SANTIAGO 4

1¿Ñe jũ̶gori roro mu̶jãã ãmeo tutiyati? Mu̶jãã majũ mu̶jãã yeri pũnapu̶ roro mu̶jãã caátigatũ̶goñarĩjẽ jũ̶gori roro mu̶jãã ãmeo tutiya. 2Apeye ũnierẽ mu̶jãã bomiña. Bairo bomirã yua, aperã cacũ̶gorãrẽ na mu̶jãã pajĩãganucũña. Tunu bairoa aperã yayere ĩñarĩ mu̶jãã u̶garipeaya. Bairo bu̶tioro ĩñau̶garipeari, roro mu̶jãã átiya, tiere bomirã. Aperã cacũ̶gorãrẽ roro na mu̶jãã tutinucũña. Tunu bairoa mu̶jãã caborijere mu̶jãã bócaetinucũña, Diore mu̶jãã cajẽnietĩẽ wapa jũ̶gori. 3Diore mu̶jãã jẽniña bairãpu̶a. Bairo jẽnimirãcũ̶ã, caroaro mu̶jãã jẽnietinucũña. Mu̶jãã rupau̶ caátigarije jetore tũ̶goñarĩ, roro cũ̶ mu̶jãã jẽniña. Torecu̶, mu̶jãã cajẽnirĩjẽrẽ yu̶etiyami Dios. 4Mu̶jãã jĩcã rũ̶mu̶rẽ Diore cũ̶ boo, ape rũ̶mu̶rẽ cũ̶ boeti, mu̶jãã cabaiata, jĩcãõ cõ manapu̶ mena caãnimasĩẽcõrẽ bairo mu̶jãã ãniña. “Noa ũna ati yepa macããjẽrẽ roro cau̶garipea netõrã pu̶ame Diore caĩñaterãrẽ bairo niñama,” ¿mu̶jãã ĩ tũ̶goñaẽtĩñati? Ni jĩcãũ̶ ũcũ̶ ati yepa macããjẽrẽ roro cũ̶ cau̶garipeanetõata, Diore caĩñateire bairo caãcũ̶ nicõãgu̶mi. 5Torea bairo quetibu̶ju̶ya Dios yaye cũ̶ caquetibu̶ju̶cũrĩqũẽ cũ̶ã: “Marĩ Pacu̶ pu̶ame Espíritu Santo marĩ yeripu̶ cũ̶ cajoricu̶re cũ̶ mainetõmajũcõãñami. Torecu̶, apei yeri pũna roquere marĩ yeripu̶ marĩ cacũ̶goro boetimajũcõãñami,” ĩ quetibu̶ju̶ya Dios yaye bu̶su̶rique. 6Bairi marĩrẽ mairĩ ju̶átigu̶mi. Tunu cũ̶ yaye bu̶su̶rique apepau̶pu̶, atore bairo ĩ quetibu̶ju̶ya: “ ‘Jãã jeto jãã masĩña jãã caátipeere,’ caĩrãrẽ na caátigarijere na ẽñotayami Dios. ‘Dios jeto masĩñami,’ caĩrã roquere caroaro mena na ju̶átinucũñami,” ĩ quetibu̶ju̶ya Dios bu̶su̶rique. 7Bairi Dios cũ̶ caborore bairo jeto ása. Wãtĩ mu̶jããrẽ cũ̶ cabu̶su̶jãrĩjẽrẽ tũ̶gou̶saeticõãña. Bairi wãtĩrẽ, “Mu̶ caĩrõrẽ bairo jãã áperigarã,” tutuaro mena cũ̶ mu̶jãã caĩata, tocãrõã yua mu̶jãã patowãcõ jãnacõãgu̶mi. 8¡Diore cũ̶ tũ̶goñaña, tame! Bairo mu̶jãã catũ̶goñarõ, cũ̶ cũ̶ã mu̶jãã tũ̶goñagu̶mi. Mu̶jãã, carorije caána ãnirĩ roro mu̶jãã caátinucũrĩjẽrẽ jãnacõãña. Caroa jetore ása. Tunu bairoa mu̶jãã, ricaati catũ̶goñarã roro mu̶jãã catũ̶goñarĩjẽrẽ jãnacõãña. “Diore camairã nimirãcũ̶ã, ati yepa macããjẽrẽ roro marĩ cau̶garipearo ñurõ,” mu̶jãã caĩtũ̶goñarĩjẽrẽ jãnacõãña. 