LOS HECHOS 12

1Ti yu̶teare quetiupau̶ Herodes pu̶ame jĩcããrã catũ̶gou̶sari majãrẽ roro popiye na baio joroque na átijũ̶goyupu̶. 2Bairi Santiago cawãmecu̶cu̶, Juan jũ̶gocu̶re jarericapãĩ mena cũ̶ pajure rocarotiyupu̶ Herodes. 3Bairo cũ̶ caátirotirijere ĩñarĩ, judío majã Jesure catũ̶gou̶saena pu̶ame u̶seaniñuparã. Bairo na cau̶seanirõĩ, Pedro cũ̶ãrẽ ñerotiyupu̶ Herodes, judío majã nemojãñurõ u̶seanigarãma, ĩ. Cũ̶, Herodes pu̶ame pããrẽ cawauarije asuena na cau̶gari bose rũ̶mu̶ Pascua caãno bairo na átirotiyupu̶ Pedrojããrẽ. 4Bairo Pedrore cũ̶ ñerĩ bero, preso jorica wiipu̶ cũ̶ jorotiyupu̶ yua Herodes. Bairo topu̶ cũ̶ jori yua, soldaua baparicãnacã poa majũ, jĩcã poare baparicãnacãũ̶ jeto caãna soldauare na ĩñacote rotiyupu̶ Herodes. Mai, Herodes pu̶ame atore bairo ĩ tũ̶goñañupũ̶: “Pascua bose rũ̶mu̶ canetõrõ beropu̶ camasã na caĩñarõ Pedro cũ̶ caátiere yu̶ besegu̶,” ĩ tũ̶goñañupũ̶. 5Bairi Pedro preso jorica wiipu̶ caroaro ĩñacotericu̶ ãñupũ̶. Topu̶ Pedro cũ̶ caãnitoye, ñubueri majã pu̶ame tũ̶goñatutuarique mena cũ̶ jẽniboja ãñuparã Diopu̶re. 6Camasã nipetiro na caĩñarõ, Pedro cũ̶ caátiere Herodes cũ̶ caĩñabesepa rũ̶mu̶ caetapa ñamirẽ Pedro pu̶ame pu̶garã soldaua watoapu̶ cãnicũñañupũ̶. Cũ̶ wãmorĩ pu̶ga nu̶gõãpu̶a soldaua wãmorĩpu̶ cadena mena jiyaturicu̶ cũñañupũ̶. Tunu bairoa ti wii jope cũ̶ãrẽ aperã soldaua ĩñacoteri majã ãñuparã. 7Bairi yua, caãno tu̶saroa marĩ Quetiupau̶tu̶ macããcũ̶ ángel pu̶ame buiaetayupu̶. Bairo cũ̶ cabuiaetaro, ti aru̶a preso jorica aru̶a pu̶ame busujiracoasuparo. Ángel yua, Pedro cũ̶ cacãnicũñarõpu̶ cũ̶ pãñawãcõñupũ̶. Bairo cũ̶ átiwacõõrĩ, atore bairo qũĩñupũ̶: “¡Wãmu̶nu̶cãña merẽ!” Bairo ángel cũ̶ caĩrĩjẽ mena cadena Pedro wãmorĩpu̶ jiyaturique caãnimiataje pu̶ame wetiñacoasuparo. 8Tunu qũĩnemoñupũ̶ ángel Pedrore: “Mu̶ jutirore jãñaña, mu̶ ru̶po jutii cũ̶ãrẽ pea ása,” qũĩñupũ̶. Bairo cũ̶ caĩrõ, Pedro cũ̶ã cũ̶ caĩrõrẽ bairo ásupu̶. Qũĩnemoñupũ̶ tunu ángel: “Mu̶ jutiro cabui macããtõrẽ jãña átiri yu̶ bero u̶saya,” qũĩñupũ̶. 9Bairo ángel cũ̶ caĩrõ tũ̶go, cũ̶ bero u̶sawitiásúpu̶ Pedro. “¿Cariape to baimicu̶ti? o ¿ángel mee cũ̶ caátie to ãnicu̶ti, qũẽguericarore bairo ĩñau̶ yu̶ baicu̶ti?” ĩ tũ̶goñañupũ̶ Pedro. 