HEBREOS 13

1Mu̶jãã pu̶ame jĩcãũ̶ pũnaa na caãmeomairõrẽ bairo mu̶jãã cũ̶ã ãmeo maijãnaeticõãña. 2Tunu bairoa aperã camasã mu̶jãã ya wii caĩñañesẽãrã cũ̶ãrẽ caroaro mena na bocári na qũẽnonucũña. ¡Tame, mu̶jãã mena macããna jĩcããrã, ángelea majãrẽ camasĩẽna nimirãcũ̶ã, caroaro na bocári na qũẽnoñupã na wiiripu̶! 3Preso jorica wiipu̶ caãna cũ̶ãrẽ na mu̶jãã masiritiepa. Mu̶jãã cũ̶ã preso jorica wiipu̶ caãna mena ãnarẽ bairo tũ̶goñaña. Na ju̶átinemoña. Roro caátiecoricarã cũ̶ãrẽ na tũ̶goñaña. Ape rũ̶mu̶ mu̶jãã cũ̶ã narẽ bairo mu̶jãã tãmu̶obujiorã, ati yepapu̶ mu̶jãã caãni rũ̶mu̶ caãno. Bairi na ĩñamairotiya. 4Tunu apeyera cawãmo jiyaricarãrẽ nipetiro na mu̶jãã caĩñanu̶cũ̶bu̶goro ñuña. Roro ãmeo átiepeeticõãña. Caroa wãme átaje jetore átiãña. Dios pu̶ame ĩñabesegu̶mi roro caãmeo átieperi majãrẽ. Canu̶mocu̶na, canu̶mo mána cũ̶ã roro na caátie jũ̶gori popiye na baio joroque na átigu̶mi Dios. 5Dinero pũrõrẽ cabonetõrãrẽ bairo baieticõãña. Ãme ati yepapu̶ ãna, mu̶jãã cacũ̶gorije mena yeri ñucõãña. Atore bairo Dios cũ̶ caĩrĩcã wãmerẽ tũ̶goñaña: “Mu̶jãã yu̶ aweyoetigu̶. Mu̶jãã yu̶ ju̶átinemonucũgu̶,” ĩñupĩ Dios. 6Bairi yua, pu̶gani cãrõ tũ̶goñarĩcãrõ mano atore bairo marĩ ĩ masĩña: “Marĩ Quetiupau̶ marĩ ju̶átinemogu̶mi. Bairi ni jĩcãũ̶ ũcũ̶ yu̶re roro caátigau̶re yu̶ uwietiya,” marĩ ĩ masĩña. 7Bairi mu̶jããrẽ cañubuejũ̶gori majã, aperã Dios yaye quetire mu̶jããrẽ caquetibu̶ju̶ricarã na cabairique cũ̶ãrẽ caroaro tũ̶goñaña. Na pu̶ame popiye baimirãcũ̶ã, Jesucristo mena tũ̶goñatutuacõãñupã na cariari rũ̶mu̶pu̶. Mu̶jãã cũ̶ã Jesucristo mena na catũ̶goñatutuaricarorea bairo cũ̶ mena tũ̶goñatutuacõã ãninucũña. 8Jesucristo caãnijũ̶goripau̶pu̶a caroaro cariape caãcũ̶ ãñupĩ. Ãme cũ̶ãrẽ bairoa nicõã ninucũñami. Bairi cũ̶ã nicõã ninucũgu̶mi tocãnacã rũ̶mu̶a. Cũ̶ yeri cũ̶ catũ̶goñarĩjẽ wasoetiyami. 9Bairi mu̶jãã nipetiro ape wãme quetibu̶ju̶rique ũnierẽ tũ̶gou̶saeticõãña. Dios cũ̶ camairĩjẽ mena yeri tutuarã marĩ ãnio joroque caáto ñuña. U̶garique wãmerẽ besecõñarĩ na cau̶garotirore bairo marĩ caáto mee, marĩ yeri tũ̶goñatutuao joroque marĩ átiya. Tie caátirotirije dope átimasĩã maniña, cañumiatacũ̶ãrẽ. 10Marĩã, Jesucristo yucu̶pãĩpu̶ cũ̶ cariarique jũ̶gori ape wãme waibu̶cu̶ joemu̶gõjoriquere cacũ̶gorãrẽ bairo marĩ baiya. Nipetiro sacerdote majã tirũ̶mu̶pu̶ macã santuariore capaacoteri majã ũna pu̶ame roque jĩcã wãme ũno cũ̶gomasĩẽtĩñama marĩ canetõrĩcã wãmerẽ. Moisés ãnacũ̶ cũ̶ caátiroticũrĩqũẽrẽ na cabonetõrõ jũ̶gori, marĩ, Jesucristo ya poa macããna mena narẽ ãnimasĩã maa. 11Bairi sumo sacerdote jeto waibu̶toa riíre santuariopu̶ jeámasĩñami, roro camasã na caátie wapare Dios cũ̶ camasiriyobojaparore bairo ĩ. Waibu̶toa rupau̶ri ãnajẽ pu̶amerẽ ti aru̶a santuario camano, ti macã jũ̶goyepu̶ tiere joenucũñupã. 12Torecu̶, Jesús cũ̶ã roro yucu̶pãĩpu̶ cũ̶ cariari rũ̶mu̶rẽ, macã camanopu̶ riayupi, cũ̶ ya poa macããnarẽ cũ̶ rií jũ̶gori carorije wapa mána caroarã Dios ya poa macããna majũ na ãmarõ ĩ. 13Bairi cabu̶cu̶ wãme átajere jãnarĩ marĩ cũ̶ã Jesús cũ̶ cabairicarorea bairo popiye baimirãcũ̶ã, tiere tũ̶goñaenarẽ bairo marĩ catũ̶goñanetõrõ ñuña. Marĩ Quetiupau̶ Jesure roro popiye cũ̶ na caátatorea bairo marĩ cũ̶ãrẽ aperã roro marĩ na caátieperijere marĩ ẽñotaetigarã. 