HEBREOS 12

1Bairi marĩ jũ̶goye caãnana capããrã Dios mena catũ̶goñatutua ĩñorĩcãrãrẽ camasĩrã ãnirĩ nipetirije marĩrẽ roro marĩ baio joroque caátiere, bairi roro camasã marĩ caátie macããjẽ, caroaro caãnimasĩrotietie ũnierẽ tocãrõã marĩ jãnacõãgarã. Tiere jãnarĩ, Dios mena tũ̶goñatutuari, ati yepapu̶ marĩ caãno ũno mai, cariapea tũ̶goñaenarẽ bairo tiere marĩ tũ̶goñanetõcõã ãnigarã, marĩ caátóre marĩ caetaparo jũ̶goye. Caatu̶ri majõcu̶ ñe ũnie cũ̶ wãmorẽ cũ̶goecu̶ ãcũ̶ caroaro mena atu̶masĩñami, cũ̶ caatu̶ẽmu̶etaro bero cũ̶ cawapatapeere camasĩ ãnirĩ. Torea bairo marĩ cũ̶ãrẽ caroaro boya. 2Jesucristo jĩcãũ̶rẽã cũ̶ marĩ catũ̶gou̶saro ñuña. Cũ̶, Jesucristo jetoa marĩ catũ̶goñatutuari wãmerẽ cajou̶ majũ niñami. Bairi cũ̶ jũ̶gori nipetiro cũ̶ mena catũ̶goñatutuarãrẽ ñe ũnie carorije camána, jĩcãrõ tũ̶ni caroarã majũ na ãnio joroque caácu̶ niñami. Jesús pu̶ame bopacooro netõrõ baiyupi yucu̶pãĩpu̶. Tipãĩpu̶ riau̶, roro bopacooro cũ̶ cabaipeere tũ̶goñabobori, tie cũ̶ cariápeere ẽñotari, “To baieticõãto,” ĩẽsupĩ Jesús. Cũ̶ pu̶ame cũ̶rẽ popiye cũ̶ baio joroque na caáto bero, nocãrõ majũ caroaro u̶seanirĩqũẽ mena yerijõrõ cũ̶ caãnipeere masĩrĩ popiye cũ̶ cabairiquere netõmasĩñupĩ. Bairo bairi bero, Dios carotimasĩ cũ̶ caruirotu̶ cariape nu̶gõã pu̶ame ruiásúpi Jesús. 3Mai, Jesús ati yepapu̶ cũ̶ caãno, carorã cũ̶rẽ popiye baio joroque caánarẽ roro na átiãmeesupi. Cariape cũ̶ caátiãnierẽ caroaro marĩ tũ̶goñagarã. Bairi mu̶jãã popiye baimirãcũ̶ã, u̶searitieticõãña. Ju̶tieticõãña mu̶jãã caátiãnie caroa macããjẽrẽ. 4Carorijere caboenarẽ bairo ãna, Jesucristo cũ̶ catãmu̶orĩcãrõrẽ bairo roro majũpũ̶rã mu̶jãã tãmu̶oetimiña mai. Carorã cañuena mu̶jããrẽ roro mu̶jãã pajĩãreetiyama mai bairãpu̶a. 5¿Dios, mu̶jãã cũ̶ pũnaa majũrẽ bairo caãnarẽ mu̶jãã cũ̶ caĩbeyoriquere merẽ mu̶jãã masiriticoati? Cũ̶ ya tutipu̶ atore bairo ĩ woaturotiyupi Dios: “Macũ̶, ĩñateeticõãña mu̶ yu̶ cabeyorijere. Mu̶rẽ yu̶ catutiri rũ̶mu̶ caãno tiere tũ̶gori u̶searitieticõãña. 