2 TIMOTEO 3

1Apeyera, Timoteo, ati u̶mu̶recóo caãnitu̶sari yu̶tea caãnorẽ camasã Dios yarã popiye tãmu̶ogarãma. 2Ti yu̶tea caãnorẽ camasã cañuena nigarãma. Jĩcããrã na majũ na caborore bairo jeto átiãniganucũgarãma. Tunu bairoa cadinero u̶garipea pairã nigarãma. “Aperã netõrõ caãnimajũrã jãã ãniña,” caĩtũ̶goñarã nigarãma. “Jãã jeto camasĩmajũrã jãã ãniña,” ĩrãrẽ bairo catũ̶goñarĩqũẽcu̶na nigarãma. Diore cũ̶ baibotiori roro cabu̶su̶pairã nigarãma. Aperã na pacu̶a cũ̶ãrẽ cayu̶ena, cabaibotiopairã nigarãma. Aperã, “Jãã mena mu̶ ñujãñuña,” di rũ̶mu̶ ũno caĩẽna nigarãma. Bairo caãna ãnirĩ Dios yaye macããjẽ buerique cũ̶ãrẽ di rũ̶mu̶ nu̶cũ̶bu̶goro ĩñaetigarãma. 3Tunu bairoa di rũ̶mu̶ ũno bopacooro cabopacarãrẽ catũ̶goñaena ninucũgarãma. Aperã roro caocayoja pairã nigarãma. Aperã cũ̶ã roro na rupau̶ caborore bairo jeto na caátiganucũrĩjẽrẽ catũ̶goña ẽñotamasĩẽna nigarãma. Tunu bairoa aperã tũ̶goñamairĩcãrõ mano tutuaro mena roro átinucũgarãma camasãrẽ. Na pu̶ame nipetiro caroa macããjẽrẽ caboena majũ ninucũgarãma. 4Tunu bairoa jĩcã majã nimirãcũ̶ã, roro bu̶su̶jã buitiregarãma aperã na yarã camasãrẽ. Roro majũ caasiapairã nigarãma. Nocãrõ pairo roro na caátie mena nimirãcũ̶ã, “Caroa macããjẽrẽ caãna majũ jãã ãniña,” ĩ tũ̶goña botionucũgarãma. Dios yaye macããjẽrẽ tũ̶gou̶sari bero, cũ̶ mena tũ̶goñatutuaricaro ũnorẽã, na majũ rupau̶ caborore bairo na caátigarije pu̶ame jetore bu̶tioro u̶garipeari átiãniganucũgarãma. 5Bairi tunu Dios yaye macããjẽrẽ cabuerãrẽ bairo majũ baitogarãma, mu̶nana. Bairo Dios yaye cũ̶ catutuarije macããjẽrẽ masĩmirãcũ̶ã, tiere caẽñotarãrẽ bairo jĩcãrõ tũ̶ni na yeri mena átiãnimasĩẽtĩnucũgarãma. Na ũnarẽ, Timoteo, mu̶ roque na ĩtoecoeticõãña. 6Na ũna ninucũñama noo na caboro aperã ya wiiripu̶ cajããñesẽãnucũrã. Bairo ape wiiripu̶ jããñesẽãrĩ yua, carõmia cayeri tũ̶goñatutuaena roro caátipairãrẽ na ĩtoepenucũñama. Bairo ĩtori yua, nipetiro carorije macããjẽrẽ na mena roro átiepenucũñama, na rupau̶ caborore bairo yua. 7Bairi tunu na ũna di rũ̶mu̶ ũno ru̶saeto buenucũñama Dios yaye quetire. Bairo buemirãcũ̶ã, di rũ̶mu̶ ũno cariape macããjẽrẽ tũ̶gojĩãti peyoetaetinucũñama. 8Camasĩrĩ majã cũmua ũna Janes, apei Jambres cawãmecu̶na Moisés ãnacũ̶rẽ cũ̶ boena, cũ̶ botiori, na camasĩrĩjẽrẽ cũ̶ áti ĩñoñupã. Narẽã bairo caĩtopairã cũ̶ã cariape macããjẽ Dios yaye quetire caboena niñama. Caũ̶mu̶a catũ̶goñarĩqũẽ mána catũ̶goñamasĩẽna niñama. Dios mena catũ̶goñatutuajãnarĩcãrã majũ niñama. 