HEBREOS 4

1Mai, Dios cũ̶ yapau̶ yerijõrõ caãnopu̶re marĩ cajããmasĩpeere cũ̶ caĩcũrĩqũẽ caãno ũnoa maijũ̶goya mu̶jãã yeri ape wãme roro mu̶jãã catũ̶goñarĩjẽrẽ. Baipu̶a, ni jĩcãũ̶ ũcũ̶ mu̶jãã mena macããcũ̶ jããetibujiou̶mi, tiere cũ̶ camaijũ̶goeticõãta. 2Marĩ ñicũ̶jãã ãnanarẽ Dios cũ̶ caquetibu̶ju̶riquerea bairo marĩ cũ̶ã marĩ tũ̶gowu̶ cũ̶ yaye queti marĩrẽ cũ̶ canetõõgariquere. Na pu̶ame tie quetire catũ̶goricarã na caãnimiatacũ̶ãrẽ, tie narẽ wapa mañupã, na majũ jĩcãrõ tũ̶ni Dios yaye quetire na catũ̶gou̶saetaje jũ̶gori. Dios mena tũ̶goñatutuagaesupa. 3Marĩ pu̶ame roque Dios yaye quetibu̶ju̶riquere cariape catũ̶goricarã ãnirĩ marĩ jããetagarã Dios yapau̶ cayerijõrĩpau̶pu̶. Baipu̶a, marĩ ñicũ̶jããrẽ na asiari, atore bairo na ĩñupĩ Dios: “Caãnorẽ bairo mu̶jããrẽ ñiña: Yu̶ mena caroaro cayerijõrõpu̶ di rũ̶mu̶ ũno mu̶jãã etaetigarã topu̶re,” na ĩñupĩ. Cabaimiatacũ̶ãrẽ, Dios pu̶ame ati u̶mu̶recóore cũ̶ caqũẽñorĩcãrõ beropu̶a merẽ na cayerijãpapau̶re qũẽnoyaparo peticõãmiñupĩ. 4Jĩcãpau̶ Dios ya tutipu̶ atore bairo ĩ quetibu̶ju̶ya ati u̶mu̶recóore cũ̶ caátiyaparorica rũ̶mu̶ bero macãã rũ̶mu̶rẽ: “Dios yerijãñupĩ cũ̶ paariquere yaparori bero pu̶gaa pẽnirõ cãnacã rũ̶mu̶ caáto majũ.” 5Tunu aperopu̶ cũ̶ãrẽ marĩ ñicũ̶jããrẽ na ĩñupã Dios ya tutipu̶: “Di rũ̶mu̶ ũno mu̶jãã etaetigarã yu̶ yapau̶ caroaro yerijõrõ caãnopu̶re,” na ĩñupĩ Dios. 6Dios yaye quetire catũ̶gojũ̶gomirĩcãrã Dios yapau̶ caroaro cayerijõrõpu̶re jããẽtĩgarãma, Diore na cabaibotiorique jũ̶gori. Na bero Dios yaye quetire catũ̶goricarã pu̶ame roque jããrã baiyama. 7Bairi Dios pu̶ame ape yu̶tea cawãma yu̶tea cũnemoñupĩ tunu camasã na canetõmasĩpa yu̶tea ũnorẽ. Marĩ ñicũ̶jãã ãnana Diore cabaibotioyaricarã beropu̶ David ape tuti bero macããcũ̶pu̶ tunu atore bairo ĩ woaquetibu̶ju̶yayupi Dios ya tutipu̶ mu̶jãã yu̶ caĩquetibu̶ju̶atajere: “Ãmerẽ Dios mu̶jããrẽ cũ̶ caquetibu̶ju̶garijere tũ̶gorã, tiere cateerãrẽ bairo baieticõãña,” ĩñupĩ David. 