EFESIOS 5

1Mu̶jãã, Dios pũnaa, cũ̶ camairã ãnirĩ caroaro cũ̶ caátiãnierẽ ĩñacõrĩ caroaro ãnajẽcu̶sa. 2Jesucristo marĩrẽ cũ̶ camairõrẽ bairo ãmeo mairĩ caroaro átiãnajẽcu̶sa. Cũ̶ pu̶ame marĩrẽ mairĩ, pajĩãecoyupi. Bairo pajĩãecori yua, Dios cũ̶ caĩñajoro camasã altar buipu̶ werea caju̶tiñurĩjẽ mena Diore na cajoemu̶gõju̶tiñuojorijere bairo baiyupa marĩrẽ netõõgu̶ cũ̶ caátaje pu̶ame. 3Mu̶jãã, Dios cũ̶ caĩroari poa macããna majũ ãnirĩ camasã roro na rupa mena na caãmeoátieperije ũnierẽ jĩcã wãmeacã ũno ápericõãña. Tunu apeye carorije ĩñau̶garipearique ũnie cũ̶ãrẽ mu̶jãã caápata, ñuẽtĩña. 4Tunu roro marĩ cabu̶su̶ata, ñuẽtĩña. Bairi dise ũnie roro ati rupau̶ caborore bairo átaje ũnierẽ bu̶su̶pẽni epeeticõãña. Catũ̶goñarĩqũẽ mánarẽ bairo carorije cabu̶goro macããjẽ cũ̶ãrẽ bu̶su̶pẽni epeeticõãña. Diore basapeorique ũnie pu̶ame roquere átiãninucũña. 5Merẽ mu̶jãã masĩrã roro caátipairã na cabaipeere: Noa ũna roro caãmeo átieperiquepairã, o caáperipee ũnierẽ caátipairã, o apeye ũnierẽ caĩñau̶garipeapairã, Jesucristo, Dios mena cũ̶ carotimasĩrĩpau̶re etamasĩẽtĩgarãma. Apeye ũnierẽ ĩñau̶garipearique pu̶ame camasã na caweericarãrẽ ĩroarique mena macããjẽ jĩcã wãme niña. 6Aperã na majũ na catũ̶goñamasĩrĩjẽ mena carori wãmerẽ na caquetibu̶ju̶ata, tiere tũ̶gopeoeticõãña. Na ĩtoecoeticõãña. Tie ũnie carorijere na caáto jũ̶gori, nocãrõ pairo popiye netõrõ na baio joroque Dios cũ̶ caátipee atíya. Diore cabaibotiorã nipetiro na ũna popiye netõrõ baigarãma. 7Tunu tore bairo caátiãnarẽ na bapacu̶pericõãña. 8Mu̶jããrẽ Dios cũ̶ canetõõparo jũ̶goye, caroaro mu̶jãã átiãnimasĩẽsupa. Canaitĩãrõpu̶ caãnarẽ bairo mu̶jãã ãñupã. Bairo caãnana mu̶jãã caãnimiatacũ̶ãrẽ, ãmerẽ yua marĩ Quetiupau̶ yaye caroa quetire catũ̶gou̶sarã ãnirĩ caroaro cabusuropu̶ caãnarẽ bairo caãna mu̶jãã ãniña. Bairo caãna ãnirĩ, cũ̶ yaye caroa queti pu̶amerẽ mu̶jãã catũ̶gou̶sacõãninucũrõ boya. 9Cũ̶ yaye caroa quetire catũ̶gou̶sarã pu̶ame tocãnacã wãme caroare átiyama. Aperãrẽ caroaro nu̶cũ̶bu̶gomasĩñama. Cariape átajere átiyama. Di rũ̶mu̶ ũno ĩtoetiyama. 