SAN MARCOS 13

1Cabero templo Dios ya wii caãniatacu̶ ti wiire witicoásúpu̶ Jesús. Bairo cũ̶ caátó, jĩcãũ̶ Jesús cũ̶ cabuei atore bairo qũĩñupũ̶: --¡Cabuei, nocãrõ caroa wii majũ to ãniñati ati wii! Paca ũ̶tãpãĩrĩ niña. Ati wii, caroa wiiro majũ nicõãña —qũĩñupũ̶ Jesure jĩcãũ̶ cũ̶ cabuei, templo wiire ĩñarĩ. 2Bairo cũ̶ caĩrõ tũ̶gori, atore bairo qũĩñupũ̶ Jesús cũ̶rẽ: --Ati wii paca ũ̶tãpãĩrĩ ũnie nipetirijere miñaña. Cariape miña: Jĩcã rũ̶mu̶, ati wiire roro na caátipa rũ̶mu̶ caetaro, jĩcã ũ̶tãã ũno bui tuticu̶ti pesaricaro manopu̶ átiyasio rocacõãgarãma ati wiire —qũĩñupũ̶ Jesús cũ̶ cabuei jĩcãũ̶rẽ. 3Cabero Olivo buropu̶ acoásúparã Jesujãã. Mai, Olivo buro Dios ya wii templo jĩãme ãñuparõ. Bairo ti buropu̶ na caetaro, topu̶ ruiyupu̶ Jesús. Bairo cũ̶ caruiro, aperã na camano, cũ̶ cabuerã Pedro, Santiago, Juan, Andrejãã pu̶ame atore bairo qũĩ jẽniñañuparã Jesure: 4“Cabuei, ¿nocãrõpu̶ to bairoati atie mu̶ caĩrĩjẽ? ¿Dope bairo merẽ, ‘Jesús cũ̶ caĩrĩqũẽ etaro baiya,’ jãã ĩ masĩrãati?” 5Bairo na caĩjẽniñarõ tũ̶gori, atore bairo na ĩñupũ̶ Jesús: “Caroaro majũ mu̶jãã tũ̶goñamasĩgarã, jããpu̶ jãã ĩtoecore, ĩrã. 6Capããrã atígarãma ĩtoñesẽãrĩ majã. Atore bairo ĩgarãma: ‘Yu̶a, Mesías yu̶ ãniña Dios cũ̶ cajou̶,’ ĩgarãma. Bairo na ĩrĩ, camasã capããrãrẽ na ĩtogarãma. 7“Tunu bairoa mu̶jãã queti tũ̶gogarã: ‘Camasã aperopu̶ cũ̶ãrẽ ãmeo pajĩãrã átiuparã.’ Bairo na caátie quetire tũ̶gori, tũ̶go acu̶aeticõãña. Ati u̶mu̶recóo capetiparo jũ̶goye bairoa cabaijũ̶goyecu̶tipee niña bairopu̶a. Bairi tũ̶go acu̶aeticõãña. 8Ti yu̶tea caãno jĩcã yepa macããna, ape yepa macããna mena ãmeo pajĩãgarãma. Tunu bairoa jĩcã macã macããna, ape macã macããna mena ãmeo pajĩãgarãma. Tunu tutuaro mena ati yepa cũ̶ã yuguigaro nipetiropu̶. Apeye au̶a riarique atígaro. Jĩcãõ carõmio bairirupau̶ caãcõ cõ macũ̶ cũ̶ cabuiari rũ̶mu̶ capũnirõ tũ̶goñarĩ cõ cawisiojũ̶goriquere bairo niña ati u̶mu̶recóo cabaipee mu̶jããrẽ yu̶ caquetibu̶ju̶rije. 9“Diore caĩroaena na caátiãnierẽ tũ̶goñamasacatiya. Mu̶jããrẽ roro átigarãma. Mu̶jããrẽ ñerĩ, popiye mu̶jãã baio joroque mu̶jãã átigarãma. Quetiuparã tu̶pu̶ mu̶jããrẽ neágarãma, to macããna mu̶jããrẽ na caĩñabeseparore bairo ĩrã. Aperã cũ̶ã sinagogas, na cañubueri wiiripu̶ mu̶jãã bape epegarãma. Tunu yu̶ yarã mu̶jãã caãno jũ̶gori na pu̶ame mu̶jããrẽ roro na catutiparore bairo ĩrã, quetiuparã gobernadores, bairi quetiuparã reyes tu̶pu̶ cũ̶ãrẽ mu̶jãã neágarãma. Bairo na caátimiatacũ̶ãrẽ, na ũnarẽ yu̶ yaye quetire nemojãñurõ mu̶jãã quetibu̶ju̶ masĩgarã bairãpu̶a. 10Atie caroa queti cũ̶ã ati u̶mu̶recóo capetiparo jũ̶goye nipetiropu̶ cajesapeticoa jũ̶goyecu̶tipee niña bairopu̶a. 11Bairi quetiuparã tu̶pu̶ roro mu̶jããrẽ na caneátó, ‘¿Dope bairo na marĩ ĩrãati?’ ĩ tũ̶goña macãẽtĩcõãña. Tipau̶ caetaro ĩña, Dios pu̶ame mu̶jãã caĩmasĩpeere mu̶jãã jogu̶mi. Mu̶jãã catũ̶goñamasĩrĩjẽ mena mu̶jãã quetibu̶ju̶etigarã. Marĩ Pacu̶ Dios mena macããcũ̶, Espíritu Santo cũ̶ camasĩõrĩjẽ jũ̶gori roque mu̶jãã quetibu̶ju̶garã camasãrẽ. 12Tipau̶ caãno, jĩcãũ̶ pũnaa caãna nimirãcũ̶ã, ãmeo bu̶su̶jãbuitirecõãgarãma. Bairo ána, gobiernorẽ na ñerotiri na pajĩãrerotigarãma. Tunu apei cũ̶ã cũ̶ macũ̶rẽ torea bairo cũ̶ átirotigu̶mi. Tunu jĩcãũ̶ pũnaa na pacu̶are boetiri, na pajĩãrerotigarãma. 13Bairi yua, ati u̶mu̶recóo macããna nipetiro mu̶jããrẽ ĩñategarãma, yu̶ yarã mu̶jãã caãnoi. Baipu̶a, ni ũcũ̶ mu̶jãã mena macããcũ̶ yu̶ yaye jĩcã wãmeacã ũnorẽ cũ̶ cajãnaeticõãta, cũ̶ netõgu̶mi Dios. 14“Bairi mu̶jãã pu̶ame Dios ya wiire nocãrõ caroapau̶re moecũ̶ caróu̶ majũ topu̶ cũ̶ caãnierẽ ĩñarã, atore bairo mu̶jãã ĩ tũ̶goñamasĩgarã: ‘Merẽ ati macã yasigaro baiya.’ (Mu̶jãã, atie yu̶ ya pũrõrẽ caĩñabuerã pu̶ame tũ̶gopeoya yu̶ yaye, yu̶ caquetibu̶ju̶rijere.) Bairo cabairo, Judea yepa macããna ũ̶tã yucu̶pu̶ na ruti ápáro. 15Tunu bairoa jĩcãũ̶ ũcũ̶ cũ̶ wii, cabuimacã aru̶apu̶ cũ̶ caãmata, ruiatíri cũ̶ apeyere, ape aru̶apu̶ caãnierẽ cũ̶ jei ápéricõãto. Cariape cũ̶ ácoa ápáro. 16Tunu bairoa cũ̶, wesepu̶ caãcũ̶ cũ̶ jutii ũnierẽ bomicũ̶ã, cũ̶ jetunuu̶ apéricõãto cũ̶ ya wiipu̶. 17¡Carõmia bairirupau̶ caãna popiye netõõrõ baigarãma! ¡Tunu bairoa, caũpũrããcãrẽ, capũnaacu̶na cũ̶ã popiye netõõrõ baigarãma ti rũ̶mu̶rẽ! 18Bairi Diore cũ̶ jẽniña, mu̶jãã carutiripau̶ camasiriyoeti rũ̶mu̶ to caãniparore bairo ĩrã. Cawãma pue yu̶tea caãno to cabaietiparore bairo ĩrã, Diore cũ̶ jẽniña. 19Ti rũ̶mu̶rẽ roro ati yepapu̶re bairique nigaro. Dios cũ̶ caátijũ̶gori rũ̶mu̶ bero tocãnacã rũ̶mu̶rẽ netõrõ popiye bairicapau̶ nigaro ti rũ̶mu̶ caetaro. 20Bairi Dios pu̶ame ti rũ̶mu̶ roro cabairijere cũ̶ cajãnarotieticõãta, camasã nipetiro riapeticoabujiorãma. Bairo na cariapeticoamiatacũ̶ãrẽ, mu̶jãã, cũ̶ cabeserãrẽ mairĩ roque, peeti yu̶tea ũno popiye mu̶jãã cabaipa rũ̶mu̶rẽ áti ẽñotabojagu̶mi. 21“Bairi ni jĩcãũ̶ ũcũ̶, ‘Mesías, Dios cũ̶ cajou̶ pu̶ame ati macãpu̶ etaupu̶,’ o ‘Ji macãpu̶ etaupu̶,’ cũ̶ caĩata, cariape cũ̶ mu̶jãã tũ̶goetigarã. 22Caĩtopairã capããrã átigarãma. ‘Yu̶a, Mesías yu̶ ãniña,’ o ‘Yu̶a, profeta yu̶ ãniña,’ caĩrã átigarãma. Capee átijẽñogarãma, camasã ricaati na catũ̶gou̶saparore bairo ĩrã. Mu̶jãã ũna, Dios cũ̶ cabesericarã cũ̶ãrẽ ĩtomigarãma. 23¡Bairi masacatiya yu̶ yarã! Merẽ mu̶jãã tiere mu̶jããrẽ yu̶ quetibu̶ju̶ jũ̶goyetiya,” na ĩ quetibu̶ju̶yupu̶ Jesús. 