HEBREOS 6

1Bairo cabairoi, cabu̶toare bairo nemorõ Dios mena tũ̶goñatutuagarã, Jesucristo yaye queti camasiriyorijere marĩ buenemogarã. Marĩ cabuejũ̶gorique cañurĩjẽ to caãnimiatacũ̶ãrẽ, nemojãñurõ camasiriyorije to caãnimiatacũ̶ãrẽ, buenemorotiya. Marĩ cabuejũ̶gorique bairo ãmu̶: Roro marĩ caátiere yapapuari marĩ cayeri wasoariquere marĩ buewu̶. Roro marĩ caátiere marĩ cacũẽtĩcõãta, caũ̶petietopu̶ cayasiránárẽ bairo marĩ cabaibujioriquere marĩ buewu̶. Apeyera Dios mena tũ̶goñatutuarique cũ̶ãrẽ marĩ buejũ̶gowu̶. 2Apeyera bautizarique macããjẽ cũ̶ãrẽ marĩ buewu̶. Tunu Diore catũ̶gou̶sari majãrẽ na ru̶poa buire na wãmo mena ñigãpeori Diopu̶re jẽnibojarique cũ̶ãrẽ marĩ buewu̶. Cariacoatana nimirãcũ̶ã tunu na cacaticoatie cũ̶ãrẽ marĩ buewu̶. Apeyera tunu Dios camasãrẽ cũ̶ caĩñabeseri rũ̶mu̶ caetaro narẽ cũ̶ caĩñabesero bero na cabaicõãninucũpee cũ̶ãrẽ marĩ buewu̶. 3Tie nipetirije marĩ cabuejũ̶gorique caãnimajũrẽ to caãnimiatacũ̶ãrẽ, nemojãñurõ camasiriyorije roquere buenemorotiya. Bairoa marĩ átigarã, Dios cũ̶ cabooata. 4Jĩcãũ̶ ũcũ̶ camasocu̶ Dios yaye quetire cariape tũ̶goyupu̶. Dios cũ̶rẽ cũ̶ camairĩjẽrẽ tũ̶gomasĩrĩ u̶seanirĩqũẽ mena ãñupũ̶. Espíritu Santo cũ̶ camasĩõnemorĩjẽ cũ̶ãrẽ masĩñupũ̶. Bairi Dios yaye caroa queti cũ̶ãrẽ u̶seanirĩqũẽ mena tũ̶goyupu̶. Dios cũ̶ carotimasĩrĩpau̶ macããjẽ cũ̶ camasĩrĩjẽ mena cũ̶ caátijẽñorĩqũẽ cũ̶ãrẽ ĩñañupũ̶. Cũ̶ ũcũ̶ caãnacũ̶ pu̶ame tiere catũ̶goricu̶ nimicũ̶ã, Dios yaye caroa quetire cũ̶ cajãnamajũcõãta, pu̶gani cãrõ tunu cũ̶ yerire Dios mena tũ̶goñawasoanemo masĩã maa. Cũ̶ ũna pu̶ame Jesucristo Dios macũ̶rẽ caboena ãnirĩ yucu̶pãĩpu̶ capapuaturicarãrẽ bairo ána átiyama, pu̶gani cãrõ tunu nipetiro camasã na caĩñajoro. Jesure roro cũ̶ boyetieperãrẽ bairo átiyama. 7Bairo cabairã pu̶ame oco caocarije yepapu̶ cañarõ ti yepa pu̶ame caũpũjõ yasiorore bairo caãna niñama. Ti yepa uparã ti yepare na caotero bero caroare caríca joata, “Caroa yepa Dios cũ̶ cũrĩcã yepa niña,” ĩ masĩñama ti yepa uparã. 8Carorije pota yucu̶ ũnie jeto caríca joata roque, ti yepa dope bairo átimasĩã maa. “Dios cũ̶ carocarica yepare bairo tuagaro,” ĩgarãma yua ti yepa uparã. Bairo ĩ yaparori bero, ti yepare joerocacõãgarãma. 9Bairo tutuaro mena mu̶jããrẽ quetibu̶ju̶mirãcũ̶ã, yu̶ yarã, jãã masĩjãñuña merẽ Dios cũ̶ canetõrĩcãrõpu̶ caáná mu̶jãã caãnierẽ. 