SAN LUCAS 3

1Cabero yua, nocãnacã rũ̶mu̶rĩ bero, Juan ãnacũ̶ desierto cayucu̶manopu̶ ãninucũñupũ̶, Zacarías ãnacũ̶ macũ̶ majũ. Mai, tiwatoa Tiberio cawãmecu̶cu̶ nipetiro yepa quetiupau̶ ãñupũ̶. Merẽ wãmorĩ peti jĩcã ru̶po pẽnirõ cãnacã cũ̶marĩ majũ quetiupau̶ ãñupũ̶ Tiberio. Apei, Poncio Pilato cawãmecu̶cu̶ Judea yepa macããnarẽ cũ̶rẽ carotibojau̶ ãñupũ̶. Apei cũ̶ã Herodes cawãmecu̶cu̶ Galilea yepa macããnarẽ cũ̶rẽ carotibojau̶ ãñupũ̶. Apei, Herodes bai cũ̶ã, Felipe cawãmecu̶cu̶ Iturea, Traconite pu̶ga yepa macããnarẽ cũ̶rẽ carotibojau̶ ãñupũ̶. Apei cũ̶ã Lisania cawãmecu̶cu̶ Abilinia yepa macããnarẽ cũ̶ rotibojayupu̶ cũ̶ cũ̶ã Tiberiore. Tunu bairoa Anás, Caifás cawãmecu̶na sacerdote majã quetiuparã majũ ãñuparã na cũ̶ã. Tiwatoa majũ Dios Juarẽ cũ̶ quetibu̶ju̶ áñesẽãrotiyupu̶ yua. 3Bairo cũ̶ caĩrõ tũ̶go, topu̶ ásúpu̶ Juan, Rio Jordán na caĩrĩ yaa tũ̶nipu̶. To macããnarẽ atore bairo na ĩ quetibu̶ju̶yupu̶: “Tũ̶goña qũẽnoña roro mu̶jãã caátiãnierẽ. Tie mu̶jãã cabairijere cũ̶ tũ̶goña jẽniña mu̶jãã majũ Diore. Tunu bairoa cabautizarotiparã mu̶jãã ãniña. Bairo mu̶jãã caáto, mu̶jãã netõgu̶mi Dios,” na ĩñupũ̶ Juan to macããnarẽ. 4Atore bairo ĩ woatu quetibu̶ju̶cũñañupĩ Isaías ãnacũ̶, Dios yau̶ profeta Juan cũ̶ cabaipeere: “Bairo ĩgu̶mi jĩcãũ̶ desierto cayucu̶manopu̶ caãnicõãniatacu̶: ‘Marĩ Quetiupau̶ yoaro mee etagu̶mi. Torena, caroaro cariape ãnicoteya. Camasã na quetiupau̶ cũ̶ caetaparo jũ̶goye cũ̶ caatípawãrẽ na caqũẽnorõrẽ bairo cũ̶ qũẽnoyuya mu̶jãã cũ̶ã. 5Na pu̶ame na quetiupau̶ cũ̶ caatípawãpu̶re ope to caãmata, ñerĩ mena tore cũbiayama. Tunu bairoa ũ̶tã buri to caãmata, yesea qũẽnoñama. Tunu bairoa carupa betori cũ̶ã to caãmata, cariape qũẽno ãmewiyoyama ti wããrẽ. Caroa wãã majũ qũẽnoñama cũ̶ caatípawãrẽ. Tore bairo mu̶jãã cũ̶ã marĩ Quetiupau̶ cũ̶ caetaparore caroaro qũẽnoyuya mu̶jãã yeripu̶. 6Bairo nipetiro camasã narẽ Dios cũ̶ canetõõroticũrĩcũ̶rẽ qũĩñagarãma,’ ĩgu̶mi cayucu̶manopu̶ caãnicõãniatacu̶,” ĩ woatu quetibu̶ju̶ jũ̶goyeticũñupĩ Isaías ãnacũ̶ Juan cũ̶ caĩquetibu̶ju̶peere. 7Bairo Isaías cũ̶ caĩwoatuquetibu̶ju̶ro bero, cayoato bero Juan pu̶ame etayupu̶. Bairo cũ̶rẽ cabautiza rotiratíatanarẽ atore bairo na ĩ quetibu̶ju̶yupu̶: “¡Mu̶jãã caĩtopairã, ãña pũnaarẽ bairo caãna mu̶jãã caãnoi, mu̶jãã yu̶ bautizaecu̶! Atore bairo mu̶jãã ĩ tũ̶goñarã: ‘Dios camasãrẽ cũ̶ caĩñabeseri rũ̶mu̶rẽ popiye marĩ cabaibujioatajere oco mena marĩ cosenetõbujiou̶mi,’ mu̶jãã ĩ tũ̶goñarã. ¿Ñamu̶ mu̶jãã cũ̶ quetibu̶ju̶yati, ‘Tie mena jãã netõgarã,’ mu̶jãã caĩrĩjẽrẽ? Bairo pu̶ame mu̶jãã caátiãnierẽ boya: 8Rorije mu̶jãã caátiere yapapuari caroaro ãnajẽ pu̶ame átijũ̶goya. Bairo mu̶jãã caáto, camasã nipetiro ĩñarã, ‘Torena, na yerire merẽ wasoa yaparoupa,’ ĩ masĩgarãma. Tunu bairoa, ‘¡Marĩã, Abraham ãnacũ̶ pãrãmerã marĩ caãnoi, marĩ netõõgu̶mi Dios!’ ĩ tũ̶goñaeticõãña. Bairo mu̶jãã caĩtũ̶goñamiatacũ̶ãrẽ, dope bairo átinetõmasĩã maniña. Dope bairo Dios bou̶, atie ũ̶tã rupaa mena Abraham pãrãmerãrẽ bairo átiqũẽno jẽñomasĩñami. 9Bairi caroaro mu̶jãã caápericõãta, jĩcãũ̶ yucu̶, caríca maniirẽ quetíjoerocacõãrĩcãrõrẽ bairo mu̶jãã átirecõãgu̶mi Dios mu̶jãã cũ̶ãrẽ. Petoaca ru̶saya mu̶jããrẽ Dios cũ̶ caĩñabesepa rũ̶mu̶,” na ĩ quetibu̶ju̶yupu̶ Juan cũ̶rẽ cabautiza rotiratíatanarẽ. 10Bairo cũ̶ caĩrõ tũ̶go, atore bairo qũĩ jẽniñañuparã to macããna capããrã: —Tame, toroque, ¿ñerẽ jãã átibujiocu̶ti? 11Bairo na caĩjẽniñarõ tũ̶go, Juan pu̶ame atore bairo na ĩñupũ̶: --Nii ũcũ̶ jutiro pu̶garo cacũ̶gou̶, apei cacũ̶goecu̶re jĩcãrõ cũ̶ nuniáto. Tunu bairoa u̶garique cacũ̶gou̶, apei cacũ̶goecu̶re cũ̶ batoáto —na ĩ quetibu̶ju̶yupu̶ Juan catũ̶gorã etarãrẽ. 12Na watoa etayuparã jĩcããrã dinerore jejobojari majã. Roma gobiernorẽ camasã yaye dinerore impuestos cawãmecu̶tiere jejobojari majã etayuparã, cũ̶ bautiza rotirána Juarẽ. Na cũ̶ã qũĩ jẽniñañuparã: —Cabuei, ¿dope jãã caátore cũ̶ boyati Dios? 13Bairo na caĩjẽniñarõ tũ̶go, atore bairo na ĩ quetibu̶ju̶yupu̶: —Mu̶jãã quetiuparã na carotiricaro jĩcãrõ tũ̶ni jeya. Tie netõrõ jeeticõãña. 14Cabero tunu soldaua cũ̶ã cũ̶ eta, qũĩ jẽniñañuparã: —Jãã ate, ¿ñerẽ jãã caátiere cũ̶ boyati Dios? Bairo na caĩjẽniñarõ tũ̶go, na cũ̶ãrẽ na ĩ quetibu̶ju̶yupu̶: --Tutuaro mena camasãrẽ na ẽmaeticõãña. Tunu na bu̶su̶jãẽtĩcõãña caáperãrẽ, marĩrẽ na wapatiáto, ĩrã. Tunu mu̶jãã capaapee wapare mu̶jãã quetiuparã na cajorijerea tocãrõã u̶seanicõãña. Bonemoeticõãña —na ĩ quetibu̶ju̶yupu̶ Juan soldauare. 15Camasã pu̶ame Juan cũ̶ caquetibu̶ju̶rije jũ̶gori bu̶tioro tũ̶goñañuparã. Bairi nipetiro camasã na yeripu̶ atore bairo ĩ tũ̶goñañuparã: “¿Ãni, Juan, Mesías, Dios cũ̶ cajou̶ majũ cũ̶ ãnicu̶ti?” ãmeo ĩ tũ̶goñañuparã na majũ. 16Bairo na caĩtũ̶goñarõ, Juan pu̶ame atore bairo na ĩ quetibu̶ju̶yupu̶: “Yu̶ paarique niña mu̶jããrẽ oco mena yu̶ cabautizarije. Yu̶ paarique to cañumiatacũ̶ãrẽ, yu̶ bero caetau̶ cũ̶ capaarije pu̶ame ñunetõgaro. Cũ̶ roque Espíritu Santore jõmasĩgu̶mi camasãpu̶re. Tunu bairoa camasã roro na catũ̶goñarĩjẽ na wasoao joroque na átigu̶mi. Cũ̶ roque yu̶ netõrõ caãnimajũũ̶ nigu̶mi. Bairi yu̶ pu̶ame jĩcãrõ tũ̶ni yu̶ átipeyomasĩẽtĩña. 17Yu̶ bero caetapau̶ pu̶ame marĩ ĩñabesegu̶mi. Bairo carorãrẽ na beseregu̶mi. Trigo aseri carorijere joerocacõãrĩcãrõrẽ bairo camasã carorãrẽ na beseregu̶mi. Caũ̶petieti peeropu̶ na joeregu̶mi. Caroarã roquere caroaro na qũẽnogu̶mi. Trigo caroa majũrẽ caroaro na caqũẽnocũrõrẽ bairo caroaro na qũẽnogu̶mi caetapau̶ cũ̶ yarã majũrẽ,” na ĩ quetibu̶ju̶yupu̶ Juan catũ̶gorã etarãrẽ Jesús cũ̶ caátipeere. 18Bairo yua, atore bairo capee wãme, camasãrẽ na quetibu̶ju̶yupu̶ Juan caroa queti majũrẽ. 19Bairo caroaro cũ̶ caquetibu̶ju̶miatacũ̶ãrẽ, quetiupau̶ gobernador Herodes cawãmecu̶cu̶ pu̶ame Juan cũ̶ caĩrĩjẽrẽ tũ̶gou̶saesupu̶. Mai, Herodes bai Felipe nu̶morẽ cõ ẽmañupũ̶. Herodías cawãmecu̶co mena ãninucũñupũ̶. Tore bairo apeye ũnie cũ̶ãrẽ roro majũ ásupu̶ Herodes. Bairo bairi roro cũ̶ caátiere cũ̶ quetibu̶ju̶miñupũ̶ Juan Herodere. 20Cabero Herodes pu̶ame cũ̶ caĩrõ tũ̶go, nemorõ roro ásupu̶. Juarẽ preso jorica wiipu̶ cũ̶ jorocacõãñupũ̶ yua. 21Mai, Juan pu̶ame to macããna nipetirãrẽ oco mena na bautizayupu̶. Bairo cũ̶ caáto watoa, Jesús cũ̶ãrẽ cũ̶ bautizayupu̶. Bairo Jesús cũ̶ cajẽnirĩpau̶a yua, jõbui u̶mu̶recóo pu̶ame pããnu̶cãcoasuparo. 22Bairo capãrõ yua, buare bairo ruiasúpu̶ Espíritu Santo, Dios Yeri majũ, Jesús tu̶pu̶. Bairo cũ̶ cabauruiató, jõbuipu̶ bu̶su̶rique atore bairo ĩ ocajoyuparo: --Mu̶, yu̶ macũ̶, yu̶ camai majũ, mu̶ ãniña. Mu̶ caátiãnierẽ ñiñajesoya bu̶tioro —ĩ bu̶su̶ ocajoyuparo jõbuipu̶ bu̶su̶rique. 