SAN JUAN 15

1Bairo jãã ĩ yaparori bero, Jesús bairo jãã ĩnemowĩ tunu: “Yu̶ pu̶ame u̶sewu̶ caãnimajũrĩ wu̶re bairo caãcũ̶ yu̶ ãniña. Bairi yu̶ Pacu̶ Dios pu̶ame cau̶se otericu̶ majũrẽ bairo caãcũ̶ niñami. 2Bairi u̶sewu̶ jĩcã ru̶pu̶ caríca manicõãta, ti ru̶pu̶re pajure recõãmasĩñami yu̶ Pacu̶. Caroaro ti ru̶pu̶ caríca cu̶pata, carorije ũnierẽ jee reri, caroaro ĩñanu̶nu̶je masĩñami, capee to caríca cu̶tinemoparore bairo yua. 3Bairi mu̶jãã pu̶ame torea bairo yu̶ caátiroticũrĩqũẽrẽ tũ̶gou̶sari caroarã majũ catuarã mu̶jãã ãniña. 4Bairi yu̶re tũ̶gou̶sa jãnaeticõãña. Yu̶ cũ̶ã, mu̶jããrẽ mairĩ, mu̶jãã yu̶ capitietorea bairo mu̶jãã cũ̶ã yu̶re yu̶ tũ̶gou̶sajãnaeticõãña. Bairi merẽ mu̶jãã masĩña: Jĩcã ru̶pu̶ u̶sewu̶ ru̶pu̶ carupau̶ majũpu̶ to caãmerĩcõãta, ríca jomasĩẽtĩña. Carupau̶ majũpu̶a caãni ru̶pu̶ ãnirĩ ríca cu̶timasĩnucũña. Torea bairo mu̶jãã cũ̶ã caroa wãmerẽ mu̶jãã átiãnimasĩẽna, yu̶re tũ̶gou̶sari jĩcãrõrẽ bairo yu̶ mena mu̶jãã caãmerĩcõãta. 5“Bairi yu̶ pu̶ame u̶sewu̶ carupawu̶ majũrẽ bairo caãcũ̶ yu̶ ãniña. Mu̶jãã pu̶ame tiwu̶ u̶sewu̶ ru̶pu̶re bairo caãna mu̶jãã ãniña. Bairi ni jĩcãũ̶ ũcũ̶ yu̶re catũ̶gou̶sacõãcũ̶, yu̶ cũ̶ã cũ̶ mena cũ̶ yeri yu̶ caãmata, jĩcãrõ tũ̶ni caroa macããjẽrẽ átiãnimasĩñami nocãrõ pairo majũ yua. Yu̶, yu̶ camanicõãta, nopẽ bairo caroa macããjẽrẽ mu̶jãã átimasĩẽna. 6Yu̶re tũ̶gou̶sari yu̶ carotirore bairo caátiãmerã na caãmata, rocaecocõãgarãma. Bairo rocaecori yua, peeropu̶ joe ecogarãma, carorije cajĩnirĩjẽ u̶sewu̶ ru̶pu̶re jeri peeropu̶ na cajoererore bairo yua. 7“Bairo yu̶re tũ̶gou̶sari yu̶ carotirore bairo jeto botioricaro mano caátiãna mu̶jãã caãmata, noo mu̶jãã caborijere yu̶ jẽniña. Bairo mu̶jãã cajẽnirõ, noo mu̶jãã caborijere mu̶jãã yu̶ jomasĩña. 