SAN JUAN 16

1“Atore bairo mu̶jãã ñi quetibu̶ju̶ya, yu̶ mena mu̶jãã catũ̶goñatutuacõãniparore bairo ĩ. 2Mu̶jããrẽ roro ñubuerica wiiripu̶ caãnarẽ mu̶jãã acuwiyoregarãma ati yepa macããna camasã. Tunu bairo átiri, mu̶jãã pajĩãrecõãgarãma. Bairo noa ũna mu̶jããrẽ capajĩãregarã pu̶ame, ‘Dios cũ̶ carotiro mena ána marĩ átiya,’ ĩ tũ̶goñamigarãma. 3Tore bairo átigarãma, yu̶re bairi yu̶ Pacu̶ cũ̶ãrẽ camasĩẽna majũ ãnirĩ. 4Atore bairo mu̶jããrẽ ñi quetibu̶ju̶cũña, camasã roro mu̶jããrẽ na caáto ĩñarĩ, yu̶ caĩquetibu̶ju̶riquere cabero mu̶jãã catũ̶goñamasĩparore bairo ĩ,” tore bairo ĩ quetibu̶ju̶wĩ Jesús, jãã, cũ̶ cabuerãrẽ. Ĩ quetibu̶ju̶ yaparo, atore bairo jãã ĩ nemowĩ tunu: “Atie mu̶jããrẽ yu̶ caquetibu̶ju̶rijere caãnijũ̶goripau̶pu̶a mu̶jãã yu̶ quetibu̶ju̶epu̶, mu̶jãã mena caãcũ̶ ãnirĩ mai. 5Bairi ãme roquere yu̶ Pacu̶ yu̶re cajoricu̶ tu̶pu̶ águ̶ majũ yu̶ baiya. Bairo yu̶ caágamiatacũ̶ãrẽ, ni ũcũ̶ mu̶jãã mena macããcũ̶, ‘¿Noopu̶ mu̶ ácú̶ati?’ yu̶re caĩjẽniñagau̶ manimajũcõãñami. 6Bairo ĩrĩcãrõ ũnorẽã, mu̶jãã pu̶ame yu̶ cabaipeere mu̶jããrẽ yu̶ caquetibu̶ju̶rije jũ̶gori bu̶tioro mu̶jãã tũ̶goñarĩqũẽ paicõãña yua. 7Bairi mu̶jããrẽ atore bairo cariape majũ mu̶jãã ñiña: Mu̶jããrẽ yu̶ caaweyocoato ñuña. Mu̶jããrẽ yu̶ caaweyoeticõãta, mu̶jããrẽ cajũ̶goãnitutuapau̶re cũ̶ yu̶ joetibujiou̶. Mu̶jããrẽ yu̶ caaweyocoápáta roque, yu̶ majũã cũ̶ yu̶ jogu̶ Espíritu Santore. 8Cũ̶, Espíritu Santo acú̶pu̶, ati yepa macããna nipetiro camasãrẽ, caroaro majũ na masĩõgu̶mi carorije macããjẽ na caátinucũrĩjẽrẽ. Cariape macããjẽ cũ̶ãrẽ na masĩõgu̶mi. Bairi Dios cũ̶ caĩñabesemasĩrĩjẽ cũ̶ãrẽ na masĩõgu̶mi yua. 9Bairi Espíritu Santo pu̶ame camasãrẽ na masĩõgu̶mi yu̶re na catũ̶gou̶saetie wapa jũ̶gori na cayasipeere. 10Bairi tunu cariape yu̶ Pacu̶tu̶ yu̶ ácoagu̶. Yu̶ mu̶jãã ĩñaetigarã yua. Bairo yu̶ Pacu̶ tu̶pu̶ yu̶ caátíe mena jũ̶gori mu̶jãã masĩõgu̶mi Espíritu Santo pu̶ame caroaro cariape caãcũ̶ yu̶ caãnierẽ yua. 11Tunu bairoa ati yepa macããnarẽ carotimasĩ wãtĩ popiye cũ̶ baio joroque Dios cũ̶ caátipee cũ̶ãrẽ mu̶jãã masĩõgu̶mi. 12“Baipu̶a, capee majũ mu̶jããrẽ yu̶ quetibu̶ju̶gamicu̶pu̶. Mai, ãmerẽ mu̶jãã pu̶ame jicoquei caroaro yu̶ mu̶jãã tũ̶gojĩãti masĩẽtĩbujiorã. 