24Ĩ quetibu̶ju̶ yaparo, atore bairo na ĩ nemoñupũ̶ tunu: “Camasã roro majũ na cabairi yu̶tea capetiro bero, muipu̶ u̶mu̶recóo macããcũ̶ naitĩãcoagu̶mi. Ñami macããcũ̶ cũ̶ã bauetigu̶mi. 25Ñocõã, u̶mu̶recóore caãnimiatana cũ̶ã ñacoagarãma. Bairo bairã, u̶mu̶recóo macããna nipetirã yugui ñacoagarãma. 26Tocãrõã yu̶, Camasã Jũ̶gocu̶, buseriwo watoapu̶ nocãrõ yu̶ catutuarije mena, bairi yu̶ caasiyabatorije mena yu̶ caatóre ĩñajogarãma. 27Bairo yu̶ caatóre na caĩñajoro yua, yu̶ ũ̶mu̶a, ángelea majãrẽ nipetiropu̶ na yu̶ árotigu̶. Bairi ati u̶mu̶recóo macããna nipetiropu̶ caãnarẽ na neñogarãma yu̶ cabesericarã pu̶amerẽ,” na ĩ quetibu̶ju̶yupu̶ Jesús. 28Ĩ quetibu̶ju̶ yaparo, ati wãmerẽ ĩcõñarĩ na ĩnemoñupũ̶ tunu: “Mai, higuera yucu̶re mu̶jãã masĩña. Ti yucu̶ cawãma pũũ cawasoaro ĩñarã, ‘Merẽ cũ̶ma cõñarõ baiya,’ mu̶jãã ĩ masĩña. 29Torea bairo mu̶jããrẽ yu̶ caquetibu̶ju̶rijere bairo cabaietaro ĩñarã, ‘Merẽ Jesús ati yepapu̶ nemo cũ̶ catunuetaparo cõñarõ baiya,’ mu̶jãã ĩ masĩgarã. 30Cariape mu̶jããrẽ ñiña: Mu̶jããrẽ yu̶ caquetibu̶ju̶rije baipeticoagaro ti yu̶tea macããna na cariaparo jũ̶goye. 31Tunu bairoa ati u̶mu̶recóo, ati yepa cũ̶ã yasipeticoagaro. Yu̶ yaye quetibu̶ju̶rique roque petietigaro. Yu̶ caĩrõrẽã bairo baicoagaro. 32“Bairopu̶a di rũ̶mu̶, di hora majũ mu̶jãã yu̶ caquetibu̶ju̶rije caetaparore ni jĩcãũ̶ ũcũ̶ masĩẽtĩñami. U̶mu̶recóo macããna ángelea majã cũ̶ã masĩẽtĩñama. Marĩ Pacu̶ Dios macũ̶, yu̶ cũ̶ã yu̶ masĩẽtĩña. Marĩ Pacu̶ Dios jeto masĩñami ti rũ̶mu̶ caetaparore. 33“Bairi ti rũ̶mu̶ yu̶ caetapa rũ̶mu̶rẽ mu̶jãã masĩẽtĩña. Bairi masacatiya yu̶ yarã. Cacãnirãrẽ bairo baieticõãña. Caroaro coteya. 34Ti rũ̶mu̶ caetaparo, jĩcãũ̶ quetiupau̶ cũ̶ cabairiquere bairo niña. Cũ̶ pu̶ame ape yepapu̶ cayoaropu̶ águ̶ jũ̶goye, cũ̶ paabojari majãrẽ na piijori, na cũñupũ̶ tocãnacãũ̶pu̶rea cũ̶ ya wii macããjẽ coteriquere caroaro na caqũẽnobojaparore bairo ĩ. Ti wii jope cacotei cũ̶ãrẽ, ‘Masacatiya, cajerutiri majã jããrema,’ qũĩ quetibu̶ju̶ cũñupũ̶. 35Cũ̶ caátó bero caroaro na caãniyurorea bairo baiya mu̶jãã cũ̶ã. Na cũ̶ã, ‘Tocãrõ majũ tunu etagu̶mi marĩ quetiupau̶,’ ĩ masĩẽnama. ‘Canaiorĩpau̶ caãno, ñami recomacã caãno, o ãbocu̶ cũ̶ capiiripau̶, o cabusuripau̶ bero tunu etabujiomi,’ ĩ masĩẽnama. Mu̶jãã cũ̶ã narẽ bairo masĩẽtĩmirãcũ̶ã, yu̶re cotecõã ninucũña. 36Masĩã mano yu̶ caatípau̶re cacãnirãrẽ bairo mu̶jãã ãnibujiorã, tocãnacã rũ̶mu̶a caroaro tũ̶goñamasĩrĩ yu̶re mu̶jãã cacoteeticõãta. 37Bairo mu̶jããrẽ yu̶ caĩrĩjẽrẽ yu̶ yarã nipetirã cũ̶ãrẽ atore bairo mu̶jãã ñiña: ¡Caroaro coteya tocãnacã rũ̶mu̶a!” na ĩ quetibu̶ju̶yupu̶ Jesús.

will be added

X\