HEBREOS 8

1Tocãnacã wãme mu̶jããrẽ jãã caquetibu̶ju̶rije caãnimajũrĩjẽ pu̶ame atore bairo niña: Jesús marĩ sumo sacerdote u̶mu̶recóopu̶ Dios cũ̶ caruiro cariape nu̶gõãpu̶ ruiyami, carotimasĩruiricaropu̶. 2Jesús pu̶ame camasã na caqũẽnorĩcã wii templo wii meerẽ, sumo sacerdote majõcu̶re bairo átiãniñami u̶mu̶recóopu̶re. Dios marĩ Quetiupau̶ majũ cũ̶ caqũẽnorĩcã wii pu̶amerẽ tore bairo Diopu̶re marĩ jẽniboja ãniñami. 3Ati yepapu̶ caãna tocãnacãũ̶pu̶a sacerdote majã waibu̶toa riire camasãrẽ cajoemu̶gõjobojaparã na caĩcũrĩcãrã ninucũñama. Bairi Jesús cũ̶ã torea bairo caãcũ̶ ãnirĩ cũ̶ majũ rupau̶ cũ̶ cariarique mena jũ̶gori Diopu̶re camasã yayere jonetõũ̶rẽ bairo caátiãcũ̶ niñami. 4Jesucristo pu̶ame ati yepapu̶ cũ̶ catuaata, jĩcãni ũno sacerdotere bairo ãmerĩbujioricu̶mi. Merẽ ati yepapu̶re niñama sacerdote majã Moisés ãnacũ̶ cũ̶ caroticũrĩqũẽrẽ bairo Diopu̶re camasã na cajorijere cajonetõbojari majã. 5Moisés ãnacũ̶rẽ santuariore cũ̶ caqũẽnorotiparo jũ̶goye atore bairo qũĩñupĩ Dios: “Tũ̶goya mai: Ũ̶tãũ̶pu̶ mu̶ caãno mu̶ yu̶ caĩñorĩcãrõrẽã bairo mu̶ qũẽnogu̶ santuariore,” qũĩñupĩ Dios Moisere. Bairo Dios Moisere cũ̶ caĩrĩqũẽrẽ tũ̶gori, atore bairo marĩ ĩ masĩña: “Sacerdote majã na caátiãninucũrĩjẽ pu̶ame u̶mu̶recóopu̶ macããjẽ Dios yayere na caátiqueyocõñarĩjẽrẽ bairo niña,” marĩ ĩ masĩña. 6Na paarique ñumirõcũ̶ã, jõbui marĩ sumo sacerdote Jesús marĩrẽ cũ̶ caátibojarije pu̶ame ñunetõña. Cawãma wãme Jesús camasãrẽ cũ̶ caĩrĩcãrõrẽ bairo Dios mena jĩcã yeri pũnacu̶narẽ bairo na ãnio joroque ásupi Jesús. 7Moisés cũ̶ caroticũrĩqũẽ caroa wãme caãnijũ̶gorica wãme caroaro cariape caãmata, apeye cawãma wãmerẽ marĩ bonemoetibujiorã tunu. 8Torecu̶, Dios pu̶ame ti yu̶tea macããna camasã na caátiãnierẽ ĩñarĩ, “Caroaro jĩcãrõ tũ̶ni átiãmerĩñama,” ĩñupĩ. Atore bairo ĩ quetibu̶ju̶ya cũ̶ ya tuti cũ̶ã: “Bairo ĩñami marĩ Quetiupau̶: ‘Ape yu̶tea caãno etagaro Israel, bairi Judá ya poa macããna nipetiro judío majãrẽ cawãma wãme na yu̶ caátibojapee. 9Atie pu̶ame mu̶jãã ñicũ̶jãã Egipto yepapu̶ caãnarẽ na yu̶ cajewiyori rũ̶mu̶ caãno na yu̶ caquetibu̶ju̶cũjũ̶goriquere bairo mee nigaro. Bairo na yu̶ caquetibu̶ju̶cũrĩqũẽrẽ na cabaibotiorique jũ̶gori na yu̶ aweyocoápú̶,’ ĩñami marĩ Quetiupau̶. 10‘Ti yu̶tea caãno Israel macããnarẽ cawãma wãme na yu̶ caátibojapee atore bairo nigaro: Na yeri na catũ̶goñarĩjẽpu̶ yu̶ caroticũpeere na tũ̶goñao joroque na yu̶ átigu̶. Bairo yu̶ caáto, yu̶ caroticũrĩjẽrẽ borã, tiere caroaro cariape átigarãma. Torecu̶ yu̶a, na pacu̶ yu̶ ãnigu̶. Na pu̶ame yu̶ ya poa macããna nigarãma. 11Bairo yu̶ caáto jũ̶gori, “Marĩ Quetiupau̶ yayere mu̶ yu̶ quetibu̶ju̶pa,” ãmeo ĩẽtĩgarãma, merẽ yu̶re camasĩrã jeto caãna ãnirĩ. Cawĩmarã, cabu̶toa nipetiro yu̶re camasĩrã jeto nigarãma ti yu̶tea caãnorẽ. 12Na, roro na caátajere yu̶ masiriyogu̶. Pu̶gani tunu tiere yu̶ tũ̶goñanemoetigu̶,’ ĩñami marĩ Quetiupau̶,” ĩ quetibu̶ju̶ya cũ̶ ya tutipu̶. 13Cawãma wãme marĩrẽ cũ̶ caátibojapeere cũ̶ caĩata, tirũ̶mu̶pu̶ marĩ ñicũ̶jããrẽ cũ̶ caquetibu̶ju̶cũjũ̶goriquere, “Jãnarĩqũẽrẽ bairo nicõãña,” ĩgu̶ ĩcũ̶mi. Bairi dise ũnie marĩrẽ dope bairo caátimasĩẽtĩẽ pu̶ame jicoquei petigaro baiya.

will be added

X\