EFESIOS 3

1Bairo bairi yu̶, Pablo, mu̶jãã, judío majã caãmerãrẽ Jesucristo yu̶ cũ̶ caju̶átinemorotiro jũ̶gori, preso jorica wiipu̶ yu̶ ãniña ãmerẽ. 2Tunu bairoa merẽ atore bairo mu̶jãã camasĩrõ ñuña: Mu̶jããrẽ camai ãnirĩ, Dios pu̶ame mu̶jããrẽ yu̶ ju̶átinemo roticũwĩ. 3Cũ̶ pu̶ame tirũ̶mu̶pu̶re camasãrẽ cũ̶ caátipee nipetirijere na masĩõẽsupi. Ati rũ̶mu̶rĩ roquere tiere yu̶ masĩõ joroque ámi, judío majã caãmerã cũ̶ãrẽ cũ̶ canetõõpeere. Tiere merẽ petoaca mu̶jãã yu̶ quetibu̶ju̶ woajowu̶. 4Atiere yu̶ caquetijori pũrõrẽ bueri, mu̶jãã masĩgarã atie, Dios yu̶re cũ̶ camasĩõrĩqũẽrẽ. 5Tirũ̶mu̶pu̶re ni jĩcãũ̶ ũcũ̶rẽ atie cũ̶ caátipeere na masĩõẽsupi Dios ape tuti caãnanarẽ. Ati rũ̶mu̶rĩ roquere, jãã, cũ̶ cabesericarã apóstolea majãrẽ, bairi profeta majã cũ̶ãrẽ jãã masĩõñupĩ Dios atiere cũ̶ Yeri, Espíritu Santo jũ̶gori. 6Atie niña camasã na camasĩẽtãjẽ ãme roque Dios cũ̶ camasĩõgarije: Ãmerẽ judío majã jeto mee cũ̶gogarãma Dios cũ̶ pũnaarẽ caroare cũ̶ cajopeere. Judío majã caãmerã cũ̶ã bairo jĩcãrõ tũ̶nia cũ̶gogarãma, caroa queti Jesucristo na cũ̶ canetõõbojariquere na catũ̶gou̶saro jũ̶gori. Na cũ̶ã cũ̶ ya poa macããna niñama. Bairi, “Caroaro na yu̶ átigu̶ Jesucristore catũ̶gou̶sarãrẽ,” Dios cũ̶ caĩjũ̶goyeticũrĩcãrõrẽ bairo jĩcãrõ tũ̶nia na cũ̶ãrẽ caroaro na átigu̶mi. 7Yu̶, caróu̶ cañuecũ̶ caãnacũ̶ yu̶ caãnimiatacũ̶ãrẽ, yu̶re mairĩ, cũ̶ yaye quetire yu̶ masĩõwĩ Dios. Masĩõ yua, tie caroa quetire cũ̶ caquetibu̶ju̶bojapau̶re bairo yu̶ cũwĩ. Nocãrõ majũ pairo cũ̶ caátimasĩrĩjẽ jũ̶gori bairo yu̶ ámi. 8Yu̶a, nipetiro Dios ya poa macããna netõjãñurõ cabu̶goro macããcũ̶ yu̶ ãniña. Bairo yu̶ caãnimiatacũ̶ãrẽ, caroaro yu̶ ámi Dios. Caroa queti, nocãrõ cacõñapetimasĩã manie cũ̶ yarãrẽ cũ̶ caju̶átinemorĩjẽrẽ mu̶jãã ũna judío majã caãmerãrẽ yu̶ quetibu̶ju̶rotijowĩ. 9Tunu bairoa tie camasãrẽ cũ̶ caátipeere tirũ̶mu̶pu̶re na masĩõẽsupi Dios. Ãme roquere cũ̶, nipetirije caqũẽnorĩcũ̶ ãnirĩ, cũ̶ caátipeere nipetiro camasãrẽ yu̶ quetibu̶ju̶rotijowĩ. 10Bairi Dios cũ̶ catũ̶goña jũ̶goyetiricarorea bairo baietacoaya yua, nipetiro ati u̶mu̶recóopu̶re carotimasĩrã bu̶tioro majũ marĩ ũnarẽ cũ̶ camairĩjẽrẽ na masĩáto ĩ. Bairi ati rũ̶mu̶rĩrẽ na pu̶ame, marĩ, Jesucristore caĩroari poa macããna jĩcã yericu̶narẽ bairo marĩ caãnierẽ ĩñarĩ, “Dise ũnie cũ̶ caátimasĩẽtĩẽ cũ̶ ru̶saetiya,” ĩmasĩcõãrãma u̶mu̶recóo macããna. 