8Cariapea yu̶ cabuerã majũ caãna nocãrõ pairo caroa macããjẽrẽ átiãnimasĩñama. Bairo na caátiãnimasĩrĩjẽ jũ̶gori yu̶ Pacu̶ pu̶ame netõjãñurõ camasãrẽ caĩroaecou̶ cañuu̶ majũ tuagu̶mi. 9Torecu̶, bu̶tioro mu̶jããrẽ ñiñamaiña, yu̶ Pacu̶ yu̶re cũ̶ camairõrẽã bairo. Bairo yu̶ camairã ãnirĩ jĩcãrõrẽ bairo yu̶ mena ãnicõã ninucũña tocãnacã rũ̶mu̶a. 10Yu̶ caroticũrĩjẽrẽ caroaro tũ̶gou̶sari, yu̶ carotirore bairo jeto mu̶jãã caáti ãmata, yu̶ camairã, yu̶ yarã majũ mu̶jãã tuagarã. Yu̶ cũ̶ã yu̶ Pacu̶ yu̶ cũ̶ carotirore bairo ácu̶, cũ̶ camai majũ yu̶ caãnorẽã bairo mu̶jãã cũ̶ã yu̶ camairã majũ mu̶jãã tuagarã. 11“Atore bairo mu̶jãã ñi quetibu̶ju̶ya, caroaro yu̶ mena mu̶jãã cau̶seanimasĩparore bairo ĩ. Tunu bairoa mu̶jãã cau̶seani coterije caroaro jĩcãrõ tũ̶ni to caãnijĩãtiparore bairo ĩ, tore bairo ñi quetibu̶ju̶ya. 12Bairi atore bairo mu̶jãã yu̶ átiroticũña: Mu̶jããrẽ yu̶ camainucũrõrẽã bairo mu̶jãã cũ̶ã tocãnacãũ̶pu̶a ãmeo maiña. 13Nocãrõ cũ̶ yarãrẽ camaimajũũ̶ cũ̶ caãmata, cũ̶ majũ rupau̶ mena cũ̶ãrẽ popiye tãmu̶orĩ cũ̶ jũ̶gori riamasĩñami. 14Bairi mu̶jãã yu̶ caroticũrĩjẽrẽ jĩcãrõ tũ̶ni mu̶jãã caátimasĩata, yu̶ yarã, yu̶ baparã majũ mu̶jãã ãniña. 15Bairi ãmerẽ yua yu̶ paabojari majãrẽ bairo mu̶jãã ñiñaẽtĩña. Mai, capaabojari majõcu̶ pu̶ame cũ̶ quetiupau̶ nipetirije cũ̶ caátiãninucũrĩjẽrẽ masĩẽtĩñami. Bairi ãmerẽ ‘yu̶ baparã’ mu̶jãã ñiña, nipetirije yu̶ Pacu̶ yu̶ cũ̶ caquetibu̶ju̶rotiriquere mu̶jãã yu̶ camasĩõrõ jũ̶gori yua. 16Mu̶jãã, yu̶re bori yu̶ mu̶jãã beseepu̶. Yu̶ pu̶ame roque mu̶jããrẽ mairĩ mu̶jãã yu̶ besewu̶. Bairo mu̶jããrẽ beseri caroa quetire mu̶jãã yu̶ quetibu̶ju̶ rotijoya capããrã camasãrẽ, yu̶ yarã na ãnicõã ninucũõ joroque mu̶jãã caátiparore bairo ĩ. Tore bairo mu̶jãã caátiãnimasĩata, yu̶ wãme mena ĩrĩ nipetirije mu̶jãã cajẽnirĩjẽrẽ mu̶jãã jogu̶mi yu̶ Pacu̶. 17Bairi atiere mu̶jãã yu̶ átiroticũña: Nipetiro tocãnacãũ̶pu̶a ãmeo maiña,” ĩ quetibu̶ju̶wĩ Jesús, jãã, cũ̶ cabuerãrẽ yua. 18Ĩ quetibu̶ju̶ yaparo, atore bairo jãã ĩnemowĩ tunu: “Ati u̶mu̶recóo macããna, mu̶jãã, yu̶ yarãrẽ na caĩñateata, merẽ yu̶re caĩñatejũ̶goricarã ñiñama. Tiere mu̶jãã camasĩrõ yu̶ boya. 19Mu̶jãã cũ̶ã ati yepa macããna cariapea mu̶jãã caãmata, na, camasã cũ̶ã mu̶jãã maibujiorãma, na yarãrẽ na camairõrẽã