2 TIMOTEO 4

1Jesucristo, catu̶sari yu̶tea caãno quetiupau̶ reyre bairo atígu̶mi tunu, nipetiro ati yepa macããna camasã cariaricarã, cacatirã cũ̶ãrẽ na ĩñabesei acú̶ yua. Bairo caatípau̶, Jesucristo, bairi cũ̶ pacu̶ Dios mena cũ̶ caĩñajoropu̶ atore bairo bu̶tioro mu̶rẽ yu̶ átirotiya. 2Caroa queti Dios yayere bu̶tioro na quetibu̶ju̶ya camasãrẽ. Tunu bairoa noa ũna caroaro catũ̶gorã, o catũ̶gogaena na caãmata cũ̶ãrẽ, tocãnacãnia na mu̶ quetibu̶ju̶nucũwã, tore bairo mu̶ caquetibu̶ju̶rije to cañuata yua. “Cariape quetibu̶ju̶yami Timoteo,” na ĩ tũ̶go joroque caroaro na quetibu̶ju̶ya camasãrẽ. Tunu bairoa tutuaro mena noa ũna cabotiorãrẽ na mu̶ caquetibu̶ju̶pee caãmata, tutuaro mena na mu̶ quetibu̶ju̶gu̶. Nemojãñurõ Dios yarã cũ̶ mena na tũ̶goñatutuao joroque na quetibu̶ju̶ri na ju̶átinemoña. Caroaro yerijõrõ tũ̶goñarĩqũẽ mena nu̶cũ̶bu̶goroa na quetibu̶ju̶ya camasã to macããnarẽ. 3Jĩcã yu̶tea etagaro tocãrõã camasã caroa queti Dios yayere boetiri na catũ̶gogaeti yu̶tea. Noa ũna aperã, na rupau̶ caborore bairo jeto ricaati cabueri majã, camasã na catũ̶gojesorije ũnie jetore cabuerã pu̶amerẽ na macãgarãma. Na rupau̶ caborore bairo na caátigarije macããjẽ, na catũ̶gojesorijere cabuerã pu̶amerẽ na tũ̶gou̶sajũ̶gogarãma. 4Dios yaye macããjẽ pu̶amerẽ yua boetigarãma. Carorije quetibu̶ju̶rique tocãnacã wãme pu̶amerẽ tũ̶gopeogarãma. 5Bairo na ũna na cabaimiatacũ̶ãrẽ, mu̶ pu̶ame roque caroaro majũ caroa wãmerẽ áticõã ninucũña. Roro popiye tãmu̶omicũ̶ã, nu̶cãnetõcõã ninucũña. Dios yaye queti camasãrẽ cũ̶ canetõõrĩqũẽ queti pu̶amerẽ tocãnacã rũ̶mu̶a quetibu̶ju̶cõã ninucũña. Caroaro jĩcãrõ tũ̶ni átipeyocõã ninucũña mu̶ paarique macããjẽrẽ. 6Yu̶ pu̶ame Jesucristo yaye yu̶ caátiãnie jũ̶gori yu̶ cayasipa rũ̶mu̶ merẽ cõñarõ baiya. Merẽ Dios tu̶pu̶ ãniágu̶, cũ̶ yu̶ cariabojapee etaro baiya. 7Jesucristo yu̶ cũ̶ cabueroticũrĩqũẽrẽ merẽ nipetiro jĩcãrõ tũ̶ni yu̶ átiyaparo peticõãña. Ãmeo qũẽĩrẽ bairo tutuaro caroaro jĩcãrõ tũ̶ni yu̶ átiyaparoya. Tunu bairoa epei caatu̶ri majõcu̶ jĩcãrõ tũ̶ni átiri, cũ̶ caatu̶yaparo etarore bairo yu̶ cũ̶ã Jesucristo mena jĩcãrõ tũ̶ni yu̶ átiyaparo petietaya merẽ. 8Bairi ãmerẽ yua, yu̶re Dios cũ̶ cajopee caãnorẽã bairo u̶mu̶recóopu̶re corona pesarica beto yu̶ ãnicotero bairo merẽ. Marĩ Quetiupau̶ camasãrẽ caĩñabesei cañuu̶ majũ ti beto pesarica betore yu̶ jogu̶mi cũ̶ cacõrĩcã rũ̶mu̶ caetaro. Yu̶ jeto merẽ jogu̶mi baipu̶a. Nipetiro cũ̶rẽ mairĩqũẽ mena ati yepapu̶ cũ̶ catunuatóre caboocoteãna cũ̶ãrẽ na jomajũcõãgu̶mi. 9Yu̶ yau̶, Timoteo, mu̶ cabooata, dope bairo mu̶ caatímasĩrõ cãrõ átiri, yu̶re miñau̶ atímajũcõãwã. 10Demas pu̶ame ati u̶mu̶recóo macããjẽrẽ bu̶tioro cabonetõũ̶ ãnirĩ yu̶ aweyocoámí. Tesalónica macãpu̶ acoámí. Apei Crescente pu̶ame roquere Galacia yepapu̶ cũ̶ yu̶ jowu̶. Apei Tito pu̶ame cũ̶ãrẽ Dalmacia yepapu̶ cũ̶ yu̶ jowu̶. 