HEBREOS 5

1Tocãnacãũ̶pu̶a sumo sacerdote majã marĩ mena macããna camasã na cabesericarã niñama, marĩrẽ Diopu̶re cajẽnibojaparã na ãmarõ ĩrã. Bairi na pu̶ame waibu̶toa riire joemu̶gõjobojanucũñama, camasã na carorije wapare Dios cũ̶ netõõáto ĩrã. 2Bairi tunu sacerdote majõcu̶ marĩrẽ bairo camasocu̶ ãnirĩ Dios cũ̶ carotirije nipetirijere átipeyomasĩẽtĩñami. Bairo cabai ãnirĩ Dios yayere camasĩpeyoenarẽ, rorije caátimawijiarã cũ̶ãrẽ bopacooro majũ na ĩñamaimasĩñami. 3Torecu̶, cũ̶ cũ̶ã rorije cũ̶ caátie cacũ̶gou̶ ãnirĩ cũ̶ yaye wapa, camasã yaye wapa cũ̶ãrẽ waibu̶toa rii mena joemu̶gõjo masĩñami Diopu̶re. 4Jĩcãũ̶ cũ̶ majũ cũ̶ caboro jũ̶gori sacerdote majõcu̶ jããmasĩẽtĩñami. Dios, Aarón ãnacũ̶rẽ cũ̶ cabesecũñarĩcãrõrẽã bairo sacerdote majõcu̶ cũ̶ã Dios cũ̶ caĩñabesericu̶ ũcũ̶ niñami. 5Jesús cũ̶ã cũ̶ majũã sumo sacerdote majõcu̶re bairo jããẽsupĩ. Dios pu̶ame roque cũ̶ jõñupĩ. Atore bairo qũĩñupĩ cũ̶ macũ̶rẽ: “Mu̶, yu̶ macũ̶ majũ mu̶ ãniña. Ati rũ̶mu̶i yu̶ macũ̶ mu̶ ãnijũ̶gogu̶.” 6Dios ya tuti apero cũ̶ caquetibu̶ju̶ropu̶ atore bairo qũĩñupĩ cũ̶ macũ̶rẽ: “Sacerdote majũ, Melquisedec ũcũ̶ mu̶ yu̶ cũña. Mu̶ pu̶ame tocãnacã rũ̶mu̶a camasãrẽ cajẽnibojau̶ mu̶ ãnicõã ninucũgu̶,” qũĩñupĩ Dios cũ̶ macũ̶rẽ. 7Mai, Jesucristo ati yepapu̶ ãcũ̶, popiye baigu̶ jũ̶goye otiri, tutuaro mena Diore qũĩ jẽniñupĩ. Dios jeto cũ̶ netõõmasĩñupĩ roro cũ̶ cabaipee ũnierẽ. Cũ̶ pu̶ame tũ̶goyupi Jesús cũ̶rẽ cũ̶ cajẽnirĩjẽrẽ, Jesús caroaro catũ̶gou̶sau̶ cũ̶ caãno jũ̶gori. Cũ̶ ju̶átinemoñupĩ. 8Bairi Cristo, Dios macũ̶ nimicũ̶ã, roro popiye tãmu̶oñupĩ. Bairo roro cũ̶ catãmu̶orĩqũẽ jũ̶gori caroaro tũ̶gonemo masĩñupĩ Jesús, Dios cũ̶ pacu̶ cũ̶ caátirotirijere. 9Bairo popiye cũ̶ cabairique jũ̶gori caroú̶ majũ ñe ũnie camácũ̶ baietari bero, nipetiro cũ̶rẽ catũ̶gou̶sari majãrẽ yerijõrõ ãnicõã ninucũrĩcãpau̶pu̶ caetaparã na ãnio joroque na ásupi Jesús. 10Torecu̶, Melquisedec sumo sacerdote majõcu̶ Dios cũ̶ cacũrĩcũ̶ ũcũ̶rẽã bairo cũ̶ cũñupĩ Dios, Jesús cũ̶ãrẽ. 11Ati wãme quetibu̶ju̶riquere capee wãme mu̶jãã yu̶ quetibu̶ju̶nemogamiña. Baimicũ̶ã, mu̶jãã pu̶ame tãmurĩ mu̶jãã catũ̶gojẽñomasĩẽtõ jũ̶gori, tiere yu̶ quetibu̶ju̶nemoẽtĩña. 12Tirũ̶mu̶pu̶ merẽ mu̶jãã tũ̶gojũ̶gowu̶ Jesucristo yaye quetire. Bairo tirũ̶mu̶pu̶ catũ̶gojũ̶goricarã ãnirĩ tie quetire cajũ̶gobueri majã mu̶jãã ãnibujiorã. Bairo caãniparã nimirãcũ̶ã, mu̶jãã pu̶ame cariape mu̶jãã tũ̶gojẽñomasĩẽtĩña mai. Dios yaye queti camasiriyoetie ũnieacã cũ̶ãrẽ caroaro majũ tunu mu̶jããrẽ quetibu̶ju̶ricarore mu̶jãã bonucũña. U̶garique majũrẽ cau̶gaena cawĩmarã caũpũrããcã ũnarẽ bairo mu̶jãã ãniña mai. Dios mena mu̶jãã tũ̶goñatutua nemomasĩẽtĩña. 13Cawĩmarã caũpũrããcã pu̶ame, “Atie caroa niña,” o “Atie carorije niña,” na caĩmasĩẽtõrẽã bairo mu̶jãã cũ̶ã caroa macããjẽrẽ mu̶jãã tũ̶goña besemasĩẽtĩña mai. 14U̶gariquere cau̶garãpu̶ niñama cabu̶toa. Na pu̶ame caroaro tũ̶gomasĩjãñuñama caroa wãme ũnierẽ. Bairi, “Atie caroa niña,” o “Atie carorije niña,” ĩ tũ̶goña besemasĩñama.

will be added

X\