SAN JUAN 21

1Cabero Jesús, jãã, cũ̶ cabuerãrẽ jãã baujaetawĩ tunu Tiberias u̶tabu̶cu̶ra cawãmecu̶tira tũ̶nipu̶. Atore bairo baiwu̶: 2Topu̶re caãna ato cãnacãũ̶ jãã ãmu̶: Simón Pedro, Tomás cawãmecu̶cu̶ apeyera Gemelo na caĩpiinucũũ̶, Natanael, Galilea yepa Caná cawãmecu̶ti macã macããcũ̶ cũ̶ã ãmi. Jãã, Zebedeo pũnaa cũ̶ã pu̶garãpu̶a jãã ãmu̶. Bairi tunu jãã mena macããna pu̶garã aperã cũ̶ã ãma. 3Bairo topu̶ jãã caãno, Simón Pedro pu̶ame atore bairo jãã ĩwĩ: --Wai wei ácú̶ yu̶ baiya —jãã ĩwĩ. Bairo jãã cũ̶ caĩrõ, jãã cũ̶ã bairo cũ̶ jãã ĩwũ̶: --Jãã cũ̶ã mu̶ mena jãã wai werágárã —cũ̶ jãã ĩwũ̶. Bairo qũĩrĩ yua, cũmuapu̶ ájããrĩ jãã acoápú̶, wai weráná. Bairo wai werámirãcũ̶ã, ti ñamirẽ jãã wai pajĩãẽpũ̶. 4Bairo jãã cabaiãno, cabusuñumu̶gõatípau̶, Jesús pu̶ame ti u̶tabu̶cu̶ra tũ̶nipu̶ bauetawĩ. Bairo cũ̶ cabauetaro, jãã cũ̶ cabuerã pu̶ame, “Cũ̶ã, Jesús niñami,” jãã ĩ masĩẽpũ̶, qũĩñamirãcũ̶ã yua. 5Bairi Jesús pu̶ame atore bairo jãã ĩ jẽniñawĩ: --Yu̶ yarã, ¿mu̶jãã wai pajĩãẽtĩñati? —jãã ĩ jẽniñawĩ. Bairo cũ̶ caĩjẽniñarõ, bairo cũ̶ jãã ĩwũ̶: —Jãã pajĩãetiapu̶. 6Jesús pu̶ame tiere tũ̶gori, bairo jãã ĩwĩ: --Bapire cariape nu̶gõã pu̶ame wẽroca ñuajoya. Bairo ána, capããrã mu̶jãã wai pajĩãgarã —jãã ĩwĩ. Bairo cũ̶ caĩrõ, cũ̶ carotirore bairo jãã ápu̶. Bairi yua, bairo jãã caáto, dope bairo bapire jãã áti tũ̶gãmu̶gõpãmu̶o jomasĩẽpũ̶, capããrã majũ bapire wai na cajããrõ jũ̶gori yua. 7Mai, yu̶, bu̶tioro Jesús cũ̶ camainucũũ̶ pu̶ame wai capããrã na cajããrõ ĩñarĩ, Pedrore atore bairo cũ̶ ñiwũ̶: --¡Marĩ Quetiupau̶a niñamima! —cũ̶ ñiwũ̶. Bairo yu̶ caĩrõ tũ̶go, Pedro pu̶ame jicoquei jãã Quetiupau̶ Jesure qũĩñamasĩrĩ, uwaro cũ̶ jutirore jãña, riapu̶ rocañuarĩ baacoámí, Jesús tu̶pu̶ ácú̶. 8Jãã, cũ̶ cabuerã pu̶ame bapire wai jiraricu̶ majũ jãã tũ̶gã pãápu̶ cũmua capairica mena paputiro tũ̶nipu̶. Mai, jãã pu̶ame jõpu̶ mee, paputiro wijaro cien metros cãrõ jãñurĩã caãnoi bapire jãã tũ̶gãpãápu̶, wai capããrã majũ na cajããrõ ĩñarĩ. 