23Bairi yua, Jesús camasãrẽ cũ̶ caquetibu̶ju̶jũ̶goripau̶ treinta años majũ cũ̶goyupu̶. Mai, Dios macũ̶ cũ̶ caãnimiatacũ̶ãrẽ, “Cũ̶ pacu̶ José niñami,” qũĩ tũ̶goñañuparã camasã Jesure. José pu̶ame Elí cawãmecu̶cu̶ ãnacũ̶ macũ̶ ãñupũ̶. 24Elí pu̶ame Matat cawãmecu̶cu̶ ãnacũ̶ macũ̶ ãñupũ̶. Matat pu̶ame Leví cawãmecu̶cu̶ ãnacũ̶ macũ̶ ãñupũ̶. Leví pu̶ame Melqui cawãmecu̶cu̶ ãnacũ̶ macũ̶ ãñupũ̶. Melqui pu̶ame Jana cawãmecu̶cu̶ ãnacũ̶ macũ̶ ãñupũ̶. Jana pu̶ame José cawãmecu̶cu̶ ãnacũ̶ macũ̶ ãñupũ̶. 25José pu̶ame Matatías cawãmecu̶cu̶ ãnacũ̶ macũ̶ ãñupũ̶. Matatías pu̶ame Amós cawãmecu̶cu̶ ãnacũ̶ macũ̶ ãñupũ̶. Amós pu̶ame Nahúm cawãmecu̶cu̶ ãnacũ̶ macũ̶ ãñupũ̶. Nahúm pu̶ame Esli cawãmecu̶cu̶ ãnacũ̶ macũ̶ ãñupũ̶. Esli pu̶ame Nagai cawãmecu̶cu̶ ãnacũ̶ macũ̶ ãñupũ̶. 26Nagai pu̶ame Maat cawãmecu̶cu̶ ãnacũ̶ macũ̶ ãñupũ̶. Maat pu̶ame Matatías cawãmecu̶cu̶ ãnacũ̶ macũ̶ ãñupũ̶. Matatías pu̶ame Semei cawãmecu̶cu̶ ãnacũ̶ macũ̶ ãñupũ̶. Semei pu̶ame Josec cawãmecu̶cu̶ ãnacũ̶ macũ̶ ãñupũ̶. Josec pu̶ame Judá cawãmecu̶cu̶ ãnacũ̶ macũ̶ ãñupũ̶. 27Judá pu̶ame Joanán cawãmecu̶cu̶ ãnacũ̶ macũ̶ ãñupũ̶. Joanán pu̶ame Resa cawãmecu̶cu̶ ãnacũ̶ macũ̶ ãñupũ̶. Resa pu̶ame Zorobabel cawãmecu̶cu̶ ãnacũ̶ macũ̶ ãñupũ̶. Zorobabel pu̶ame Salatiel cawãmecu̶cu̶ ãnacũ̶ macũ̶ ãñupũ̶. Salatiel pu̶ame Neri cawãmecu̶cu̶ ãnacũ̶ macũ̶ ãñupũ̶. 28Neri pu̶ame Melqui cawãmecu̶cu̶ ãnacũ̶ macũ̶ ãñupũ̶. Melqui pu̶ame Adi cawãmecu̶cu̶ ãnacũ̶ macũ̶ ãñupũ̶. Adi pu̶ame Cosam cawãmecu̶cu̶ ãnacũ̶ macũ̶ ãñupũ̶. Cosam pu̶ame Elmadam cawãmecu̶cu̶ ãnacũ̶ macũ̶ ãñupũ̶. Elmadam pu̶ame Er cawãmecu̶cu̶ ãnacũ̶ macũ̶ ãñupũ̶. 29Er pu̶ame Jesús cawãmecu̶cu̶ ãnacũ̶ macũ̶ ãñupũ̶. Jesús pu̶ame Eliezer cawãmecu̶cu̶ ãnacũ̶ macũ̶ ãñupũ̶. Eliezer pu̶ame Jorim cawãmecu̶cu̶ ãnacũ̶ macũ̶ ãñupũ̶. Jorim pu̶ame Matat cawãmecu̶cu̶ ãnacũ̶ macũ̶ ãñupũ̶. 30Matat pu̶ame Leví cawãmecu̶cu̶ ãnacũ̶ macũ̶ ãñupũ̶. Leví pu̶ame Simeón cawãmecu̶cu̶ ãnacũ̶ macũ̶ ãñupũ̶. Simeón pu̶ame Judá cawãmecu̶cu̶ ãnacũ̶ macũ̶ ãñupũ̶. Judá pu̶ame José cawãmecu̶cu̶ ãnacũ̶ macũ̶ ãñupũ̶. José pu̶ame Jonám cawãmecu̶cu̶ ãnacũ̶ macũ̶ ãñupũ̶. Jonám pu̶ame Eliaquim cawãmecu̶cu̶ ãnacũ̶ macũ̶ ãñupũ̶. 