotiri majã cõ u̶cotimiñuparã. Na cau̶cotimiatacũ̶ãrẽ, cõ tũ̶goesuparo. Bairo na caátimiatacũ̶ãrẽ, jĩrĩã netõrõ roro majũ baiyupo. Tunu bairo cõ cacũ̶gorijeacarẽ na nunire peyocõãñupõ u̶co wapa. 27Bairo baicõã yua, tũ̶goñañupõ cõ pu̶ame Jesús cũ̶ camasĩrĩjẽrẽ, cũ̶ cariaye netõrĩjẽrẽ. Bairo tiere tũ̶goñarĩ, Jesús bero pu̶ame asúpo. Bairo cũ̶ bero atí yua, cũ̶ jutirore tuañañupõ. 28Mai, cõ pu̶ame cariape tũ̶goñañupõ Jesús cũ̶ cariaye netõmasĩrĩjẽrẽ. Bairo cariape tũ̶goñarĩ yua, “Cũ̶ jutiro cayoaro yapaacarẽ yu̶ capãñaata, yu̶ caticoago,” ĩ tũ̶goñañupõ. Bairo tiere ĩ tũ̶goñarĩ, Jesús bero pu̶ame atíri, tore bairo ásupo. 29Bairo cõ caáto, tocãrõã jicoquei caticoasupo. Cõ cariípetirije riaye jãnacoasuparo. Bairi cõ pu̶ame tocãrõã masĩcõãñupõ cõ riaye canetõrĩjẽrẽ yua. 30Jesús pu̶ame, “Yu̶ camasĩrĩjẽ jũ̶gori jĩcãõ cõ cariaye cu̶tiere yu̶ netõãpũ̶,” ĩ masĩñupũ̶. Bairo masĩrĩ, atore bairo na ĩñupũ̶ Jesús cũ̶tu̶ caãna camasãrẽ: --¿Noa na tuañaati yu̶ jutirore? —na ĩ jẽniñañupũ̶. 31Bairo cũ̶ caĩrõ tũ̶go, cũ̶ cabuerã pu̶ame atore bairo qũĩñuparã Jesure: --Jãã cabuei, rita ãnoa camasã capããrã niñama. Bairi mu̶ tunerocayama noo na caboro. Nana na caátiere mi bauya —qũĩñuparã. 32Bairo na caĩrõ tũ̶gomicũ̶ã, cõ ĩñamacãñupũ̶, cũ̶rẽ capãñaatacore masĩgu̶. 33Bairo ĩñamacã cũ̶ cabaiãno, cariamiataco pu̶ame, cõ cacatiatajere masĩrĩ, tunu bairi uwitũ̶goñarĩ, Jesutu̶ etayupo. Ru̶popaturi mena Jesús ru̶pori tu̶pu̶ etanumuñupõ. Bairo etanumurĩ, nipetirije cõ cabaiatajere Jesure cũ̶ quetibu̶ju̶yupo. 34Bairo cõ caĩquetibu̶ju̶ro bero, cõ ĩñupũ̶ Jesús: --Yu̶ yao, yu̶ camasĩrĩjẽrẽ cariape mu̶ tũ̶goñaupa. Bairi mu̶ riayere yu̶ netõõcõãña. Tunu ácója u̶seanirĩqũẽ mena —cõ ĩñupũ̶ Jesús. 35Bairo cũ̶ caĩãnitoyea, jĩcããrã etayuparã, Jairo ya wii macããna pu̶ame. Jairore qũĩ quetibu̶ju̶rã etayuparã: --Mu̶ macõ merẽ baiyasicoaamo. Bairi tocãrõã cũ̶ patowãcõña marĩrẽ cabueire —qũĩ quetibu̶ju̶yuparã Jairore. 36Bairi Jesús cũ̶ã cũ̶ caĩrĩjẽrẽ tũ̶goyupu̶. Bairo tũ̶gori, atore bairo qũĩñupũ̶ Jairore: --Jairo, tũ̶go acu̶aeticõãña. Dios cũ̶ camasĩrĩjẽ jetore tũ̶goñatutuaya —qũĩñupũ̶ Jesús Jairore. 37Bairo ĩcõã, Pedro, Santiago, cũ̶ bai Juan ásúparã Jesús mena. Aperãrẽ na árotiesupu̶ Jesús. 38Bairo Jairo ya wiipu̶ na caetaro, ti wii macããna pu̶ame oti awaja ãñuparã. Cabaiyasiatacore bopacooro cõ cabairijere cõ ĩña otiyuparã. 39Bairo na cabairo ĩñarĩ, ti wiire jããrĩ bero, atore bairo na ĩñupũ̶ Jesús: --Awaja otieticõãña mu̶jãã. Atio cawĩmao baiyasietiyamo. Cãnio baiyamo —na ĩñupũ̶ Jesús. 40Bairo cũ̶ caĩrõ tũ̶go, nipetirã to macããna pu̶ame roro cũ̶ bócaboyeticõãñuparã, “Merẽ yasicoaamo,” ĩrã. Bairo na cabaimiatacũ̶ãrẽ, Jesús pu̶ame ti wiire na wiyocõã joyupu̶. Áti yaparo, cariacoataco ãnacõ cõ caãnopu̶re jããcoasupu̶ cõ ãnacõ pacu̶a mena. 41Bairo jããeta yua, cõ ãnacõ wãmorĩrẽ ñerĩ, atore bairo cõ ĩñupũ̶: —¡Talita cum! (Bairo ĩgaro ĩña: “Cawĩmao wãmu̶nu̶cãña.”) 42Bairo cũ̶ caĩrõ, cõ pu̶ame jicoquei catitunurĩ wãmu̶nu̶cã ñesẽãcoasupo yua. Mai, pu̶ga wãmo peti ru̶pore pu̶ga pẽnirõ cãnacã cũ̶marĩ majũ cũ̶goyupo. Bairo cõ cacatitunurõ ĩñarĩ, camasã pu̶ame bu̶tioro tũ̶goñacõã maniásuparã. 43Bairo na catũ̶goñamaniamiatacũ̶ãrẽ, Jesús pu̶ame na ĩnemoñupũ̶ tunu atore bairo: “Aperãrẽ na quetibu̶ju̶eticõãña cawĩmao cõ cacatiatajere,” na ĩñupũ̶. Ĩ yaparo, u̶gariquere cõrẽ na nurotiyupu̶ yua.

will be added

X\