HEBREOS 2

1Bairo Jesús caãnimajũũ̶ cũ̶ caãnoi, cũ̶ yaye queti marĩ catũ̶gojũ̶goriquere nemojãñurõ marĩ tũ̶gou̶sanemogarã, ape wãme marĩ tãmu̶ore, ĩrã. 2Tirũ̶mu̶pu̶a Dios ángelea majã jũ̶gori quetibu̶ju̶yayupi camasãrẽ cũ̶ yaye quetire. Na caĩrĩqũẽ cariape ãñupã. Bairi cũ̶ yaye quetire caboena, aperã roro caátimajã cũ̶ãrẽ cariapea popiye na baio joroque na ásupi Dios. 3Bairi Jesucristo marĩrẽ cũ̶ canetõõrĩqũẽrẽ marĩ caboeticõãta, dope bairo marĩ rutimasĩẽtĩña. Jesús pu̶ame tie quetire caãnijũ̶goripau̶ quetibu̶ju̶jũ̶goyupi. Cabero aperã cũ̶rẽ catũ̶goricarã pu̶ame marĩ quetibu̶ju̶nemoñupã tunu cũ̶ yaye quetire. 4Bairi Dios cũ̶ã, “Cariapea niña yu̶ macũ̶ yaye queti,” ĩ, marĩ áti ĩñowĩ capee wãme cũ̶ camasĩrĩjẽrẽ. Tunu bairoa Espíritu Santo jũ̶gori marĩ joyupi nipetiri wãme marĩ camasĩpeere. Cũ̶ cabori wãme caãnorẽ bairo marĩ joyupi tocãnacãũ̶rẽã. 5Mu̶jããrẽ yu̶ caquetibu̶ju̶atatore bairo ati u̶mu̶recóo capetiro bero ãnigaro ape u̶mu̶recóo tunu. Ángelea majã pu̶ame cũ̶ã yua, carotimasĩẽnarẽ bairo na cũgu̶mi ti u̶mu̶recóo caãno Dios. 6Jĩcãpau̶ Dios ya tutipu̶ atore bairo ĩ quetibu̶ju̶yupi jĩcãũ̶: “¿Nopẽĩ Dios jããrẽ tocãrõ majũ miñaposeroyati? Cabu̶goro macããna jãã caãnimiatacũ̶ãrẽ, ¿nopẽĩ jããrẽ tocãrõ majũ mu̶ tũ̶goñanucũñati? 7Ati yu̶tea caãno mai ángelea majã roca macããnarẽ bairo jããrẽ mu̶ cũñupã. Bairo jããrẽ cũmicũ̶ã, ãmerẽ yua, caãnimajũrã jãã ãnio joroque mu̶ átiya. 8Nipetirije uparãrẽ bairo jããrẽ mu̶ cũñupã,” ĩ quetibu̶ju̶yupi jĩcãũ̶. Bairo camasãrẽ nipetiro uparãrẽ bairo cũrĩ yua, dise ũnie na netõnu̶cãẽtĩña. Cabaimiatacũ̶ãrẽ, camasã nipetiro rotipeyojĩãti masĩẽtĩñami mai. 9Jesús cũ̶ãrẽ peti yu̶tea cãrõã ángelea majã roca macããcũ̶rẽ bairo cũ̶ cũñupĩ Dios. Cũ̶ pu̶ame camasãrẽ camainetõũ̶ ãnirĩ, Jesucristo cũ̶ riao joroque ásupi. Bu̶tioro popiye netõñupĩ, Jesús marĩ ãme caãnarẽ netõõgu̶. Bairo cũ̶ cabairique jũ̶gori yua, Dios pu̶ame caroa tutuarique majũrẽ cũ̶ joyupi. Quetiupau̶ majũ cũ̶ jããõ joroque cũ̶ ásupi tunu. 10Nipetiro ati u̶mu̶recóo