SAN MARCOS 4

1Cabero acoásúpu̶ Jesús u̶tabu̶cu̶ra tũ̶nipu̶. Topu̶ eta, camasãrẽ na quetibu̶ju̶ jũ̶goyupu̶ tunu. Mai, camasã capããrã majũ na caãnoi, Jesús pu̶ame cũmua turorica capairicapu̶ ájããñupũ̶. Cũ̶tu̶ catũ̶gorã etarã pu̶ame peta paputiropu̶ nucũñuparã. 2Bairo na cabairo, capee wãme ĩcõñarĩ na quetibu̶ju̶yupu̶ Jesús. Atore bairo na ĩ quetibu̶ju̶yupu̶: 3“Yu̶ caquetibu̶ju̶rijere caroaro tũ̶gopeoya. Jĩcã rũ̶mu̶ ásúpu̶ jĩcãũ̶ caũ̶mu̶ cũ̶ wesepu̶, oteriquere otei ácú̶. 4Topu̶ eta, cũ̶ oteriquere wẽbato otejũ̶goyupu̶. Bairo caroaro cũ̶ caotemiatacũ̶ãrẽ, oterique jĩcã rupaa ñañuparõ maapu̶. Bairo maapu̶ ti rupaa cañarõ ĩñarã, minia pu̶ame wu̶ruiatí, u̶garecõãñuparã. 5Cabero cũ̶ cawẽbatoro, ape rupaa ũ̶tã yepapu̶ cayepa esemenirõpu̶ ñañuparõ. Tie pu̶ame yoaro mee putimiñuparõ, cayepa esemenirõ caãnoi. 6Bairo tie oterique pu̶ame pútiatímii yua, yoaro mee riacoásúparo muipu̶ cũ̶ caasijĩãrõĩ, dope bairo nu̶cõõrĩ jomasĩẽtĩrĩ yua. 7Cabero cũ̶ cawẽbatoro, ape rupaa pota yucu̶ watoapu̶ ñañuparõ. Cabero pota yucu̶ pu̶ame cabu̶tinetõrõ, tie oterique pu̶ame caroaro pútimasĩẽsuparo. Pota yucu̶ pu̶ame otere bu̶tibiacõãñuparõ. Bairi rícamani yucu̶ ásuparo. 8Cabero ape rupaa pu̶ame caroa yepapu̶ ñañuparõ. Cabero puti, bu̶ticoasuparo. Bairo bu̶tiátó, jĩcã jatí treinta rupaa majũ rícacu̶suparo. Ape jatí sesenta rupaa majũ rícacu̶suparo. Ape jatí cien majũ rícacu̶suparo,” na ĩ quetibu̶ju̶yupu̶ Jesús. 9Ĩ quetibu̶ju̶ yaparo, atore bairo na ĩnemoñupũ̶ tunu: “Mu̶jãã caãmoocu̶na mu̶jãã ãniña. Bairi ãmerẽ yua, mu̶jããrẽ yu̶ caquetibu̶ju̶atajere tũ̶goãmewiyoya mu̶jãã yeripu̶,” na ĩñupũ̶ Jesús cũ̶tu̶ catũ̶gorã etarãrẽ. 10Cabero Jesús jĩcãũ̶ã cũ̶ caãno, cũ̶tu̶ macããna bairi cũ̶ cabuerã cũ̶ã cũ̶tu̶ eta yua, atore bairo qũĩ jẽniñañuparã: “¿Dope ĩgaro to ĩñati caotei queti?” 11Bairo na caĩrõ tũ̶go, atore bairo na ĩ quetibu̶ju̶yupu̶ Jesús: “Dios cũ̶ carotimasĩrĩpau̶ macããjẽrẽ tirũ̶mu̶pu̶ macããna na catũ̶goetajere mu̶jãã roquere mu̶jãã masĩõñami. Aperã tiere na camasĩrõrẽ boetiyami. Torecu̶, ape wãme ĩcõñarĩ na quetibu̶ju̶ rotiyami Dios. 12Na pu̶ame cacaapee cũ̶gorã nimirãcũ̶ã, Dios cũ̶ caátiere ĩñamasĩẽtĩñama. Tunu bairoa cũ̶ yaye quetire tũ̶gomirãcũ̶ã, tiere tũ̶gomasĩẽtĩñama. Bairi Diore, ‘Jãã mu̶ netõõwã,’ qũĩẽtĩnucũñama. Torena, carorije wapa cacũ̶gorã tuayama Dios cũ̶ caĩñajoro yua,” na ĩ quetibu̶ju̶yupu̶ Jesús. 13Bairo ĩ quetibu̶ju̶ yaparo, atore bairo na ĩ quetibu̶ju̶yupu̶ tunu: “¿Caotei cũ̶ caátajere ĩ cõñarĩ mu̶jããrẽ yu̶ caquetibu̶ju̶atajere mu̶jãã tũ̶gomasĩẽtĩati? Tiere mu̶jãã camasĩẽtĩcõãta, ¿Dope bairo rita ape wãmerẽ mu̶jãã masĩcu̶ti? Mu̶jãã masĩẽna. 