GÁLATAS 6

1Yu̶ yarã, yu̶ bairãrẽ bairo caãna, mu̶jããrẽ ñiña: Ni jĩcãũ̶ ũcũ̶ mu̶jãã mena macããcũ̶ carorije macããjẽrẽ cũ̶ caátinucũata, tutuaro mena cariape cũ̶ quetibu̶ju̶ya. Mu̶jãã pu̶ame Jesucristo mena catũ̶goñatutuarã majũ ãnirĩ caroaro cũ̶ ju̶átinemoña, roro cũ̶ catãmu̶onemoetiparore bairo ĩrã. Bairãpu̶a, caroaro cũ̶ tũ̶goñamairĩ, nu̶cũ̶bu̶gorique mena cũ̶ mu̶jãã beyogarã. Bairo cũ̶ ũnarẽ na beyorã, tocãnacãũ̶pu̶a caroaro mu̶jãã tũ̶goñamasacatiwa, roro wãtĩrẽ marĩ ĩtoecore, ĩrã. 2Bairi mu̶jãã pu̶ame tocãnacãũ̶pu̶a ãmeo ju̶átinemorĩ, roro mu̶jãã caátiãninucũrĩjẽrẽ netõnu̶cãcõãnucũña. Tore bairo ána, Cristo cũ̶ caátiroticũrĩcãrõrẽ bairo átipeyorã mu̶jãã átigarã yua. 3Tunu apeyera, ni jĩcãũ̶ ũcũ̶ cabu̶goro macããcũ̶ nimicũ̶ã, “Yu̶a, caãnimajũũ̶ yu̶ ãniña. Na caquetibu̶ju̶rijere yu̶ boetiya,” caĩbotiopai cũ̶ yaye wapa caãnipeere cũ̶ majũã ĩtou̶ átiyami. 4Bairi mu̶jãã pu̶ame roque tocãnacãũ̶pu̶a caroaro ĩñabesecõñaña mu̶jãã majũã nipetiri wãme mu̶jãã caátiãninucũrĩjẽrẽ. Tore bairo caroaro mu̶jãã majũã mu̶jãã caátiere mu̶jãã caĩñabesemasĩata, caroaro mu̶jãã tũ̶goña u̶seanigarã. Bairopu̶a, tore bairo mu̶jãã catũ̶goñau̶seanirĩjẽ pu̶ame Dios mena caroaro mu̶jãã caátiãnie to ãmarõ. Aperã na cabairijere ĩñacõñarĩ mu̶jãã pu̶ame, “Aperã netõrõ caroaro caátiãna jãã ãniña,” ĩrĩ, mu̶jãã cau̶seanirĩjẽ roque cañuetie niña. 5Ni jĩcãũ̶ ũcũ̶ Dios caroa cũ̶ caroticũrĩqũẽrẽ caátipeyocõãninucũũ̶ maami. Bairi tocãnacãũ̶pu̶a marĩ majũã roro marĩ caátiãninucũrĩjẽrẽ canetõnu̶cãcõãparã marĩ ãniña. 6Torecu̶, ni jĩcãũ̶ ũcũ̶ Dios yaye caroa queti aperã na caquetibu̶ju̶rijere catũ̶gonucũũ̶ cũ̶ caãmata, cũ̶rẽ cabuerã cũ̶ãrẽ nipetiri wãme cũ̶ cacũ̶gorije mena cũ̶ ju̶átinemoáto. Ñubueri majã nipetiro na ju̶átinemoáto caquetibu̶ju̶ri majãrẽ na yaye na cacũ̶gorije mena. 7Bairi apeyera, ni jĩcãũ̶ ũcũ̶ Diore roro cũ̶ caĩboyeti epepee maniña. Bairi mu̶jãã cũ̶ã mu̶jãã majũ rupau̶re ĩtoepeeticõãña. Atiere tũ̶goñañijate: Camasã jĩcã wãme otere na caoteata, cabero cabu̶tiro carícare jegarã otenucũñama. 8Torea bairo ni jĩcãũ̶ ũcũ̶ cũ̶ rupau̶ caborore bairo rorije caátijũ̶goricu̶, carori wãme cũ̶ caáticõãmata, caberopu̶ cũ̶ãrẽ carorije jũ̶gori cayasipau̶ majũ tuacõãgu̶mi. Baipu̶a, apei pu̶ame roque Espíritu Santo cũ̶ caborore bairo caroa wãme caáticõãjũ̶goricu̶, cũ̶ caborore bairo jeto cũ̶ caáticõãninucũata, cabero yeri capetietie majũrẽ cacũ̶gopau̶ tuacõãgu̶mi yua. 9Tore bairo cabairo jũ̶gori, marĩ pu̶ame caroa macããjẽ átiãnajẽrẽ caátiãniju̶tietiparã marĩ ãniña. Tore bairo jeto caroa macããjẽrẽ marĩ caáticõãninucũata, ti yu̶tea caetaro caroare marĩ cũ̶gogarã. 