11Caãnijũ̶goripau̶pu̶a capetietipee cũ̶ caátipeere cũ̶ caátiga jũ̶goricarore bairo átiyaparoyupi merẽ ati rũ̶mu̶rĩrẽ marĩ Quetiupau̶ Jesucristo cũ̶ caátaje jũ̶gori. 12Bairo Jesucristo yarã ãnirĩ, cũ̶ mena tũ̶goña tutuari, uwiricaro mano Diore cũ̶ marĩ jẽnimasĩña. 13Torecu̶, nu̶cũ̶bu̶gorique mena mu̶jããrẽ ñiña: Mu̶jãã, judío majã caãmerã, caroaro mu̶jãã canetõpeere mu̶jãã yu̶ caquetibu̶ju̶rije jũ̶gori roro popiye yu̶ baiya. Bairo yu̶ cabaimiatacũ̶ãrẽ, mu̶jããrẽ yu̶ caquetibu̶ju̶rije jũ̶gori caroa macããjẽ mu̶jããrẽ to etao roque yu̶ átiya. Bairi tũ̶goña yapapuaeticõãña. 14Bairo marĩrẽ caroaro Dios cũ̶ caátajere tũ̶goñarĩ, ru̶popatuuri mena etanumurĩ cũ̶ ñiroaya marĩ Pacu̶ majũrẽ. 15Dios yarã nipetiro ati yepa macããna, u̶mu̶recóo macããna cũ̶ã cũ̶ yarã majũ marĩ caãnoi, “yu̶ pũnaa” marĩ ĩ wãmetiyami Dios. 16Dise ũnie cũ̶ caátimasĩẽtĩẽ cũ̶ ru̶saetiya. Bairo cũ̶ cabairoi, atore bairo mu̶jãã ñi jẽnibojanucũña marĩ Pacu̶pu̶re: “Efeso macããnarẽ ñe ũnie ru̶saeto tũ̶goñatutuamasĩrĩqũẽrẽ Espíritu Santo jũ̶gori na joya. 17Tunu bairoa Jesucristo mena na catũ̶goñatutuarije jũ̶gori na yeripu̶ cũ̶ ãnicõã ãninucũáto Jesús,” mu̶jãã ñi jẽnibojanucũña Diopu̶re. Bairo cũ̶ caáto, mu̶jãã pu̶ame di rũ̶mu̶ ũno ricaati wãmerẽ mu̶jãã tũ̶goñaetigarã. Bairi camasãrẽ nocãrõ majũ pairo na mu̶jãã maimasĩgarã. 18Tunu bairoa mu̶jãã, bairi nipetiro Jesucristore catũ̶gou̶sari majã cũ̶ã, mu̶jãã masĩgarã nocãrõ ñe ũnie ru̶saeto Jesucristo cũ̶ camairĩjẽrẽ. 19Tie camasãrẽ cũ̶ camairĩjẽrẽ nipetiro masĩpeyoetimirãcũ̶ã, tiere mu̶jãã camasĩnemonucũrõrẽ yu̶ boya. Bairo mu̶jãã cabaiata, Dios marĩrẽ cũ̶ carotirore bairo nemojãñurõ ñe ũnie ru̶saeto mu̶jãã átiãninucũgarã. 20Dios nocãrõ majũ caátimasĩ pu̶ame cũ̶rẽ marĩ cajẽnirĩ wãme, o marĩrẽ cũ̶ caátipeere marĩ catũ̶goñarõ netõjãñurõ cũ̶ pu̶ame roque caátimasĩ niñami. Tie cũ̶ caátimasĩrĩjẽ marĩpu̶re caãno jũ̶gori ãmerẽ marĩ tutuao joroque átiyami. Bairi cũ̶ marĩ cabasapeoro ñuña. 21¡Ati rũ̶mu̶ macããna, bairi ape tuti macããna, bairi tocãnacã tuti bero caãniparã nipetiro Jesure caĩroari poa macããna Diore cũ̶ na cabasapeoro ñuña! Bairoa to baiáto.

will be added

X\