EFESIOS 6

1Mu̶jãã, na pũnaa cũ̶ã, marĩ Quetiupau̶ yaye quetire catũ̶gou̶sarã ãnirĩ, mu̶jãã pacu̶a na caĩrĩjẽrẽ tũ̶gou̶saya. Bairo átaje caroa cariape macããjẽ niña. 2Dios, “Caroa wãme mu̶ yu̶ átigu̶,” cũ̶ caĩjũ̶goyeticũrĩqũẽ mena macããjẽ Moisés ãnacũ̶ cũ̶ caroticũrĩqũẽ jĩcã wãme atore bairo ĩña: “Mu̶jãã pacu̶are na nu̶cũ̶bu̶goya. Bairo mu̶jãã caápata, mu̶jãã u̶seanigarã. Bairo caána ãnirĩ, ati yepapu̶re yoaro mu̶jãã ãnigarã,” ĩña. 4Tunu mu̶jãã, capacu̶a, mu̶jãã pũnaarẽ caasiapairã na ãnio joroque na ápericõãña. Caroaro mena roque na beyoya. Marĩ Quetiupau̶re ĩroarique cũ̶ãrẽ na quetibu̶ju̶ya caroaro mena. 5Mu̶jãã, paabojari majã cũ̶ã, mu̶jãã quetiuparã ati yepa macããna na caĩrĩjẽrẽ tũ̶gou̶saya. Nu̶cũ̶bu̶gorique mena na carotirijere ása. Jesucristo yaye quetire mu̶jãã catũ̶gou̶sarore bairo na cũ̶ãrẽ jĩcãrõ tũ̶nia, ape wãme tũ̶goñarĩcãrõ mano na tũ̶gou̶saya. 6Paabojari majã jĩcããrã caroaro paayama, na quetiuparã na caĩñajoro, jãã mena na u̶seaniáto, ĩrã. Bairo caroaro paamirãcũ̶ã, cabero na caĩñaeto pu̶amerẽ paaetiyama. Na ũnarẽ bairo baieticõãña. Mu̶jãã pu̶ame roque Jesucristore capaabojari majã ãnirĩ, Dios mu̶jãã caátipeere cũ̶ caborore bairo ĩtorique mano ása. 7“Camasã ũ̶mu̶a marĩ caãno jũ̶gori mee, Jesucristo ũ̶mu̶a marĩ caãno jũ̶gori pu̶ame roque, caroaro marĩ paagarã,” ĩ tũ̶goñarĩ, paaya caroa paarique ũnierẽ. 8Merẽ mu̶jãã masĩña atiere: Marĩ tocãnacãũ̶pu̶a paabojari majã, o paabojari majã caãmerã cũ̶ã caroaro marĩ caátaje cãrõ jũ̶gori caroare marĩ jogu̶mi marĩ Quetiupau̶ pu̶ame. 9Mu̶jãã, paabojari majã quetiuparã cũ̶ã, mu̶jãã ũ̶mu̶arẽ caroaro na nu̶cũ̶bu̶goya. Narẽ roro na tuti epeeticõãña mu̶jãã ũ̶mu̶arẽ. Mu̶jãã caãnierẽ mu̶jãã masiritiepa. Mu̶jãã cũ̶ã narẽ bairo u̶mu̶recóopu̶ mu̶jãã Quetiupau̶ cũ̶goya. Cũ̶ roque nipetiro camasãrẽ jĩcãrõ tũ̶nia marĩ ĩñapeoyami. 