10Bairi marĩ caátimasĩrõ cãrõ nipetiro camasãrẽ caroaro na marĩ ju̶átigarã. Tore bairo netõjãñurõ marĩ caátimasĩpee niña marĩ yarã Dios mena catũ̶goñatutuanucũrã roquere. 11¡Ĩñañijate mu̶jãã cũ̶ã! Atie catu̶sarijere capaca woarique mena yu̶ majũpu̶a mu̶jãã woatujou̶ yu̶ átiya, caroaro mu̶jãã catũ̶gou̶saparore bairo ĩ. 12To caãna, caĩtopairã, mu̶jããrẽ bu̶tioro mu̶jãã rupau̶ macããjẽrẽ cayiserotiganucũrã pu̶ame na majũã caroaro tuagarã, tore bairo átirotiga nucũñama. Na yarã, na quetiuparã, Jesucristo yucu̶pãĩpu̶ cũ̶ cariarique quetire na caquetibu̶ju̶ata, “Roro popiye marĩ átirema,” ĩrã jeto, tore bairo mu̶jããrẽ átirotiganucũñama. Na quetiuparã narẽ na caĩroapeere borã, tore bairo jeto átirotiganucũñama. 13Tore bairo caĩquetibu̶ju̶rã, na rupau̶ macããjẽrẽ cayisetarotiricarã caãna nimirãcũ̶ã, nipetirije Moisés ãnacũ̶ cũ̶ caroticũrĩqũẽrẽ átipeyoetinucũñama. Bairo caáperã nimirãcũ̶ã, mu̶jãã pu̶amerẽ bu̶tioro mu̶jãã rupau̶ macããjẽrẽ mu̶jãã yisetarotiganucũñama. Bairo mu̶jããrẽ tutuaro mena mu̶jãã rupau̶re na caátirotirique mena jũ̶gori canetõnu̶cãmasĩrĩ majãrẽ bairo tũ̶goñanucũñama. Bairo rupau̶pu̶ cãmicu̶taje na caátirotirije cawapa manierẽ bairo caãnimiatacũ̶ãrẽ, tore bairo tũ̶goñanucũñama. 14Bairo na cabaimiatacũ̶ãrẽ, yu̶ pu̶ame yu̶ caátie mena canetõnu̶cãmasĩ majũrẽ bairo yu̶ ãnitũ̶goñaẽtĩña. “Jesucristo yucu̶pãĩpu̶ cũ̶ cariarique queti roque caroa caãnimajũrĩjẽ niña,” ĩrĩ bu̶tioro yu̶ quetibu̶ju̶nucũña. Yu̶ pu̶ame Jesucristo yucu̶pãĩpu̶ cũ̶ cariarique jũ̶gori ati u̶mu̶recóopu̶re roro yu̶ caátiere canetõrĩcũ̶ yu̶ ãniña. Bairi ati u̶mu̶recóo macããna na cabonetõnucũrĩjẽ cũ̶ãrẽ yu̶ átinemoẽtĩña yua. Tiere merẽ yu̶ jãnacõãwũ̶. 15Bairi marĩ rupau̶ macããtõrẽ cayisericu̶, o cayise ecoetacu̶ marĩ caãmata cũ̶ãrẽ, ñe ũnie wapa maniña. Dios cũ̶ caborore bairo cawãma yeri tũ̶goñarĩqũẽ mena marĩ cabuianemorĩqũẽ roque cariapea caãnimajũrĩjẽ niña. 16Bairi mu̶jãã nipetiro yu̶ caátirotirijere catũ̶gou̶sarã caroaro yeri jõrõ ãnajẽcu̶sa. Marĩ Pacu̶ Dios caroaro cũ̶ caĩñamaimasĩrĩjẽ mena ãnajẽcu̶sa. Tore bairo jeto ãnajẽcu̶sa mu̶jãã nipetiro cariapea Dios ya poa macããna caãna, cũ̶ caborore bairo yua. 17Bairo atiere yu̶ caquetibu̶ju̶ro bero, ato jũ̶goyere ni jĩcãũ̶ ũcũ̶ roro popiye yu̶ cũ̶ bairique yeoeticõãto. Bairi merẽ yu̶ cabairijere masĩñama camasã. Roro popiye yu̶ baio joroque yu̶ na caátaje jũ̶gori capee majũ yu̶ rupau̶re yu̶ cãmii cu̶tiya. Tiere ĩñarĩ, camasã cariapea Jesucristo yau̶, cũ̶ paabojari majõcu̶ yu̶ caãnierẽ masĩñama. 18Yu̶ yarã, yu̶ bairãrẽ bairo caãna, Jesucristo marĩ Quetiupau̶ caroa yeri cu̶tajere mu̶jãã cũ̶ jonemoáto, mu̶jãã to Galacia yepa macããna nipetirore. Bairoa to baiáto. Tocãrõã niña atie queti yu̶ cawoaturije.

will be added

X\