SANTIAGO 3

1Mu̶jãã, yu̶ bairãrẽ bairo caãna, tũ̶gopeoya mu̶jããrẽ yu̶ caquetibu̶ju̶rijere: Capããrã majũ na caãno boetiya mu̶jããrẽ caquetibu̶ju̶parãrẽ. Merẽ mu̶jãã masĩña: Jãã ũna quetibu̶ju̶ri majãrẽ netõjãñurõ jãã caátajere ĩñacõñarĩ jãã ĩñabesegu̶mi Dios. 2Marĩ nipetiro jĩcã rũ̶mu̶rẽ roro marĩ átinucũña. Bairi ni jĩcãũ̶ ũcũ̶ jĩcã wãme ũno rorije caĩẽcũ̶ pu̶ame caroú̶ majũ niñami. Bairo caãcũ̶ ãnirĩ, roro cũ̶ catũ̶goñarĩjẽrẽ ẽñotamasĩcõãñami. 3Mu̶jãã yu̶ quetibu̶ju̶ cõñapã mai: Marĩ caballore cũ̶ riseropu̶ ãpõã betore tujããrĩ, ti beto mena jũ̶gori cũ̶ marĩ tũ̶gãñe tunuonu̶cõmasĩña. Caballo pai cũ̶ caãnimiatacũ̶ãrẽ, ti betoaca mena jũ̶gori cũ̶ marĩ tũ̶gãñe tunuonu̶cõmasĩña. 4Torea bairo niña cũmua capairiya riare capẽñarĩcã cũ̶ã. Ti cũmua pairi cũmua caãnimiatacũ̶ãrẽ, bairi tunu wĩno tutuaro capapu jogamiatacũ̶ãrẽ, ti cũmuarẽ cawatuu̶ pu̶ame noo cũ̶ caboropu̶ watujo masĩñami õcãpãĩãcã, tiare watujoricapãĩãcã mena jũ̶gori. 5Torea bairo niña marĩ ñemerõ cũ̶ã. Õcãrõãcã nimirõcũ̶ã, capee bu̶su̶masĩña. Peero cũ̶ã õcã peeroaca mena jĩñatuajũ̶goata, cabero pairi peero ámasĩña. Capee majũ ũ̶ũ̶reya. 6Marĩ ñemerõ cũ̶ã peerore bairo niña. Ati u̶mu̶recóo macããjẽ carorijere ĩmasĩña marĩ rupau̶ macããtõ ñemerõ pu̶ame, õcãrõãcã nimirõcũ̶ã. Apeye, apeye capee bu̶su̶ya marĩ ñemerõ. Bairi marĩ yeri royetuanucũña, rorije to mena marĩ caĩrõĩ. Wãtĩ tore bairo cũ̶ caĩrotiro jũ̶gori rorije marĩ bu̶su̶ya. Bairi marĩ cabuiaro beropu̶i marĩ yerire royetujũ̶goató, marĩ cayasiropu̶ marĩ royetujãnaña marĩ ñemerõ. 7Camasã pu̶ame nipetiro waibu̶toare, minia cũ̶ãrẽ, pĩnoa cũ̶ãrẽ, ria capairiya macããna cũ̶ãrẽ na canubu̶tioricarãrẽ bairo na ãnio joroque átiyama. Bairo átiyaparori yua, na caborore bairo na átirotimasĩñama. 8Bairo narẽ na caátimasĩmiatacũ̶ãrẽ, ni jĩcãũ̶ ũcũ̶ marĩ ñemerõrẽ rotimasĩẽcũ̶mi. Marĩ ñemerõ carotimasĩã mano niña. Ãña cũ̶ cabacaro, cũ̶ nima cũ̶ cajorore bairo niña marĩ bu̶su̶rique carorije. Camasãrẽ popiye na baio joroque na marĩ átiya marĩ ñemerõ mena jũ̶gori. 9Marĩ ñemerõ mena Dios, marĩ Pacu̶ majũrẽ cũ̶ marĩ basapeoya. Ti ñemerõ menaina tunu aperãrẽ roro na marĩ bu̶su̶paiya. Dios cũ̶ cabaurijere bairo cabaurã caãna na caãnimiatacũ̶ãrẽ, roro na marĩ bu̶su̶paiya. 