SANTIAGO 2

1Mu̶jãã, yu̶ bairãrẽ bairo caãna, yu̶ camairã atore bairo ñinemoña mu̶jããrẽ tunu: Mu̶jãã, marĩ Quetiupau̶ nocãrõ caroú̶re caĩroarã ãnirĩ, nipetiro camasãrẽ jĩcãrõrẽ bairo na ĩñaña. Pairo cadinero cũ̶gori majã, cacũ̶goena cũ̶ãrẽ nu̶cũ̶bu̶goeticõã na baieticõãña. Jĩcãrõrẽ bairo na ĩñaña. 2Ĩ cõñarĩ mu̶jããrẽ yu̶ quetibu̶ju̶pa mai: Jĩcã rũ̶mu̶ jĩcã poa macããna na cañubueneñarĩ rũ̶mu̶ caãno jĩcãũ̶ capee cacũ̶gou̶ jããetayupu̶. Cũ̶ pu̶ame anillo oro betoori, bairi caroa jutii cũ̶ãrẽ cajãñaátacu̶ ãñupũ̶. Cũ̶ bero cabopacau̶, cabu̶cu̶ juti cajãñaátacu̶ cũ̶ã jããetayupu̶. 3Bairo na cajããetaro ĩña, atore bairo qũĩñuparã caroa jutii cajãñau̶rẽ: “Ato ruiya caroapau̶pu̶,” qũĩñuparã. Apei cabopacau̶ pu̶amerẽ: “Mu̶a noo mu̶ caboro nucũña,” o “Toa yepapu̶ ruicõãña,” qũĩñuparã. 4Bairi mu̶jãã cũ̶ã tore bairo mu̶jãã caápata, ñuẽtĩña Dios cũ̶ caĩñajoro. Mu̶jãã, “Ãni pu̶ame caãnimajũũ̶ ãcũ̶mi,” ĩrĩ, roro caãmeoĩñabeserãrẽ bairo mu̶jãã baibujiorã, bairo mu̶jãã caápata. Roro catũ̶goñarĩqũẽ cu̶narẽ bairo ána, tore bairo mu̶jãã átibujiorã. 5Mu̶jãã, yu̶ bairãrẽ bairo caãna, tũ̶gopeoya atiere: Ati yepa macããna cabopacarãrẽ na beseyupi Dios, cũ̶ mena bu̶tioro na, catũ̶goñatutuarã majũ na ãnio joroque ĩ. Tunu bairoa na cũ̶ã cũ̶ carotimasĩrĩpau̶ caãna na caãniparore bairo ĩ, na beseyupi. Cũ̶ caĩjũ̶goyeticũrĩcãrõrẽã bairo nipetiro camasã cũ̶ camairã cũ̶ tu̶pu̶ na caãno bojũ̶goyupi. 6Bairo Dios cabopacarãrẽ cũ̶ cabomiatacũ̶ãrẽ, mu̶jãã pu̶ame narẽ na tũ̶goñaboboo joroque na mu̶jãã átinucũña. ¿Cadinerocu̶na pu̶ame mee mu̶jããrẽ tutuaro na roti epeetinucũñati? ¿Na mee mu̶jããrẽ ñerĩ quetiuparã caĩñabeserã tu̶pu̶ na ñeápérinucũñati? Na ũna roque bairo mu̶jãã átiepenucũñama. 7Nipetiro camasã, “¡Jesucristo yarã niñama!” mu̶jããrẽ ĩñama. Bairi mu̶jãã pu̶ame cũ̶ wãme, caroa wãmerẽ cacũ̶gorã nimirãcũ̶ã, ¿nopẽĩrã Jesucristo wãmerẽ caĩboyetiepenucũrã pu̶amerẽ na mu̶jãã boyati? 8Marĩ Quetiupau̶ cũ̶ caroticũrĩqũẽ caãnimajũrĩjẽ atore bairo quetibu̶ju̶ya cũ̶ ya tutipu̶: “Mu̶ mena macããcũ̶rẽ cũ̶ maiña mu̶ rupau̶re mu̶ camairõrẽã bairo,” ĩ quetibu̶ju̶ya. Bairi mu̶jãã pu̶ame tore bairo jeto mu̶jãã caápata, nipetiro camasã cabopacarãrẽ, bairi cadinerocu̶na cũ̶ãrẽ jĩcãrõrẽ bairo mairĩ, cariape caánarẽ bairo mu̶jãã ãnibujiorã. 