9Roro mu̶jãã caátiere tũ̶goñarĩ, tũ̶goña yapapuarotiya. Otiricaro cãrõ tũ̶goña yapapuaya. Boyetiricaro ũnorẽã, otirotiya. U̶seanirĩcãrõ ũnorẽã, yapapuarotiya, roro mu̶jãã caátiere tũ̶goñarĩ. 10Bairo mu̶jãã tocãnacãũ̶pu̶a marĩ Quetiupau̶re, “Cañuecũ̶ yu̶ ãniña. Bairi bopacooro ñiñagu̶,” qũĩ bu̶su̶qũẽnoña. Bairo mu̶jãã caĩrõ, marĩ Quetiupau̶ pu̶ame mu̶jãã netõõgu̶mi. Cũ̶ caĩñajoro caãnimajũrãrẽ bairo mu̶jãã ãnio joroque mu̶jãã átigu̶mi. 11Mu̶jãã, yu̶ bairãrẽ bairo caãna, ãmeo bu̶su̶paieticõãña. Ni jĩcãũ̶ ũcũ̶ cũ̶ yau̶re roro cũ̶ cabu̶su̶paiata, o cũ̶ caátiere roro cũ̶ caĩñabeseata, Dios, “¡Ãmeo maiña!” cũ̶ caĩroticũrĩqũẽrẽ cabotiou̶re bairo baiyami. “¡Dios netõrõ yu̶ masĩña!” caĩrẽ bairo niñami. 12Jĩcãũ̶ã niñami cañurĩjẽ marĩ caátipeere caroticũrĩcũ̶. Cũ̶ã niñami marĩ caátiãnierẽ caroaro caĩñabesei. Cũ̶ jetoa camasãrẽ na netõõmasĩñami. Tunu bairoa cũ̶ jetoa camasãrẽ na yasiomasĩñami. Bairi mu̶jãã pu̶ame, ¿nopẽĩrã, “Apei cũ̶ caátiere jãã majũ jãã ĩñabese masĩña,” mu̶jãã ĩñati? Bairo mu̶jãã caĩrõ ñuẽtĩña. 13Apeye mu̶jãã yu̶ caĩrĩjẽrẽ tũ̶goya tunu: Mu̶jãã jĩcããrã atore bairo mu̶jãã ĩña: “Ãme, o ñamirõcã ti macãpu̶ marĩ ágarã. Topu̶ etarã, marĩ paawapatagarã jĩcã cũ̶ma majũ,” ĩrãrẽ bairo mu̶jãã ĩnucũña. 14Bairo caĩrã nimirãcũ̶ã, ni jĩcãũ̶ ũcũ̶ ñamirõcã ũno cabaipeere mu̶jãã masĩẽtĩña. Marĩ caãnie, “¿dope to baimiñati?” mu̶jãã ĩ tũ̶goñaẽtĩña. Ñamirõcãcã oco buseri caãnierẽ bairo mu̶jãã ãniña. Tie pu̶ame ñamirõcãcãrẽ baumirõcũ̶ã, cabero manicoáyá tunu. Tie cabairore bairo mu̶jãã cũ̶ã mu̶jãã baiãninucũña. 15Bairi atore bairo pu̶ame roque mu̶jãã caĩtũ̶goñarõ ñuña: “Dios cũ̶ caboro, topu̶ marĩ ágarã. Tunu bairoa cũ̶ caboro, marĩ caátigarijere marĩ átimasĩgarã,” mu̶jãã caĩtũ̶goñarõ ñuña. 16Bairo cabaimiatacũ̶ãrẽ, mu̶jãã pu̶ame: “Jãã majũ jãã masĩña jãã caátipeere,” mu̶jãã caĩnucũrĩjẽrẽ mu̶jãã jãnagaetiya. Tie ũnie ĩ tũ̶goñarĩqũẽ ñuẽtĩña. 17Bairi ni jĩcãũ̶ ũcũ̶ caroa átajere masĩmicũ̶ã, tiere cũ̶ caápericõãta, roro ácu̶ átiyami Dios cũ̶ caĩñajoro.

will be added

X\