GÁLATAS 5

1Mai, Jesucristo pu̶ame Moisés ãnacũ̶ cũ̶ caroticũrĩqũẽrẽ carotiecorã majũ marĩ caãnimirĩqũẽrẽ marĩ netõõ joroque marĩ ámi. Bairo marĩ cũ̶ caátaje jũ̶gori mu̶jãã pu̶ame caroaro jeto ãnajẽ cu̶ticõã ninucũña tocãnacã rũ̶mu̶a. Roro majũ tunu caátirotiecorãrẽ bairo tuanemoeticõãña. 2Yu̶ Pablo, mu̶jãã yu̶ caĩquetibu̶ju̶rijere caroaro jĩcãrõ tũ̶ni majũ tũ̶gopeoya: Judío majã na caátinucũrĩ wãme, na rupau̶ macããjẽ yisetarique ũnierẽ mu̶jãã cũ̶ã mu̶jãã caátiãniganucũata, dope bairo Jesucristo mu̶jããrẽ cũ̶ canetõõrĩqũẽ wapa maniña. 3Mu̶jããrẽ ñinemopã tunu: Ni jĩcãũ̶ ũcũ̶ mu̶jãã mena macããcũ̶ cũ̶ rupau̶ macããjẽ yisetarique ũnierẽ cũ̶ caátiãniganucũata, nipetirije Moisés ãnacũ̶ cũ̶ caátiroticũrĩqũẽrẽ carotiecou̶ majũ tuacõãgu̶mi. 4Mu̶jãã, roticũrĩqũẽrẽ mu̶jãã caátie jũ̶gori canetõgatũ̶goñanucũrã, Jesucristo pu̶amerẽ cũ̶ tũ̶gou̶sajãnarã mu̶jãã átiya. Bairo caãna ãnirĩ, Dios mu̶jããrẽ cũ̶ camairĩjẽrẽ, mu̶jããrẽ cũ̶ canetõõrĩqũẽ cũ̶ãrẽ caboena majũ tuarã mu̶jãã baiya. 5Jãã, tiere caĩroaena pu̶amea Espíritu Santo jũ̶gori, bairi tunu Jesucristo mena jãã catũ̶goñatutuacõãnie jũ̶gori jãã carorije wapare canetõecoparã majũ jãã tuacõãña. 6Bairi Jesucristo mena marĩ caãmata, yisetarotirique ũnie, o yisetarotietaje cũ̶ã caãnimajũrĩjẽ mee niña. Jesucristo mena marĩ catũ̶goñatutuarije roque caãnimajũrĩjẽ niña. Bairo cũ̶ mena marĩ catũ̶goñatutuarije mena caroaro camasãrẽ na marĩ maimasĩgarã. 7Mu̶jãã, Galacia yepa macããna, caroaro majũ Jesucristore cũ̶ mu̶jãã tũ̶gou̶sa jũ̶gomiwũ̶. ¿Noa mu̶jããrẽ cariape quetire mu̶jãã tũ̶gou̶sa jãnao joroque na áti? 8Dios mee tore bairo mu̶jãã jãnao joroque ásupi. Cũ̶ pu̶ame mu̶jããrẽ cabesericu̶ majũ roque niñami. 9Bairi merẽ jĩcã wãme ĩrĩqũẽrẽ ĩrĩcãrõ pu̶amata, mu̶jãã masĩña: “Petoaca levadurare marĩ cajããmiatacũ̶ãrẽ, pan qũẽnorĩcã bu̶ru̶are petiropu̶ jesapeticoaya.” Torea bairo roro ricaati quetibu̶ju̶rique jĩcã wãmeacãrẽ mu̶jãã catũ̶gou̶saata, cabero capee majũ mu̶jãã tũ̶gou̶sagarã carorije macããjẽrẽ. 10Marĩ Quetiupau̶ pu̶ame ricaati wãme, roro mu̶jãã catũ̶goña ãnimiatacũ̶ãrẽ, caroa wãmerẽ mu̶jãã átiãnio joroque mu̶jãã átigu̶mi tunu. Bairo mu̶jãã cũ̶ caátipeere tũ̶goñarĩ, yu̶ pu̶ame cariapea marĩ Quetiupau̶ mena yu̶ tũ̶goña tutuacõãña. Baipu̶a, Dios, roro mu̶jãã átiãnio joroque caátiecorotinucũrãrẽ popiye na baio joroque na átigu̶mi. Ni ũcũ̶ cũ̶ caãmata cũ̶ãrẽ, jĩcãrõ tũ̶nia popiye