10Bairi Dios cañuu̶ majũ niñami. Masiritietiyami Dios mu̶jãã cũ̶rẽ caroaro mu̶jãã camairĩjẽrẽ. Cũ̶rẽ mu̶jãã camairĩjẽ jũ̶gori marĩ yarã Dios mena catũ̶goñatutuarãrẽ na mu̶jãã ju̶átinemowũ̶. Mai, bairoa mu̶jãã áticõã ninucũña ãme cũ̶ãrẽ. 11Torena, mu̶jããrẽ atore bairo jãã ĩnemoña: Tocãnacãũ̶pu̶a mu̶jãã mena macããnarẽ bairo jeto na ju̶átinemoña u̶seanirĩqũẽ mena. Bairo átinucũña, Dios caroaro cũ̶ caátibojapee nipetirijere mu̶jãã cacũ̶gopetimasĩparore bairo ĩrã. 12Mu̶jãã, aperã cateeyepairã na caátiãnajẽ cu̶tiere bairo mu̶jãã caátíãno jãã boetiya. Dios mena na catũ̶goñatutuarije jũ̶gori popiye baimirãcũ̶ã, Dios cũ̶ caĩrĩcãrõrẽã bairo cũ̶ canetõrĩcãrã na cabairore bairo mu̶jãã caãno jãã boya. 13Dios, marĩ ñicũ̶ Abraham ãnacũ̶rẽ caroaro cũ̶ caáti rũ̶mu̶rẽ cariape cũ̶ majũ ya wãme mena qũĩñupĩ, apei cũ̶ netõrõ caĩñabesei cũ̶ camano jũ̶gori. Bairo qũĩñupĩ: “Caroa majũrẽ mu̶ yu̶ jogu̶. Mu̶ pãrãmerã capããrã majũ na bu̶o joroque yu̶ átigu̶.” 15Bairo cũ̶ caĩrõ bero, Abraham pu̶ame cũ̶ caĩrĩcãrõrẽã bairo caetapa rũ̶mu̶rẽ caroaro mena coteyupi. Cabero Dios cũ̶ caĩcũjũ̶goyetiricarorea bairo cũ̶ baiyupa. 16Camasã pu̶ame, “Cariape majũ jãã ĩña,” na caĩata, na bui macããcũ̶ ya wãme mena ĩ bu̶su̶nucũñama. Bairo cũ̶ wãme mena na caĩbu̶su̶ata, “Marĩ caĩrĩcãrõrẽã bairo marĩ caápericõãta, cũ̶ã, marĩrẽ popiye marĩ baio joroque cũ̶ áparo,” caĩrãrẽ bairo ĩnucũñama. Bairo na caĩrõ bero caãnoi, dope bairo ape wãme ĩ bu̶su̶netõ masĩã maa yua. 17Torecu̶, Dios pu̶ame wasoaricaro mano cariapea caroaro cũ̶ caátibojapeere cũ̶rẽ catũ̶gou̶sarã na camasĩrõrẽ boyupi. Pu̶gani cãrõ tũ̶goñanemorĩcãrõ mano tiere na camasĩrõ boyupi. Bairi cũ̶ caĩcũrĩqũẽrẽ bairo caroaro cũ̶ caátipeere cacũ̶goparãrẽ cũ̶ ya wãme majũ mena na ĩ quetibu̶ju̶yupi. 18Bairo marĩrẽ, “Caroaro mu̶jããrẽ yu̶ átigu̶,” bairi tunu cũ̶ wãme majũ mena ĩrĩ, cũ̶ caĩquetibu̶ju̶rique jũ̶gori marĩ pu̶ame caãnorẽ bairo cariape marĩ tũ̶goñatutuagarã. Dios caĩtopai mee niñami. Cũ̶ caĩrĩqũẽ dope bairo wasoamasĩã maniña. Bairi, “Marĩrẽ netõõgu̶mi Dios cũ̶ caĩrĩcãrõrẽ bairo,” marĩ ĩ tũ̶goñatutuamasĩña. 19“Cũmua capairicare ãpõãpãĩ canu̶cũ̶rĩpãĩ mena jũ̶gori, ti cũmua aperopu̶ wu̶ámasĩẽtĩña,” marĩ ĩ masĩña pu̶gani cãrõ tũ̶goñarĩcãrõ mano. Torea bairo Jesús mena marĩ catũ̶goñatutuarique mena jũ̶gori, “Cũ̶ mena u̶seanirĩ marĩ ãnicõã ninucũgarã tocãnacã rũ̶mu̶a cũ̶ caĩrĩcãrõrẽã bairo,” marĩ ĩ masĩña merẽ pu̶gani cãrõ tũ̶goñarĩcãrõ mano. Apeyera tunu sumo sacerdote majõcu̶ templo wiipu̶ Dios mena bu̶su̶ácú̶, jutii asero yoo ẽñotarica aserore netõrĩ, Dios cũ̶ caãnipau̶pu̶ etanucũñupũ̶. Torea bairo Jesús marĩ catũ̶goñatutuanemojũ̶goricu̶ cũ̶ã cũ̶ cariarique jũ̶gori u̶mu̶recóo Dios cũ̶ caãnipau̶pu̶ etayupi. Marĩ jũ̶goye ájũ̶goyupi u̶mu̶recóore, marĩ cũ̶ yarã cũ̶ã cũ̶ tu̶pu̶ marĩ caámasĩparore bairo ĩ. Bairo cũ̶ caáto jũ̶gori, cũ̶ cũñupĩ Dios marĩ sumo sacerdote majõcu̶re bairo caãnicõãninucũpau̶ majũ. Tirũ̶mu̶pu̶ macããcũ̶ Melquisedec cawãmecu̶cu̶ ãnacũ̶rẽ bairo cũ̶ cũñupĩ.

will be added

X\