SANTIAGO 5

1Mu̶jãã, cadinero cũ̶gonetõrĩ majã, tame, tũ̶goya yu̶ caĩrĩjẽrẽ: ¡Popiye mu̶jãã cabaipeere tũ̶goñarĩ yapapuarotiya! ¡Bu̶tioro otiricaro cãrõ tũ̶goña yapapuaya! 2Capee ãme mu̶jãã cacũ̶gomirĩjẽ boayasicoagaro. Jutii caroa mu̶jãã cũ̶gomirĩjẽ cũ̶ãrẽ moena butua u̶garerã átiyama. 3Mu̶jãã yaye dinero oro, plata ũnie cũ̶ã u̶tawitiri boaro baiya. Tiere ĩñarã, nipetiro camasã, “Dinerore camairã niñama,” mu̶jããrẽ ĩ masĩñama. Bairo camairã mu̶jãã caãnoi, jicoquei popiye mu̶jãã baio joroque mu̶jãã átigu̶mi Dios. Mu̶jãã pu̶ame pairo majũ mu̶jãã jeneño netõõcõãñupã ati rũ̶mu̶rĩ, caãnitu̶sari rũ̶mu̶rĩrẽ. 4Tunu bairoa mu̶jãã paabojari majãrẽ na mu̶jãã wapatiesupa na cawapatamirĩjẽrẽ. Bairi Dios nocãrõ capããrã ángelea majãrẽ carotimasĩ pu̶ame mu̶jããrẽ na cawapajẽnirĩjẽrẽ tũ̶gou̶mi. “Jããrẽ wapa joetiyama jãã quetiuparã,” paabojari majã cũ̶ na caĩrĩjẽrẽ tũ̶gou̶mi. 5Mu̶jãã ati yepapu̶ ãna, capee majũ mu̶jãã cũ̶goya. Bairo cacũ̶gorã ãnirĩ, noo mu̶jãã rupau̶ caborore bairo jeto mu̶jãã cajesorijere mu̶jãã átiãninucũña. Mu̶jãã, wecu̶ nurĩcũ̶rẽ na capajĩãparo jũ̶goye, na canuu u̶cu̶orore bairo mu̶jãã ãnajẽ cu̶tiya. Wecu̶re cũ̶ na capajĩãrĩ rũ̶mu̶ caetarore bairo, mu̶jãã cũ̶ãrẽ petoaca ru̶saya Dios roro mu̶jããrẽ cũ̶ caátipa rũ̶mu̶. 6Tunu, aperã na cabuicu̶perimiatacũ̶ãrẽ, mu̶jãã pu̶ame, “Mu̶jãã buicu̶tiya,” na mu̶jãã ĩña. Ĩ yaparori bero, narẽ mu̶jãã pajĩãrerotiya. Bairo mu̶jãã caáto, na pu̶ame ãmemasĩẽtĩñama. 7Bairi mu̶jãã pu̶ame roque yu̶ bairãrẽ bairo caãna, popiye baimirãcũ̶ã, tũ̶goñaenarẽ bairo tũ̶goñanetõcõãña marĩ Quetiupau̶ nemo cũ̶ catunuatípa rũ̶mu̶ caetaparo jũ̶goye. Wese paari majõcu̶ cũ̶ cabairijere tũ̶goñaña mai: Cũ̶ pu̶ame cũ̶ wesere caocajãjũ̶gopeere patowãcãẽcũ̶ coteyami. Cabero yua, cũ̶ ote, cabu̶tiro ĩñarĩ, tunu caocomani rũ̶mu̶rẽ patowãcãẽcũ̶ coteyami, tie caroa ríca majũrẽ jegu̶. 8Torea bairo mu̶jãã cũ̶ã Jesús nemo cũ̶ catunuetaparore patowãcãẽna, cũ̶ coteya. Merẽ marĩ Quetiupau̶ nemo cũ̶ caetapa rũ̶mu̶ cõñarõ baiya. Bairi tũ̶goñatutuacõã ninucũña. 9Mu̶jãã, yu̶ bairãrẽ bairo caãna, ãme popiye mu̶jãã cabairijere ãmeo bu̶su̶paieticõãña, Dios pu̶ame roro mu̶jãã cabu̶su̶pairijere ĩñacõñarĩ mu̶jããrẽ cũ̶ caĩñabeseetiparore bairo ĩrã. Camasã na caátajere caĩñabesei ati yepapu̶ cũ̶ caetapa rũ̶mu̶ cõñarõ majũ baiya. 10Mu̶jãã, yu̶ bairãrẽ bairo caãna, yu̶ camairã tũ̶goñaña mai profeta majã ãnana na cabairiquere: Na pu̶ame Dios bu̶su̶riquere camasãrẽ na quetibu̶ju̶netõõñesẽãñupã. Popiye baimirãcũ̶ã, tũ̶goñaenarẽ bairo tũ̶goñanetõõcõãñupã. Narẽ bairo mu̶jãã cũ̶ã popiye baimirãcũ̶ã, tũ̶goñanetõõcõãña roro mu̶jãã catãmu̶orĩjẽrẽ. 