14Marĩã, ati yepapu̶re jĩcã macã tocãnacã rũ̶mu̶a caãnicõãninucũpã macãrẽ marĩ cũ̶goetiya. Bairi ape macã Dios ya macã tocãnacã rũ̶mu̶a caãnicõãninucũpã macãrẽ camacãránárẽ bairo caãna marĩ ãniña. 15Bairi tocãnacãnia marĩ Pacu̶ Diore, bairi Jesucristo cũ̶ãrẽ basapeorotiya. Marĩ cabasapeorije waibu̶toa riire marĩ cajoemu̶gõjorije ũnie niña. Bairi marĩ risero mena, “Jãã Pacu̶, mu̶ ñumajũcõãña jãã mena,” cũ̶ marĩ caĩbasapeope niña. 16Caroa wãme camasã mena átiãnajẽrẽ masiritieticõãña. Tunu bairoa aperã camasãrẽ mu̶jãã cacũ̶gorije mena na cabopacarijere na ju̶átinemonucũña. Tie waibu̶cu̶ riire joemu̶gõjorãrẽ bairo mu̶jãã caátie niña. Tie ũnie roquere ĩñajesoyami Dios. 17Torena, mu̶jããrẽ carotiri majãrẽ caroaro mena na yu̶ya. Caroaro mena na carotirijere ása. Na pu̶ame yerijãrĩcãrõ mano caroaro ĩñacotenucũñama mu̶jããrẽ. “Marĩ paarique cũ̶ãrẽ ĩñabesegu̶mi Dios,” ĩ tũ̶goñarĩ, tore bairo átinucũñama mu̶jããrẽ carotiri majã pu̶ame. Bairi mu̶jããrẽ carotiri majã na caĩñajesoparo ñurõ caroaro mena na paabojanucũña. Mu̶jãã capaarijere na ĩñajesoetio joroque ápericõãña. Bairo mu̶jãã caápericõãta, ñe ũnierẽ caáperãrẽ bairo mu̶jãã tuabujiorã. 18Bairi apeyera tunu, jããrẽ Diopu̶re mu̶jãã jẽnibojagarã. Pu̶gani tũ̶goñarĩcãrõ mano jãã masĩña merẽ caroaro yerijõrõ jãã catũ̶goñarĩqũẽ cu̶tiere. Nipetiropu̶re caroaro cariape jãã caátiãnimasĩpeere jãã boya. 19Bairi apeyera Diopu̶re yu̶ mu̶jãã cajẽnibojanucũrõ yu̶ boya. Bairo yu̶ mu̶jãã cajẽnibojaro, mu̶jãã tu̶pu̶ yoaro mea tunu yu̶ ãnio joroque Dios cũ̶ áparo ĩrã, yu̶ mu̶jãã jẽnibojawa. 20Dios pu̶ame caroaro yerijõrõ caãnajẽcu̶cu̶ niñami. Tunu bairoa marĩ Quetiupau̶ Jesucristore cariacoatacu̶ cũ̶ caãnimiatacũ̶ãrẽ, tunu cũ̶ catio joroque caátacu̶ niñami. Marĩrẽ, oveja coteri majõcu̶re bairo caãcũ̶, Jesús cũ̶ cariarique jũ̶gori cawãma wãme Dios cũ̶ yarãrẽ cũ̶ caátibojarique caãnicõãninucũpeere caãnorẽ bairo to tuao joroque caátacu̶ niñami Dios. 21Bairo caátacu̶ pu̶ame nipetiri wãme mu̶jããrẽ jĩcãrõ tũ̶ni ñe ũnie wapa cacũ̶goenarẽ bairo caãna mu̶jãã cũ̶ áparo. Bairo cũ̶ caáto, nipetiro cũ̶ cabori wãme ũnie jetore caroaro mu̶jãã átimasĩgarã. Bairi marĩrẽ cũ̶ caátigari wãme cãrõ marĩ cũ̶ áparo Jesucristo jũ̶gori. Bairi atore bairo marĩ ĩña: “Jesucristore marĩ cabasapeorije to petieticõãto. Bairoa to baiáto,” marĩ ĩña. 22Yu̶ yarã mu̶jããrẽ ñiña: Atie queti petoaca mu̶jããrẽ yu̶ caquetibu̶ju̶woatujorijere caroaro yerijõrõ tũ̶gopeoya. 23Bairi apeyera, atiere mu̶jãã camasĩrõ yu̶ boya: Marĩ yau̶ Timoteo cũ̶ã merẽ preso jorica wiipu̶ caãnimiatacu̶ witiyupi. Bairi ato yu̶tu̶ tãmurĩ cũ̶ caetaata, cũ̶ mena yu̶ atígu̶ mu̶jããrẽ yu̶ caĩñau̶átí rũ̶mu̶rẽ yua. 24Bairi nipetiro mu̶jããrẽ cajũ̶goñubueri majã, aperã Dios ya poa macããna nipetiro cũ̶ã na ñuáto. Ati yepa Italia yepa macããna cũ̶ã mu̶jããrẽ bu̶tioro ñurotijoyama. 25Mu̶jãã nipetirore caroa macããjẽ, caroare cũ̶ jonemoáto Dios. Tocãrõã niña atie yu̶ cawoaturije.

will be added

X\