SAN JUAN 17

1Bairo jãã ĩ quetibu̶ju̶ yaparori bero, u̶mu̶recóopu̶ ĩñamu̶gõjori, atore bairo cũ̶ pacu̶ Diore qũĩ jẽniwĩ: “Caacu̶, merẽ tocãrõã yu̶ mu̶ cacõrĩcã yu̶tea etaro baiya. Bairi yu̶, mu̶ macũ̶rẽ nocãrõ mu̶ caátitutuãnierẽ yu̶ u̶pocũña. Bairo mu̶ caáto, yu̶, mu̶ macũ̶ cũ̶ã nocãrõ mu̶ caátitutuãnierẽ nipetiro camasãrẽ na yu̶ áti ĩñogu̶. 2Bairi mu̶ macũ̶rẽ nipetirã ati yepa macããna camasã netõrõ rotimasĩrĩqũẽ cũ̶ãrẽ yu̶ mu̶ jowu̶. Bairo mu̶ caáto yua, caticõãninucũrĩqũẽrẽ nipetiro yu̶ mu̶ cajoricarãrẽ na yu̶ cajomasĩparore bairo ĩ, tiere yu̶ mu̶ jowu̶. 3Caticõãnajẽrẽ masĩrĩqũẽ pu̶ame mu̶, jĩcãũ̶ã Dios cariape majũ mu̶ caãnierẽ, yu̶, Jesucristo mu̶ cajoricu̶ cũ̶ãrẽ camasã na camasĩpee niña. 4“Ati yepapu̶re ãcũ̶ merẽ mu̶ catutuarije mena mu̶ carotirore bairo yu̶ áti yaparobojaya. Ati yepa macããna camasãrẽ na yu̶ masĩõpeyocõãña mu̶ caátitutuãnierẽ merẽ yua. 5Bairi Caacu̶, mu̶rẽ ñiña tunu: Mu̶ caĩñajoropu̶ nocãrõ mu̶ caátitutuarije mena yu̶ átimasĩõ joroque yu̶ ása tunu, mu̶ mena jĩcãrõ yu̶ cacũ̶goriquere bairo ati u̶mu̶recóo caãniparo jũ̶goyepu̶a. 6“Camasã ati yepa macããnarẽ na beseri, yu̶ mu̶ cacũrĩcãrãrẽ merẽ na yu̶ masĩõ peyocõãña mu̶, yu̶ Pacu̶ Dios, mu̶ caãnajẽ cu̶tiere. Na pu̶ame mu̶ cabesericarã mu̶ yarã caãna niñama. Bairo caãna ãnirĩ, mu̶ carotiro mena mu̶ yaye quetire mu̶ yu̶ caquetibu̶ju̶bojaro, caroaro majũ yu̶ tũ̶gou̶sayama. 7Bairi ãmerẽ nipetirije yu̶ mu̶ cajonucũrĩjẽrẽ, ‘Dios cũ̶ cajorije majũ niña,’ ĩ masĩpeyocõãñama merẽ yua. 8Cariape majũ yu̶ mu̶ caquetibu̶ju̶rotirijere na yu̶ quetibu̶ju̶nucũña. Na pu̶ame caroaro majũ yu̶ tũ̶gou̶sayama. Bairi masĩñama mu̶tu̶ mu̶ carotimasĩrĩpau̶ caãnacũ̶ ati yepapu̶ yu̶ mu̶ cajorique cũ̶ãrẽ. 9“Caroaro na ãnio joroque na mu̶ caátiparore bairo ĩ, mu̶rẽ na yu̶ jẽnipeobojaya, mu̶ yarã yu̶ mu̶ cacũrĩcãrã na caãnoi. Ati yepa macããna camasãrẽ mu̶ yaye quetire catũ̶gou̶sagaenarẽ na yu̶ jẽnibojaetinucũña. 10Nipetirã yu̶ yarã yu̶re catũ̶gou̶sarã pu̶ame mu̶ yarã niñama. Bairi nipetirã mu̶ yarã caãna cũ̶ã yu̶ yarã niñama. Bairi na cũ̶ã yu̶ caátitutuãnierẽ camasãrẽ na áti ĩñogarãma. 11“Yu̶ pu̶ame tocãrõã mu̶ tu̶pu̶ yu̶ ãniágu̶. Tocãrõã ati yepare yu̶ ãmerĩgu̶ yua. Yu̶ cabuerã roque ati yepa tuagarãma, bairo mu̶tu̶ yu̶ caãnitoye. Caacu̶, nocãrõ cañuu̶ ãnirĩ, mu̶ catutuarije mena na coteya, mu̶ catutuarije mena na yu̶ cacote nucũrĩcãrõrẽã bairo. Na cũ̶ã jĩcãrõ tũ̶ni marĩ caãnorẽã bairo na caãnimasĩparore bairo ĩ, caroaro na ĩñacoteya. 12Ati yepa ãcũ̶, yu̶ mu̶ cacũrĩcãrãrẽ caroaro majũ na yu̶ qũẽno ãninucũwũ̶, mu̶ catutuarije mena mu̶ carotijoricarorea bairo yua. Bairo na qũẽno ãcũ̶, ni ũcũ̶rẽ cũ̶ yasio joroque yu̶ ápewu̶. Baipu̶a, mu̶ ya tutipu̶ profeta majã ãnana na cawoatujũ̶goyeticũrĩcãrõrẽ bairo cabaipau̶ jeto yasigu̶mi. 13“Bairi mu̶ tu̶pu̶ águ̶ yu̶ baiya. Mai, bairo na mena ati yepapu̶ ãcũ̶na, atore bairo na ñiña, na cũ̶ã bu̶tioro ñe ũnie ru̶saeto na u̶seaniáto, na mena ãcũ̶ bu̶tioro yu̶ cau̶seanirõrẽã bairo. 