11Bairi marĩ pu̶ame bairo na cabairiquere tũ̶gorã, “U̶seanirĩ ãñupã na ũna Dios mena catũ̶goñanetõmasĩrĩ majã,” marĩ ĩ tũ̶goñaña. Merẽ mu̶jãã tũ̶goyupa Job cawãmecu̶cu̶ ãnacũ̶ cũ̶ cabairique cũ̶ãrẽ. Cũ̶ cũ̶ã popiye baimicũ̶ã, tũ̶goñaecũ̶rẽ bairo tũ̶goñanetõõcõãñupĩ. Tunu bairoa mu̶jãã tũ̶goyupa Job popiye cũ̶ cabairicaro bero marĩ Quetiupau̶ cũ̶rẽ cũ̶ caju̶átinemorĩqũẽrẽ. Marĩ Quetiupau̶ pu̶ame nipetiro camasãrẽ bopacooro caĩñau̶ majũ niñami. Torecu̶ nipetiro mu̶jãã cũ̶ãrẽ mu̶jãã ju̶átinemogu̶mi. 12Apeyera mu̶jãã, yu̶ bairãrẽ bairo caãnarẽ, mu̶jãã yu̶ quetibu̶ju̶nemoña tunu caãnimajũrĩ wãmerẽ: “Dios mena jãã ĩña,” ĩ bu̶su̶eticõãña. Tore bairo ape wãmerĩ cũ̶ãrẽ ĩ bu̶su̶eticõãña. Bairi, “Cariape jãã ĩña,” tocãrõã ĩcõãjãna ánája. “Dios mena jãã ĩña,” ĩ bu̶su̶nemoẽtĩcõãña, “Roro mu̶jãã ĩña,” mu̶jããrẽ Dios cũ̶ caĩẽtĩparore bairo ĩrã. 13Apeyera tunu: Ni jĩcãũ̶ ũcũ̶ mu̶jãã mena macããcũ̶ popiye bairi cũ̶ cayapapuata, Diore cũ̶ jẽniáto. Apei caroaro u̶seanirõ cũ̶ caãmata, Diore basariquere cũ̶ basapeoáto. 14Tunu apei cariau̶ cũ̶ caãmata, ñubueri majãrẽ cajũ̶goãnarẽ na cũ̶ piiáto, “Diopu̶re yu̶ na jẽnibojaáto,” ĩ. Bairi na pu̶ame u̶se aceituna mena cariau̶re cũ̶ tuu yaparori bero, marĩ Quetiupau̶ wãme mena ĩrĩ cũ̶ na cajẽnibojaro boya, cũ̶ camasĩrĩjẽ mena cariau̶re cũ̶ cacatioparore bairo ĩrã. 15Bairi Dios mena tũ̶goñatutuari na cajẽniata, netõcoagaro cũ̶ riaye. Marĩ Quetiupau̶ cũ̶ camasĩrĩjẽ jũ̶gori cariayecu̶cu̶ nimicũ̶ã, caticoagu̶mi yua. Tunu bairo cũ̶ pu̶ame rorije caátacu̶ cũ̶ caãmata cũ̶ãrẽ, roro cũ̶ caátajere cũ̶ masiriyobojagu̶mi Dios. 16Bairi mu̶jãã cũ̶ã roro mu̶jãã caátajere ãmeo quetibu̶ju̶ya mu̶jãã majũ. Bairo quetibu̶ju̶ri yua, ãmeo jẽnibojaya Diopu̶re, mu̶jãã riayere cũ̶ canetõõparore bairo ĩrã. Bairi caũ̶mu̶ ñe ũnie carorije wapa cacũ̶goecu̶ pu̶ame Diore bu̶tioro cũ̶ cajẽniata, cũ̶ cajẽnirĩjẽ cũ̶ yu̶eticõã cũ̶ baietigu̶mi Dios. 17Tũ̶goñañijate profeta Elías ãnacũ̶ cũ̶ caátajere: Marĩrẽ bairo caãcũ̶ cũ̶ caãnimiatacũ̶ãrẽ, Dios pu̶ame caroaro cũ̶ yu̶yupu̶ bu̶tioro cũ̶rẽ cũ̶ cajẽnirĩjẽrẽ. “To oco ocaeparo,” Elías cũ̶rẽ cũ̶ caĩjẽnirõ jũ̶gori, oco joesupi Dios ati yepare itia cũ̶ma ape cũ̶ma recomacã cãrõ yoaro majũ. 18Cabero, “To oco ocáto tunu,” cũ̶ caĩjẽnirõ bero, oco joyupi tunu Dios. Bairi ati yepa tunu oterique putijũ̶goyuparo, Elías Diore cũ̶ cajẽnirõ jũ̶gori. 19Apeyera tunu, mu̶jãã, yu̶ bairãrẽ bairo caãna, ni jĩcãũ̶ ũcũ̶ mu̶jãã mena macããcũ̶ Jesús bu̶su̶riquere cajãnamiatacu̶ pu̶ame apei cũ̶ cabeyorije jũ̶gori Jesure tunu cũ̶ caĩroata, netõgu̶mi. Capee roro cũ̶ caátiere netõgu̶mi, apei cũ̶ cabeyorije jũ̶gori. Bairi cũ̶ bapa pu̶ame cũ̶ yeri pũna cayasicoabujioatajere cũ̶ netõõ joroque cũ̶ átibojagu̶mi yua. Tocãrõã niña atie queti yu̶ cawoaturije.

will be added

X\