HEBREOS 1

1Tirũ̶mu̶pu̶re marĩ ñicũ̶jããrẽ Dios quetibu̶ju̶yayupi tocãnacã nia na cũ̶ caĩmasĩrĩ wãmerẽ bairo. Profeta majã jũ̶gori cũ̶ yaye quetire na quetibu̶ju̶yayupi. 2Bairi ati yu̶tea catu̶sari yu̶teapu̶ cũ̶ãrẽ cũ̶ macũ̶ jũ̶gori marĩ quetibu̶ju̶yupi. Cũ̶ macũ̶ jũ̶gori ati u̶mu̶recóo nipetirore qũẽnoñupĩ Dios. Bairi nipetiro cũ̶ caátajere cacũ̶gopau̶re bairo cũ̶ cũñupĩ Dios cũ̶ macũ̶rẽ. 3Dios macũ̶ cũ̶ã, cũ̶ pacu̶ cũ̶ caasiyabatorije nipetirijere bairo jĩcãrõ tũ̶nia niñami. Cũ̶ pacu̶ Dios cũ̶ caãnorẽ bairo jĩcãrõ tũ̶nia niñami cũ̶ macũ̶ cũ̶ã. Bairi nipetirije ati u̶mu̶recóo macããjẽ baiãnimasĩña cũ̶ caátirotimasĩrĩjẽ jũ̶gori. Bairo caãcũ̶ ãnirĩ, marĩ carorije wapare cose yaparori bero u̶mu̶recóopu̶ ásúpi, cũ̶ pacu̶ Diotu̶ cariape nu̶gõã carotimasĩruiricaropu̶ ruiácú̶. 4Dios pu̶ame cũ̶ macũ̶rẽ ángelea majã netõrõ caãnimajũũ̶ cũ̶ cũñupĩ. Na netõjãñurõ caãnimajũrĩ wãmerẽ cacũ̶gou̶ cũ̶ cũñupĩ Dios cũ̶ macũ̶rẽ. 5Noa ũna aperãrẽ atore bairo ĩẽsupĩ Dios cũ̶ ya tutipu̶ cũ̶ãrẽ: “Mu̶, yu̶ macũ̶ majũ mu̶ ãniña. Ati rũ̶mu̶i yu̶ macũ̶ mu̶ ãnijũ̶gogu̶.” Ángelea majã ũnarẽ na ĩẽsupĩ. Cũ̶ macũ̶ jetore bairo qũĩñupĩ. Bairi tunu noa ũna aperãrẽ atore bairo ĩẽsupĩ Dios: “Cũ̶ pacu̶a yu̶ ãniña yu̶a. Cũ̶ã niñami yu̶ macũ̶ majũ,” na ĩẽsupĩ. Cũ̶ macũ̶ jetore tore bairo qũĩñupĩ. 6Apero cũ̶ caquetibu̶ju̶ropu̶ cũ̶ macũ̶ jĩcãũ̶ caãcũ̶ ati yepapu̶ cũ̶ caetarore atore bairo na ĩñupĩ: “Yu̶ yarã ángelea majã nipetiro qũĩroagarãma yu̶ macũ̶rẽ.” 7Ángelea majã pu̶amerẽ atore bairo caãna na cũñupĩ: “Yu̶ yarã ángelea majã wĩnorẽ bairo na ãnio joroque na yu̶ átiya. Tunu bairoa peero caũ̶rõrẽ bairo na ãnio joroque na yu̶ átiya, yu̶re caju̶ána pu̶amerẽ,” na ĩcũñupĩ. 8Cũ̶ macũ̶ pu̶ame roquere bairo pu̶ame qũĩñupĩ: “Mu̶a, yu̶ macũ̶ Dios, tocãnacã rũ̶mu̶a carotimasĩ mu̶ ãninucũgu̶. Cariape caroa wãme jeto carotimasĩ mu̶ ãnigu̶. 9Caroa macããjẽ ũnie jetore caĩroau̶ mu̶ ãniña. Torecu̶, carorije macããjẽ pu̶amerẽ miroaetiya. Bairo caãcũ̶ mu̶ caãnoi, yu̶, mu̶ pacu̶ Dios pu̶ame mu̶ yu̶ besewu̶. Tunu bairi aperã netõrõ caroa yericu̶tajere mu̶ yu̶ jowu̶,” qũĩñupĩ. 10Tunu apero cũ̶ caquetibu̶ju̶ropu̶ bairo ĩñupĩ: “Mu̶, ati u̶mu̶recóo quetiupau̶, mu̶ camasĩrĩjẽ mena mu̶ qũẽnowũ̶ ati yepa caãnijũ̶goripau̶pu̶ina. Mu̶na, mu̶ qũẽnowũ̶ ati u̶mu̶recóo cũ̶ãrẽ. 11Atie mu̶ caqũẽnorĩqũẽ nipetirije peticoagaro. Ati u̶mu̶recóo pu̶ame jutii camasã na cajãñarĩjẽ caboapetirorea bairo peticoagaro. Cabaimiatacũ̶ãrẽ, mu̶ pu̶ame mu̶ petietigu̶. Tocãnacã rũ̶mu̶a mu̶ ãnicõã ninucũgu̶. 12¡Camasã na jutii cabu̶cu̶re cũcõãrĩ apeye cawãmarẽ wasoaricarore bairoa nipetirije mu̶ wasoacõãgu̶ ati u̶mu̶recóo macããjẽrẽ! Mu̶ pu̶ame mu̶ petietigu̶. Bairoa mu̶ ãnicõã ninucũgu̶” qũĩñupĩ Dios cũ̶ macũ̶rẽ. 13Noa ũna ángelea majãrẽ atore bairo na ĩẽsupĩ Dios: “Yu̶tu̶ cariape nu̶gõã pu̶ame ruiya caãnimajũrõpu̶. Topu̶ mu̶ caruiro, yu̶ pu̶ame mu̶ pesuare na yu̶ netõnu̶cãcõãgu̶,” na ĩẽsupĩ Dios. Cũ̶ macũ̶ jetore tore bairo qũĩñupĩ. 14Ángelea majã pu̶ame ati rupau̶ caãna mee niñama. Cabauena niñama. Diore caju̶ána caãna ãnirĩ cũ̶ carotirijere caáticoteri majã niñama. Bairi Dios yarã cũ̶ canetõparãrẽ caju̶átinemonucũrã niñama.

will be added

X\