10Bairi yu̶ yarã, yu̶ bairãrẽ bairo caãna, caãnitu̶sari wãme atiere mu̶jããrẽ yu̶ quetibu̶ju̶ woajoya: Marĩ Quetiupau̶ cũ̶ camasĩõrĩjẽ mena yeri pũna tutuarã ãña. 11Dios cũ̶ camasĩõrĩjẽ nipetirije mu̶jããrẽ cũ̶ cajorije mena wãtĩ mu̶jããrẽ cũ̶ caĩtorijere ẽñotaya. Jĩcãũ̶ soldau pajĩãrĩcãrõpu̶ ácú̶, cũ̶ rupau̶re maijũ̶gou̶, ru̶poa peorica coro, bairi ãpõã jutiro cũ̶ãrẽ jãñañami. Torea bairo Dios cũ̶ camasĩõrĩqũẽ jũ̶gori wãtĩ roro cũ̶ caĩrĩjẽ, roro cũ̶ caátigarije cũ̶ãrẽ mu̶jãã ẽñotamasĩgarã. 12Marĩã, caroaro ãnigarã, ãmeo qũẽrãrẽ bairo marĩ átiya. Bairãpu̶a, camasã mena mee ãmeo qũẽrã marĩ baiya. Wãtĩ yeri pũna quetiuparã mena ãmeo qũẽrãrẽ bairo ána marĩ baiya. Wãtĩ yeri pũna pu̶ame cabauena nimirãcũ̶ã, ati u̶mu̶recóopu̶ nicõãñama, catutuarã. Na camasĩrĩjẽ mena camasã carorãrẽ roro majũ na caátipeere rotinucũñama. 13Bairi mu̶jãã pu̶ame Dios cũ̶ camasĩõrĩjẽ nipetirije mu̶jããrẽ cũ̶ cajorije mena tũ̶goñatutuaya. Bairo tũ̶goñatutuari, wãtĩ mu̶jããrẽ cũ̶ caĩbu̶su̶jãrĩ rũ̶mu̶ ũnorẽ cũ̶ caĩrĩjẽrẽ tũ̶goenarẽ bairo mu̶jãã tũ̶goñanetõcõãgarã. Bairo tũ̶goñanetõcõãrĩ yua, Jesucristo yaye quetire cajãnaenarẽ bairo mu̶jãã ãnicõã nigarã. 14Jĩcãũ̶ soldau cũ̶ wapana mena cũ̶ caãmeoqũẽparo jũ̶goye ãpõã asero mena jãñañami. Caãnijũ̶goro ti asero mena carupawẽrẽ jiyayami. Bairo jiya yaparori bero, cũ̶ yerire ẽñotagu̶, ape jutiro ãpõã jutirore cũ̶ cotiapu̶ jãñaẽñotayami. Mu̶jãã, cũ̶rẽ bairo caroaro netõgarã, Dios yaye caroa quetire mu̶jãã yeripu̶ mu̶jãã catũ̶goñacõãno boya. Tunu bairoa caroaro netõgarã, carorije cawapamoenarẽ bairo mu̶jãã ãnicõã ninucũgarã Dios cũ̶ caĩñajoro. 15Tunu soldau cũ̶ caãmeoqũẽĩápáro jũ̶goye ru̶po juti peayami. Torea bairo mu̶jãã cũ̶ã Dios yaye quetire mu̶jãã caquetibu̶ju̶ñesẽãparo jũ̶goye tiere caroaro masĩjũ̶goyecu̶sa, caroa yericu̶tajecu̶na na ãnio joroque na mu̶jãã caátiparore bairo ĩrã. 16Tunu soldau cũ̶ wãmoa tiire cũ̶goyami. Cũ̶ wapana, “Yeruu̶ mena na cawẽrĩjẽ caũ̶rĩjẽ yu̶pu̶re caetaro yu̶ ũ̶rẽ,” ĩ, bairo átiyami. Torea bairo mu̶jãã cũ̶ã Jesucristo mena mu̶jãã catũ̶goñatutuaro boya, wãtĩ mu̶jããrẽ roro cũ̶ caátigamirĩjẽrẽ mu̶jãã caẽñotamasĩparore bairo ĩrã. Atie caãnimajũrĩjẽ niña. 17Tunu soldau cũ̶ ru̶poa buire pesayami ãpõã coro. Tunu bairoa ñosẽrĩcãpãĩrẽ cũ̶goyami, cũ̶ wapanarẽ na netõnu̶cãcõãgu̶. Torea bairo mu̶jãã cũ̶ã Dios mu̶jããrẽ cũ̶ canetõõrĩjẽrẽ tũ̶goñacõã ninucũña, wãtĩ marĩ wapacu̶ roro cũ̶ caátirotigamirĩjẽrẽ netõnu̶cãcõãgarã. Tunu bairoa Dios yaye quetire Espíritu Santo cũ̶ camasĩõrĩjẽ mena uwiricaro mano camasãrẽ na quetibu̶ju̶ya, wãtĩ roro cũ̶ caátigarijere netõnu̶cãcõãgarã. 18Apeyera tunu Diore cũ̶ jẽnijãnaeticõãña. Espíritu Santo cũ̶ camasĩõrĩjẽ jũ̶gori Diore cũ̶ jẽnicõã ninucũña tocãnacã rũ̶mu̶a. Cawu̶goapairãrẽ bairo baieticõãña. Espíritu Santo marĩ yeripu̶ cũ̶ caĩrĩjẽrẽ caroaro tũ̶goya. Tunu bairoa, “Marĩrẽ yu̶ecu̶mi,” ĩẽna, Dios yarã nipetirore na jẽnibojaya Diopu̶re. 19Tunu yu̶ cũ̶ãrẽ Diopu̶re yu̶ mu̶jãã jẽnibojawa camasãrẽ yu̶ caquetibu̶ju̶ masĩpeere. Tunu uwiricaro mano Dios yaye queti tirũ̶mu̶pu̶re na camasĩpeyoetaje nipetiro camasãrẽ cũ̶ canetõõgarijere caroaro yu̶ caquetibu̶ju̶parore bairo ĩrã, yu̶ mu̶jãã jẽnibojawa. 20Atie quetire yu̶ quetibu̶ju̶ rotijowĩ Dios. Bairo Dios yu̶ cũ̶ caquetibu̶ju̶rotijomiatacũ̶ãrẽ, tie queti wapa ato preso jorica wiipu̶ yu̶ cũrocacõãwã. Bairo atopu̶ nimicũ̶ã, uwiricaro mano ato macããnarẽ Dios yaye quetire na yu̶ caquetibu̶ju̶parore bairo ĩrã, yu̶ mu̶jãã jẽnibojawa. 21Apeyera, marĩ yau̶, Tíquico, marĩ camairẽ mu̶jãã tu̶pu̶ cũ̶ yu̶ joya. Cũ̶ pu̶ame marĩ Quetiupau̶ cũ̶ caroticũrĩqũẽrẽ yu̶re caju̶paãninucũũ̶ niñami. Mu̶jãã tu̶pu̶ etau̶, mu̶jããrẽ quetibu̶ju̶gu̶mi yu̶ cabairije nipetirijere. Ãme ati rũ̶mu̶rĩ yu̶ caátie cũ̶ãrẽ quetibu̶ju̶gu̶mi. 22Torecu̶, mu̶jãã tu̶pu̶ cũ̶ yu̶ joya, jãã cabairijere mu̶jããrẽ cũ̶ caquetibu̶ju̶parore bairo ĩ. Bairo cũ̶ caquetibu̶ju̶ro, mu̶jãã pu̶ame mu̶jãã tũ̶goña yerijãñagarã tunu. 23Yu̶ yarã, marĩ pacu̶ Dios, marĩ Quetiupau̶ Jesucristo mena caroa yeri pũnacu̶tajere cũ̶ jonemoáto mu̶jããrẽ. Ãmeo mairĩqũẽrẽ, bairi tũ̶goñatutuarique cũ̶ãrẽ cũ̶ jonemoáto. 24Noa ũna marĩ Quetiupau̶ Jesucristore cũ̶ na camaijũ̶goricarore bairo camaitũ̶goñacõãninucũrãrẽ caroare na cũ̶ jonemoáto. Tocãrõã niña atie queti yu̶ cawoaturije.

will be added

X\