14Ãmerẽ yua, mu̶jããrẽ yu̶ quetibu̶ju̶gu̶ caroaro ĩcõñarĩ caotei quetire camasãrẽ yu̶ caquetibu̶ju̶atajere: Camasã jĩcããrã Dios yaye quetire tũ̶goyama. Bairo tũ̶gomirãcũ̶ã, tũ̶gomasĩẽtĩñama. Dios bu̶su̶riquere na catũ̶goatato beroaca, wãtĩ pu̶ame uwaro eta, jecõãñami na camasĩbujioatajere. Minia na cawu̶je u̶garicarore bairo etanecõãñami wãtĩ, na camasĩbujioatajere. Na pu̶ame caotei cũ̶ caoterique maapu̶ cañarĩcã rupaare bairo niñama. 16Tunu aperã camasã Dios yaye quetire u̶seanirõ tũ̶go, jicoquei, ‘Jau̶,’ ĩñama. Bairo bomirãcũ̶ã, bairãpu̶a na yeripu̶ caroaro cũ̶ yu̶etiyama. Capútirije canu̶cõmanajẽrẽ bairo niñama. Bairi roro na cabairo caãno, o Dios yaye quetire na catũ̶gou̶saro jũ̶gori aperã narẽ na caĩñatero ĩñarã, yoaro mee jãnañama Dios yaye quetire yua. Dios mena yoaro ãmerĩñama. Naa, caotei cũ̶ caoterique ape rupaa ũ̶tã buipu̶ cañarĩcã rupare bairo niñama. 18Tunu aperã camasã Dios yaye quetire, ‘Jau̶,’ na caĩrõ bero, apeye ũnie pu̶amerẽ bu̶tioro tũ̶goña macãñama. Ati yepa macããjẽ wapatarique ũnierẽ, bairi caroaro na caãnigarije cũ̶ãrẽ tũ̶goñañama bu̶tioro. Bairi Dios bu̶su̶riquere tũ̶goña masiriticõãñama. Caroaro caánarẽ bairo na caáperoi, caríca bu̶timasĩẽtĩẽrẽ bairo niñama. Bairi naa, caotei cũ̶ caoterique ape rupaa pota watoapu̶ cañarĩcã rupaare bairo niñama. 20Bairãpu̶a, aperã roque Dios yaye quetire u̶seanirõ tũ̶goyama. Na yeri pũnapu̶ cariape tũ̶gopeori, tiere tũ̶gou̶sayama. Caotei cũ̶ caoterique ape rupaa, caroa yepapu̶ cañarĩcã rupaare bairo niñama. Jĩcã jatí treinta rupaa majũ rícacu̶suparo. Ape jatí sesenta rupaa majũ rícacu̶suparo. Ape jatí cien majũ rícacu̶suparo. Torea bairo niñama Dios yayere catũ̶gou̶sanucũrã pu̶ame,” na ĩ quetibu̶ju̶yupu̶ Jesús. 21Ĩ yaparo, atore bairo na ĩ quetibu̶ju̶nemoñupũ̶ Jesús tunu: “¿Camasã carupapata rocapu̶, o cama rocapu̶ jĩñaworiquere na cũñati? Tore bairo cũẽtĩnucũñama. Jõbuipu̶ roque cũnucũñama camasã, nipetiro cajããetarã na caĩñamasĩparore bairo ĩrã. 22Na cajĩñaworipau̶ nipetiro baugaro caĩñamaniataje. Torea bairo ape rũ̶mu̶pu̶ camasã nipetiro ãme camasĩã manierẽ masĩpeticoagarãma. 23Mu̶jãã caãmoocu̶na mu̶jãã ãniña. Bairi ãmerẽ yua, mu̶jããrẽ yu̶ caquetibu̶ju̶atajere tũ̶goãmewiyoya mu̶jãã yeripu̶.” 24Tunu atore bairo na ĩnemoñupũ̶ Jesús: “Yu̶ caquetibu̶ju̶rijere mu̶jãã catũ̶gopeoata, Dios pu̶ame mu̶jããrẽ masĩõnemogu̶mi tunu yu̶ caquetibu̶ju̶rijere. Bairo tũ̶gomirãcũ̶ã, petoaca mu̶jãã catũ̶gopeoata roque, cabero mu̶jãã camasĩmiatajere mu̶jãã masiriticõãgarã. Bairi caroaro cariape tũ̶gopeoya,” na ĩ quetibu̶ju̶yupu̶ Jesús. 