6Yu̶a, capacu̶ ãnirĩ yu̶ camai ĩñarã yu̶ pũnaarẽ cariape na yu̶ beyomasĩña. Bairi tunu yu̶ macũ̶rẽ bairo caãcũ̶rẽ tutuaro mena cũ̶ yu̶ quetibu̶ju̶ masĩña, caroaro cũ̶ áparo ĩ,” ĩ quetibu̶ju̶yupi. 7Bairi mu̶jãã pu̶ame Dios, mu̶jããrẽ cũ̶ cabeyorijere tũ̶gou̶saya. Bairo mu̶jãã catũ̶gou̶saata, cũ̶ pũnaa majũrẽ bairo mu̶jãã átigu̶mi. Ni ũcũ̶ camacũ̶cu̶cu̶ camasĩ cũ̶ macũ̶rẽ cũ̶ beyoeticoa baiecu̶mi. Torecu̶, marĩ Pacu̶ Dios cũ̶ã marĩ beyomasĩñami. 8Bairo mu̶jããrẽ cũ̶ cabeyoeticõãta, cũ̶ pũnaa mee mu̶jãã ãnibujiorã. Capacu̶ mánarẽ bairo caãna mu̶jãã tuabujiorã. 9Apeyera marĩ, cawĩmarã marĩ caãno, marĩ pacu̶a marĩ beyonucũwã. Tie na caĩbeyorijere nu̶cũ̶bu̶goro marĩ tũ̶gonucũwũ̶. Bairo cabairicarã caãna nimirãcũ̶ã, ¿dopẽĩrã marĩ Pacu̶ Dios pu̶amerẽ cũ̶ cabeyorijere marĩ tũ̶gou̶saetiyati? Cũ̶ pu̶ame roquere netõjãñurõ nu̶cũ̶bu̶gorique mena cũ̶ caĩrĩjẽrẽ tũ̶gou̶sarotiya, caroa yeri pũna mena ãnigarã. 10Ati yepapu̶re nocãrõ yoari yu̶tea mea marĩ caãnipeere marĩ pacu̶a marĩ beyo ãninucũñama. Na camasĩrõ cãrõ marĩ beyonucũñama. Bairo na caátimiatacũ̶ãrẽ, netõjãñurõ cariape beyomasĩñami marĩ Pacu̶ Dios roque, cũ̶rẽ bairo caroarã marĩ caãniparore bairo ĩ. 11Dise ũnie marĩrẽ tutuaro mena na cabeyorije u̶seanirõ marĩ áperiya. Marĩ yapapuao joroque marĩ átiya tipau̶ jetore bairopu̶a. Cabaimiatacũ̶ãrẽ, caberopu̶ tie na caĩbeyorijere cariape mena marĩ catũ̶gou̶saata, caroaro cariape yerijõrõ marĩ ãnimasĩgarã. 12Bairi cũ̶ ricaari, cũ̶ ñicããrĩ catutuaecu̶, Dios cũ̶ camasĩrĩjẽ jũ̶gori tunu cũ̶ cacatinemorõrẽã bairo mu̶jãã cũ̶ã Dios cũ̶ camasĩrĩjẽ jũ̶gori cũ̶ mena tũ̶goñatutuanemoña tunu. Caroaro cariape áticõã ninucũña. Ricaati átiãnajẽrẽ jãnacõãña. 14Nipetiro camasã mena caroaro yerijõrõ ãnajẽcu̶sa. Tunu bairo carorije wapa mánarẽ bairo ãnajẽcu̶sa. Carorije wapa cacũ̶gorã pu̶ame marĩ Quetiupau̶re ĩñamasĩẽtĩgarãma. Caroa yeri pũna cacũ̶gorã roque qũĩñagarãma. 15Mu̶jãã majũ tũ̶goñatutuao joroque ãmeo ása, tocãnacãũ̶pu̶a mu̶jãã mena macããna Dios tu̶pu̶ na caẽmu̶etamasĩparore bairo ĩrã. Bairi ni jĩcãũ̶ ũcũ̶ mu̶jãã mena macããcũ̶ rorije caáticotei cũ̶ manicõáto. Rorije caácu̶ cũ̶ caãmata, rorije na áticotebujiou̶mi camasãrẽ. 