bairo. Yu̶ pu̶ame roque mu̶jããrẽ ati yepa macããna mena macããnarẽ mu̶jãã yu̶ besewu̶. Bairi mu̶jããrẽ ati yepa macããna pu̶ame bu̶tioro mu̶jãã teyama, merẽ ati yepa macããna mee mu̶jãã caãno jũ̶gori yua. 20Cajũ̶goye atore bairo mu̶jãã yu̶ caquetibu̶ju̶atajere tũ̶goñanemoñijate: Ni jĩcãũ̶ ũcũ̶ paabojari majõcu̶ cũ̶ quetiupau̶ netõjãñurõ ãmerĩñami. Yu̶re roro yu̶ áti u̶sanucũwã, yu̶ pajĩãgarã. Bairi mu̶jãã cũ̶ãrẽ torea bairo roro mu̶jãã átigarãma. Tunu bairoa yu̶ yaye quetire na catũ̶gou̶saata, mu̶jãã cũ̶ãrẽ mu̶jãã tũ̶gou̶sagarãma mu̶jãã caquetibu̶ju̶rijere. 21Bairãpu̶a, aperã camasã mu̶jããrẽ roro jeto átinucũgarãma, yu̶ caquetibu̶ju̶rijere tũ̶gou̶sari camasãrẽ na mu̶jãã caquetibu̶ju̶netõrĩjẽ jũ̶gori. Bairo mu̶jããrẽ caátinucũrã pu̶ame yu̶ Pacu̶ Dios yu̶re ati yepapu̶ cajoricu̶re camasĩẽna ãnirĩ bairo mu̶jãã átinucũgarãma. 22“Ati yepa macããna nipetiro camasã na carorije wapare na yu̶ caquetibu̶ju̶masĩõũ̶ ápericõãta, yu̶re na catũ̶gou̶saetie wapa, wapa cũ̶goetibujiorãma. Ãmerẽ yua narẽ yu̶ caquetibu̶ju̶ro bero, ‘Carorije cawapa mána jãã ãniña,’ ĩ netõmasĩẽtĩñama. 23Bairi tunu jĩcãũ̶ ũcũ̶ yu̶re caĩñatei pu̶ame yu̶ Pacu̶ Dios cũ̶ãrẽ caĩñateire bairo ãcũ̶ baiyami. 24Ati yepa macããna camasãrẽ caroa wãme áti ĩñorĩqũẽrẽ na yu̶ caáti ĩñou̶ ápericõãta, yu̶ caátiere na caĩroaetie wapa, wapa cũ̶goetibujiorãma. Bairo na yu̶ caáti ĩñorĩjẽrẽ ĩñamirãcũ̶ã, ñiñagaetiyama. Bairo bairã, yu̶ Pacu̶ Dios cũ̶ãrẽ caĩñaterãrẽ bairo ãna baiyama. 25Atore bairo cabaipeere Dios ya tutipu̶ ĩ woatujũ̶goyeticũñañupã: ‘Ñe apeye ũnie jũ̶gori cabuicu̶peirea qũĩña tejãñugarãma,’ ĩ woatu quetibu̶ju̶yupa. 26“Bairi mu̶jããrẽ cajũ̶goãnitutuapau̶ Espíritu Santo cariape caãcũ̶ majũrẽ yu̶ Pacu̶ jũ̶gori mu̶jãã yu̶ cajopau̶ pu̶ame, yu̶, cariape yu̶ caãnierẽ mu̶jãã masĩõgu̶mi. 27Mu̶jãã pu̶ame merẽ yu̶ mena cajũ̶goripau̶pu̶a yu̶ mu̶jãã masĩcõã ninucũwũ̶. Bairo mu̶jãã cũ̶ã yu̶re camasĩrã ãnirĩ cariapea na masĩõ joroque na mu̶jãã átigarã camasãrẽ yu̶ caátiãnierẽ.

will be added

X\