10Torecu̶, marĩ Quetiupau̶ cũ̶ caĩñajesorije ũnierẽ marĩ caátiãnimasĩrõ ñuña. 11Tunu aperã canaitĩãrõpu̶ caãnarẽ bairo caãna dope bairo caátimasĩã manierẽ na caátie ũnie macããjẽrẽ marĩ caápero boya. Ricaati catũ̶goñarãrẽ na marĩ cabeyoro boya, caroa quetire na tũ̶goñamasĩjũ̶goáto ĩrã. 12Canaitĩãrõpu̶ caãnarẽ bairo caãna cayasioropu̶ roro na caátiere marĩ caquetibu̶ju̶cõñaata, caboborije majũrẽ marĩ ĩbujiorã. 13Bairãpu̶a, bairo na caátiere ĩñabeseri yua, “Dios cũ̶ carotirije mee niña bairo na caátie,” marĩ ĩmasĩña, Dios yaye caroa quetire marĩ cabuerije jũ̶gori. 14Cabusurije pu̶ame nipetirije marĩ ĩñamasĩõ joroque átiya. Torea bairo Dios yaye caroa quetire marĩ cabuerije jũ̶gori nipetiro camasã na caátiãnierẽ marĩ ĩñabesemasĩña. Bairi atore bairo ĩña Dios ya tutipu̶ cũ̶ãrẽ: “Mu̶jãã, cacãnirãrẽ bairo caãna, wãcãña. Mu̶jãã, cariacoatanarẽ bairo caãna nimirãcũ̶ã, tunu cacatirãrẽ bairo tũ̶goya. Bairo mu̶jãã catũ̶goro, Cristo pu̶ame cũ̶ yaye caroa quetire mu̶jãã masĩõ joroque átigu̶mi,” ĩ quetibu̶ju̶ya Dios ya tutipu̶. 15Bairi caroaro tũ̶goñaña mu̶jãã caátiãnipeere. Catũ̶gomasĩẽnarẽ bairo ãmerĩcõãña. Catũ̶gomasĩrã na caãnorẽ bairo pu̶ame roque átiãña. 16Ati rũ̶mu̶rĩrẽ camasã roro átinucũñama. Bairi mu̶jãã pu̶ame tocãnacãnia caroare áticõã ninucũña. Caroare átijãnaeticõãña. 17Catũ̶gomasĩẽnarẽ bairo ãmerĩcõãña. Marĩ Quetiupau̶, marĩ caátipee cũ̶ caborijere masĩña. Tiere masĩrã yua, bairo jeto ása. 18Tunu bairoa eticũmueticõãña. Caeticũmupai pu̶ame cũ̶ majũã royetuanemou̶ baiyami. Mu̶jããrẽ ñe ũnie ru̶saeto Espíritu Santo cũ̶ camasĩõrĩjẽ pu̶ame roquere boya. 19Tunu bairoa Dios caroaro cũ̶ caátiere mu̶jãã majũ ãmeo quetibu̶ju̶ya. Salmos, himnos cawãmecu̶ti tuti macããjẽ, bairi tunu Espíritu Santo jũ̶gori basarique cũ̶ãrẽ u̶seanirĩqũẽ mena basapeoya. Mu̶jãã camasĩrõ cãrõ marĩ Quetiupau̶re cũ̶ basapeoya. 20Tocãnacãnia marĩ Pacu̶ Diore, “¡Mu̶ ñujãñuña jãã mena!” qũĩña, nipetiri wãme mu̶jããrẽ cũ̶ caátiere tũ̶goñarĩ. Marĩ Quetiupau̶ Jesucristo wãme mena, cũ̶ camasĩrĩjẽ mena bairo qũĩcõã ninucũña. 21Mu̶jãã nipetiro Jesucristore caĩroarã mu̶jãã ãniña. Bairi nu̶cũ̶bu̶gorique mena ãmeo ĩñaña mu̶jãã majũ. Ãmeo baibotioeticõãña. 