10Bairo cũ̶ caĩtũ̶goñamiatacũ̶ãrẽ, cacoteri majã soldaua caãnijũ̶gorãrẽ na netõñuparã. Narẽ netõá, aperã soldaua cacoterã cũ̶ãrẽ na netõñuparã tunu. Bairi yua witieta, jope, ãpõã mena na caqũẽnorĩcã jope na caetaro, ti jope pu̶ame to majũã pããcoasuparo. Bairo capãrõ, witicoásúparã preso jorica wiire yua. Bairo witiáti bero, yoajãñurõ cũ̶ jũ̶goa yasiweyocoásúpu̶ ángel pu̶ame yua. 11Tocãrõpu̶ Pedro tũ̶goñamasĩñupũ̶ ángel cũ̶rẽ cũ̶ caátiere. Bairo tũ̶goñamasĩrĩ yua, atore bairo ĩñupũ̶: “Ãmerẽ yu̶ masĩña yua, cariape yu̶ Quetiupau̶ cũ̶tu̶ macããcũ̶ ángel majũrẽ cũ̶ netõõrotijoupi, yu̶re Herodes roro cũ̶ caátibujiopeere. Tunu bairoa judío majã yu̶re roro na caátigarijere na áperio joroque ĩ, cũ̶ joupi cũ̶tu̶ macããcũ̶ ángel majũrẽ,” ĩ tũ̶goñamasĩñupũ̶ Pedro. 12Bairo ĩ tũ̶goñamasĩrĩ bero, acoásúpu̶ Pedro, Juan apeyera Marcos cawãmecu̶cu̶ paco María ya wiipu̶. Ti wiipu̶ capããrã camasã neñarĩ Diopu̶re cũ̶ jẽnibojarã ásuparã Pedrore. 13Ti wii etajũ̶gorica jopepu̶ etari piiyupu̶ Pedro. Bairo cũ̶ capiirijere tũ̶gori, Rode cawãmecu̶co pu̶ame, “¿Noa ũna na ãnicu̶ti?” ĩõ ĩñao ásúpo. 14Baiopu̶a, jõpũ̶ã Pedro bu̶su̶riquere tũ̶gomasĩrĩ, bu̶tioro majũ u̶seaniñupõ. Bairo cau̶seanio ãnirĩ yua, Pedrore cũ̶ pããjõrĩ mee, Diore cajẽniãnatu̶ pu̶amerẽ atu̶cõãjãásúpo, na quetibu̶ju̶o ácó. Topu̶ na etari, “¡Pedro jopepu̶ niñami!” na ĩñupõ. 15Bairo cõ caĩrõ, cañubuerã pu̶ame bairo cõ boca ĩñuparã: --¡Bairi ĩcõ miña! Ĩmecũ̶õ miña —cõ ĩñuparã. Bairo na caĩmiatacũ̶ãrẽ, cõ pu̶ame, “¡Bairicõõ mee mu̶jããrẽ ñiña! ¡Cũ̶ã niroyaami!” na ĩmiñupõ. Bairo cõ caĩmiatacũ̶ãrẽ, atore bairo ĩnemoñuparã na pu̶ame tunu: --Pedro mee ãcũ̶mi. ¡Cũ̶ wãtĩ pu̶ame ãcũ̶mi! —ĩñuparã. 16Bairo na caĩãnitoye, jopepu̶ piinemocõãñupũ̶ Pedro pu̶ame mai. Bairo cũ̶ capiiãnoi yua, cũ̶ pããjõñuparã Pedrore. Cũ̶ pããjõrĩ, qũĩña acu̶acoasuparã Pedrore, María ya wii caãniatana pu̶ame yua. 17Pedro pu̶ame cũ̶ wãmorĩrẽ ñumu̶gõrĩ na bu̶su̶jãnarotiyupu̶. Bairo na ĩ jãnaorĩ, ángel preso jorica wiipu̶ caãcũ̶rẽ cũ̶ cũ̶ cawiyoataje nipetirijere na quetibu̶ju̶yupu̶. Tiere na quetibu̶ju̶ yaparo, atore bairo na ĩnemoñupũ̶ Pedro tunu: --Atie yu̶ cabaiataje nipetirijere cũ̶ mu̶jãã quetibu̶ju̶wa Santiagore. Tunu bairoa na mu̶jãã ĩwã marĩ yarã catũ̶gou̶sarã cũ̶ãrẽ —na ĩñupũ̶ Pedro yua, ti ñamirẽ María wiipu̶ caneñaátanarẽ. Bairo na ĩ yaparori bero, witi acoásúpu̶ apepau̶pu̶ Pedro. 