9Bairi yua, jãã pu̶ame paputiropu̶ maa etanu̶cãrã, peero riorica peerore jãã ĩñawũ̶. Bairi ti peeropu̶ wai jĩcãũ̶ pũ̶õnu̶cõrĩcũ̶ cũ̶ãrẽ jãã ĩñawũ̶. Pan cũ̶ã ãmu̶ ti peero tu̶re. 10Paputiro tũ̶nipu̶ jãã camaa nu̶cãrõ ĩña, Jesús pu̶ame atore bairo jãã ĩwĩ: --Jĩcããrã ũna ãmeacã mu̶jãã cawai pajĩãetarãrẽ na jeasá ato pu̶ame —jãã ĩwĩ. 11Bairo Jesús jãã cũ̶ caĩrõ tũ̶go, Simón Pedro pu̶ame cũmuapu̶ etajãã, bapire tũ̶gãatí, paputiropu̶ wai capããrã na cajããrĩcũ̶rẽ tũ̶gãmojowĩ. Mai, capacarã jeto ciento cincuenta y tres majũ wai capããrã ti bapire jãñupã. Bairo ti bapire capããrã majũ wai na cajããmiatacũ̶ãrẽ, tii bapi pu̶ame woepu̶. 12Jesús pu̶ame bairo Pedro waire, bapi mena paputiropu̶ na cũ̶ caweemocũ yaparoro ĩña, atore bairo jãã ĩwĩ: --Tiaya. U̶ga wãcãrasá mai mu̶jãã cũ̶ã —jãã ĩwĩ Jesús. Jãã pu̶ame merẽ, “Marĩ Quetiupau̶ Jesua niñami,” jãã ĩ masĩcõãwũ̶. Bairi bairo jãã cũ̶ caĩrõ, jãã pu̶ame jĩcãũ̶ ũcũ̶ pu̶amena, “¿Ñamu̶ majũ mu̶ ãniñati?” cũ̶ jãã ĩ jẽniñaepũ̶ Jesure. 13Bairi yua, Jesús pu̶ame pããrẽ nerĩ, jãã batojowĩ. Wai cũ̶ãrẽ torea bairo jãã batojowĩ. 14Ãme mena merẽ itiani majũ Jesús, jãã, cũ̶ cabuerã caãnimiatanarẽ, cũ̶rẽ na capajĩãrocaro bero cacatitunuatacu̶ jãã tu̶pu̶re buiaeta ĩñou̶ baiwĩ Jesús. 15Bairo jãã cau̶gawãcã yaparoro bero, Jesús pu̶ame Simón Pedrore atore bairo qũĩ jẽniñawĩ: —Simón, Juan macũ̶, mu̶rẽ ñiña: ¿Ãnoa mu̶ baparã netõjãñurõ yu̶ mu̶ maiñati? Bairo Jesús cũ̶ caĩrõ tũ̶go, Simón Pedro pu̶ame atore bairo qũĩ yu̶wĩ: --Yu̶ Quetiupau̶, mu̶ yu̶ maimajũcõãña. Merẽ mu̶ masĩña mu̶ yu̶ camairĩjẽrẽ. Bairo Pedro cũ̶ caĩrõ, Jesús pu̶ame bairo qũĩwĩ: —Baiupa, toroque yu̶ caquetibu̶ju̶cũrĩjẽrẽ cariape catũ̶gou̶sarãrẽ caroaro na coteri na jũ̶goãña. 16Bairo Jesús Pedrore qũĩ quetibu̶ju̶ yaparo, bairo qũĩ jẽniñanemowĩ tunu: —Simón, Juan macũ̶, mu̶rẽ ñiña: ¿Mu̶a, cariapea yu̶ mu̶ maiñati? Bairo Jesús cũ̶ caĩjẽniñarõ, atore bairo qũĩwĩ Pedro: —Yu̶ Quetiupau̶, mu̶ yu̶ maimajũcõãña. Merẽ mu̶ masĩña mu̶ yu̶ camairĩjẽrẽ. Bairo Pedro cũ̶ caĩrõ, Jesús pu̶ame bairo qũĩwĩ: —Baiupa, toroque yu̶ caquetibu̶ju̶cũrĩjẽrẽ cariape catũ̶gou̶sarãrẽ caroaro na coteri na jũ̶goãña. 17Bairi yua ãme mena merẽ itiani majũ atore bairo qũĩ jẽniñanemowĩ Pedrore: —Simón, Juan macũ̶, mu̶rẽ ñiña: ¿Mu̶a, yu̶ mu̶ maiñati? Bairo Jesús itiani majũ cũ̶ cũ̶ caĩjẽniñarõ jũ̶gori, tũ̶goñarĩqũẽ pairique mena atore bairo qũĩ yu̶wĩ Pedro Jesure: —Yu̶ Quetiupau̶, nipetirije yu̶ mu̶ masĩña. Mu̶ masĩña merẽ mu̶ yu̶ camairĩjẽ cũ̶ãrẽ. Bairo Pedro cũ̶ caĩrõ, Jesús pu̶ame bairo qũĩwĩ: --Baiupa, toroque yu̶ caquetibu̶ju̶cũrĩjẽrẽ cariape catũ̶gou̶sarãrẽ caroaro na coteri na jũ̶goãña. 