SAN LUCAS 15

1Bairi ti watoa Roma macããnarẽ camasã yaye dinerore jejobojari majã, aperã carorije caána cũ̶ã Jesús cũ̶ caĩquetibu̶ju̶rijere tũ̶gogarã, cũ̶ tu̶re etanucũñuparã. 2Bairo na caátó ĩña, fariseo majã Jesure qũĩ bu̶su̶paiyuparã. Aperã, Moisés ãnacũ̶ cũ̶ caroticũrĩqũẽrẽ camasãrẽ cajũ̶gobuerã mena qũĩ bu̶su̶paiyuparã atore bairo: --Cũ̶, Jesús carorije caánarẽ boyami. Moena mena u̶gabapacu̶ti nucũñami —qũĩñuparã, Jesús cũ̶ cabairijere ĩñarĩ. 3Bairo na caĩrõĩ, Jesús pu̶ame oveja cacoteire ĩcõñarĩ atore bairo na ĩ quetibu̶ju̶yupu̶: 4“¿Ni ũcũ̶ mu̶jãã mena macããcũ̶ cien oveja majũrẽ cũ̶ cacũ̶goata, bairi jĩcãũ̶ na mena macããcũ̶ cũ̶ camawijiaata, jicoquei cũ̶ macãũ̶ ápéribujiou̶cu̶ti? Jicoquei cũ̶ macãũ̶ ácoabujiou̶mi. Noventa y nueve caãnarẽ ẽñotaricaropu̶ cũcõã, jĩcãũ̶ camawijiaatacu̶re cũ̶ macãũ̶ ábujiou̶mi. 5Bairi caũ̶mu̶ pu̶ame cabero ovejare cũ̶ macã bócari, cũ̶ pu̶sa, tunuatíbujiou̶mi u̶seanirĩ. 6Bairo cũ̶ ya wiipu̶ tunueta, cũ̶ bapare, bairi cũ̶tu̶ macããna cũ̶ãrẽ na neñoporotibujiou̶mi. Bairo na caetaro ĩña, na ĩbujiou̶mi: ‘Jĩcãũ̶ yu̶ oveja, camawijiamiatacu̶re merẽ cũ̶ yu̶ bócaapu̶. Bairi yu̶ mena mu̶jãã cũ̶ã u̶seanirasá,’ na ĩbujiou̶mi. 7Caãnorẽ bairo mu̶jããrẽ ñiña: Jõbui macããna netõjãñurõ u̶seaniñama ati yepa macããcũ̶ carorije caátimiatacu̶ cũ̶ yerire cũ̶ cawasoaro berore. Noventa y nueve camasã cañurã caroaro na caátiãnie netõrõ ĩñajesoyama jõbui macããna pu̶ame,” na ĩñupũ̶ Jesús fariseojããrẽ. 8Ĩ yaparo, ape wãmerẽ ĩcõña quetibu̶ju̶yupu̶ tunu: “¿Dico ũcõ carõmio moneda pu̶ga wãmo cãnacã tiiri majũrẽ cõ cacũ̶goata, bairi jĩcã tii wiipu̶ to cayasicoápata, jicoquei ti tiire cõ macãõ áperibujiocu̶ti? Jicoquei macãõ ácoabujioomo. Cõ jĩñaworique lámparare jĩñawori canaitĩãrõrẽã owa macãbujioomo caroaro mena. Bócaripu̶ owa macãjãnabujioomo yua. 9Bairo carõmio pu̶ame cabero ti tiire macã bócari, cõ baparã rõmirĩrẽ, bairi cõtu̶ macããna cũ̶ãrẽ na neñopo rotibujioomo. Bairi na caetaro ĩña, na ĩbujioomo: ‘Jĩcã moneda tiire, cayasimiata tiire merẽ yu̶ bócaapu̶. Bairi yu̶ mena mu̶jãã cũ̶ã u̶seanirasá,’ na ĩbujioomo. 10Caãnorẽ bairo mu̶jããrẽ ñiña: Torea bairo Dios yarã ángelea majã cũ̶ã u̶seaniñama ati yepa macããcũ̶ carorijere caátimiatacu̶ cũ̶ yerire cũ̶ cawasoaro berore,” na ĩñupũ̶ Jesús fariseojããrẽ. 11Ĩ yaparo, ape wãme cũ̶ãrẽ ĩ cõñañupũ̶: “Jĩcãũ̶ ãñupũ̶ pu̶garã caũ̶mu̶arẽ capũnaacu̶cu̶. 