22Mu̶jãã, carõmia, camanapũ̶ãcu̶na cũ̶ã, marĩ Quetiupau̶ yaye quetire marĩ catũ̶gou̶sarore bairo mu̶jãã manapũ̶ã na caĩrĩjẽ cũ̶ãrẽ tũ̶gou̶saya. 23Jesucristo pu̶ame cũ̶rẽ caĩroari poa macããna Jũ̶gocu̶ majũ niñami. Torea bairo mu̶jãã tocãnacãũ̶ã canu̶moacu̶na, mu̶jãã nu̶moarẽ cajũ̶gocu̶are bairo cajũ̶goãna mu̶jãã ãniña. Apeyera tunu Jesucristo pu̶ame marĩ, cũ̶rẽ caĩroari poa macããna, cũ̶ rupau̶re bairo caãnarẽ Canetõõpau̶ niñami. 24Marĩ, Jesucristore caĩroari poa macããna ãnirĩ cũ̶ yaye quetire marĩ cabaibotioata, ñuẽtĩña. Torea bairo marĩ mena macããna rõmirĩ na manapũ̶ãrẽ jĩcã wãmeacã ũno na cabaibotioata, ñuẽtĩña. 25Jesucristo pu̶ame marĩ, cũ̶rẽ caĩroari poa macããnarẽ marĩ mairĩ, marĩ netõõgu̶ riayupi. Torea bairo mu̶jãã cũ̶ã canu̶moacu̶na bu̶tioro na maiña mu̶jãã nu̶moarẽ. 26Dios cũ̶ caĩñajoro carorije cacũ̶goenarẽ bairo marĩ caãniparore bairo ĩ, riayupi Jesús. Oco mena u̶gueri coserericarore bairo roro marĩ caátiere marĩ coserebojayupi, cũ̶ yaye quetire marĩ catũ̶gou̶saro jũ̶gori. 27Bairi caroaro jutiro cau̶gueri manorẽ bairo marĩ yeri cũ̶ãrẽ carorije manorẽ bairo cosecõãñupĩ. Marĩ, cũ̶rẽ caĩroari poa macããna tunu cũ̶ caetanemopa rũ̶mu̶ caetaro ñe ũnie caroa macããjẽ ru̶saeto marĩ caãniparore bairo ĩ, bairo marĩ ásupi. 28Bairi mu̶jãã canu̶moacu̶na mu̶jãã nu̶moarẽ na maiña. Mu̶jãã rupau̶re mu̶jãã camairõrẽã bairo mu̶jãã nu̶moa cũ̶ãrẽ na maiña. Caroaro na ju̶átinemoña. Ni jĩcãũ̶ ũcũ̶ cũ̶ nu̶morẽ caju̶átinemou̶ pu̶ame, cũ̶ rupau̶re caroaro camaijũ̶gou̶re bairo niñami. 29Noa ũna na rupau̶re cateerã maniñama. Na rupau̶re camaijũ̶gorã jeto niñama. Jesucristo cũ̶ã marĩrẽ, cũ̶ rupau̶re bairo caãnarẽ marĩ maiñami, cũ̶ yarã marĩ caãno jũ̶gori. 31Atore bairo marĩ ĩ cũñupĩ Dios: “Jĩcãũ̶ caũ̶mu̶ carõmio mena cũ̶ cawãmojiyaata, cũ̶ pacu̶a tu̶re witigu̶mi. Ape wiipu̶ ãnigu̶mi cũ̶ nu̶mo mena. Bairo na caãno, jĩcãũ̶rẽ bairo na ñiñagu̶. Jĩcã rupau̶re bairo nigarãma,” marĩ ĩ cũñupĩ Dios. 32Atie queti caãnimajũrĩjẽ, tirũ̶mu̶pu̶re na camasĩẽtãjẽ ãme rũ̶mu̶rĩ roquere marĩ camasĩrĩjẽ niña. Jesucristo, bairi marĩ, cũ̶rẽ caĩroari poa macããna jĩcã rupau̶re bairo marĩ caãnierẽ ĩgu̶ ñiña, bairo yu̶ caĩata. 33Torecu̶, atore bairo mu̶jãã caátipeere yu̶ boya: Mu̶jãã, canu̶moacu̶na tocãnacãũ̶ã, mu̶jãã rupau̶re mu̶jãã camairõrẽã bairo mu̶jãã nu̶moa cũ̶ãrẽ na maiña. Tunu bairoa mu̶jãã, carõmia, camanapũ̶ãcu̶na cũ̶ã tocãnacãõã mu̶jãã manapũ̶ãrẽ na nu̶cũ̶bu̶goya.

will be added

X\