26Ĩ yaparo atore bairo na ĩ quetibu̶ju̶nemoñupũ̶ tunu: “Dios yaye macããjẽrẽ quetibu̶ju̶rique, jĩcãũ̶ camasocu̶ yepapu̶ otere cũ̶ caoterijere bairo niña: 27Ote yaparori bero, tie otere ĩñapeocõã ãmeimi. Bairi tocãnacã ñamia cãnii, tocãnacã rũ̶mu̶a ãnicõã, cũ̶ cabaitoye, cũ̶ caoterique pu̶ame puticoato. Bairi cũ̶ pu̶ame dope bairo bairi caputirore masĩẽcũ̶mi. 28Putiro, yoaro mee pũũ witiro. Pũũ witi yaparo, carupa jatí jeñarõ. Carupa jatí jeña yaparo, caríca wiyoro, tie bu̶ti carupa rupaa jeñarõ. 29Ti rupaa cabu̶tiro ĩña, jeimi tiere caotericu̶, ‘Tocãrõã bu̶ti yaparoya,’ ĩ. Torea bairo Dios yaye macããjẽrẽ quetibu̶ju̶rique cũ̶ã niña,” na ĩ quetibu̶ju̶yupu̶ Jesús. 30Ĩ quetibu̶ju̶ yaparo, atore bairo na ĩnemoñupũ̶ Jesús tunu cũ̶tu̶ catũ̶gorã etarãrẽ: “¿Dope bairo mu̶jããrẽ yu̶ masĩõñati Dios cũ̶ carotimasĩrĩpau̶re? ¿Di wãme ũnorẽ ĩcõñarĩ mu̶jããrẽ yu̶ quetibu̶ju̶yati? 31Mostaza na caĩrĩ apeacarẽ jĩcãũ̶ cũ̶ wesepu̶ cũ̶ caotericaacarẽ bairo niña Dios cũ̶ carotimasĩrĩpau̶. Tia apeacã pu̶ame õcããcã majũ nimirõcũ̶ã, cabero puti bu̶tiátó, pairicu̶ majũ áya, nipetirije wesepu̶ oterique netõrõ. Paca majũ ru̶pu̶ri cu̶tiya. Bairi minia cũ̶ã tii yucu̶ ru̶pu̶ripu̶re na ria batiirire qũẽnorĩ nicõãmasĩñama. Torea bairo niña Dios cũ̶ carotimasĩrĩpau̶ cũ̶ã,” na ĩcõña quetibu̶ju̶yupu̶ Jesús. 33Torea bairo jeto capee wãme ĩcõñarĩ na quetibu̶ju̶nucũñupũ̶ Jesús nipetiro camasã cũ̶tu̶ catũ̶gorã etarãrẽ. Na camasĩjĩãtiparo cãrõ caroaro na quetibu̶ju̶yupu̶. 34Dise ũnie quetibu̶ju̶riquere ĩcõñaetiri na quetibu̶ju̶esupu̶. Baipu̶a, aperã na camano na catũ̶goetopu̶ cũ̶ cabuerã pu̶amerã nipetiro caroaro tũ̶gojĩãtipetiricaro na quetibu̶ju̶nucũñupũ̶. 35Cabero ti rũ̶mu̶ muipu̶ cũ̶ cajããtõ, Jesús pu̶ame atore bairo na ĩñupũ̶ cũ̶ cabuerãrẽ: —Jito, ati u̶tabu̶cu̶ra ape nu̶gõãpu̶ marĩ pẽña átóca. 36Bairo cũ̶ caĩrõ bero, cũ̶ cabuerã ájããñuparã cũmua cũ̶ cajãatacapu̶, ape nu̶gõãpu̶ pẽñagarã. Bairo na caátó, aperã cũ̶ã na cũmu rupaa mena Jesujãã bero u̶sa asúparã. 37Bairo na caátó yua, wĩno pairo papu atíjũ̶goyuparo. Bairo capapuro ocoturi pairo atíjabejããñuparõ, cũmua ruagari tũ̶nipu̶ yua. 38Mai, Jesús pu̶ame na caátó beroaca, cũmua cawaturo pu̶ame jutipoti buipu̶ cãnijããcoasupu̶. Bairo cũ̶ cabairoi, cũ̶ cabuerã pu̶ame cũ̶ wãcõñuparã. Cũ̶ wãcõrĩ atore bairo qũĩñuparã Jesure: --¡Jããrẽ cabuei, ruarã marĩ baiya! ¿Mu̶ tũ̶goñaẽtĩñati jããrẽ? —qũĩñuparã. 39Bairo na caĩrõ tũ̶gowãcã, wãmu̶nu̶cãñupũ̶ Jesús. Wãmu̶nu̶cã, wĩnorẽ jãnarotiyupu̶. Tunu bairoa oco turi cũ̶ãrẽ: --¡Jãna átoja! —ĩñupũ̶. Bairo cũ̶ caĩrõ, jicoquei jãnapeticoasuparo yua. 40Cabero atore bairo na ĩñupũ̶ Jesús cũ̶ cabuerãrẽ: --¿Nopẽĩrã bu̶tioro mu̶jãã uwiyati? ¿Dios mena mu̶jãã tũ̶goña tutuaetiyati mai? —na ĩñupũ̶. 41Cũ̶ cabuerã pu̶ame cũ̶ caáto ĩñaacu̶acoasuparã. Atore bairo ãmeo ĩñuparã na majũ: —¡Ago tame! ¡Nocãrõ majũ cũ̶ masĩñati Jesús! Wĩno, ocoturi cũ̶ã cũ̶ tũ̶gocõãña.

will be added

X\