12Bairi jĩcã rũ̶mu̶ cabai pu̶ame atore bairo qũĩñupũ̶ cũ̶ pacu̶re: ‘Caacu̶ mu̶ cariaro bero, mu̶ yaye mu̶ cacũ̶gomirĩqũẽrẽ yu̶re na caricawopeere ãmeacã yu̶ boya. “Jau̶,” miwã,’ qũĩñupũ̶ cũ̶ pacu̶re. Bairo cũ̶ caĩrõ tũ̶go, cũ̶ caĩrõrẽã bairo ásupu̶ cũ̶ pacu̶ pu̶ame. Na, pu̶garãpu̶rea na ricawoyupu̶ cũ̶ yayere yua. 13Bairo cabero, nocãnacã rũ̶mu̶ bero meea cabai pu̶ame cũ̶ cacũ̶gomiataje nipetirijere nunireyupu̶. Bairo áticõã, tie wapa dinerore ñerĩ, acoásúpu̶ cayoaropu̶ ape yepapu̶. Bairo topu̶ eta, noo cũ̶ rupau̶ caborije carorije jetore ásupu̶. Bairo ácu̶, tie dinerore átire peyocõãñupũ̶. 14Bairi cũ̶ dinero capetiro beropu̶, ti yepa macããjẽ u̶garique cũ̶ã peticoasuparo. Bairo cabairoi, caátácu̶ pu̶ame au̶a riajũ̶goyupu̶. 15Bairo au̶ariari, ti yepa macããcũ̶rẽ paarique jẽni ásúpu̶. Bairo cũ̶ cajẽnirõ, to macããcũ̶ pu̶ame cũ̶ yeseare cũ̶ coterotiyupu̶. 16Bairo na cote ãcũ̶ yua, na cau̶garije, qũẽnu ũnierẽã u̶gagamiñupũ̶ cũ̶ cũ̶ã, bu̶tioro queyari. Camasã noa ũna u̶gariquere cũ̶ nuesuparã. 17Bairo roro tãmu̶orĩ cũ̶ pacu̶ paabojari majã na caátiãnierẽ tũ̶goña bócayupu̶: ‘Caacu̶ ũ̶mu̶a capããrã ãma. Ni ũcũ̶ na mena macããcũ̶ queyaemi. Na u̶garique cũ̶ã ru̶sacõãnucũwũ̶ na ya wiipu̶re. ¡Yu̶ roque atopu̶ ãcũ̶, au̶ai yu̶ riaya!’ ĩ tũ̶goñañupũ̶ cawãmau̶. 18Ĩ tũ̶goña, atore bairo ĩ tũ̶goñanemoñupũ̶ tunu: ‘Caacu̶ tu̶pu̶ yu̶ tunuágu̶ tunu. Topu̶ eta, qũĩña, atore bairo cũ̶ ñigu̶: “Caacu̶, Dios mena roro yu̶ átiapu̶. Mu̶ mena cũ̶ãrẽ roro yu̶ átiapu̶. 19Bairo roro yu̶ caátiataje jũ̶gori, mu̶ macũ̶rẽ bairo yu̶ ãmerĩña yua. Apei, mu̶ paabojari majõcu̶re bairo yu̶re miñagu̶ ãmerẽ,” cũ̶ ñigu̶ Caacu̶re,’ ĩ tũ̶goñañupũ̶ cawãmau̶. 20Bairo ĩ tũ̶goña, torea bairo baiyupu̶. Maapu̶ cũ̶ pacu̶ ya macã caátíwãrẽ tunu ásúpu̶ yua. “Bairi jõpũ̶ã mai cawãmau̶ cũ̶ caãno, cũ̶ pacu̶ pu̶ame qũĩñajoyupu̶. Qũĩñajo yua, bopacooro qũĩñañupũ̶ cũ̶ macũ̶rẽ. Bairi cũ̶ tu̶pu̶ atu̶ ásúpu̶. Bairo cũ̶ atu̶ bocá, caroaro cũ̶ jẽni, cũ̶ pabario, u̶seanirĩ cũ̶ bocáyupu̶. 21Bairo cũ̶ caátimiatacũ̶ãrẽ, cũ̶ macũ̶ pu̶ame tũ̶goña yapapuari atore bairo qũĩñupũ̶: ‘Caacu̶, Dios mena roro yu̶ átiapu̶. Mu̶ mena cũ̶ãrẽ roro yu̶ átiapu̶. Bairo roro yu̶ caátiataje jũ̶gori mu̶ macũ̶rẽ bairo yu̶ ãmerĩña yua. Apei, mu̶ paabojari majõcu̶re bairo yu̶re miñagu̶ ãmerẽ,’ qũĩñupũ̶ cawãmau̶ cũ̶ pacu̶re. 22Bairo cũ̶ caĩmiatacũ̶ãrẽ, cũ̶ pacu̶ pu̶ame cũ̶ yu̶esupu̶. Cũ̶ paabojari majãrẽ jutii cũ̶ macũ̶ cũ̶ cawasoapeere na neátí rotiyupu̶: ‘Tãmurĩ jutii caroa majũrẽ jeasá. Tunu bairoa anillo, yu̶ macũ̶ cũ̶ cawãmojããpa beto cũ̶ãrẽ neasá. Tunu bairoa ru̶po jutii cũ̶ capeapee cũ̶ãrẽ jeasá. Cũ̶ marĩ jããto,’ na ĩñupũ̶. 