macããjẽ, Dios cũ̶ caátaje niña. Nipetirije ati u̶mu̶recóo caãnie baiãnimasĩña Dios cũ̶ caátirotimasĩrĩjẽ jũ̶gori. Dios pu̶ame cũ̶ pũna caãna nipetiro cũ̶tu̶ caroaro caãnopu̶ na caãnorẽ boyupi. Bairi Jesucristo popiye cũ̶ catãmu̶orĩqũẽ jũ̶gori ñe ũnie caru̶saecu̶ cariape camasãrẽ canetõõmasĩ majũ cũ̶ ásupi. 11Jesús marĩrẽ canetõõrĩcũ̶, bairi marĩ cũ̶ canetõõrĩcãrã cũ̶ã jĩcãrõ tũ̶nia Dios pũnaa jeto marĩ ãniña. Bairi Jesús Dios macũ̶ pu̶ame, “Yu̶ bairãrẽ bairo caãna niñama,” ĩ tũ̶goñaboboetiyami. 12Bairo ĩ tũ̶goñaboboetiri, atore bairo qũĩ quetibu̶ju̶yupi Jesús Diore: “Mu̶ caátiãnierẽ na yu̶ quetibu̶ju̶gu̶ yu̶ bairãrẽ bairo caãnarẽ. Na cañubueneñarõpu̶, ‘Catutuau̶, cañuu̶ niñami Dios,’ na ñi quetibu̶ju̶gu̶.” 13Apero cũ̶ caquetibu̶ju̶ropu̶ bairo qũĩñupĩ Jesús Diore: “Yu̶a, Dios mena yu̶ tũ̶goñatutuaya.” Tunu aperopu̶ qũĩñupĩ: “Atoa yu̶ ãniña mu̶ pũnaa, yu̶ mu̶ cajoricarã mena,” qũĩñupĩ Jesús Diore. 14Jĩcãũ̶ pũnaa, jĩcãũ̶ rupau̶ na caãnorẽ bairo Jesús cũ̶ã ati rupau̶ caãcũ̶ etayupi. Bairi cũ̶ pu̶ame marĩrẽ bairo ati rupau̶ mena cacũ̶gou̶ riayupi, marĩrẽ cateeri majõcu̶ wãtĩ, yasiriquere caátimajõcu̶re cũ̶ netõgu̶. 15Marĩ camasã marĩ cayasipeere cauwirã marĩ ãnimiñupã tocãnacã rũ̶mu̶a. Bairo marĩ cabaimiatacũ̶ãrẽ, Jesús pu̶ame marĩrẽ caroaro cũ̶ caátibojarique jũ̶gori di rũ̶mu̶ ũno marĩ uwinemoetigarã. 16Cariapea, Jesús pu̶ame ángelea majãrẽ ju̶átigu̶ mee, marĩ Abraham pãrãmerã roquere marĩ ju̶átigu̶, ati yepapu̶ buia etayupi. 17Jesucristo pu̶ame marĩ cũ̶ yarã rupau̶re bairo caãcũ̶ ãñupĩ, marĩ sumo sacerdote caãcũ̶rẽ bairo tuagu̶. Dios cũ̶ caĩñajoro yua, Dios yayere caquetibu̶ju̶netõũ̶ cañuu̶, bopacooro camasãrẽ caĩñau̶ tuayupi, marĩ rupau̶re bairo caãcũ̶ ãnirĩ. Bairo caãcũ̶ ãnirĩ, cũ̶ã, camasã roro na caátie wapare netõõñupĩ, roro popiye cũ̶ catãmu̶orĩqũẽ jũ̶gori. 18Bairo Jesús roro átiecori, wãtĩ cũ̶ãrẽ roro cũ̶ caátirotiriquere yu̶esupi. Bairo cabairicu̶ ãnirĩ ãme cũ̶ãrẽ Jesús ju̶átimasĩjãñuñami wãtĩ camasãrẽ roro cũ̶ caátigari majãrẽ.

will be added

X\