13Bairi Espíritu Santo mu̶jããtu̶ acú̶pu̶, mu̶jãã masĩpeyo joroque mu̶jãã átigu̶mi cariape macããjẽ majũ masĩrĩqũẽrẽ yua. Cũ̶ pu̶ame cariape macããjẽ majũrẽ mu̶jãã quetibu̶ju̶gu̶mi. Baipu̶a, cũ̶ majũ cũ̶ caborore bairo mu̶jãã quetibu̶ju̶etigu̶mi. Dios yaye macããjẽ cũ̶ catũ̶gorijere mu̶jãã quetibu̶ju̶gu̶mi. Bairi tunu nipetirije caberopu̶ cabaipee cũ̶ãrẽ mu̶jãã quetibu̶ju̶ masĩõgu̶mi yua Dios Yeri Espíritu Santo pu̶ame. 14Cũ̶ pu̶ame caroaro majũ yu̶ nu̶cũ̶bu̶gori ñiroagu̶mi. Cũ̶, Espíritu Santo pu̶ame yu̶ yaye yu̶ camasĩrĩjẽ macããjẽrẽ camasĩ ãnirĩ, tiere mu̶jãã quetibu̶ju̶ masĩõgu̶mi. Bairo yu̶ yayere camasĩ ãnirĩ, yu̶ cũ̶ãrẽ bu̶tioro ñiroagu̶mi. 15Bairi nipetirije yu̶ Pacu̶ caroa cũ̶ caátiãnie yu̶ yaye jeto ãno baiya. Bairi, ‘Espíritu Santo pu̶ame tie yu̶ yaye yu̶ camasĩrĩjẽ macããjẽrẽ mu̶jããrẽ masĩõ joroque mu̶jãã átigu̶mi,’ ñiapũ̶. 16“Bairi ãme bero cayoápéroa yu̶ mu̶jãã ĩñaetigarã. Bairo ñiñaetimirãcũ̶ã, cabero jãñurĩpu̶ roque yu̶ mu̶jãã ĩñanemogarã tunu,” ĩ quetibu̶ju̶wĩ Jesús, jãã, cũ̶ cabuerãrẽ. 17Bairije Jesús jãã cũ̶ caĩquetibu̶ju̶rijere tũ̶gori, jãã pu̶ame jãã majũ atore bairije jãã ãmeo ĩ jẽniñawũ̶: --¿Dope bairo ĩgu̶, tore bairije marĩ qũĩ quetibu̶ju̶yati? ¿Dopẽĩ, “Cabero jãñurĩ yu̶ mu̶jãã ĩñaetigarã yua,” marĩ ĩmicũ̶ã, “Tunu cabero jãñurĩpu̶ yu̶ mu̶jãã ĩñanemogarã,” marĩ qũĩñati? ¿Nopẽ ĩgu̶, “Yu̶ Pacu̶ tu̶pu̶ yu̶ águ̶,” marĩ qũĩ quetibu̶ju̶yati? 18¿Dope bairo ĩ quetibu̶ju̶gu̶, “Ãme bero cayoápéroa,” qũĩñati? Bairi, “Tie ĩ quetibu̶ju̶gu̶ ĩñami,” marĩ ĩ tũ̶gomasĩẽtĩmajũcõãña —jãã ãmeo ĩwũ̶. 19Jesús pu̶ame bairo jãã caãmeo ĩrõ, cũ̶rẽ jãã caĩjẽniñagarijere masĩcõãñupĩ. Bairi atore bairo jãã ĩwĩ: —Mu̶jããrẽ bairo ñiapũ̶: “Ãme bero cayoápéroa yu̶ mu̶jãã ĩñaetigarã yua. Bairi tunu cabero jãñurĩpu̶ roque yu̶ mu̶jãã ĩñanemogarã tunu.” ¿Atie mu̶jãã yu̶ caĩatajerea mu̶jãã ãmeo jẽniñacõã niñati? 