9Tore bairo nipetiro camasãrẽ jĩcãrõ tũ̶ni na mu̶jãã caĩroaeticõãta, roro caána mu̶jãã ãnibujiorã. Bairi carorije cawapa cũ̶gorãrẽ bairo mu̶jãã tuabujiorã, Dios yaye cũ̶ caroticũrĩcã wãmerẽ caáperã ãnirĩ yua. 10Torecu̶, ni jĩcãũ̶ ũcũ̶ Dios cũ̶ caroticũrĩqũẽ capee wãmerẽ caroaro átipeyomicũ̶ã, baipu̶a jĩcã wãmerẽ cũ̶ caápericõãta, nipetirije Dios cũ̶ caroticũrĩqũẽrẽ canetõõnu̶cãũ̶rẽ bairo tuayami. Nipetirije carorije wapa cacũ̶gou̶re bairo tuayami yua. 11Dios pu̶ame atore bairo ĩcũñupĩ: “Mu̶jãã nu̶moa caãmerãrẽ na ñe epeeticõãña.” Tunu bairoa ape wẽẽpu̶ atore bairo ĩcũnemoñupĩ: “Camasãrẽ na pajĩãreeticõãña,” ĩcũñupĩ. Bairi ni ũcũ̶ aperã nu̶moarẽ cañe epeetinucũũ̶ nimicũ̶ã, camasocu̶re capajĩãrĩ majõcu̶ cũ̶ caãmata, nipetirije Dios cũ̶ caroticũrĩqũẽrẽ cabaibotiou̶re bairo qũĩñagu̶mi Dios. 12Bairi mu̶jãã, Dios cũ̶ caquetibu̶ju̶cũrĩqũẽ jũ̶gori caĩñabese ecoparã ãnirĩ, caroaro ãnajẽcu̶sa. Caroa wãme bu̶su̶ya. Carorije ĩẽtĩcõãña. Cũ̶ caroticũrĩqũẽ pu̶amerẽ marĩ caápata, caroaro marĩ ãnimasĩgarã. 13Bairi noa ũna aperãrẽ bopacooro na na caĩñaeticõãta, na cũ̶ãrẽ bopacooro na ĩñaetibujiomi Dios, na caátajere ĩñacõñarĩ na cũ̶ caĩñabeseri rũ̶mu̶rẽ. Aperãrẽ bopacooro caĩñarã pu̶ame roque caroaro netõgarãma ti rũ̶mu̶rẽ. 14Mu̶jãã, yu̶ bairãrẽ bairo caãna, ni jĩcãũ̶ ũcũ̶, “Dios mena yu̶ tũ̶goñatutuaya,” caĩ nimicũ̶ã, caroaro átajere cũ̶ caápericõãta, cũ̶ caĩrĩjẽ wapa maniña. ¿Bairo cũ̶ caĩrĩjẽ jũ̶gori caroaro cũ̶ netõũ̶áti? Netõẽcũ̶mi. 15Atore bairo mu̶jããrẽ ñi quetibu̶ju̶ cõñapã mai: Mu̶jãã yau̶ jĩcãũ̶, o mu̶jãã yao jĩcãõ jutii mani, u̶garique mani cabairã nibujiorãma. 16Bairi ni ũcũ̶ mu̶jãã mena macããcũ̶ narẽ bocári atore bairo na ĩbujiou̶mi: “Caroaro ãña. Tũ̶goñarĩqũẽ paieticõãña. U̶gariquere, jutii cũ̶ãrẽ tãmurĩ mu̶jãã bócagarã,” na ĩbujiou̶mi. Bairo ĩmicũ̶ã, na cabopacarijere na joetibujiou̶mi. Bairo cũ̶ caĩrĩjẽ wapa maniña. 17Torea bairo ni ũcũ̶, “Dios mena yu̶ tũ̶goñatutuaya,” caĩ nimicũ̶ã, aperãrẽ bopacooro ĩñarĩ na cũ̶ caju̶ápericõãta, cũ̶ caĩrĩjẽ wapa maniña. 18Bairo yu̶ caĩrõĩ, jĩcãũ̶ mu̶jãã mena macããcũ̶ atore bairo ĩbujiou̶mi: “Jĩcããrã, ‘Dios mena marĩ catũ̶goñatutuaro jeto ñuña,’ ĩ quetibu̶ju̶yama. Aperã ĩñama: ‘Marĩ catũ̶goñatutuaro jũ̶gori mee, caroaro marĩ caáto roque ñuña,’ ĩ quetibu̶ju̶yama,” ĩbujiou̶mi jĩcãũ̶ mu̶jãã mena macããcũ̶. Bairo cũ̶ caĩmiatacũ̶ãrẽ, atore bairo cũ̶ ũcũ̶rẽ ñiña: Yu̶ pu̶ame caroaro mu̶ caátiere ĩñaẽtĩrĩ, “Dios mena catũ̶goñatutuau̶ ãcũ̶mi,” mu̶rẽ ñi masĩẽtĩña. Cariapea yu̶ caátiere mu̶ caĩñarĩjẽ jũ̶gori roque, “Caãnorẽ bairo Dios mena tũ̶goñatutuayami,” yu̶ mi masĩcõãña. 