9Merẽ camasã aperã caroaro masĩcõãñama catũ̶goñamasĩẽna majũ na caãnierẽ. Tirũ̶mu̶pu̶ caãnana Janes, apei Jambrejãã, Moisés ãnacũ̶rẽ caboetanarẽã bairo roro na cabairijere merẽ masĩcõãñama camasã. Bairi di rũ̶mu̶ ũno nemojãñurõ camasãrẽ na ĩtonemonutua áperigarãma yua. 10Timoteo, mu̶ roque caroaro cariape yu̶ caátirotirore bairo yu̶ cabuerijere mu̶ átiãninucũña. Yu̶rea bairo ati wãmerĩrẽ caroaro mu̶ átiãninucũña: Yu̶rea bairo caroaro mu̶ átajecu̶ti ãnimasĩña. Yu̶rea bairo mu̶ cũ̶ã yu̶ caátiãnipeere mu̶ tũ̶goñanucũña. Mu̶ cũ̶ã yu̶rea bairo Dios mena mu̶ tũ̶goñatutuaya. Camasã roro popiye mu̶ tãmu̶o joroque na caátimiatacũ̶ãrẽ, caroaro yerijõrõ yu̶rea bairo mu̶ tũ̶goñanetõcõã ninucũña. Camasã aperã cũ̶ãrẽ caroaro yu̶rea bairo na miñamaiña. Tunu bairoa yu̶rea bairo popiye tãmu̶onucũmicũ̶ã, mu̶ yeri tũ̶goñatutuajãñuña. 11Roro mu̶rẽ pajĩãgarã, o tocãnacã wãmerẽ roro popiye tãmu̶omicũ̶ã, mu̶ nu̶cãnetõcõãnucũña. Yu̶ yau̶, merẽ caroaro mu̶ masĩña roro majũ Antioquía, Iconio, bairi Listra yu̶ catãmu̶orĩqũẽrẽ. Roro majũ Jesucristo yaye queti jũ̶gori yu̶ pajĩãgawã to macããna. Roro majũ popiye yu̶ tãmu̶owũ̶. Bairo roro popiye yu̶ catãmu̶omiatacũ̶ãrẽ, marĩ Quetiupau̶ pu̶ame tie nipetirijere yu̶ ju̶átinemowĩ. 12Bairãpu̶a, merẽ marĩ masĩña: Nipetiro Jesucristo cũ̶ caborore bairo caroaro caátiãnigarã, tocãnacãũ̶pu̶a roro popiye áti ecogarãma, aperã jũ̶gori. 13Aperã carorã cañuena, aperã caĩtopairã roque nemojãñurõ jõpu̶ame carorije macããjẽrẽ átinutuagarãma. Aperãrẽ roro na ĩtoepemirãcũ̶ã, na cũ̶ã roro ĩtoecogarãma na yaye wapa yua. 14Timoteo, mu̶ pu̶ame roque tie ũnie ápeia, caroa wãme jetore tocãnacã rũ̶mu̶a áticõã ninucũña mu̶rẽ yu̶ cabuerique mena. Merẽ tie queti, “Cariape majũã niña tie quetibu̶ju̶rique,” ĩrĩ caroaro mu̶ tũ̶gou̶sacõã ninucũña. Mu̶rẽ tie quetire cabuericarã cũ̶ãrẽ cariapea mu̶ masĩña. 15Tunu bairoa merẽ caroaro mu̶ masĩña cawĩmau̶acã ãcũ̶pũ̶na, Dios yaye macããjẽ caroa quetire mu̶ camasĩjũ̶gorique. Bairi mu̶ pu̶ame nemojãñurõ buecõã ninucũña. Bairo tie quetire nemojãñurõ bueri caroaro mu̶ caátiãmata, Jesucristo mena mu̶ catũ̶goñatutuarije jũ̶gori mu̶ netõmasĩgu̶. 16Nipetiro Dios ya tuti macããjẽ woaturique Dios cũ̶ camasĩõrõ jũ̶gori na cawoaturique niña. Bairi tie buerique marĩrẽ caju̶átiere bairo ñujãñuña. Aperãrẽ tiere bueata, ñujãñuña. Tie mena jũ̶gori aperãrẽ beyogu̶, marĩ cabueata cũ̶ãrẽ, ñujãñuña. Tie mena jũ̶gori caroaro cariape na caãnimasĩpeere bori, narẽ marĩ cabueata, tie queti ñumajũcõãña. 17Tore bairo marĩ cabueata yua, Dios yau̶ caãcũ̶ pu̶ame tocãnacã wãme caroa macããjẽrẽ caátijĩãtimasĩpeyou̶ majũ tuagu̶mi.

will be added

X\