14Yu̶, mu̶ caquetibu̶ju̶rotiriquere na yu̶ quetibu̶ju̶nucũña. Tunu apeyera ati yepa macããcũ̶ mee yu̶ caãnoi, na pu̶ame cũ̶ã ati yepa macããna meerẽ bairo caãna niñama. Bairi ati yepa macããna camasã pu̶ame na jũnuoñe ĩñajãñunucũñama. 15‘Mu̶ tu̶pu̶ tãmurĩ na jejoya,’ ĩ mee ñiña. ‘Caroaro majũ na qũẽnoña,’ ĩ pu̶ame roque bairo ñiña. ‘Carorije wãtĩ na átirotiremi, na ĩñaricanu̶gõña ĩ,’ bairo mu̶ ñiña. 16Na cũ̶ã ati yepa macããcũ̶ mee yu̶ caãnorẽã bairo ati yepa macããna mee niñama. 17Bairo mu̶ caquetibu̶ju̶rijere mu̶ majũã na u̶poya, mu̶ yaye cariape majũ caãnorẽã bairo na caátiãnimasĩparore bairo ĩ. Mu̶ yaye cariape macããjẽ majũ niña. 18Ati yepapu̶ yu̶re mu̶ caquetibu̶ju̶rotijoricarorea bairo yu̶ cũ̶ã ãnoa yu̶ yarãrẽ na yu̶ bueroti joya camasãrẽ. 19Mu̶ caborore bairo tũ̶gou̶sari caroú̶ ãnigu̶, na carorije wapa na yu̶ riabojagu̶. Bairo na yu̶ cariabojaro, na pu̶ame cũ̶ã caroarã majũ tuagarãma cariapea yua. 20“Ãnoa jũ̶gori jeto mee mu̶rẽ na yu̶ jẽnibojaya. Nipetiro camasã cabero na caquetibu̶ju̶ro catũ̶gou̶saparã cũ̶ãrẽ na yu̶ jẽnibojaya. 21Caroaro na ãnio joroque ĩ, mu̶rẽ na yu̶ jẽnibojaya. Marĩ mena jĩcãrõrẽã bairo caroaro na ãnicõãto na cũ̶ã. Caacu̶, mu̶, yu̶ mena mu̶ caãnorẽã bairo, bairi tunu yu̶ cũ̶ã mu̶ mena yu̶ caãnorẽã bairo na cũ̶ã jĩcãrõrẽã bairo na ãmarõ. Bairo na caãno ĩñarã, ati yepa macããna camasã pu̶ame, ‘Cariape majũã Jesús, Dios cũ̶ cajoricu̶ niñami,’ ĩ masĩgarãma. 22Bairi mu̶ carotimasĩrĩjẽrẽ yu̶ mu̶ cajoricarorea bairo yu̶ cũ̶ã rotimasĩrĩqũẽrẽ na yu̶ joya, jĩcãrõrẽã bairo na tũ̶goña yeri jãña ãmarõ ĩ. Bairo bairã, jĩcãrõ marĩ caãnorẽã bairo na cũ̶ã na ãmarõ. 23Yu̶, na mena yu̶ ãniña. Mu̶ pu̶amea yu̶ mena mu̶ ãniña. Bairo caãna marĩ caãnoi, jĩcãrõ tũ̶ni caãna majũ na tuao joroque na marĩ átigarã. Bairo na marĩ caáto, ati yepa macããna camasã pu̶ame na ĩñarã, ‘Cariape majũã Jesús, Dios cũ̶ cajoricu̶ niñami,’ ĩ masĩgarãma. ‘Cũ̶ caquetibu̶ju̶rijere catũ̶gou̶sarãrẽ na maiñami Dios, cũ̶ macũ̶rẽ cũ̶ camairõrẽã bairo,’ ĩ masĩgarãma. 24“Caacu̶, ati u̶mu̶recóo caãniparo jũ̶goyepu̶a mu̶ camairĩcũ̶ yu̶ ãniña. Bairi mu̶ pu̶ame yu̶ yarã caãniparãrẽ yu̶ mu̶ besebojayupa. Bairi na cũ̶ã yu̶ caãniátó mu̶ tu̶pu̶ na caãnorẽ yu̶ boya. Yu̶ caátitutuãnie yu̶ mu̶ cajorijere na caĩñaparore bairo ĩ, topu̶ na caãnorẽ yu̶ boya. 25Caacu̶, caroú̶ cariape caácu̶ majũ mu̶ ãniña. Ati yepa macããna camasã pu̶ame mu̶ masĩẽtĩnucũñama. Yu̶ pu̶ame roque bairo mu̶ na camasĩẽtĩmiatacũ̶ãrẽ, mu̶ yu̶ masĩjãñunucũña. Bairi ãnoa yu̶ mena caãna cũ̶ã, ‘Cariape majũã Jesús, Dios cũ̶ cajoricu̶ niñami,’ ĩ masĩñama. 26Yu̶ pu̶ame mu̶ caátiãnierẽ caroaro na masĩõ joroque na yu̶ átinucũña. Baipu̶a, bairo jeto mu̶rẽ na masĩcõã ninucũõ joroque na yu̶ áticõã ninucũgu̶, yu̶re mu̶ camai ãninucũrĩjẽrẽ bairo na cũ̶ãrẽ to baiáto ĩ. Yu̶ majũ cũ̶ã na mena yu̶ caãniparore bairo ĩ, mu̶rẽ na masĩcõã ninucũõ joroque na yu̶ áticõã ninucũgu̶,” qũĩ jẽniwĩ Jesús cũ̶ pacu̶ Diore.

will be added

X\