19Tunu bairoa, “Dios jĩcãũ̶ã niñami marĩ caĩroau̶. Apei maniñami,” mi masĩña. Bairo mu̶ caĩmasĩrõ ñumirõcũ̶ã, caroaro etaetiya. Wãtĩ yeri pũna cũ̶ã, “Dios jĩcãũ̶ã niñami,” ĩ masĩcõãñama. Bairo ĩrã, nanarĩ uwirãma. 20Bairi, “Dios mena yu̶ tũ̶goñatutuaya,” caĩ nimicũ̶ã, caroaro átajere cũ̶ caápericõãta, cũ̶ caĩrĩjẽ wapa maniña, Dios cũ̶ caĩñajoro. ¡Tame! ¡Mu̶ pu̶ame catũ̶goñamasĩẽcũ̶rẽ bairo mu̶ tũ̶goñaña! ¿Marĩ ñicũ̶jãã na cabairiquere mu̶ masiriticoati? 21Marĩ ñicũ̶ ãnacũ̶, Abraham pu̶ame, cũ̶ macũ̶ Isaare cũ̶ pajĩãrĩ, cũ̶ rupau̶ri ãnajẽrẽ joemu̶gõ jogamiñupũ̶, Dios cũ̶rẽ cũ̶ carotiroi. Bairo cũ̶ caátigarijere ĩñarĩ, Dios pu̶ame, “¡Bairo ápericõãña!” qũĩrĩ, carorije wapa cacũ̶goecu̶re bairo qũĩñañupũ̶ Dios Abrahãrẽ. 22Torena, Abraham cũ̶ caátajere tũ̶goñarĩ atore bairo mu̶jãã ĩ tũ̶goñamasĩña Abrahãrẽ: “Caroaro cũ̶ catũ̶gou̶sarique jũ̶gori Dios mena cũ̶ catũ̶goñatutuarijere cũ̶ áti ĩñoñupĩ Abraham Diore. Tunu bairoa cũ̶ caátaje jũ̶gori Dios mena cũ̶ catũ̶goñatutuarije pu̶ame ñe ũnie ru̶saeto tuayupa Abrahãrẽ,” mu̶jãã ĩ tũ̶goñamasĩña. 23Torea bairo ĩ quetibu̶ju̶yayupa Dios ya tutipu̶ na caquetibu̶ju̶woacũrĩqũẽ: “Abraham Diore cũ̶ catũ̶goñatutuarije jũ̶gori carorije cawapa cũ̶goecu̶re bairo qũĩñañupĩ.” Bairi, “Abraham, Dios bapa majũ niñami,” qũĩñuparã nipetiro camasã cũ̶rẽ. 24Bairo Abraham ãnacũ̶ cũ̶ cabairiquere tũ̶goñamasĩrĩ, atore bairo mu̶jãã nipetiro mu̶jãã ĩ masĩña: “Ni jĩcãũ̶ ũcũ̶ Dios mena cũ̶ catũ̶goñatutuarije jeto meerẽ caroaro cũ̶ caátie cũ̶ãrẽ átirotiya, carorije wapare cacũ̶goecu̶re bairo tuagu̶, Dios cũ̶ caĩñajoro,” mu̶jãã ĩ masĩña. 25Tunu Abraham ãnacũ̶rẽ bairo baiyupo apeo Rahab caũ̶mu̶a mena caepewapatamirĩcõ cũ̶ã. Cõ pu̶ame cõ ya macãrẽ Josué cũ̶ caĩñarutirotijoricarãrẽ na yasio cũ̶goyupo cõ ya wiipu̶, yu̶ yarã narẽ na pajĩãrema, ĩõ. Cabero maa cũ̶ãrẽ na ĩñoñupõ na carutitunuápáwãrẽ. Bairo cõ caátore ĩñarĩ, Dios pu̶ame carorije cawapa cũ̶goecore bairo cõ ĩñañupĩ. 26Bairo bai yua, marĩ rupau̶pu̶ marĩ yeri pũna camanicõãta, cariayasicoatanarẽ bairo marĩ ãniña. Torea bairo, “Dios mena marĩ tũ̶goñatutuaya,” caĩrã nimirãcũ̶ã, caroaro átajere marĩ caápericõãta, marĩ caĩrĩjẽ wapa maniña. Cariayasicoatanarẽ bairo marĩ ãniña Dios cũ̶ caĩñajoro, caroa ũnierẽ caáperã marĩ caãmata yua.

will be added

X\