EFESIOS 4

1Bairi, yu̶, marĩ Quetiupau̶ yaye quetire yu̶ caquetibu̶ju̶rije jũ̶gori presopu̶ caãcũ̶ ãnirĩ nu̶cũ̶bu̶gorique mena atore bairo mu̶jããrẽ ñiña: Mu̶jãã cũ̶ã Dios cũ̶ cabesericarã mu̶jãã ãniña. Bairi nipetiro cũ̶ cabesericarãrẽ na cũ̶ caãnirotiricarore bairo mu̶jãã cũ̶ã ãnajẽcu̶sa. 2“Aperã netõrõ caãnimajũrã jãã ãniña,” ĩ tũ̶goñaeticõãña. Nu̶cũ̶bu̶gorique mena ãmeo ĩñaña. Aperã mu̶jããrẽ roro na caátimiatacũ̶ãrẽ, na ãmeeticõãña. Narẽ mu̶jãã camairĩjẽ jũ̶gori tũ̶goenarẽ bairo roro na caátiere tũ̶goña netõcõãña. 3Espíritu Santo cũ̶ camasĩrĩjẽ jũ̶gori jĩcãrõrẽ bairo yericu̶tiri, jĩcã majãrẽ bairo átiãña. 4Dios cũ̶ caĩñajorore marĩã cũ̶ pũnaa jĩcã majãrẽ bairo marĩ ãniña. Tunu jĩcãũ̶ã niñami Espíritu Santo Dios yeri pũna marĩ mena caãcũ̶. Tunu bairoa marĩrẽ Dios cũ̶ caátipee jĩcã wãmerẽã marĩ coteya. 5Tunu marĩ Quetiupau̶ jĩcãũ̶ã niñami. Tunu jĩcãrõ tũ̶nia Jesús mena marĩ tũ̶goñatutuaya. Tunu jĩcã wãmea marĩ cabautizarotiri wãme cũ̶ã niña. 6Tunu marĩ nipetiro Pacu̶ jĩcãũ̶ã niñami. Cũ̶ã, nipetiro netõrõ rotimasĩñami. Marĩ nipetiro mena caãcũ̶ niñami. Tunu bairoa nipetiropu̶ caãcũ̶ niñami. 7Jĩcã majã marĩ caãnimiatacũ̶ãrẽ, marĩ, tocãnacãũ̶pu̶rea ape wãmerẽ, ape wãmerẽ marĩ caátimasĩpeere marĩ joyupi Jesucristo cũ̶ cajogari wãme ũnierẽ. 8Tore bairo quetibu̶ju̶ya Dios ya tuti cũ̶ã: “Cũ̶ wapanarẽ na netõ yaparori bero, u̶mu̶recóopu̶ wãmu̶ásúpi. Bairo wãmu̶áetari yua, ati yepa macããna caroa wãme na caátimasĩpeere na joyupi,” ĩ quetibu̶ju̶ya Dios ya tutipu̶. 9¿Dope bairo ĩgaro, “U̶mu̶recóopu̶ wãmu̶ásúpi,” to ĩñati? “Mai, ati yepapu̶ ruiatíjũ̶goyupi, cũ̶ cawãmu̶ápáro jũ̶goye,” ĩgaro ĩña. 10Bairo ati yepa caruietaricu̶ pu̶ame u̶mu̶recóo buijãñurĩpu̶ caetaricu̶ majũ niñami. Bairo caãcũ̶ ãnirĩ nipetiropu̶ carotimasĩ niñami. 11Cũ̶ã niñami marĩ caátimasĩpeere cajou̶. Bairo caácu̶ ãnirĩ jĩcããrã marĩ mena macããnarẽ apóstolea majã marĩ ãnio joroque ámi. Aperã marĩ mena macããna profeta majã, aperã Jesús jũ̶gori camasãrẽ Dios cũ̶ canetõrĩqũẽrẽ caquetibu̶ju̶ri majã, aperã pastores, aperã bueri majã marĩ ãnio joroque ámi. 12Tore bairo marĩ ámi, cũ̶ yarãrẽ, marĩ mena macããnarẽ marĩ caju̶átinemomasĩparore bairo ĩ. Bairo marĩ caáto jũ̶gori, Jesucristore caĩroari poa macããna pu̶ame nipetiro nemojãñurõ átitutua ãnimasĩgarãma. 