20Cariape majũ atore bairo mu̶jãã ñi quetibu̶ju̶ya: Mu̶jãã otigarã. Bairo bairã, bu̶tioro mu̶jãã tũ̶goña yapapuagarã. Bairo mu̶jãã cabaimiatacũ̶ãrẽ, ati yepa macããna pu̶ame u̶seanigarãma. Bairo mu̶jãã catũ̶goñayapapuaatato bero, u̶seani tũ̶goñarĩqũẽ pu̶ame mu̶jãã ãniwasoa etagaro yua. 21Jĩcãõ carõmio bairirupau̶ caãcõ cõ macũ̶ cũ̶ cabuiagaro, bu̶tioro wisio tũ̶goñañamo. Tunu bairoa cõ macũ̶ cũ̶ cabuiaro bero roque, wisio tũ̶goñaẽtĩñamo yua. Bairo cõ macũ̶ jĩcãũ̶ ati yepapu̶ cũ̶ cabuiaro jũ̶gori, cawisiomiataco yua cõ macũ̶rẽ ĩñarĩ bu̶tioro tũ̶goña u̶seanicõãñamo. 22Jĩcãõ carõmio cõ cabairore bairo mu̶jãã cũ̶ã ãmeacãrẽ bu̶tioro roro popiye majũ tãmu̶orĩ mu̶jãã yapapuaya. Cabero tunu mu̶jãã tu̶re etau̶pu̶, mu̶jãã ñiñagu̶ tunu. Bairo yu̶ cabairopu̶ ñiñarã, bu̶tioro mu̶jãã yeripu̶ mu̶jãã tũ̶goña u̶seanigarã. Bairo mu̶jãã cau̶seanirĩjẽrẽ ni jĩcãũ̶ ũcũ̶ mu̶jãã u̶seani jãnao joroque mu̶jãã átimasĩẽtĩgu̶mi. 23Cariapea mu̶jããrẽ ñiña: “Mu̶jãã mena yu̶ caãmerĩ rũ̶mu̶ caãnorẽ yua, mu̶jãã caborijere yu̶re mu̶jãã jẽnietigarã. Yu̶ Pacu̶pu̶ roquere cũ̶ mu̶jãã jẽnimasĩgarã. Bairo cũ̶ jẽnirã, mu̶jãã caborijere yu̶ wãme mena ĩrĩ cũ̶ mu̶jãã cajẽnirõ, nipetirijere mu̶jãã jomajũcõãgu̶mi yua. 24Mai, mu̶jãã mena yu̶ caãno, jĩcãni ũno yu̶ wãme mena ĩrĩ, mu̶jãã jẽnietinucũña. Bairi ãmea mu̶jãã jẽnigarã. Bairo mu̶jãã cajẽniata, Dios pu̶ame mu̶jãã jogu̶mi mu̶jãã caborijere, jĩcãrõ tũ̶ni mu̶jãã cau̶seanirĩjẽ to caãnijĩãtiparore ĩrã,” ĩ quetibu̶ju̶wĩ Jesús, jãã, cũ̶ cabuerãrẽ. 25Ĩ quetibu̶ju̶ yaparo, atore bairo jãã ĩ nemowĩ tunu. “Bairi atore bairo mu̶jãã yu̶ caĩquetibu̶ju̶nucũrĩjẽrẽ ĩcõñarĩ mena jeto mu̶jãã yu̶ quetibu̶ju̶nucũña: Bairi ãme ato jũ̶goyere tocãrõã ĩcõñarĩ, mu̶jãã yu̶ quetibu̶ju̶etigu̶. Cariapea yua caroaro majũ yu̶ Pacu̶ yaye caroare mu̶jãã yu̶ quetibu̶ju̶ masĩõpeyocõãgu̶, ĩ cõñarĩcãrõ mano yua. 26Mu̶jãã mena yu̶ caãmerĩ rũ̶mu̶rẽ yua mu̶jãã pu̶ame yu̶ wãme mena ĩrĩ, yu̶ Pacu̶re cũ̶ mu̶jãã jẽninucũgarã. Yu̶ pu̶ame