18Cariape mu̶ ñiña: Cawãmau̶ ãcũ̶, mu̶ caborore jutiro jãñarĩ, noo mu̶ caboropu̶ mu̶ áñesẽãnucũñupã. Mu̶ cabu̶cu̶aro yua, aperã camasã pu̶ame mu̶ wãmorĩrẽ ñumu̶gõrĩ, mu̶ juti jããrĩ, mu̶ caágaetopu̶ mu̶ neárocagarãma yua —qũĩwĩ Jesús Pedrore. 19Mai, bairije Pedrore Jesús cũ̶ caĩquetibu̶ju̶ata, Pedro cũ̶ cariapa wãmerẽ ĩ quetibu̶ju̶ masĩõgu̶ ĩwĩ Jesús. Bairo Pedro cũ̶ cabairiapee jũ̶gori camasã Dios cũ̶ catutuarijere na cũ̶ caĩñopeere ĩ quetibu̶ju̶ ĩwĩ Jesús. Bairo ĩ quetibu̶ju̶ yaparo, bairo qũĩwĩ Jesús tunu Pedrore: --¡Nipetirije yu̶ caátiãninucũrõrẽ bairo caroaro áticõã ninucũña! —qũĩ cũwĩ Jesús Pedrore yua. 20Cabero Jesús cũ̶ caĩquetibu̶ju̶ro bero, Pedro pu̶ame ãmejore ĩñau̶ yua, yu̶ majũrẽ ñiñacõãwĩ, yu̶, bu̶tioro Jesús cũ̶ camairẽ. Mai, yu̶ pu̶ame Jesús mena jĩcãrõ jãã cau̶garui tu̶sari watoa Jesús cũ̶tu̶aca ruiri, atore bairo cũ̶ caĩjẽniñarĩcũ̶ã yu̶ ãniña: “Yu̶ Quetiupau̶, ¿ni majũ mu̶rẽ, bairo qũĩ bu̶su̶jã buitirocau̶ati?” cũ̶ caĩjẽniñarĩcũ̶ã yu̶ ãniña. 21Bairo yu̶ ãmejore ĩñarĩ, atore bairo Jesure qũĩ jẽniñawĩ Pedro: --Yu̶ Quetiupau̶, ãnira, ¿dope bairo cũ̶ to bairoati? —qũĩ jẽniñawĩ Jesús. 22Bairo Pedro cũ̶ caĩjẽniñarõ, bairo qũĩwĩ Jesús: --Cũ̶ cabaiyasicoapata cũ̶ãrẽ, o ati yepapu̶ tunu yu̶ caetaro cũ̶ cacaticõãmata cũ̶ãrẽ, mu̶ camasĩpee mee niña. Mu̶a, tiere tũ̶goñarĩ mee, nipetirije yu̶ caátiãninucũrõrẽ bairo caroaro áticõã ninucũña —qũĩwĩ Jesús Pedrore. 23Atore bairo Pedro Jesure cũ̶ caĩjẽniñarõ, Jesús cũ̶ caĩquetibu̶ju̶ataje queti etacoasupa Jesús yarã ñubueri majãpu̶re: “Juan riaetigu̶mi. Caticõã nigu̶mi,” ĩrĩqũẽ queti. Baipu̶a, Jesús pu̶ame yu̶re, “Riaetigu̶mi,” ĩ mee bairo qũĩ quetibu̶ju̶wĩ Pedrore. Atore bairo jeto ĩwĩ: “Cũ̶ cabaiyasicoapata cũ̶ãrẽ, o ati yepapu̶ tunu yu̶ caetaro cũ̶ cacaticõãmata cũ̶ãrẽ, mu̶ camasĩpee mee niña.” Tie jetore ĩwĩ. 24Yu̶a, Jesús cũ̶ cabuei, cũ̶ cabuerique yu̶ caĩñarĩqũẽrẽ caquetibu̶ju̶, ati tutire cawoau̶a yu̶ ãniña. Bairi atie yu̶ caquetibu̶ju̶woaturije caroa cariape macããjẽ queti niña. 25Apeye capee majũ Jesús cũ̶ caátaje nimiña. Bairi nipetirije Jesús cũ̶ caátiãnajẽrẽ marĩ cawoatupeyocõãta, ti tutiri pu̶ame ati u̶mu̶recóore bijapetiro cãrõ nicoabujioro. Tocãrõã ñiña.

will be added

X\