3 SAN JUAN 1

1Yu̶, cabu̶cu̶ camasĩ majũ, ati cartare mu̶ yu̶ woajoya, Gayo yu̶ bapa caãnorẽ bairo yu̶ camai majũũ̶rẽ. 2Yu̶ yau̶, yu̶ baire bairo caãcũ̶, yu̶ camai, atore bairo Diopu̶re mu̶ yu̶ jẽnibojaya: Dios cũ̶ caĩñajoro caroaro mu̶ caãnorẽã bairo nipetiri wãme caroaro mu̶ caátiãni wãme jeto to ãmarõ. Bairi tunu riaye mácũ̶ caroaro mu̶ caãno cũ̶ãrẽ yu̶ boya. 3Bu̶tioro yu̶ tũ̶goña u̶seaniapu̶ jĩcããrã marĩ yarã atíri, Dios mena caroaro cariape mu̶ catũ̶goñatutuacõãnierẽ yu̶ na caquetibu̶ju̶ro tũ̶gori. 4Netõjãñurõ u̶seanirĩqũẽ niña yu̶ra, yu̶ cabuerã yu̶ pũnaarẽ bairo caãna Dios cũ̶ caãnirotirore bairo cariape na caátiãnie quetire yu̶ catũ̶goata. 5Yu̶ yau̶, yu̶ baire bairo caãcũ̶, yu̶ camai, caroaro nu̶cũ̶bu̶gorique mena marĩ yarã aperãrẽ na mu̶ qũẽnonucũñupã mu̶ ya wiipu̶re. Bairo jeto mu̶ átiãninucũñupã aperopu̶ macããna mu̶tu̶ caetarã quetibu̶ju̶ri majãrẽ. 6Bairi jãã cañubue neñarõpu̶ ãna, na cũ̶ã, “Bu̶tioro jããrẽ camai ãnirĩ caroaro jãã ju̶átinucũñami Gayo,” ĩ bu̶su̶nucũñama mu̶rẽ. Bairi mu̶rẽ ñiña: Tunu na caetaro, na ju̶átinemoña. Na cabopacarijere na joya, na caquetibu̶ju̶ ñesẽãmasĩnucũparore bairo ĩ. Dios cũ̶ caborore bairo na ju̶átinemoña. 7Na pu̶ame Jesucristo yarã, cũ̶ carotiricarã ãnirĩ cũ̶ yaye quetire na bueñesẽãráná bainucũñama aperopu̶ macããnarẽ. Bairo topu̶ Diore camasĩẽna watoapu̶ ãna, “Jããrẽ ju̶átinemoña,” na ĩ jẽniñesẽãẽtĩnucũñama. 8Torena, marĩ pu̶ame caroaro mena na marĩ ju̶átinemogarã, Jesucristo yaye queti cariape macããjẽrẽ na caquetibu̶ju̶ ñesẽãmasĩnucũparore bairo ĩrã. 9Mai, yu̶ pu̶ame jĩcã carta na yu̶ woajomiwũ̶ mu̶tu̶ macããna Dios ya poa macããna ñubueri majãrẽ. Bairo yu̶ caátimiatacũ̶ãrẽ, Diótrefes pu̶ame camasãrẽ cajũ̶gobueri majã jãã caãnierẽ boetinucũñupĩ, camasãrẽ rotirique jetore caátinucũũ̶ ãnirĩ. 10Bairi yu̶ pu̶ame mu̶jãã tu̶pu̶ yu̶ caetari rũ̶mu̶ caãno cũ̶rẽ tutuaro mena cũ̶ yu̶ quetibu̶ju̶gu̶. Mai, cũ̶ pu̶ame cabu̶goroa jããrẽ bu̶su̶pai ñesẽãnucũñami. Yu̶ pu̶ame tie cũ̶ caĩñesẽãrĩjẽ mena yu̶ u̶seaniẽtĩña. Aperã marĩ yarã cañubueñesẽãrĩ majãrẽ caroaro na qũẽnoetinucũñami. Tunu bairoa marĩ yarãrẽ, aperã ñubueri majã na ya wiipu̶ na na cacũgaata, narẽ cũrotietinucũñami Diótrefes. Tunu bairoa narẽ caqũẽnogarãrẽ na acurewiyo jocõãnucũñami. “Tore na tuaeticõãto Dios ya poa macããna mena,” ĩ, tore bairo átiãninucũñami. 11Bairi yu̶ yau̶, yu̶ baire bairo caãcũ̶, yu̶ camai, atie carorije macããjẽ na caátiere ĩñajeeticõãña. Caroa macããjẽ jetore átiãninucũña. Caroa macããjẽrẽ caátiãninucũũ̶ pu̶ame Dios mena jĩcãrõrẽ bairo caãcũ̶ niñami. Apei, carorije macããjẽ jetore caácu̶ pu̶ame Diore camasĩẽcũ̶rẽ bairo tuayami. 12Cabaimiatacũ̶ãrẽ, apei Demetrio pu̶ame caroaro átiãninucũñami. Nipetiro camasã, “Cañuu̶ niñami Demetrio,” na caĩ ninucũñami. Bairi Dios cariape caãcũ̶ cũ̶ã masĩñami caroaro Demetrio cũ̶ caátiãnierẽ. Bairi jãã cũ̶ã cũ̶ cabaiãnierẽ tũ̶gorã, tiere jãã bu̶su̶nucũña. Merẽ caroaro cariape mu̶ cũ̶ã mu̶ masĩña cũ̶rẽ jãã caĩbu̶su̶nucũrĩjẽrẽ. 13Baipu̶a, capee mu̶ yu̶ quetibu̶ju̶gamiña. Baimicũ̶ã, woatujorique mena mu̶rẽ yu̶ quetibu̶ju̶jogaetiya. 14Tãmurĩ mu̶rẽ ñiñagaya tunu. Bairo mu̶rẽ ĩñau̶pu̶ roque, mu̶ mena yu̶ bu̶su̶gu̶ yu̶ majũpu̶a atie queti caroa macããjẽrẽ. 15Bairi caroa yericu̶taje mu̶ cũ̶ jonemoáto Dios. Yu̶ baparã mu̶ ñurotijoyama. Bairi mu̶rẽ ñiña: Tocãnacãũ̶pu̶a na ñuáto marĩ yarã to macããna. Tocãrõã niña atie queti yu̶ cawoajorije.

will be added

X\