11Jĩcãũ̶ã, Lucas jeto yu̶ mena niñami. Bairi Marcore cũ̶ mu̶ macãwã. Cũ̶ roquere cũ̶ mu̶ piiapá ato mu̶ caatí rũ̶mu̶ caãno. Ape watoara cũ̶ pu̶ame yu̶ ju̶átibujiou̶mi ato yu̶ capaãno yu̶ paariquere. 12Apei marĩ yau̶ Tíquico pu̶amerã Efeso macãpu̶ cũ̶ yu̶ jowu̶. Topu̶ ãcũ̶mi. 13Apeyera atopu̶ acú̶, yu̶ ju̶tiro cayoaro, Troas macã yu̶ cacũrĩcãrõrẽ yu̶ mu̶ neatíbojawa. Carpo ya wiipu̶ yu̶ cũwũ̶ tore. Apeye yu̶ papera tutiri cũ̶ãrẽ mu̶ jeatíbojawa. Papera pergamino pũũrĩ roquere mu̶ cũẽpã. Mu̶ jeatímajũcõãwã. 14Apeyera Alejandro ãpõãrẽ capaanucũũ̶ pu̶ame roro majũ yu̶ átinucũñami. Yu̶re caroaro nu̶cũ̶bu̶goetiyami. Bairi marĩ Quetiupau̶ pu̶ame cũ̶ caátaje cãrõ qũĩñacõñarĩ qũĩñabesegu̶mi cũ̶ yaye wapa. 15Bairi mu̶ pu̶ame cũ̶rẽ cũ̶ uwiya. Roro mu̶ tãmu̶o joroque mu̶ átiremi. Cũ̶ pu̶ame yua ãmerẽ camasãrẽ marĩ caquetibu̶ju̶nucũrĩjẽ Dios yaye caroa quetire caboecu̶ majũ catuaricu̶ niñami. 16Caĩñabeseri majã carotimasĩrã tu̶re yu̶ cabu̶su̶qũẽnou̶ etari watoare jĩcãũ̶ majũã yu̶ ãmu̶. Noa ũna yu̶ ju̶bu̶su̶nemoema, quetiuparã carotimasĩrãtu̶ yu̶ caetajũ̶gorore. Nipetiro yu̶ mena caãnimiatana yu̶ aweyopeticoámá. Tie na cabairique jũ̶gori marĩ yarãrẽ Dios pu̶ame popiye na baio joroque na cũ̶ ápericõãto. 17Bairo marĩ yarã yu̶re na caju̶áperimiatacũ̶ãrẽ, marĩ Quetiupau̶ roque yu̶ ju̶átimajũcõãwĩ. Yeri tũ̶goñatutuarique majũrẽ yu̶ jowĩ. Bairo yeri tũ̶goñatutuarique yu̶ cũ̶ cajoro jũ̶gori cũ̶ yaye queti camasãrẽ cũ̶ canetõõrĩqũẽ quetire caroaro na yu̶ quetibu̶ju̶ masĩõ joroque yu̶ ámi. Na, nipetiro judío majã caãmerã cũ̶ yaye quetire na yu̶ caquetibu̶ju̶ro bero, tiere na tũ̶gopeo joroque ámi Dios. Tore bairo átiri yu̶ netõwĩ marĩ Quetiupau̶ pu̶ame, macãnu̶cũ̶ yaiare bairo cauwiorã caãna quetiuparã roro yu̶re na caátibujiopeere yua. 18Bairi tunu ato jũ̶goye cũ̶ãrẽ nipetiro roro yu̶ catãmu̶opeere yu̶ ju̶átinemocõã ninucũgu̶mi Dios. Bairo yu̶ netõrĩ yua, cũ̶ carotimasĩrĩpau̶ u̶mu̶recóopu̶ caãnipau̶ majũ yu̶ tuao joroque yu̶ átigu̶mi. ¡Bairi cũ̶ jetorea cũ̶ caasiyarije caroa cũ̶ catutuãnie to ãnicõã ninucũáto tocãnacã rũ̶mu̶a! Bairoa to baiáto. 19Bairi apeyera marĩ yarã Prisca, Aquila, bairi Onesíforo ya poa macããna cũ̶ãrẽ yu̶ ñurotijoya. 20Apei Erasto cawãmecu̶cu̶ pu̶ame Corinto macãpu̶ tuawĩ. Trófimo pu̶amerã Mileto macãpu̶ cariau̶re cũ̶ yu̶ atíweyowu̶. 21Timoteo, tãmurĩ jãñurõã mu̶ apá. Tãmurĩã, pue caetaparo jũ̶goyea mu̶ apá atopu̶re. Mu̶rẽ ñurotijoyama marĩ yarã. Eubulo, Pudente, Lino, Claudia, bairi marĩ yarã nipetiro ñubueri majã cũ̶ã mu̶ ñurotijoyama. 22Bairi yua, marĩ Quetiupau̶ Jesucristo mu̶rẽ cũ̶ ju̶áticõã ninucũãmarõ. Bairi Dios cũ̶ã nocãrõ caroa cũ̶ yaye macããjẽrẽ mu̶jãã nipetirore cũ̶ jonemoáto. Tocãrõã niña atie queti yu̶ cawoaturije.

will be added

X\