na baio joroque na átigu̶mi. 11Mai, apeyera tunu yu̶ yarã, jĩcããrã ricaati caquetibu̶ju̶ñesẽãnucũrã atore bairo ñi bu̶su̶nucũñama: “Pablo cũ̶ã camasã judío majã caãmerãrẽ, ‘Mu̶jãã cũ̶ã judío majã na caátinucũrõrẽ bairo mu̶jãã rupau̶ macããjẽrẽ yisetarotiya,’ na ĩ quetibu̶ju̶ átiyami,” ñi bu̶su̶nucũñama. Bairo yu̶ cũ̶ã narẽ bairo yu̶ caátirotirije caãmata, roro majũ yu̶re teeri, popiye yu̶ baio joroque yu̶ áperibujiorãma. Bairãpu̶a, popiye yu̶ baio joroque yu̶ átinucũñama, “Jesucristo yucu̶pãĩpu̶ cũ̶ cariarique jũ̶gori mena jeto marĩ netõmasĩña,” yu̶ caĩquetibu̶ju̶rije jũ̶gori. 12Bairo mu̶jããrẽ roro pajũ̶goro mu̶jãã rupau̶ macããjẽrẽ bu̶tioro cayisetarotiganucũrĩ majã, na pu̶ame roque na majũã na rupau̶ macããjẽrẽ na yisejure recõãto, ¡tame! 13Mu̶jãã, yu̶ yarã, yu̶ bairãrẽ bairo caãna, caroaro caãniparã, roticũrĩqũẽrẽ carotiecoetiparã, cũ̶ cabesericarã majũ mu̶jãã ãniña. Bairi caroa macããjẽ jetore caátiãniparã mu̶jãã ãniña. Bairo roticũrĩqũẽrẽ carotiecoena cũ̶ cacũrĩcãrã nimirãcũ̶ã, “Marĩ caboro marĩ rupau̶ mena carorijere marĩ átimasĩña,” di rũ̶mu̶ ũno ĩ tũ̶goñaeticõãña. “Tie carorije macããjẽrẽ na átiãmarõ,” ĩ mee, tore bairo mu̶jãã cũñupĩ Dios. Caroa pu̶ame roquere átiri, jĩcãrõ tũ̶ni mu̶jãã caãmeomai ãnierẽ bou̶, tore bairo mu̶jãã cũñupĩ. 14Bairi roticũrĩqũẽ pu̶ame atore bairo caĩrĩjẽ mena neñojori jĩcã riseroa yua quetibu̶ju̶ya: “Mu̶jãã majũ rupau̶re mu̶jãã camairõrẽã bairo aperã camasã cũ̶ãrẽ na maiña.” 15Bairo cũ̶ cacũrĩqũẽ caãno jũ̶gori, roro ãmeo ĩñateeticõãña. Ãmeo asiari ãmeo tutiepeeticõãña. Masacatiya. Jĩcã majãrẽ bairo mu̶jãã caãnajẽ cu̶tie to petio joroque mu̶jãã átire. 16Bairi mu̶jããrẽ ñiña: Espíritu Santo mu̶jããrẽ cũ̶ cajũ̶goãnorẽ bairo jĩcãrõ tũ̶ni caroaro átiãnicõãnucũña. Carorije mu̶jãã rupau̶ caborore bairo mu̶jãã caátiãniga nucũrĩjẽrẽ átiãmerĩcõãña. 17Mai, carorije marĩ rupau̶ caborore bairo marĩ caátigatũ̶goñanucũrĩjẽ pu̶ame Espíritu Santore cateerãrẽ bairo átaje niña. Torecu̶, Espíritu Santo cũ̶ã, carorije macããjẽrẽ marĩ rupau̶ caborore bairo marĩ caápata, ĩñajesoetiyami. Tiere caboecu̶ niñami. Bairi ati rupau̶pu̶ carorije tũ̶goñarĩqũẽ caãno jũ̶gori pu̶gatuapu̶a caãmeoterãrẽ bairo marĩ ãnajẽ cu̶ticõãña. Bairi mu̶jãã pu̶ame carorijere mu̶jãã átiãnijãnamasĩẽtĩña. 