8Josué, Moisés berore marĩ ñicũ̶jãã israelita majãrẽ cajũ̶goricu̶ pu̶ame jĩcãpau̶a caroapau̶ cayerijõrõpu̶ na cajũ̶goátácu̶ cũ̶ caãmata, ape rũ̶mu̶ camasã na canetõõmasĩpa rũ̶mu̶ ũnorẽ quetibu̶ju̶ cũnemoẽtĩbujioricu̶mi Dios. 9Bairi mai, Dios yapau̶ caroaro cayerijõrĩpau̶ cũ̶ ya poa macããna na caãniparo nicõãña. 10Dios cũ̶ paariquere átiyaparori bero, cũ̶ cayerijãrĩcãrõrẽã bairo ni jĩcãũ̶ ũcũ̶ Dios yapau̶ caroaro cayerijõrĩpau̶ caetau̶ pu̶ame cũ̶ paariquere jãnarĩ cũ̶ cũ̶ã yerijãgu̶mi. 11Torena, marĩ cũ̶ã tutuaro mena marĩ tũ̶goñatutuanemorotiya, topu̶re etagarã, “Marĩ ñicũ̶jãã catũ̶gou̶saetana na cabaiyaricarore bairo marĩ baire,” ĩrã. 12Dios bu̶su̶rique pu̶ame marĩrẽ cacatirã marĩ ãnio joroque marĩ átiya. Ñosẽricapãĩ pu̶ga nu̶gõã caoripãĩ marĩ yeripu̶ caetarore bairo niña Dios bu̶su̶rique. Tipãĩ netõrõ etamasĩña Dios bu̶su̶rique marĩ yeripu̶, marĩ catũ̶goñarĩjẽ nipetiro macããjẽpu̶. Bairi tiere tũ̶gorã yua, marĩ pupeapu̶ marĩ catũ̶goñarĩjẽrẽ, “Caroa niña,” o “Carorije niña tie,” marĩ ĩ tũ̶goña besemasĩña. 13Marĩã, Dios cũ̶ caátana marĩ ãniña. Bairi ni jĩcãũ̶ ũcũ̶ marĩ mena macããcũ̶ yasioropu̶ cũ̶ caátiere átimasĩẽtĩñami Dios cũ̶ caĩñajoro. Nipetirije marĩ caátiere masĩpeti majũcõãñami Dios, marĩrẽ caĩñabesepau̶ ãnirĩ. 14Jesús, Dios macũ̶ pu̶ame marĩ sumo sacerdote majũrẽ bairo caãcũ̶ etayupi u̶mu̶recóopu̶re. Bairi marĩ pu̶ame Jesucristo mena marĩ catũ̶goñatutuacõã ninucũrĩjẽrẽ áticõã ninucũrotiya. 15Jesús, marĩ sumo sacerdote pu̶ame marĩ cayeri wẽpũ̶ẽtĩẽrẽ masĩcõãñami. Bairi marĩrẽ bopacooro majũ marĩ ĩñanemomasĩñami, merẽ cũ̶ cũ̶ã bopacooro bairique ũnierẽ marĩrẽã bairo catãmu̶oñarĩcũ̶ ãnirĩ. Bairo cabairicu̶ nimicũ̶ã, cũ̶ pu̶ame jĩcã ni ũno roro ápeyupi. Jĩcã ni ũno wãtĩ cũ̶ caĩrĩjẽrẽ yu̶esupi. 16Bairi uwiricaro mano Diore cũ̶ marĩ jẽnigarã nocãrõ marĩrẽ camaimajũũ̶rẽ. Marĩ roro marĩ cabairijere cũ̶ cabopaca ĩñaparore bairo ĩrã, tũ̶goñatutuarique mena cũ̶ marĩ jẽnigarã. Bairo marĩ caápata, marĩrẽ ju̶átinemogu̶mi popiye marĩ cabairi rũ̶mu̶rẽ, nocãrõ cañuu̶ majũ ãnirĩ.

will be added

X\