31Eliaquim pu̶ame Melea cawãmecu̶cu̶ ãnacũ̶ macũ̶ ãñupũ̶. Melea pu̶ame Mena cawãmecu̶cu̶ ãnacũ̶ macũ̶ ãñupũ̶. Mena pu̶ame Matata cawãmecu̶cu̶ ãnacũ̶ macũ̶ ãñupũ̶. Matata pu̶ame Natán cawãmecu̶cu̶ ãnacũ̶ macũ̶ ãñupũ̶. 32Natán pu̶ame David cawãmecu̶cu̶ ãnacũ̶ macũ̶ ãñupũ̶. David pu̶ame Isaí cawãmecu̶cu̶ ãnacũ̶ macũ̶ ãñupũ̶. Isaí pu̶ame Obed cawãmecu̶cu̶ ãnacũ̶ macũ̶ ãñupũ̶. Obed pu̶ame Booz cawãmecu̶cu̶ ãnacũ̶ macũ̶ ãñupũ̶. Booz pu̶ame Sala cawãmecu̶cu̶ ãnacũ̶ macũ̶ ãñupũ̶. Sala pu̶ame Naasón cawãmecu̶cu̶ ãnacũ̶ macũ̶ ãñupũ̶. 33Naasón pu̶ame Aminadab cawãmecu̶cu̶ ãnacũ̶ macũ̶ ãñupũ̶. Aminadab pu̶ame Admin cawãmecu̶cu̶ ãnacũ̶ macũ̶ ãñupũ̶. Admin pu̶ame Arni cawãmecu̶cu̶ ãnacũ̶ macũ̶ ãñupũ̶. Arni pu̶ame Esrom cawãmecu̶cu̶ ãnacũ̶ macũ̶ ãñupũ̶. Esrom pu̶ame Fares cawãmecu̶cu̶ ãnacũ̶ macũ̶ ãñupũ̶. Fares pu̶ame Judá cawãmecu̶cu̶ ãnacũ̶ macũ̶ ãñupũ̶. 34Judá pu̶ame Jacob cawãmecu̶cu̶ ãnacũ̶ macũ̶ ãñupũ̶. Jacob pu̶ame Isaac cawãmecu̶cu̶ ãnacũ̶ macũ̶ ãñupũ̶. Isaac pu̶ame Abraham cawãmecu̶cu̶ ãnacũ̶ macũ̶ ãñupũ̶. Abraham pu̶ame Taré cawãmecu̶cu̶ ãnacũ̶ macũ̶ ãñupũ̶. Taré pu̶ame Nacor cawãmecu̶cu̶ ãnacũ̶ macũ̶ ãñupũ̶. 35Nacor pu̶ame Serug cawãmecu̶cu̶ ãnacũ̶ macũ̶ ãñupũ̶. Serug pu̶ame Ragau cawãmecu̶cu̶ ãnacũ̶ macũ̶ ãñupũ̶. Ragau pu̶ame Peleg cawãmecu̶cu̶ ãnacũ̶ macũ̶ ãñupũ̶. Peleg pu̶ame Heber cawãmecu̶cu̶ ãnacũ̶ macũ̶ ãñupũ̶. Heber pu̶ame Sala cawãmecu̶cu̶ ãnacũ̶ macũ̶ ãñupũ̶. 36Sala pu̶ame Cainán cawãmecu̶cu̶ ãnacũ̶ macũ̶ ãñupũ̶. Cainán pu̶ame Arfaxad cawãmecu̶cu̶ ãnacũ̶ macũ̶ ãñupũ̶. Arfaxad pu̶ame Sem cawãmecu̶cu̶ ãnacũ̶ macũ̶ ãñupũ̶. Sem pu̶ame Noé cawãmecu̶cu̶ ãnacũ̶ macũ̶ ãñupũ̶. Noé pu̶ame Lamec cawãmecu̶cu̶ ãnacũ̶ macũ̶ ãñupũ̶. 37Lamec pu̶ame Matusalén cawãmecu̶cu̶ ãnacũ̶ macũ̶ ãñupũ̶. Matusalén pu̶ame Enoc cawãmecu̶cu̶ ãnacũ̶ macũ̶ ãñupũ̶. Enoc pu̶ame Jared cawãmecu̶cu̶ ãnacũ̶ macũ̶ ãñupũ̶. Jared pu̶ame Mahalaleel cawãmecu̶cu̶ ãnacũ̶ macũ̶ ãñupũ̶. Mahalaleel pu̶ame Cainán cawãmecu̶cu̶ ãnacũ̶ macũ̶ ãñupũ̶. 38Cainán pu̶ame Enós cawãmecu̶cu̶ ãnacũ̶ macũ̶ ãñupũ̶. Enós pu̶ame Set cawãmecu̶cu̶ ãnacũ̶ macũ̶ ãñupũ̶. Set pu̶ame Adán cawãmecu̶cu̶ ãnacũ̶ macũ̶ ãñupũ̶. Adán pu̶ame Dios cũ̶ caqũẽnojũ̶goricu̶ ãnirĩ cũ̶ macũ̶rẽ bairo caãcũ̶ ãñupũ̶ yua.

will be added

X\