yu̶ Pacu̶re mu̶jãã yu̶ cajẽnibojacõãninucũpee jeto nigaro ĩ mee, bairo mu̶jãã ñiña. Yu̶ Pacu̶ pu̶ame mu̶jãã maiñami, yu̶ cũ̶ãrẽ mu̶jãã camairõ jũ̶gori. Tunu bairoa cariape Dios cũ̶ cajoricu̶ yu̶ caãnierẽ masĩrĩ caroaro yu̶ mu̶jãã catũ̶gou̶sarije jũ̶gori mu̶jãã maiñami. Torena, mu̶jãã pu̶ame roque mu̶jãã majũã cũ̶ mu̶jãã jẽninucũgarã yua. 28Yu̶ pu̶ame yu̶ Pacu̶ cũ̶ carotimasĩrĩpau̶ caãnacũ̶ yu̶ apú̶ ati yepapu̶re, mu̶jãã camasã mena ãni acú̶. Bairo caatácu̶ ãnirĩ, tunu mu̶jãã ati yepa macããna camasãrẽ aweyo águ̶ yu̶ baiya yu̶ caatátopu̶a tunu. Bairi yu̶ caatáto, yu̶ Pacu̶ tu̶pu̶a yu̶ tunuágu̶ tunu,” jãã ĩwĩ Jesús, jãã, cũ̶ cabuerãrẽ. 29Bairo cũ̶ caĩrõ tũ̶gorã, atore bairo cũ̶ jãã ĩwũ̶: --Ãme roque caroaro cariape majũ jãã mu̶ quetibu̶ju̶ya yua. Apeye ũnie cũ̶ãrẽ ĩ cõñanucũrĩ mee, caroaro majũ jãã mu̶ quetibu̶ju̶ya. 30Ãmerẽ yua caroaro majũ jãã mu̶ caquetibu̶ju̶masĩõrõ tũ̶gorã, ni jĩcãũ̶ ũcũ̶ mu̶ jẽniñanemo nucũrĩcãrõ mano jĩcãrõ tũ̶ni majũ mu̶rẽ jãã tũ̶gou̶sa masĩña. Bairi tiere jãã mu̶ caquetibu̶ju̶ro tũ̶gorã, cariape majũ mu̶rẽ jãã masĩña Dios cũ̶ carotimasĩrĩpau̶ caãnacũ̶ mu̶ caatáje cũ̶ãrẽ —cũ̶ jãã ĩwũ̶ Jesure. 31Bairo jãã, cũ̶ cabuerã, cũ̶ jãã caĩrõ tũ̶gori, atore bairo jãã ĩwĩ Jesús: --¿Ãmerẽ yua caroaro majũ ñe ũnie ru̶saricaro mano cariape yu̶ mu̶jãã tũ̶gou̶sacõãñati? 32Mu̶jãã pu̶ame yu̶ mu̶jãã caaweyoparo merẽ etaro baiya. Bairo yu̶re aweyorã, tocãnacãũ̶pu̶a noo mu̶jãã caboropu̶ mu̶jãã ábatacoagarã. Bairo mu̶jãã cabairo, yu̶ pu̶ame roque jĩcãũ̶ã yu̶ tuagu̶. Jĩcãũ̶ã yu̶ ãmerĩña baipu̶a. Yu̶ Pacu̶ Dios pu̶ame yu̶ mena ãniñami. 33Bairi atore bairo nipetirije mu̶jãã ñi quetibu̶ju̶ya, yu̶ mena cũ̶ãrẽ jĩcãrõ tũ̶ni caroaro mu̶jãã catũ̶goña yerijãñacõãninucũparore bairo ĩ yua. Mu̶jããrẽ ati yepa macããna popiye mu̶jãã baio joroque mu̶jãã átiepenucũgarãma. Mu̶jãã pu̶ame bairo mu̶jãã na caátimiatacũ̶ãrẽ, tũ̶goñatutuacõãña. Merẽ yu̶ roque ati u̶mu̶recóo macããjẽ carorijere yu̶ botionetõnu̶cãcõãwũ̶ —jãã ĩ quetibu̶ju̶wĩ Jesús.

will be added

X\