16Ni jĩcãũ̶ ũcũ̶ mu̶jãã mena macããcũ̶ roro cũ̶ rupau̶ caborore bairo cũ̶ átiepeeticõãto. Tunu bairoa Dios yaye caroa wãmerẽ, “Cabu̶goro macããjẽ niña,” caĩrãrẽ bairo baieticõãña. Esaú ãnacũ̶rẽ bairo baieticõãña mu̶jãã. Cũ̶ pu̶ame cũ̶ pacu̶ cũ̶ camacũ̶cu̶tijũ̶goricu̶ ãnirĩ, cajũ̶gocu̶re bairo cũ̶ cabaiãnipeere cũ̶goyupi. Bairo caãcũ̶ nimicũ̶ã, tiere, “Cabu̶goro macããjẽ niña,” caĩrẽ bairo baiyupi. Jĩcã bapa u̶garica bapa jũ̶gori cajũ̶gocu̶re bairo cũ̶ caãnierẽ wapatireyupi cũ̶ baire. 17Merẽ mu̶jãã masĩña tie bero cũ̶ cabairiquere. Dios Esaure caroare cũ̶ cajopeere cũ̶ pacu̶ cũ̶ caĩquetibu̶ju̶ro bu̶tioro tũ̶gogamiñupĩ. Bairo cũ̶ cabomiatacũ̶ãrẽ, cajũ̶gocu̶ cũ̶ caãnierẽ cũ̶ baire cũ̶ cawapatirericaro jũ̶gori cũ̶ yu̶masĩẽsupi cũ̶ pacu̶. Tutuaro mena otimicũ̶ã, cajũ̶gocu̶re bairo cũ̶ caãnimirĩqũẽrẽ tunu cũ̶gomasĩẽsupi Esaú. 18Mu̶jãã, marĩ ñicũ̶jãã israelita majã ãnana na caĩñarĩcã wãme ũnierẽ mu̶jãã ĩñaesupa. Na pu̶ame Moisés ũ̶tãũ̶pu̶ cũ̶ caãnitoye, ĩñañupã ũ̶tãũ̶ pairo caũ̶rõrẽ. Tie caũ̶rĩjẽ buseri jũ̶gori canaitĩãrĩjẽrẽ ĩñañupã. Tunu bairoa wĩno cũ̶ã tutuaro capapurijere ĩñañupã. 19Tunu bairoa marĩ ñicũ̶jãã israelita majã ãnana na catũ̶gorica wãme ũnie trompeta tutuaro cabu̶su̶ro cãrõ Dios cũ̶ cabu̶su̶ocajorique cũ̶ãrẽ mu̶jãã tũ̶goesupa. Bairo mu̶jãã cabaimiatacũ̶ãrẽ, na pu̶ame roque tie bu̶su̶rique pairo cauwiorijere tũ̶goyupa. Bairo uwiri, Dios narẽ yoaro cũ̶ cabu̶su̶ãnorẽ boesupa. Tocãrõã cũ̶ jãna rotiyupa Diore. 20Dios cũ̶ caroticũrĩqũẽrẽ dope átijĩãtietimirã, tore bairo ĩñupã Diore. Mai, atore bairo ĩñuparõ Dios narẽ cũ̶ caátiroticũrĩqũẽ pu̶ame: “Ni jĩcãũ̶ ũcũ̶ ati ũ̶tãũ̶rẽ capeañau̶rẽ ũ̶tã rupaa, o ãpõã besuro mena cũ̶ pajĩãrocacõã rotiya. Ni ũcũ̶ waibu̶cu̶ ũcũ̶ cũ̶ãrẽ tore bairo átirotiya,” ĩñuparõ. 21Nocãrõ majũ ĩña acu̶arique caãnoi, Moisés cũ̶ majũ cũ̶ã atore bairo ĩñupĩ: “Bu̶tioro uwiri yu̶ nanacu̶pu̶,” ĩñupĩ. 22Mu̶jãã roque narẽ bairo mu̶jãã baietiya. U̶mu̶recóopu̶ caãni ũ̶tãũ̶ buipu̶ caãni macã Jerusalén cawãmecu̶ti macã Dios cacaticõãninucũũ̶ ya macãpu̶ caãniparã majũ mu̶jãã ãniña. Aperã cũ̶ã nocãrõ capããrã majũ Diotu̶ macããna ángelea majã neñapori Diore cabasapeorã na caãnopu̶ caãniparã mu̶jãã ãniña. 