SANTIAGO 1

1Yu̶, Santiago, marĩ Pacu̶, bairi marĩ Quetiupau̶ Jesucristo mena na paabojari majõcu̶ ãnirĩ, ati carta mena mu̶jããrẽ woajou̶ yu̶ átiya. Mu̶jãã, Israel yepa macããna, pu̶ga wãmo peti ru̶pore pu̶ga pẽnirõ cãnacã poari majũ caãnimirĩcãrã, ãmerẽ nipetiropu̶ caábataricarãrẽ mu̶jãã woajou̶ yu̶ átiya. 2Mu̶jãã, yu̶ bairãrẽ bairo caãna, yu̶ yaye quetire tũ̶gopeoya mai: Ape rũ̶mu̶ mu̶jããrẽ roro tãmu̶orĩqũẽ caetaata, tie mena tũ̶goña yapapuaeticõãña. Tiere u̶seanirĩqũẽ mena mu̶jãã catũ̶goñarõ ñuña. 3Noo ricaati mu̶jããrẽ caetari rũ̶mu̶ caãno, “¡Ñugaro! ¡Dios mena tũ̶goñatutuari yua, marĩ nu̶cãcõãgarã!” mu̶jãã caĩata, nemojãñurõ mu̶jãã tũ̶goñanetõõmasĩgarã. Merẽ mu̶jãã masĩña tiere. 4Bairi tie tũ̶goñatutuariquere caroaro maijũ̶goya, mu̶jããrẽ ñe ũnie to caru̶saetiparore bairo ĩrã. Bairi nocãrõ majũ catũ̶goñanetõmasĩrã ãnirĩ, camasã cañurã ñe ũnie ãnimasĩrĩqũẽ caru̶saena majũ mu̶jãã ãnigarã. 5Bairi ni jĩcãũ̶ ũcũ̶ jĩcã wãmerẽ camasĩpeyoecu̶ cũ̶ caãmata, Diore cũ̶ jẽnimasĩñami. Bairo cũ̶ cajẽniata, cũ̶ jogu̶mi Dios cũ̶ cajẽnirĩjẽrẽ. Camasã nipetiro nocãrõ na caboro cãrõ masĩrĩqũẽrẽ na jogu̶mi, cũ̶ na cajẽniata. “¿Nopẽĩrã tocãrõ majũ mu̶jãã jẽniñati?” ĩẽtĩgu̶mi Dios. 6Bairãpu̶a, “¡Jããrẽ joecu̶mi!” ĩ tũ̶goñaena, jẽniña. Dios mena tũ̶goñatutuari mu̶jãã cajẽnirõ boya. Dios mena catũ̶goñatutuaecu̶ pu̶ame ria capairiya oco turire bairo niñami. Wĩno jũ̶gori tiere aperopu̶, aperopu̶ capapubatorerore bairo niñami. 7Bairo caãcũ̶ jĩcã rũ̶mu̶ jĩcã wãmerẽ boyami cũ̶rẽ Dios cũ̶ caátibojapeere. Ape rũ̶mu̶rẽ bairo boetiyami. Bairo jeto tũ̶goñanucũñami. Bairo catũ̶goñau̶ pu̶ame, “Yu̶ caborore bairo jeto átigu̶mi Dios,” ĩ masĩẽcũ̶mi. 9Tunu apeyera ni ũcũ̶ cabopacau̶ nimicũ̶ã, Jesure caĩroau̶ pu̶ame cũ̶ u̶seaniáto. Cũ̶ roque Dios cũ̶ caĩñajoro pu̶amerẽ cabu̶goro macããcũ̶ mee niñami. 