COLOSENSES 3

1Jesucristo cariacoatacu̶ nimicũ̶ã Dios cũ̶rẽ cũ̶ cacatioro jũ̶gori mu̶jãã cũ̶ã cariacoatana nimirãcũ̶ã tunu cacatirãrẽ bairo mu̶jãã baiyupa Dios cũ̶ caĩñajoro. Bairo cabairã ãnirĩ, ati u̶mu̶recóo macããjẽ rotirique mee, Jesucristo jõbui Diotu̶ cariape nu̶gõã carui yaye queti pu̶ame roquere tũ̶gou̶saya. 2Jõbui u̶mu̶recóo macããjẽ caroa jetore tũ̶goñaña, ati yepa macããjẽ carorijere tũ̶goñaena. 3Ãmerẽ mu̶jãã Jesucristo, Dios mena macããcũ̶ mena mu̶jãã ãnajẽ cu̶tiya. Bairi jĩcãũ̶ cawãmau̶ cabaiyasiricu̶ ãnacũ̶ ati yepa macããjẽ rotirique cũ̶ catũ̶gou̶saetorea bairo mu̶jãã cũ̶ã tiere tũ̶gou̶saeticõãña. 4Bairi mu̶jãã cacatiri rũ̶mu̶rĩ cãrõ Jesucristo cũ̶ carotirore bairo mu̶jãã áticõã ninucũgarã. Bairo áticõã ninucũrã yua, ati yepapu̶ nemo cũ̶ cabaujaetari rũ̶mu̶ caetaro mu̶jãã cũ̶ã cũ̶rẽ bairo cũ̶ mena cũ̶ caasiyabatorije mena mu̶jãã ãnicõãgarã. 5Bairi jãnacõãña ati yepa macããjẽ roro mu̶jãã caátigarijere. Aperã rõmirĩrẽ na ñee epeeticõãña mu̶jãã nu̶moa caãmerãrẽ. Mu̶jãã, carõmia cũ̶ã, mu̶jãã manapũ̶ã caãmerãrẽ na ñee epeeticõãña. Mu̶jãã nipetiro, dise ũnie carorijere ãmeo átiepeeticõãña. Aperãrẽ, mu̶jãã catũ̶goñarĩjẽpu̶ narẽ roro rupau̶ mena átieperiquere átiga tũ̶goñaeticõãña. Tunu bairoa aperã na cacũ̶gorijere u̶goeticõãña. Apeye ũnierẽ u̶gorã, Dios meerẽ ĩroarã mu̶jãã baigarã. 6Tie ũnierẽ caátinucũrãrẽ bu̶tioro popiye na baio joroque na átigu̶mi Dios. 7Cajũ̶goyepu̶re mu̶jãã cũ̶ã tie ũnie carorijere mu̶jãã ásupa. 8Ãmerẽ yua, Jesucristo yarã ãnirĩ nipetirije roro mu̶jãã caátiere jãnacõãña: Ãmeo asiarique, bairi roro ãmeo awajatutirique, bairi roro ãmeo ĩñatutirique, bairi roro ãmeo bu̶su̶pairique, bairi roro ãmeo ĩrĩqũẽ cũ̶ãrẽ jãnacõãña. 9Cajũ̶goyepu̶ roro mu̶jãã caátiga nucũñamirĩqũẽrẽ cajãnacõãrĩcãrã ãnirĩ ãmerẽ yua ãmeo ĩtoepeeticõãña. 10Jĩcãũ̶ cawãmau̶ cabu̶cu̶ jutirore cũrĩ, cawãmarõ pu̶ame cũ̶ cajãñawasoarore bairo mu̶jãã cũ̶ã roro mu̶jãã caátiãnigarijere jãnarĩ, cawãma wãme caroaro átiãnajẽ pu̶amerẽ mu̶jãã tũ̶goñajũ̶goyupa. Dios mu̶jããrẽ caqũẽnorĩcũ̶ pu̶ame tunu mu̶jããrẽ qũẽnonemoñami, cũ̶rẽ bairo ãnajẽ cu̶tajere mu̶jãã cacũ̶goparore bairo ĩ. Bairo nemojãñurõ cũ̶rẽ bairo ãnajẽ cu̶tiri yua, ñe ũnie ru̶saeto cũ̶ mu̶jãã masĩgarã. 11Bairi ãmerẽ yua, nipetirore Jesucristo cũ̶ caĩñajoro ĩñaricaworique maniña. Noa ũna judío majã, judío majã caãmerã cũ̶ã, na rupau̶ macããjẽrẽ cayisetarotiricarã, cayiserotiena cũ̶ã, aperopu̶ macããna cũ̶ã, posa ũna cũ̶ã, paacoteri majã cũ̶ã, na majũã capaarique cũ̶gorã cũ̶ã jĩcãrõrẽã bairo niñama. Jesucristo cũ̶ caĩñajoro ĩñaricaworique maniña. Tie nipetiro marĩ caãnajẽ cu̶tie ñe wapa maa. Jesucristo cũ̶ caãnajẽ cu̶tie roque caãnimajũrĩjẽ niña. Tunu bairoa cũ̶ã, marĩ nipetiro mena nicõãñami. 12Dios pu̶ame mu̶jããrẽ maiñami. Mu̶jãã beseyupi, cũ̶ yarã mu̶jãã caãniparore bairo ĩ. Jĩcãũ̶ cawãmau̶ cabu̶cu̶ jutirore cũrĩ, cawãmarõ pu̶ame cũ̶ cajãñawasoarore bairo mu̶jãã cũ̶ã roro mu̶jãã caátiãnigarijere jãnarĩ, cawãma wãme caroaro átiãnajẽ cu̶taje pu̶amerẽ átiãnajẽcu̶sa. Cabopacarãrẽ caroaro cariape na ĩñamaiña. Na ju̶átinemoña. Tunu bairoa, “Aperã netõrõ caãnimajũrã jãã ãniña,” ĩ tũ̶goñaeticõãña. Tunu bairoa aperãrẽ caroaro nu̶cũ̶bu̶gorique mena na ĩñaña. Tunu aperã mu̶jããrẽ roro na caátimiatacũ̶ãrẽ, tũ̶goenarẽ bairo roro na caátiere tũ̶goña netõcõãña. 