18Bairãpu̶a Espíritu Santo mu̶jããrẽ cũ̶ cajũ̶goãnigarijere mu̶jãã caẽñotaeticõãta, caroaro mu̶jãã átiãnimasĩgarã. Roticũrĩqũẽrẽ carotiecorãrẽ bairo mu̶jãã baietigarã yua. 19Carorijere na rupau̶ mena na caátigatũ̶goñanucũrĩjẽrẽ bairo roro caátinucũrã na caátie nipetirore caroaro marĩ masĩpeticõãña. Na pu̶ame atie ũnie carorijere átinucũñama: Roro carõmio mena átiepepairiquere, carorije macããjẽrẽ átipairique, cawãmarã jeto ãna roro ãmeo átiãnajẽ cu̶taje cũ̶ãrẽ átiãninucũñama. 20Tunu bairoa camasã na caweericarãrẽ ĩroarique, wãtĩ yeri pũna jũ̶gori rori wãme átimasĩrĩqũẽ cũ̶ãrẽ átiãninucũñama. Tunu bairoa ãmeo teerique, ãmeo ĩñapesucu̶taje cũ̶ãrẽ di rũ̶mu̶ ũno jãnagaetinucũñama. Caroaro jĩcãrõ tũ̶ni ãnimasĩgaetinucũñama. Tunu bairoa roro majũ caasiañurã ninucũñama. Jĩcã poa, ape poa macããna mena ãmeo asiari roro majũ ãmeo tutinucũñama. Bairo ána, ãmeo ricawatiri ricaati jeto ãnajẽrẽ átiganucũñama. 21Tunu bairoa aperã na cacũ̶gorijere bu̶tioro ĩñau̶garipeanucũñama. Tunu bairoa eti cũmupainucũñama. Tunu bose rũ̶mu̶ qũẽnorãcũ̶ã, nu̶cũ̶bu̶gorique mano u̶gapacari roro majũ baimecũ̶nucũñama. Tore bairo átaje capee wãme majũ átiãninucũñama. Bairi cajũ̶goyepu̶ mu̶jããrẽ yu̶ caĩquetibu̶ju̶ricarorea bairo ãme cũ̶ãrẽ mu̶jãã ñinemoña tunu: Tore bairo roro caátipairã petoaca ũno cũ̶ãrẽ Dios cũ̶ carotimasĩrĩpau̶re etaetigarãma. 22Mai, Espíritu Santo pu̶ame roque marĩ caãmeomairĩjẽrẽ, u̶seanirĩqũẽ mena yerijõrõ ãnajẽ cu̶taje cũ̶ãrẽ cajou̶ majũ niñami. Tunu bairoa popiye baimirãcũ̶ã, caroaro yerijõrõ ãnajẽ cu̶tajere, camasãrẽ caroaro ju̶átinemorĩqũẽrẽ, caroaro cariape camasã mena átiãnajẽ cũ̶ãrẽ cajou̶ niñami. 23Tunu bairoa aperã camasãrẽ baibotioena caroaro jĩcãrõ tũ̶ni ãnajẽrẽ, marĩ rupau̶ roro marĩ caátiga tũ̶goñanucũrĩjẽrẽ ẽñotajĩãtimasĩrĩqũẽ cũ̶ãrẽ marĩ jomasĩñami Espíritu Santo. Bairo Espíritu Santo marĩ cũ̶ cajorije mena jĩcãrõ tũ̶ni marĩ caátiãmata, ni ũcũ̶, “Moisés ãnacũ̶ cũ̶ caroticũrĩqũẽrẽ áperiyama,” marĩ ĩ masĩẽtĩñami. 24Bairi merẽ Jesucristo yarã caãna pu̶ame Jesucristo yucu̶pãĩpu̶ cũ̶ cariarique jũ̶gori roro ati rupau̶ mena tocãnacã wãme roro na caátiga tũ̶goñanucũrĩjẽrẽ canetõecoricarã majũ niñama. 25Bairi Espíritu Santo marĩ mena cũ̶ caãmata, marĩ cũ̶ cajũ̶goãnigarijere bairo jĩcãrõ tũ̶ni caáticõã ninucũparã marĩ ãniña. 26Bairo caãna ãnirĩ, cabaibotiorãrẽ bairo marĩ ãmerĩgarã. Tunu bairoa ãmeo ricawatiri ricaati jeto ãnajẽ cu̶tajere marĩ átiãmerĩgarã. Tunu bairo aperã yayere ĩñau̶garipeari na marĩ ĩñateetigarã.

will be added

X\