23Tunu bairo Dios pũnaarẽ bairo caãna, caãnijũ̶gorã u̶mu̶recóopu̶ Dios ya pũrõpu̶ cũ̶ yarã caãnarẽ cũ̶ cawoaturicarã na caneñarõpu̶ caãniparã mu̶jãã ãniña. Dios camasã nipetiropu̶re caĩñabesei majũ tu̶pu̶ mu̶jãã etagarã. Caroarã na ãnio joroque cũ̶ caátana tu̶pu̶ mu̶jãã etagarã. 24Tunu bairo Jesutu̶ mu̶jãã etagarã, caroa wãme cawãma wãme marĩrẽ caátibojacũrĩcũ̶ tu̶pu̶. Jesús pu̶ame yucu̶pãĩpu̶ cũ̶ cariarique jũ̶gori cũ̶ rií mena marĩ carorije wapare cosericarore bairo marĩ tuao joroque marĩ ásupi. Abel cũ̶ carií rerique pu̶ame ãmeoqũẽ ãmerĩqũẽrẽ bairo átaje tuayupa. Bairi Abel ãnacũ̶ cũ̶ carií rerique netõjãñurõ caãnimajũrĩjẽ ãñupã Jesús yaye rií pu̶ame roque. 25Torecu̶, Jesús marĩrẽ caquetibu̶ju̶re caroaro cũ̶ marĩ tũ̶gou̶sagarã. Moisés ati yepa macããcũ̶ ãnacũ̶ Dios yayere marĩ ñicũ̶jãã ãnanarẽ cũ̶ caquetibu̶ju̶netõrĩjẽrẽ tũ̶gogaesupa. Bairi dope bairo netõmasĩẽsupa. Marĩ roque na netõjãñurõ bairã majũ marĩ netõmasĩẽna, u̶mu̶recóopu̶ macããcũ̶ marĩrẽ cũ̶ caquetibu̶ju̶garijere marĩ catũ̶gogaeticõãta. 26Tirũ̶mu̶pu̶ ji yu̶teapu̶re Dios cũ̶ cabu̶su̶ro jũ̶gori ati yepa tutuaro to yuguio joroque ásupi Dios, Moisés ãnacũ̶ cũ̶ caãni yu̶teapu̶re. Bairi ãmerẽ tunu atore bairo ĩnemoñami Dios: “Pu̶gani cãrõ tunu yu̶ cabu̶su̶rije mena ati yepa to yuguio joroque yu̶ átigu̶. Ãmerẽ ati yepa jeto meerẽ, u̶mu̶recóopu̶ cũ̶ã to yuguio joroque yu̶ átigu̶,” ĩñami. 27Bairo cũ̶ caĩata, atore bairo ĩgu̶ ĩcũ̶mi Dios: Ati u̶mu̶recóo macããjẽ nipetiro cũ̶ caátaje, yepa cayuguirije ũnie mena yasipeticoagaro. Bairo ati u̶mu̶recóo macããjẽ nipetirije cũ̶ caátajere cũ̶ cayasioro bero yua, Dios marĩ Quetiupau̶ cũ̶ caãno macããjẽ jeto tuagaro. 28Dios cũ̶ carotimasĩrĩpau̶, marĩrẽ cũ̶ cacũbojaripau̶ jeto tuagaro. Bairo tiere tũ̶goñarĩ, Diore, “Mu̶ ñujãñuña jãã mena,” marĩ caĩbasapeoro ñuña. Torecu̶, caroaro cariape átiãnajẽ, cũ̶rẽ ĩroarique Dios cũ̶ caĩñajesori wãmerĩ majũrẽ marĩ caátiãno ñuña. 29Peero tutuaro mena caũ̶rĩ peero apeye ũnierẽ caũ̶rerorea bairo Dios cũ̶ã tutuaro mena marĩ carorije wapare caĩñabesemasĩ majũ niñami.

will be added

X\