13Jicoquei ãmeo asiaeticõãña. Aperã na caátie mu̶jãã cajesoetiere na masiriyoya. Jesucristo merẽ mu̶jãã yaye wapare masiriyoyupi. Bairi mu̶jãã cũ̶ã aperãrẽ cũ̶ caátatorea bairo na masiriyobojaya. 14Tunu bairoa mu̶jãã caãmeomairõ ñuña. Tie pu̶ame roque nipetirije caroaro mu̶jãã caátie caãnimajũrĩjẽ niña. Tore bairo ãmeo mairã, tocãnacã wãme caroa caãnierẽ mu̶jãã átimasĩgarã. 15Jĩcã poa macããna, jĩcã rupau̶re bairo caãna mu̶jãã cũñupĩ Dios. Bairi caroa yericu̶taje Jesucristo mu̶jããrẽ cũ̶ cajorique jũ̶gori, tũ̶goña beseya jĩcã majãrẽ bairo mu̶jãã caátipeere. Diore, “Jãã mena mu̶ ñujãñuña,” qũĩnucũña. 16Tunu apeyera Jesucristo yaye quetire mu̶jãã yeri pũnapu̶ tũ̶goñanucũña. Jesucristo cũ̶ camasĩõrĩjẽ nipetirije mena ãmeo quetibu̶ju̶ya. Bairi tunu yerijõrõ mena ãmeo bu̶su̶ya. Tunu bairoa Dios caroaro mu̶jããrẽ cũ̶ caátiere u̶seanirĩqũẽ mena tũ̶goñarĩ, bu̶tioro cũ̶ basapeoya cũ̶ yaye basarique mena. 17Bairi mu̶jãã, Jesucristo yarã ãnirĩ nipetirije mu̶jãã caátie, bairi mu̶jãã caĩrĩjẽ cũ̶ãrẽ caroaro átiãnajecu̶sa. Tunu bairoa Jesucristo marĩrẽ caroaro cũ̶ caátiere tũ̶goñarĩ, marĩ Pacu̶ Diore cũ̶ basapeoya. 18Mu̶jãã, carõmia, mu̶jãã manapũ̶ã na caĩrĩjẽrẽ nu̶cũ̶bu̶gorique mena na tũ̶gou̶saya. Marĩ Quetiupau̶re caĩroarã ãnirĩ bairo mu̶jãã caáto ñuña. 19Mu̶jãã, caũ̶mu̶a cũ̶ã, mu̶jãã nu̶moarẽ na maiña. Caroaro mena na quetibu̶ju̶ya. Tutuaro mena mu̶jãã caĩrĩjẽ ñuẽtĩña. 20Mu̶jãã, na pũnaa cũ̶ã, caroaro mu̶jãã caátipee cũ̶ãrẽ ĩñau̶seanigu̶mi Dios. Bairi mu̶jãã pacu̶a na caĩrĩjẽ nipetirijere tũ̶gou̶saya. 21Tunu mu̶jãã, capacu̶a, mu̶jãã pũnaarẽ caasiapairã na baio joroque na ápericõãña. Caroaro mena roque na quetibu̶ju̶ya. Roro majũ na mu̶jãã caĩata, na pu̶ame na u̶searitio joroque na mu̶jãã átibujiorã. 22Mu̶jãã, paabojari majã cũ̶ã, mu̶jãã quetiuparã ati yepa macããna na caĩrĩjẽ nipetirijere tũ̶gou̶saya. Paabojari majã jĩcããrã caroaro paayama na quetiuparã na caĩñajoro, jãã mena na u̶seaniáto, ĩrã. Bairo caroaro paamirãcũ̶ã, cabero na caĩñaeto pu̶amerẽ paaetiyama. Narẽ bairo baieticõãña. Mu̶jãã pu̶ame roque marĩ Quetiupau̶ yaye quetire ĩroari tocãnacã rũ̶mu̶ jĩcãrõ tũ̶nia ape wãme tũ̶goñarĩcãrõ mano na tũ̶gou̶saya. 23“Camasã ũ̶mu̶a jãã caãno jũ̶gori mee, Jesucristo ũ̶mu̶a jãã caãno jũ̶gori pu̶ame caroaro jãã paagarã,” ĩ tũ̶goñarĩ paaya mu̶jãã cawapatarije ũnierẽ. 24Merẽ mu̶jãã masĩña atiere: Caroaro mu̶jãã caátaje jũ̶gori caroare mu̶jãã jogu̶mi Dios. Mu̶jãã pu̶ame Jesucristo, mu̶jãã Quetiupau̶ majũ, cũ̶ caroticũrĩqũẽrẽ mu̶jãã átinucũña. Bairi caroare mu̶jãã jogu̶mi mu̶jãã yaye caãnipee cũ̶ caqũẽnocũrĩjẽrẽ. 25Rorije caána roquere roro na caátaje jũ̶gori popiye na baio joroque na átigu̶mi Dios. Cũ̶ pu̶ame nipetiro camasã, paabojari majã, o na majũ capaariquecu̶na cũ̶ãrẽ jĩcãrõ tũ̶nia ĩñapeoyami.

will be added

X\