HEBREOS 9

1Bairi tunu marĩ ñicũ̶ ãnacũ̶ Moisere Dios cũ̶ caquetibu̶ju̶roticũrĩqũẽ jũ̶gori masĩñupã camasã pu̶ame ñubuerã na caátinu̶cũ̶bu̶gopeere, ati yepa macããtõ santuario macããjẽrẽ. 2Dios ya wii waibu̶toa aseri mena na caqũẽnojũ̶gorica wii pu̶ame atore bairo caãni wii ãñuparõ: Pu̶ga aru̶a cacũ̶gori wii majũ ãñuparõ. Etajũ̶goricapau̶re, Cañurĩpau̶ cawãmecu̶tipau̶re ãñuparõ candelabro jĩñaworica tutu. Tipau̶rea ãñuparõ tunu jĩcã mesa pan caroa Dios yaye majũ na caĩcũrĩqũẽ cũ̶ã. 3Bairi jĩcã jutii ẽñotarica bero macãã asero jũ̶goyepu̶ ãñuparõ tunu Cañurĩpau̶ Majũ Dios ya aru̶a cawãmecu̶ti aru̶a. 4Topu̶re ãñuparõ oro mena na caqũẽnorĩcã altar mesa incienso caju̶tiñurĩjẽrẽ na cajoemu̶gõrĩ mesa majũ. Tipau̶rea ãñuparõ tunu Dios ya pata rocapata cofre del pacto cawãmecu̶ti pata oro mena nipetiropu̶ cabuire werica pata majũ. Ti pata pupeapu̶ ãñuparõ jĩcã jotu̶ oro mena na caqũẽnorĩcã jotu̶, u̶garique Dios cũ̶ cajorique maná cawãmecu̶tie mena. Tunu bairoa ti pata pupeapu̶re ãñuparõ Aarón ãnacũ̶ tuericu̶ caãcããjããrĩcũ̶ cũ̶ã. Apeyera Dios cũ̶ caroticũrĩqũẽrẽ cũ̶ cawoaturicapãĩrĩ ũ̶tãpãĩrĩ cũ̶ã ãñuparõ ti patapupeapu̶re. 5Ti pata bui pu̶amerẽ ãñuparã ángelea majãrẽ bairo caãna wericarã pu̶garã. Na pu̶ame topu̶ na caãnie jũ̶gori, “Dios cũ̶ caãno niña ato,” ĩgarã baiyuparã. Na queru̶pu̶u̶ri mena ãmeo ñucãnamurĩ ti pata buire nucũñuparã. Bairo cabaimiatacũ̶ãrẽ, capee wãme yu̶ quetibu̶ju̶nemoẽtĩña ti wãmerẽ. 6Bairo ti wii macããjẽ tore bairo caroaro qũẽnorĩcãrõ caãnoi, ti wii caãnijũ̶gori aru̶are jããetanucũñuparã, na cañubuerije macããjẽrẽ átigarã sacerdote majã. 7Ti aru̶a bero macãã aru̶a pu̶amerẽ sumo sacerdote jeto jããmasĩñupũ̶. Jĩcãni jeto jããnucũñupũ̶ jĩcã cũ̶marẽ. Ti aru̶are cũ̶ cajããrĩ rũ̶mu̶rẽ waibu̶toa riíre jeánucũñupũ̶. Cũ̶ carorije wapa, bairi cũ̶ ya macã macããna tũ̶goñaena roro na caátie wapa cũ̶ãrẽ Dios na cũ̶ masiriyobojáto ĩ, tiere jeánucũñupũ̶. 8Atie nipetirijere tũ̶goñarĩ, atore bairo marĩ masĩõñami Espíritu Santo pu̶ame: Mai, caãnijũ̶gori aru̶a pu̶ame ñubueriquere áta aru̶apu̶ camasã na caãnitoye, ape aru̶a, santuario aru̶a pu̶ame mai pããjã masĩã maa. Torea bairo cabu̶cu̶ wãme na cañubuerique caãnicõãmata mai, cariape Dios cũ̶ caãnipau̶re etamasĩã mano. 9Tie nipetirije marĩ catũ̶gorije ati yepa macããjẽ santuario pu̶ame marĩ ati yu̶tea macããna u̶mu̶recóopu̶ caãno santuario cũ̶ãrẽ marĩ camasĩparore bairo ĩ, cũñupĩ Dios. Bairo tie, ati yepa macããjẽ jũ̶gori waibu̶toa riire joemu̶gõrĩ santuariopu̶ cañubuerã etarã caroaro yericu̶ti petietaetiyama mai. 10Tie ati yepa macããjẽ Moisés ãnacũ̶ cũ̶ caroticũrĩqũẽ pu̶ame marĩ cau̶gapee, marĩ caetipee, marĩ wãmorĩ marĩ cacosepee wãme ũnie jetore átirotiyupa. Tie nipetirije caátirotirijere Dios cũ̶ cawasoaparo jũ̶goye mai marĩ rupau̶re maijũ̶gorique macããjẽ wãme niña. Marĩ yerire dope bairo átimasĩẽtĩña tie jũ̶gori. 11Merẽ atímajũcõãñupĩ Cristo marĩ sumo sacerdote Dios marĩrẽ caroaro cũ̶ caátipeere cajou̶ majũ. Marĩ sumo sacerdote cũ̶ capaari wii santuario pu̶ame ati yepa macãã wii santuario netõjãñurõ caroaro caãnimajũrĩ wii niña. Ati yepa macããna camasã na caqũẽnorĩcã wii mee niña. Bairi ati yepa macãã wii mee, u̶mu̶recóo macãã wii majũ niña, ĩgu̶ ñiña. 12Jesucristo merẽ santuariopu̶ jããñupĩ. Bairo jããrĩ, waibu̶toa chivoa, bairi becerroa rií mena mee, cũ̶ majũ rií mena jũ̶gori marĩ carorije wapare netõõgu̶ jããñupĩ. Jĩcãnia jããñupĩ, pu̶gani cãrõ jããnemoesupi. Bairo cũ̶ cabairique jũ̶gori yeri capetietiere cacũ̶gorã marĩ tuao joroque ásupi. 13Nurĩcãrã toroa, bairi chivoa rií, tunu bairoa becerrare na cajoerije õwãrẽ oco mena asuri camasã buire sacerdote majõcu̶ na cũ̶ cayayewẽrõ bero, bui na rupau̶re cau̶gueri coserãrẽ bairo jeto tuayama, Dios cũ̶ caĩñajoro. 14Bairo atie cabaimiatacũ̶ãrẽ, ¡Jesucristo yaye rií pu̶ame roque waibu̶toa rií netõjãñurõ caãnimajũrĩjẽ niña! Espíritu Santo caãnicõãninucũũ̶ cũ̶ camasĩrĩjẽ jũ̶gori Jesucristo cũ̶ rupau̶ majũrẽã Diopu̶re cũ̶ jou̶re bairo ásupi. Waibu̶toa riire na cajoemu̶gõjonucũrĩjẽ netõjãñurõ cũ̶ caátie pu̶ame ñe ũnie ru̶saesupa. Cũ̶ cariarique jũ̶gori caũ̶petietopu̶ cayasiránárẽ bairo marĩ cabaibujioriquere netõõñupĩ. Bairo marĩ netõõñupĩ Jesús Dios caãnicõãninucũũ̶rẽ caroaro cũ̶ marĩ catũ̶gou̶samasĩparore bairo ĩ. 15Torecu̶, Jesucristo pu̶ame yucu̶pãĩpu̶ cũ̶ cariarique jũ̶gori Dios cũ̶ pacu̶ mena, bairi camasã mena cũ̶ãrẽ jĩcã yericu̶narẽ bairo caroaro Dios mena marĩ ãnio joroque ásupi. Cawãma wãme mena, “Mu̶jãã yu̶ netõõbojagu̶,” cũ̶ caĩrĩcãrõrẽã bairo ásupi. “Bairo yu̶ caáto caãnijũ̶gorica wãme roticũrĩqũẽrẽ na cacũ̶gorica yu̶tea caãno roro na caátaje wapare yu̶ masiriyobojagu̶. Bairo yu̶ caáto bero, Dios cũ̶ caĩñabesericarã cũ̶ yarã caãniparã pu̶ame cũ̶ caĩjũ̶goyeticũrĩcãrõrẽã bairo yeri capetietiere cacũ̶goparã majũ nigarãma,” ĩrẽ bairo marĩ ásupi. 16Bairi, “Jĩcãũ̶ cũ̶ caĩrĩqũẽ cawãma wãme caroaro tutuaro mena to ãmarõ,” marĩ caĩata, tie cawãma wãmerẽ cacũrĩcũ̶ cũ̶ cariarije mena marĩ masĩña. Cũ̶ cariaepata roque, tie cũ̶ caĩcũrĩqũẽrẽ bairo bai jũ̶goetibujioro. 17Bairi jĩcãũ̶ cũ̶ caĩcũrĩqũẽ cawãma wãme ũnie wapa maniña, mai tiere caĩcũrĩcũ̶ cũ̶ cacaticõãmata. Cũ̶ cariaro beropu̶ roquere wapa cu̶tibujioro. 18Torecu̶, Dios pu̶ame caãnijũ̶gorique Moisés ãnacũ̶rẽ cũ̶ caátiroticũrĩqũẽ cũ̶ãrẽ waibu̶toare pajĩãrĩqũẽ mena cũjũ̶goyupi. 