23Ĩ yaparo, bairo na ĩnemoñupũ̶ tunu: ‘Marĩ wecu̶ macũ̶ caroaro majũ cariicu̶cu̶re cũ̶ pajĩãrájá. Cũ̶ marĩ u̶garoa. Ãni, yu̶ macũ̶ cariacoabujioatacu̶ nimicũ̶ã, tunu cacatiatacu̶re bairo niñami ãmerẽ. Cayasicoamirĩcũ̶rẽ cũ̶ marĩ bócaya tunu. ¡Bairi marĩ bose rũ̶mu̶ qũẽnoto! ¡U̶seanirĩ marĩ ãnito!’ na ĩñupũ̶ cũ̶ pacu̶ cũ̶ ũ̶mu̶arẽ. Bairo cũ̶ caĩrõ tũ̶go, cũ̶ caĩrõrẽã bairo ásuparã. Bose rũ̶mu̶ qũẽno jũ̶goyuparã yua. 25“Bairo na cabaiãno, cajũ̶gocu̶ pu̶ame jõpu̶ wesepu̶ ãñupũ̶. Bairo topu̶ paatu̶sa, wiipu̶ tunucoásúpu̶ tunu. Bairo tunuatí wiitu̶ etayupu̶. Bairo etau̶ yua, na cabasarijere tũ̶goyupu̶ wiipu̶re. 26Bairo tũ̶go, paabojari majõcu̶ jĩcãũ̶rẽ cũ̶ piijori qũĩ jẽniñañupũ̶: ‘¿Dope to baiyati?’ 27Bairo cũ̶ caĩrõ tũ̶go, atore bairo qũĩñupũ̶: ‘Mu̶ bai, tirũ̶mu̶pu̶ cañesẽãũ̶ ámirĩcũ̶ etaami. Bairi catiia cũ̶ catunuetaro ĩña, mu̶ pacu̶ pu̶ame wecu̶ macũ̶ caroaro majũ cau̶secu̶cu̶re jãã pajĩãrotiami. “Bose rũ̶mu̶ marĩ qũẽnoto,” ĩãmi mu̶ pacu̶,’ qũĩñupũ̶ paabojari majõcu̶ cajũ̶gocu̶re. 28Bairo cũ̶ caĩrõ tũ̶go, asiacoasupu̶. Ti wiire jããgaesupu̶. Bairo cũ̶ cabairo tũ̶go, cũ̶ pacu̶ pu̶ame macãpu̶ cũ̶ pii asúpu̶, cũ̶ jããparo ĩ. 29Cajũ̶gocu̶ pu̶ame cũ̶ pacu̶re cũ̶ yu̶esupu̶ mai. ‘Caacu̶ nocãrõ yoaro mu̶ mena yu̶ paanucũña. Di rũ̶mu̶ ũno mu̶ yu̶ botioetinucũña mu̶ carotirijere. Bairo caroaro majũ mu̶rẽ yu̶ caĩroamiatacũ̶ãrẽ, di rũ̶mu̶ ũno jĩcãũ̶ãcã ũcũ̶ marĩ canuu̶rẽ yu̶ mu̶ pajĩãrotiepu̶. “Mu̶ baparã mena u̶seanirĩ bose rũ̶mu̶ qũẽnoña,” yu̶ miepũ̶. 30Ãmerẽ ãni mu̶ macũ̶, carõmia caũ̶mu̶ mena caepewapatarã mena mu̶ dinerore caátireatacu̶ pu̶ame etaupi. Bairo cũ̶ catunuetaro ĩña, jicoquei mu̶ pu̶ame jĩcãũ̶ wecu̶ macũ̶ caroaro majũ cau̶secu̶cu̶re cũ̶ mu̶ pajĩãrotiupa, bose rũ̶mu̶ marĩ qũẽñoto, ĩ. Bairo mu̶ caáto ñuetõ,’ qũĩñupũ̶ cajũ̶gocu̶ cũ̶ pacu̶re. 31“Bairo cũ̶ caĩrõ tũ̶go, atore bairo qũĩñupũ̶ cũ̶ pacu̶: ‘Macũ̶ mu̶a, yu̶ mena mu̶ ãninucũña. Bairi yu̶ yaye nipetirije mu̶ yaye niña. 32Mu̶ bai pu̶ame cariacoabujioatacu̶ nimicũ̶ã, tunu cacatiatacu̶re bairo niñami ãmerẽ. Cayasicoamirĩcũ̶rẽ cũ̶ marĩ bócaya tunu. Bairi marĩ cau̶seanirõ ñuña. Bose rũ̶mu̶ marĩ caqũẽnorõ ñuña,’ qũĩñupũ̶ capacu̶ cũ̶ macũ̶ cajũ̶gocu̶re yua,” ĩcõñarĩ na ĩ quetibu̶ju̶yupu̶ Jesús fariseojããrẽ.

will be added

X\