10Capee cacũ̶gou̶ pu̶ame oó yoaro caãmerõrẽ bairo caãcũ̶ niñami. Muipu̶ bu̶tioro cũ̶ caasiro jũ̶gori, oó yoaro mee jĩniyasicoaya. Torea bairo baigarãma na capaarije watoa capee apeye ũnierẽ cacũ̶gorã pu̶ame. Na cũ̶ã yasicoagarãma. Bairi ni jĩcãũ̶ ũcũ̶ capee cacũ̶gou̶ Jesure caĩroau̶ cũ̶ caãmata, cũ̶ u̶seani tũ̶goñaáto. “Capee yu̶ cacũ̶gomiatacũ̶ãrẽ, Dios cũ̶ caĩñajorore yu̶ yaye caãnimajũrĩjẽ mee niña,” qũĩ u̶seani tũ̶goñaáto. 12U̶seanirĩ niñami ni jĩcãũ̶ ũcũ̶ wãtĩ cũ̶rẽ cũ̶ caĩbu̶su̶jãrĩjẽrẽ tũ̶gomicũ̶ã, catũ̶goñanetõmasĩ majũ. Bairo caãcũ̶ majũ cũ̶ caãnoi, Dios pu̶ame cũ̶ mena cũ̶ catũ̶goñatutuarijere masĩmajũcõãñami. Bairo masĩrĩ yeri capetieti pũnarẽ cũ̶ jogu̶mi, cũ̶rẽ camairãrẽ cũ̶ caĩjũ̶goyeticũrĩcãrõrẽã bairo yua. Tie cũ̶ cajorije pu̶ame corona, caatu̶eperi majõcu̶ cũ̶ canetõrĩjẽ wapa cũ̶ cawapatari beto corona beto netõjãñurõ caroa majũ niña. 13Tunu bairoa Dios pu̶ame carorije caápei niñami. Tunu ni ũcũ̶rẽ carorijere caátiroti mee niñami. Bairi ni ũcũ̶ rorije cũ̶ catãmu̶orĩ rũ̶mu̶ caetaro, Diore roro qũĩ tũ̶goñaeticõãto. “Dios pu̶ame roro yu̶re áti ĩñau̶ ácu̶mi, ¿dope bairo cũ̶ ácu̶ati ãni? ĩ,” qũĩ tũ̶goñaeticõãto. 14Bairo pu̶ame roque niña, ni jĩcãũ̶ ũcũ̶ roro cũ̶ catãmu̶oata: Caãnijũ̶goripau̶re cũ̶ majũã cũ̶ catũ̶goñarĩjẽ mena roro átigayami. Tie cũ̶ catũ̶goñarĩjẽ caetapetiro yua, cũ̶ caátigarijere átimasĩcõãñami. Bairo cũ̶ caáticõãmata, Dios tu̶pu̶ ámasĩẽtĩgu̶mi. Cayasiricu̶re bairo tuagu̶mi yua. 16Bairi mu̶jãã, yu̶ bairãrẽ bairo caãna, yu̶ camairã, cariape tũ̶goñaña. “Dios pu̶ame roro marĩrẽ áti ĩñau̶ ácu̶mi,” caĩtũ̶goñarãrẽ bairo baieticõãña. Na majũã ĩtorã átiyama, bairo na caĩtũ̶goñaata. 17Ati yepa macããjẽ cañurĩjẽ nipetirije caãnie, Dios jõbui caãcũ̶ marĩrẽ cũ̶ cajorique majũ niña. Muipu̶re, bairi ñocõã cũ̶ãrẽ caqũẽnorĩcũ̶ cũ̶ cajorique majũ niña. Cũ̶ pu̶ame tiere ape wãme átiwasoaetiyami. Cañuu̶ majũ nicõã ninucũgu̶mi tocãnacã rũ̶mu̶a. 18Torecu̶, cũ̶ pũnaarẽ bairo marĩ ãnio joroque marĩ ámi, cũ̶ cabojũ̶goricarorea bairo. Cũ̶ yaye quetire cariape caãnierẽ marĩ masĩõwĩ, yu̶ pũnaa caãnijũ̶gorã na ãmarõ, ĩ. 19Bairi mu̶jãã, yu̶ bairãrẽ bairo caãna, yu̶ camairã, tũ̶gopeoya yu̶ caĩrĩjẽrẽ: Mu̶jãã tocãnacãũ̶pu̶a caroaro tũ̶gopeoya caroa queti na caquetibu̶ju̶rijere. Cotericaro mano tũ̶gou̶saya. Bu̶su̶garã jũ̶goye pu̶ame mu̶jãã yeripu̶ tũ̶goñaña mai. Jicoquei ĩ wiyoeticõãña. Tunu bairoa asiarique cũ̶ãrẽ jicoquei asiaeticõãña. 