19Mai, nipetiro camasã Israel macããnarẽ na quetibu̶ju̶yupi Moisés ãnacũ̶ Dios narẽ cũ̶ caátiroticũrĩqũẽrẽ. Bairo na quetibu̶ju̶ri bero, waibu̶toa chivoa, bairi becerroa na capajĩãtãna riíre jeeri, tiere oco mena asuyupi. Áti yaparo, yucu̶ hisopo cawãmecu̶tii ru̶pu̶ mena oveja poa jũõrĩqũẽrẽ ti ru̶pu̶pu̶ jiyaturi, riíre yosene átiri, Dios bu̶su̶rica tutire yayewẽñupĩ. Bairi to macããna camasã nipetiro cũ̶ãrẽ na yayewẽñupĩ Moisés tie rií oco mena asuriquere. 20Bairo áti yaparo, atore bairo na ĩñupĩ: “Cawãma wãme mu̶jãã camasãrẽ Dios cũ̶ caáticũrĩjẽ merẽ ãni jũ̶goya,” na ĩñupĩ. 21Apeyera tunu Moisés pu̶ame nipetiro Dios ya wii santuario, bairi ñubuerique macããjẽ cũ̶ãrẽ tie rií mena yayewẽñupĩ tie buire. 22Moisés ãnacũ̶ cũ̶ caátiroticũrĩqũẽ caĩquetibu̶ju̶ro pu̶amata, rií jũ̶gori mena jeto dise ũnie nipetiro jãñurĩpu̶a caroa wãme ñumasĩña Dios cũ̶ caĩñajorore. Waibu̶toare na capajĩãẽtĩcõãta, rorije na caátie wapare Dios cũ̶ camasiriyobojapee maniña. 23Bairo cabairoi, waibu̶toa rii joemu̶gõrĩqũẽrẽ bonucũñupã. Camasã na caqũẽnorĩqũẽ u̶mu̶recóopu̶ caãnie macããjẽrẽ caãnicõñaqueyorijere, “Caroa wãme nimasĩña Dios cũ̶ caĩñajoro,” ĩgarã, bairo ásupu̶. Bairo na caátinucũmiatacũ̶ãrẽ, u̶mu̶recóo macããjẽ pu̶ame ati yepapu̶ camasã na caátie netõjãñurõ caãnimajũrĩjẽ ũnierẽ boya. 24Torecu̶, Cristo ati yepa macãã wii santuario wiire jããrĩcãrõ ũnoa, santuario u̶mu̶recóo macãã wii pu̶ame roquere jããñupĩ. Ati yepa macãã wii camasã na caqũẽnorĩcã wii u̶mu̶recóopu̶ caãni wii macããjẽrẽ bairo caãnicõñaqueyori wiire jããẽsupĩ. Ti wii u̶mu̶recóopu̶ caãni wiire jããrĩ yua, Diopu̶re marĩ jẽnibojagu̶ jããñupĩ. 25Jesucristo jĩcãnia jããñupĩ u̶mu̶recóopu̶ caãni wiire. Ati yepa macããcũ̶ sumo sacerdote roque tocãnacã cũ̶ma waibu̶toa rií mena jejããnucũñami santuariopu̶. Tie rií cũ̶ yaye mee, waibu̶toa rií mena pu̶ame roque jee jããnucũñami. 26Tore bairo átaje caãnipee caãmata, Cristo capee tocãnacã cũ̶ma riacõã ninucũbujiou̶mi ati yepare Dios cũ̶ caqũẽnorõ beropu̶ina. Bairopu̶a, tore bairo átaje caãnipee mee niña. Ati yu̶tea catu̶sari yu̶teare Cristo pu̶ame cũ̶ majũ yucu̶pãĩpu̶ jĩcãnia riajãnañupĩ, cũ̶ yarã caãniparã yaye wapare na netõõbojagu̶. Pu̶gani cãrõ cũ̶ carianemopee mee niña. 27Bairi marĩ camasã cũ̶ã jĩcãnia marĩ riagarã. Marĩ cabaiyasiro bero, Dios nipetiro marĩ caátajere marĩ ĩñabesegu̶mi. 28Torea bairo Cristo cũ̶ã jĩcãnia yucu̶pãĩpu̶ riayupi, capããrã camasãrẽ na carorije wapare regu̶. Cabero bauetagu̶mi tunu. Rianemogu̶ mee, cũ̶ yarã cũ̶rẽ cacoterãrẽ na jeágu̶ buiaetagu̶mi tunu.

will be added

X\