18Ti ñami cabusuri rũ̶mu̶rẽ mawijioroa na baicõãñuparõ yua ĩñacoteri majã soldauare. Bairi, “¡Dope cũ̶ baiupari Pedro!” ãmeo ĩñuparã soldaua pu̶ame na majũ. Bairo ĩrĩ, bu̶tioro tũ̶goñarĩqũẽ paiyuparã. 19Pedro cũ̶ camanierẽ queti tũ̶go, Herodes pu̶ame Pedrore na macããrotimiñupũ̶ tunu. Na, soldaua pu̶ame cũ̶ bócaesuparã. Torecu̶, Herodes pu̶ame caĩñacotemasĩẽna na caãnoi, Pedrore cacotemiatanarẽ na pajĩãre rotiyupu̶ yua. Bairo átirotiri bero, Judea yepare witiri, Cesarea macãpu̶ ãniásúpu̶. 20Mai, Herodes pu̶ame Tiro, bairi Sidón macãã macããna mena asiajãñuñupũ̶. Bairo asiari, cũ̶ ya yepa macããjẽ u̶gariquere na jorotiesupu̶. Bairi na pu̶ame cũ̶ mena ãmeo bu̶su̶qũẽnogarã, jĩcãrõrẽ bairo tũ̶goñarĩ, “Cũ̶tu̶ marĩ bu̶su̶rároa,” ĩ tũ̶goñañuparã. Bairi Blasto cawãmecu̶cu̶, Herodes roca carotimasĩ caãnimajũũ̶rẽ, “Jããrẽ mu̶ ju̶bu̶su̶bojagu̶,” qũĩñuparã. 21Bairo na caĩatacu̶ cũ̶ cabu̶su̶roi, Herodes pu̶ame, “Jau̶, ti rũ̶mu̶ majũ na mena yu̶ bu̶su̶gu̶,” qũĩ cũñupũ̶. Bairi ti rũ̶mu̶ caetaro ĩña, jutii caĩñabeseri majã na cajãñarĩjẽ ũnierẽ jãñarĩ, quetiuparã na caruiropu̶ ruiyupu̶. Bairo rui yaparo yua, Tiro, Sidón macããna caetaátanarẽ na bu̶su̶jũ̶goyupu̶. 22Bairo cũ̶ cabu̶su̶rijere tũ̶gori, camasã pu̶ame awajari atore bairo ĩñuparã: “¡Ãni, marĩrẽ cariape caquetibu̶ju̶, marĩ ũcũ̶ camasocu̶ mee, jũ̶gũẽ ũcũ̶ ãcũ̶mi!” qũĩñuparã Herodere. 23Bairo na cũ̶ caĩãno, tocãrõã yua, ángel marĩ Quetiupau̶tu̶ macããcũ̶ pu̶ame Herodere cũ̶ riañao joroque ásupu̶, “Dios jĩcãũ̶ã niñami marĩ caĩroapau̶,” cũ̶ caĩẽtĩẽ wapa. Cabero yua, cũ̶rẽ becoa u̶garocacõãñuparã. 24Bairo cabaimiatacũ̶ãrẽ, nipetiropu̶ Dios yaye quetire tũ̶gopeticoasuparã Jesucristore catũ̶gou̶sari majã na caquetibu̶ju̶netõrõ jũ̶gori. 25Bernabé, bairi Saulo narẽ na caátirotijoatajere áti yaparori bero, Jerusalén caãniatana tunucoásúparã Antioquíapu̶ tunu. Na mena Juan, apeyera Marcos cawãmecu̶cu̶re cũ̶ piiásúparã.

will be added

X\