HEBREOS 3

1Bairo cabairoi, mu̶jãã yu̶ yarãrẽ bairo caãna, Dios yarã, cũ̶ ya poa macããna mena macããna, Dios cũ̶ cabesericarã cũ̶ yarã majũ, atore bairo mu̶jããrẽ ñiña: Jesucristo pu̶ame apóstol majũ Dios cũ̶ caquetibu̶ju̶rotijoricu̶ niñami. Marĩ sumo sacerdote majũ niñami. Cũ̶ jũ̶gori caroaro cariape Dios mena marĩ tũ̶goñatutuamasĩña. Bairi cũ̶ jetorea cariape tũ̶goñanucũña. 2Marĩ ñicũ̶ Moisés ãnacũ̶ caroaro cariape átiyayupi Dios cũ̶rẽ cũ̶ caátiroticũrĩqũẽrẽ marĩ ñicũ̶jãã Israel macããnarẽ. Moisés cũ̶ cabairicarorea bairo Jesús cũ̶ã caroaro cariape ásupi Dios cũ̶rẽ cũ̶ caátiroticũrĩqũẽrẽ, Jesús, Dios cũ̶ cabesericu̶ majũ cũ̶ã. 3Cũ̶ pu̶ame jĩcã wii caqũẽnorĩ majõcu̶re bairo caãcũ̶ niñami. Moisés pu̶ame ti wiire bairo caãcũ̶ niñami. Jĩcã wii caqũẽnorĩcũ̶ ti wii netõõrõ caãnimajũũ̶ niñami. Bairo cabairoi, Jesús, Moisés netõrõ caãnimajũũ̶ niñami. 4Tocãnacã wiipu̶a, wiiri jĩcãũ̶ jũ̶gori caqũẽnoecorica wiiri niña. Bairo camasã, jĩcã wãme na caqũẽnomasĩmiatacũ̶ãrẽ, nipetirije Dios cũ̶ caátimasĩrĩjẽ jeto niña. 5Moisés pu̶ame caroaro cariape átiyayupi Dios cũ̶ caátiroticũrĩqũẽrẽ. Cũ̶ pu̶ame Israel macããnarẽ Dios cũ̶ caquetibu̶ju̶garijere na quetibu̶ju̶netõñupĩ. Jĩcã wiipu̶ capaabojau̶ ũcũ̶rẽ bairo caãcũ̶ ãñupĩ Moisés ãnacũ̶. 6Jesús pu̶ame roque Dios macũ̶ majũ ãnirĩ, ti wii upau̶ cariape caácu̶ ũcũ̶ niñami. Marĩã, ti wii macããnarẽ bairo caãna marĩ ãniña, cũ̶ mena u̶seanirĩ marĩ catũ̶goñatutuacõã ninucũata. 7Torecu̶, Espíritu Santo atore bairo ĩñupĩ Dios ya tutipu̶re: “Ãmerẽ Dios mu̶jããrẽ cũ̶ caquetibu̶ju̶garijere tũ̶gorã, tiere cateerãrẽ bairo baieticõãña. 8Mu̶jãã ñicũ̶jãã ãnana Diore cũ̶ baibotionucũwã. Desierto cayucu̶manopu̶ ãna Diore cũ̶ tũ̶gogaetiri, bu̶tioro cũ̶ asiao joroque baiwã. Bairi mu̶jãã pu̶ame narẽ bairo baieticõãña. Cayu̶gaenarẽ bairo baieticõãña. 9Topu̶ mu̶jãã ñicũ̶jãã yu̶ yayere tũ̶gogaetiri, yu̶ asiao joroque yu̶ áma. Narẽ yu̶ camasĩrĩjẽ mena cuarenta cũ̶marĩ majũ yu̶ caátijẽño ĩñorĩjẽrẽ ĩñamirãcũ̶ã, yu̶ baibotiocõã ninucũwã. 10Torecu̶, ti tuti macããnarẽ na yu̶ asiajãñuwũ̶. Atore bairo na ñiwũ̶: ‘Ricaati tũ̶goñarĩqũẽ jetore mu̶jãã yeri pũna mena mu̶jãã tũ̶goñamawijia ñesẽãnucũña, yu̶ yaye quetire boetiri.’ 11Bairo asiari yua, atore bairo na ñiwũ̶: ‘Caãnorẽ bairo mu̶jããrẽ ñiña: Yu̶ mena caroaro cayerijõrõpu̶ di rũ̶mu̶ ũno mu̶jãã etaetigarã topu̶re,’ na ñiwũ̶,” ĩñupĩ Dios. 12Bairi yu̶ yarã, tocãnacãũ̶pu̶a maijũ̶goya mu̶jãã yeri ape wãme roro mu̶jãã catũ̶goñarĩjẽrẽ. Roro mu̶jãã yeripu̶a mu̶jãã catũ̶goñaata, Dios caãnicõãninucũũ̶rẽ cũ̶ jãnaweyorãrẽ bairo mu̶jãã baigarã. 13Bairo pu̶ame roque boya mu̶jããrẽ: Tocãnacã rũ̶mu̶a jĩcãrõ tũ̶goñatutuao joroque ãmeo ása Dios mena. Bairo áticõã ninucũña mai mu̶jãã cacatiri rũ̶mu̶ cãrõ, ni ũcũ̶ mu̶jãã mena macããcũ̶ jĩcãũ̶ wãtĩrẽ bu̶su̶jãecoremi ĩrã. Bairi wãtĩrẽ mu̶jãã cabu̶su̶jãecoata, Diore cayu̶gaenarẽ bairo mu̶jãã tuagarã tunu. 14Jesucristo mena mu̶jãã catũ̶goñatutua jũ̶goricapau̶pu̶ina tũ̶goñatutuacõã ninucũña ati u̶mu̶recóore mu̶jãã caãni rũ̶mu̶ cãrõ. Bairo mu̶jãã caátiãmata, Jesucristo mena mu̶jãã ãnicõã ninucũgarã. 15Bairi atore bairo ĩña Dios cũ̶ caquetibu̶ju̶ricaropu̶: “Ãmerẽ Dios mu̶jããrẽ cũ̶ caquetibu̶ju̶garijere tũ̶gorã, tiere cateerãrẽ bairo baieticõãña. Mu̶jãã ñicũ̶jãã Diore cabaibotionucũñarĩcãrã ãnanarẽ bairo baieticõãña,” ĩña ti tutipu̶. 16¿Noa ũna na ãñuparĩ Dios bu̶su̶riquere tũ̶gori bero, tunu tiere catũ̶gogaetana? Naa ãñupã marĩ ñicũ̶ ãnacũ̶ Moisés, Egipto yepapu̶ caãnarẽ cũ̶ cajewiyoricarã. 17¿Noa menarẽ Dios cuarenta cũ̶marĩ majũ cũ̶ asia ãñuparĩ? Naa ãñupã na carorije wapa jũ̶gori desierto cayucu̶manopu̶ cayasiricarã. 18Tunu, ¿noa ũnarẽ atore bairo qũĩñuparĩ Dios: “Caãnorẽ bairo mu̶jããrẽ ñiña: Yu̶ mena caroaro cayerijõrõpu̶ di rũ̶mu̶ ũno mu̶jãã etaetigarã topu̶re,” na qũĩñuparĩ? Naa ãñupã Diore cabotioricarã. 19Merẽ marĩ masĩña na cabairiquere. Diore na cabaibotiorique jũ̶gori cũ̶ mena caroaro caãnopu̶ etamasĩẽsupã.

will be added

X\