20Dios pu̶ame caasiau̶ cũ̶ caátiere ĩñajesoetiyami. Bairi marĩ caasiaro boetiya. 21Bairi nipetirije roro mu̶jãã caátiere jãnacõãña. Mu̶jãã yeri pũnapu̶ pairo roro mu̶jãã catũ̶goñarĩjẽ cũ̶ãrẽ pu̶gani tũ̶goñanemoeticõãña. Caroaro mena tũ̶gou̶saya Dios yaye queti mu̶jãã catũ̶gou̶sajũ̶goriquere. Tie quetire tũ̶gou̶sarã yua, roro mu̶jãã cabairijere mu̶jãã netõcõãgarã. 22Bairi Dios yaye quetire tũ̶gorique jeto boetiya. Tiere tũ̶gori bero cũ̶ caátirotirije cũ̶ãrẽ marĩ caáto ñuña. Tore bairo mu̶jãã caápericõãta, mu̶jãã majũã caĩtorãrẽ bairo mu̶jãã baibujiorã. 23Dios yaye quetire tũ̶gomicũ̶ã, cũ̶ caĩrotirore bairo caápei pu̶ame atore bairo niñami: Jĩcãũ̶ ũcũ̶ caũ̶mu̶ ẽñoorõpu̶ cũ̶ riapére caĩñau̶rẽ bairo niñami. Bairo ĩñarĩ bero, ãmejorenu̶cã, tocãrõã yoaro mee masiriticoacu̶mi cũ̶ riapé cũ̶ cabauatajere. Cũ̶rẽ bairo niñami Dios yaye quetire tũ̶gomicũ̶ã, cũ̶ carotirijere caápei. 25Apei pu̶ame Dios yaye quetire tũ̶gori bero, tiere masiritietiyami. Bairo masiritietiri yua, Dios cariape cũ̶ carotiriquere ñe ũnie ru̶saetore bairo tũ̶goñanucũñami. Tie cũ̶ carotirique pu̶ame caroaro marĩ yeri cu̶tio joroque marĩ átiya. Bairi Dios cũ̶ carotiriquere caátiãcũ̶ ãnirĩ, tiere jãnaẽtĩñami. Cũ̶ roque u̶seanirĩqũẽ mena cũ̶ caátiere átimasĩgu̶mi. 26Tunu bairoa ni ũcũ̶, “¡Diore camasĩ yu̶ ãniña!” caĩ nimicũ̶ã, noo cũ̶ caboro roro cũ̶ caĩrĩjẽrẽ cũ̶ cajãnamasĩẽtĩcõãta, cũ̶ majũã ĩtou̶ átiyami. Bairo cũ̶ majũã caĩtou̶re bairo cũ̶ caãno jũ̶gori yua, “¡Diore camasĩ yu̶ ãniña!” cũ̶ caĩrĩjẽ pu̶ame wapa maa. 27Bairo átaje pu̶ame ñuña: Roro cabairãrẽ, camasã uparã mánarẽ, bairi cawapearã rõmirĩ cũ̶ãrẽ caroaro na marĩ caju̶átinemorõ ñuña. Tunu bairoa ati yepa macããna roro na caátore bairo marĩ caápero ñuña. Tore bairo marĩ caápata, Diore camasĩrã majũ marĩ ãnigarã, Dios cũ̶ caĩñajoro.

will be added

X\