13Bairo caátitutuanimasĩrã yua, marĩ nipetiro jĩcãrõrẽ bairo Dios mena marĩ tũ̶goñatutuagarã. Tunu cũ̶ macũ̶ Jesucristo cũ̶ãrẽ jĩcãrõrẽ bairo cũ̶ marĩ masĩgarã. Bairo marĩ cabaiãno bero, ñe ũnie marĩrẽ ru̶saetigaro caroaro marĩ caátiãnipee. Jesucristo caroaro cũ̶ caátiãnierẽ bairo marĩ cũ̶ã caroaro marĩ átiãnigarã. 14Bairi marĩ pu̶ame yua, cawĩmarã jicoquei jĩcã wãmerẽ na catũ̶gomawijiarore bairo marĩ baietigarã. Bairo cabaiena ãnirĩ, aperã caĩtori majã di wãme ũno cawãma wãme bueriquere caroaro mena na caquetibu̶ju̶miatacũ̶ãrẽ, na caĩrĩjẽrẽ cariape marĩ tũ̶goetigarã. 15Bairo pu̶ame marĩ caátiãnipee boya: Cariape macããjẽ quetire caroaro mena marĩ caãmeo quetibu̶ju̶ro boya. Bairo ãmeo quetibu̶ju̶rã, Jesucristo, marĩ Jũ̶gocu̶ caroú̶ cũ̶ caãnorẽ bairo marĩ cũ̶ã marĩ bainutuágarã. 16Jesucristo marĩ Jũ̶gocu̶ cũ̶ caãnoi, jĩcãũ̶ rupau̶re bairo caãna marĩ ãniña. Cũ̶, caũ̶mu̶ rupau̶ macããjẽ cũ̶ caapee, cũ̶ ãmoo, cũ̶ wãmoorĩ, cũ̶ ru̶pori, cũ̶ cacatiãnie nipetirije jĩcãrõ tũ̶ni to capaapeticõãta, caũ̶mu̶ pu̶ame caroaro átiãnimasĩñami. Tore bairo marĩã Jesucristore caĩroari poa macããna cũ̶ã tocãnacãũ̶ã marĩ caátimasĩpeere Jesucristo marĩrẽ cũ̶ cajoriquere jĩcãrõ tũ̶ni marĩ caápata, marĩ nipetiro caroaro marĩ átiãnimasĩgarã. Nemojãñurõ marĩ ãmeo ju̶átinemogarã. 17Bairi Jesús mu̶jããrẽ yu̶ cũ̶ caĩrotiro jũ̶gori, atore bairo mu̶jãã caátiãnipeere mu̶jããrẽ yu̶ átirotiya: Ati u̶mu̶recóo macããna Diore camasĩẽna na caátiãninucũrõrẽ bairo mu̶jãã cũ̶ã mu̶jãã caátinucũrĩjẽrẽ jãnacõãña. Diore camasĩẽna pu̶ame, na majũã na catũ̶goñarĩ wãme mena caátimasĩã manie ũnierẽ átiãninucũñama. 18Tunu bairoa cayeri mána, cariape catũ̶goñamasĩẽnarẽ bairo niñama. Bairo caãna ãnirĩ, cawãma yericu̶taje Dios cũ̶ cajogamirĩjẽrẽ boetiyama. 19Bairo carorije jetore caáticõãninucũrã ãnirĩ, tiere átijeyamajũcõãñama. Bairo caátijeyamajũcõãna ãnirĩ, tocãnacã wãme carorije átieperique ũnierẽ, tũ̶goñamasĩrĩ mee tiere átinucũñama. 20Mu̶jãã pu̶ame roque narẽ bairo átiãnigarã mee, Jesucristo yaye quetire mu̶jãã tũ̶gou̶sajũ̶goyupa. 