10Ti ñemerõ menaina Diore cũ̶ marĩ basapeoya. Tunu ti ñemerõ menaina camasãrẽ, “Roro na baiáto,” marĩ ĩ bu̶su̶nucũña. Yu̶ yarã, bairo marĩ caĩata, ñuẽtĩña. Bairo boetiya. 11¿Oco cawitiri opere, oco caroa, oco carorije cũ̶ã jĩcãpau̶rea to witinucũñati? Bairo witietinucũña. 12Mu̶jãã, yu̶ bairãrẽ bairo caãna, tunu bairoa higuera yucu̶ pu̶ame, ¿aceituna rícare to ríca cu̶tinucũñati? Tie meerẽ ríca cu̶tinucũña. Tunu bairoa u̶sewu̶ pu̶ame, ¿higos wãmerẽ to ríca cu̶tinucũñati? Tie meerẽ ríca cu̶tinucũña. Jĩcã wãmeena pu̶ga wãme ríca cu̶periya. Jĩcã wãme jeto ríca cu̶tinucũña. Torea bairo oco caocarije cawitiri ope oco operea oco caocaetie cũ̶ã jĩcã operea witimasĩẽtĩña. Bairi marĩ pu̶ame jĩcã rũ̶mu̶ caroaro bu̶su̶, ape rũ̶mu̶ roro bu̶su̶ marĩ caĩata, ñuẽtĩña. 13Bairi ni jĩcãũ̶ ũcũ̶ mu̶jãã mena macããcũ̶ catũ̶goñamasĩ cũ̶ caãmata, caroa ũnierẽ cũ̶ caáto boya. “¡Yu̶ jeto yu̶ átinetõcõãgu̶!” ĩ tũ̶goñaecũ̶ caroa ũnierẽ cũ̶ caáto boya. Bairo cũ̶ caápata, nipetiro camasã caroaro cũ̶ caátiãnimasĩrĩjẽrẽ masĩgarãma. 14Apei mu̶jãã mena macããcũ̶ cũ̶ yeri pũnapu̶ apei cũ̶ caãnierẽ roro cũ̶ caĩñau̶garipeata roque, ñuẽtĩña. Tunu, “¡Yu̶ jeto yu̶ masĩña yu̶ caátipeere!” cũ̶ caĩata, ñuẽtĩña. Cũ̶ pu̶ame, “¡Camasĩ yu̶ ãniña!” caĩ nimicũ̶ã, bairo mee niñami. 15Cũ̶ camasĩrĩjẽ pu̶ame ati yepa macããna na catũ̶goñarĩjẽrẽ bairo niña. Tiere joetiyami Dios. Wãtĩ pu̶ame tie ũnie tũ̶goñarĩqũẽrẽ na jonucũñami camasãrẽ. 16Bairi noo ũno caãna, aperã na caãnierẽ roro caĩñau̶garipeari majã na caãmata, o “¡Jãã jeto jãã masĩña jãã caátipeere!” caĩrĩ majã na caãmata, jĩcãrõrẽ bairo ãnimasĩẽtĩñama. Carorije tocãnacã wãmerẽ ãmeo átinucũñama na ũna na caãnorẽ. 17Dios cũ̶ camasĩõrĩjẽrẽ cacũ̶gorã pu̶ame nipetiro camasã watoare caroaro caãnarẽ bairo átiãniñama. Tunu bairoa roro átajere ãmeo áperinucũñama. Camasãrẽ caroaro na ĩroanucũñama. Aperã roro cabairãrẽ bopacooro na ĩñañama. Bairi nipetiri wãme caroare átinucũñama, caroaro cariape cabu̶su̶rã ãnirĩ. 18Bairi noa ũna caroaro ãnajẽrẽ cajũ̶goátiãnigarã pu̶ame cariape caroa macããjẽrẽ quetibu̶ju̶ masĩgarãma. Bairo na caquetibu̶ju̶rije pu̶ame oterique cabu̶tirore bairo camasã yeripu̶ bu̶tijũ̶goyecu̶tigaro caroa macããjẽ. Camasã pu̶ame caroaro ãnimasĩgarãma na caquetibu̶ju̶rije jũ̶gori yua.

will be added

X\