SAN MARCOS 16

1Cabero yerijãrĩcã rũ̶mu̶ bero macã rũ̶mu̶ caãno María Magdalena, bairi apeo María Santiago paco, bairi apeo Salomé, caju̶tiñurĩjẽrẽ wapatiyuparã. Jesús rupau̶ri ãnajẽrẽ pioturagarã baimiñuparã. 2Bairo ti rũ̶mu̶, cabu̶su̶ripau̶aca muipu̶ cũ̶ cawãmu̶atípau̶ caãno, ape semana caãni jũ̶gori rũ̶mu̶rẽ Jesús rupau̶ri ãnajẽrẽ na cacũrocaatapau̶pu̶re ásúparã. 3Bairo topu̶ áná, atore bairo ãmeo ĩ ásúparã na majũ: —¿Noa marĩrẽ ti ope na cabiaatatiire na tupãbojarãati? 4Bairo ti masã opere etarã yua, ĩñajoyuparã. Ti opere na cabiaatatii, capairi ũ̶tã tii pu̶ame tupãworicaropu̶ bauyuparo. 5Bairo cabairoi, ti opepu̶ jããñuparã. Bairo jããetari, jĩcãũ̶ cawãmau̶ cariape nu̶gõã pu̶ame jutii caroaro cabotiri wu̶re cajãñaruire qũĩñañuparã. Bairo qũĩñarã yua, acu̶acoasuparã. 6Bairo na cabairo, atore bairo na ĩñupũ̶ caũ̶mu̶ pu̶ame: --Mu̶jãã, uwieticõãña. Yu̶ masĩña. Jesús, Nazaret macã macããcũ̶, yucu̶pãĩpu̶ na capapuaturocamiatacu̶re cũ̶ macãrã mu̶jãã baiya. Ĩñañijate cũ̶rẽ na cacũmiatatore. Merẽ catitunucoami. Bairi atore maniñami. 7Bairo ĩña yaparori bero, tunu ánája macãpu̶. Cũ̶ cabuerã, bairi Pedro cũ̶ãrẽ na quetibu̶ju̶rájá. Atore bairo na mu̶jãã ĩwã: “Merẽ caticuupi Jesús. Bairi mu̶jãã jũ̶goye Galilea yepapu̶ águ̶mi. Topu̶ mu̶jãã cotegu̶mi,” na ĩ quetibu̶ju̶rájá. Bairo cũ̶ cabaipeere mu̶jãã cũ̶ caquetibu̶ju̶cũrĩcãrõrẽã bairo topu̶ cũ̶ mu̶jãã bocagarã yua —na ĩ quetibu̶ju̶yupu̶ ángel María Magdalenajããrẽ. 8Bairo cũ̶ caĩquetibu̶ju̶ro tũ̶go, carõmia pu̶ame yoaro mee acoásúparã. Nanauwirã, bairi tunu tie cabairijere tũ̶goacu̶ari atu̶coásúparã. Bairi aperãrẽ na caĩñaatajere na quetibu̶ju̶esuparã, bu̶tioro uwirã yua. 9Bairo judío majã na cayerijãrĩ rũ̶mu̶ busuri rũ̶mu̶ cabusuro bero Jesús cacatitunuatacu̶ cõ buiaetajũ̶goyupu̶ María Magdalenarẽ. Mai, María pu̶ame cajũ̶goyepu̶re jĩcã wãmo peti pu̶ga pẽnirõ cãrõ majũ wãtĩ yeri pũnaarẽ Jesús cũ̶ caawiyojobojarico ãñupõ. 10Bairo Jesús Maríare cũ̶ cabuiaetaro bero, cũ̶ mena caquetibu̶ju̶ñesẽãnucũrĩcãrãrẽ na quetibu̶ju̶o ácó ásúpo. Mai, na pu̶ame bu̶tioro yapapuari otirã baiãñuparã. 11Bairo, “Jesús merẽ tunu catiupi. Mepu̶ cũ̶ ñiñaapũ̶,” cõ caĩrõ tũ̶gomirãcũ̶ã, cariape cõ tũ̶goesuparã. 12Tipau̶ bero aperã cũ̶ cabuerã pu̶garã caáñesẽãrãrẽ apeire bairo tunu na buiaetayupu̶ Jesús. 13Bairo na cũ̶ cabuiaetaro bero, na cũ̶ã tunucoásúparã Jerusalẽpu̶ cũ̶ cabuerãrẽ na quetibu̶ju̶ráná. Na cũ̶ãrẽ cariape na tũ̶goesuparã cũ̶ cabuerã pu̶ame. 14Cabero tunu cũ̶ cabuerã pu̶ga wãmo peti ru̶pore jĩcãã pẽnirõ caãnacãũ̶ majũ na cau̶garuiripau̶a buiaetayupu̶. Bairo natu̶ buiaetari, “Tunu caticuupi,” na yarã na caĩrĩjẽrẽ cariape na catũ̶goetoi jũ̶gori, “¿Nopẽĩrã, ‘Tunu caticuupi,’ na caĩrĩjẽrẽ cariape mu̶jãã tũ̶goetiyati?” na ĩ tuti etayupu̶ Jesús. 15Bairo ĩ yaparo, atore bairo na ĩ quetibu̶ju̶nemoñupũ̶: “Camasã tocãnacã poari macããnarẽ noo na caãnopu̶, yu̶ yaye caroa quetire na quetibu̶ju̶ ñesẽãrájá, na cũ̶ã yu̶ yaye quetire na catũ̶gou̶saparore bairo ĩrã. 16Bairo noa ũna yu̶ yaye quetire tũ̶gou̶sari, cabautiza rotirã ũna caroaro netõcõãgarãma. Aperã catũ̶gou̶saena pu̶ame roro popiye baigarãma. 17Bairi tunu yu̶re catũ̶gou̶sarãrẽ cũ̶ camasĩrĩjẽrẽ na jogu̶mi Dios. Tiere narẽ cũ̶ cajoro capee wãmerĩ átimasĩgarãma. Yu̶ catutuarije mena wãtĩã camasãrẽ cajãñarãrẽ na acurewiyojo masĩgarãma. Bairi tunu aperã yayere na cabu̶su̶masĩẽtajere bu̶su̶masĩgarãma. 18Ãñarẽ ñerã cũ̶ã, bairi capũnirĩjẽrẽ etirã cũ̶ã, dope bairo baietigarãma. Apeyera tunu cariarãrẽ na wãmorĩ mena na cañigãpeoroa, na cariayecu̶tie netõcoagaro,” na ĩñupũ̶ Jesús. 19Bairo Jesús cũ̶ cabuerãrẽ na ĩ quetibu̶ju̶ yaparori bero, na wu̶weyori, u̶mu̶recóo pu̶amerẽ wãmu̶coásúpu̶. Cũ̶ pacu̶ Dios tu̶pu̶re etau̶, cariape nu̶gõã pu̶ame etari ruiyupu̶ yua. 20Bairo u̶mu̶recóopu̶ cũ̶ cawãmu̶atato bero, cũ̶ cabuerã tocãnacãũ̶pu̶a nipetiropu̶ Jesús yaye quetire quetibu̶ju̶ ñesẽãñuparã. Na caquetibu̶ju̶ñesẽãrõ, marĩ Quetiupau̶ pu̶ame masĩrĩqũẽrẽ na joyupu̶. Capee wãmerĩ átijẽño masĩrĩqũẽrẽ na joyupi, camasã, “Na caquetibu̶ju̶rijere cariapea niña,” na ĩ masĩáto ĩ yua. Tocãrõã ñiña.

will be added

X\