21Caãnorẽ bairo cũ̶ caátiãnierẽ mu̶jãã catũ̶goata, tunu bairoa cariape quetire mu̶jããrẽ cũ̶ camasĩõata, tirũ̶mu̶pu̶ mu̶jãã rupau̶ mena roro mu̶jãã caátiãninucũrĩqũẽrẽ bairo átiãninemoeticõãña. Roro mu̶jãã caátiãninucũrĩqũẽ jũ̶gori mu̶jãã majũã mu̶jãã roye tuamiñupã. 23Bairo roro mu̶jãã caátiãninucũrĩqũẽrẽ jãnarĩ yua, cawãma wãme caroaro átiãnajẽ pu̶amerẽ mu̶jãã yeripu̶ tũ̶goñajũ̶goya. 24Jĩcãũ̶ cawãmau̶ cabu̶cu̶ jutiirore cũrĩ, cawãmarõ pu̶ame cũ̶ cajãñawasoarore bairo mu̶jãã cũ̶ã roro mu̶jãã caátiãnigarijere jãnirĩ, cawãma wãme caroaro átiãnajẽ pu̶amerẽ tũ̶goñajũ̶goya. Tiere mu̶jãã tũ̶goñamasĩõ joroque ásupi Dios. Ni jĩcãũ̶ ũcũ̶ Dios cũ̶ cayeri wasoaricaro jũ̶gori caroaro átiãnajẽ pu̶amerẽ catũ̶goñamasĩ caroaro cariape ãnigu̶mi. Roro átiepeetigu̶mi. 25Apeyera tunu tocãrõã ĩtojãnacõãña. Marĩ nipetiro jĩcã poa macããnarẽ bairo marĩ ãniña. Bairi caroaro cariape jeto marĩ caãmeobu̶su̶ro boya. 26Tunu bairoa di rũ̶mu̶ ũno caãno jĩcã wãme jũ̶gori roro mu̶jãã caasiata, tunu roro buipearo asianemoeticõãña. Jicoquei tiere tũ̶goñaqũẽnoña. Rupa rũ̶mu̶ asia ãmerĩcõãña tie mena. 27Wãtĩ pu̶ame cũ̶ cabu̶su̶jãrĩjẽrẽ mu̶jãã tũ̶gou̶sare. 28Tunu apeyera ñiña: Cajerutiri majõcu̶ tocãrõã, cũ̶ jerutijãnacõãto. Cũ̶ ũna tiere jãnarĩ, caroa wãme paariquere na paáto, aperã cabopacarãrẽ jĩcã wãme ũno na caju̶átinemomasĩparore bairo ĩrã. 29Tunu bairoa carorijere bu̶su̶eticõãña. Caroa jetore bu̶su̶nucũña. Mu̶jãã caĩrĩjẽrẽ catũ̶gorã pu̶ame na catũ̶goñatutuanemopee ũnie jetore bu̶su̶ya. Na cayeri jãñanemopee ũnie jetore bu̶su̶ya. 30Dios Yeri Espíritu Santore cũ̶ yapapuao joroque ápericõãña. Marĩ yeripu̶ cũ̶ caãnie jũ̶gori “Dios yarã marĩ ãniña,” marĩ ĩmasĩña. Tunu bairoa marĩ yeripu̶ cũ̶ caãnie jũ̶gori, “Dios yarãrẽ cũ̶ canetõõpeyori rũ̶mu̶ caetaro, marĩ cũ̶ã marĩ netõgarã,” marĩ ĩmasĩña. 31Tunu tocãnacã wãme carorije mu̶jãã catũ̶goñarĩjẽrẽ jãnacõãña: Roro asiarique, asianetõcoátaje, pesucu̶taje, awaja tutirique, roro ĩbu̶su̶pairique, tie ũnie nipetirije carorije mu̶jãã catũ̶goñarĩjẽrẽ jãnacõãña. 32Caroaro ãnajẽcu̶sa. Tunu bairoa ãmeo ĩñamaiña. Jesucristo yarã mu̶jãã caãno jũ̶gori, Dios pu̶ame roro mu̶jãã caátajere masiriyobojayupi. Bairi tore bairo mu̶jãã cũ̶ã ãmeo masiriyobojaya roro mu̶jãã caãmeoátiere.

will be added

X\