2 TIMOTEO 2

1Bairi, Timoteo, yu̶ macũ̶rẽ bairo caãcũ̶, mu̶ pu̶ame, mu̶ caátiãnimasĩpee Jesucristo mu̶rẽ cũ̶ cajorique nipetirije mena tutuaro quetibu̶ju̶ ãninucũña camasãrẽ. 2Torecu̶, mu̶ pu̶ame capããrã na catũ̶goropu̶ yu̶ caquetibu̶ju̶rique mu̶ catũ̶goriquere noa ũna aperã caũ̶mu̶a caroaro caátiãnarẽ na quetibu̶ju̶netõña. Bairo na mu̶ caquetibu̶ju̶netõrõ, na pu̶ame cũ̶ã aperãrẽ na quetibu̶ju̶nutuagarãma tie quetire. 3Jĩcãũ̶ soldau popiye cũ̶ wapana jũ̶gori tãmu̶omicũ̶ã, cũ̶ cabairijere nu̶cãnetõcõãñami. Torea bairo mu̶ cũ̶ã Jesucristo yau̶ soldau cañuu̶ ãnirĩ cũ̶ yaye queti jũ̶gori popiye mu̶ catãmu̶onucũrĩjẽrẽ nu̶cãnetõcõãña. 4Jĩcãũ̶ soldau caãcũ̶ cũ̶ quetiupau̶ cũ̶ carotirore bairo jeto jĩcãrõ tũ̶ni átinucũñami. Bairo caácu̶ ãnirĩ, aperã soldaua caãmerã camasã mena ãnirĩ narẽ bairo átiãmerĩnucũñami, cũ̶ quetiupau̶ cũ̶ caĩñajesoparore bairo ĩ. Tore bairo mu̶ cũ̶ã Jesucristo yau̶ soldaure bairo caácu̶ ãnirĩ cũ̶ carotirore bairo jeto átiãña, mu̶rẽ qũĩñajeso joroque ĩ. 5Torea bairo eperi majõcu̶ cũ̶ã, caroaro cũ̶ caeperije wapa cũ̶ na cajopeere ñemasĩẽtĩñami, caroaro eperique macããjẽ carotirore bairo jĩcãrõ tũ̶ni cũ̶ caátipeyojĩãtieticõãta. 6Tunu bairoa jĩcãũ̶ cũ̶ wesere capaanucũũ̶, cũ̶ roque caãnijũ̶goro cũ̶ yaye cũ̶ caoterique cabu̶tiro ríca jemasĩñami. 7Timoteo, atie mu̶rẽ ĩcõñarĩ, mu̶ yu̶ caquetibu̶ju̶rijere caroaro tũ̶gopeoya. Tie mu̶ yu̶ caquetibu̶ju̶rijere marĩ Quetiupau̶ roque caroaro mu̶ tũ̶goãmewiyo masĩõ joroque mu̶ átigu̶mi. 8Timoteo, atie Jesucristo cũ̶ cabairiquere masiritieticõãña: David ãnacũ̶ pãrãmi majũ marĩrẽã bairo caãcũ̶ ãñupĩ Jesucristo. Bairo caãcũ̶ nimicũ̶ã, Diore bairo cũ̶ caãnierẽ marĩ masĩõgu̶ pajĩãecori bero cati tunucoasupi tunu. Yu̶ pu̶ame tie camasãrẽ cũ̶ canetõrĩqũẽ quetirea yu̶ quetibu̶ju̶nucũña camasãrẽ. 9Tie quetire camasãrẽ yu̶ caquetibu̶ju̶rije jũ̶gori roro popiye yu̶ tãmu̶onucũña. Tunu bairoa roro majũ caátimajũcõãrĩcũ̶rẽ bairo ato preso jorica wiipu̶re ãpõãwẽ mena jiyaricu̶ yu̶ ãniña. Bairo yu̶ cabaimiatacũ̶ãrẽ, Dios yaye caroa queti pu̶amerẽ ñamu̶ ũcũ̶ yasio masĩẽcũ̶mi. Nipetiropu̶ jesapeticoagaro. 10Bairi yu̶ pu̶ame, Dios yarã cũ̶ cabesericarã caroaro na caãnipeere ĩ, roro popiye yu̶ tãmu̶onucũña. Na cũ̶ã yu̶ caquetibu̶ju̶rijere tũ̶gori bero yua, nocãrõ caroaropu̶ netõjĩãtiri, yeri capetietiere Jesucristo jũ̶gori na cacũ̶goparore bairo ĩ, bu̶tioro yu̶ quetibu̶ju̶nucũña. 11Atie caãnorẽ bairo cariape niña: Jesucristo mena tũ̶goñatutuari cũ̶ yaye quetire marĩ caquetibu̶ju̶rije jũ̶gori marĩrẽ na capajĩãrocaata, Jesucristo cũ̶ cacatitunurĩcãrõrẽã bairo marĩ cũ̶ã marĩ catitunucoagarã, riamirãcũ̶ã yua. 12Ati u̶mu̶recóopu̶re popiye marĩ catãmu̶oatacũ̶ãrẽ, Jesucristo cũ̶ carotimasĩrĩpau̶re caãniparã majũ marĩ ãnigarã. Apeyera Jesucristore masĩmirãcũ̶ã, marĩ caĩtoata, cũ̶ cũ̶ã marĩrẽ masĩẽtĩgu̶mi. 13Cũ̶rẽ boetiri, cũ̶ caborore bairo marĩ cabaiepatacũ̶ãrẽ, cũ̶ roque tocãnacã rũ̶mu̶a cañuu̶ nicõã ninucũgu̶mi. Cũ̶ roque cariape caĩ majũ ãnirĩ cũ̶ majũã ĩtomasĩẽtĩñami. 14Timoteo, atiere na mu̶ quetibu̶ju̶nemowã. Bairo na quetibu̶ju̶nemorĩ, atore bairo na mu̶ átirotiwa Dios cũ̶ caĩñajoro: Cabu̶goro macããjẽ bu̶su̶rica risero macããjẽ ũnie mena tocãrõã na ãmeo bu̶su̶rique netõjãnacõãto. Tie ũnie ãmeo bu̶su̶rique netõrĩqũẽ cabu̶goro macããjẽ dope caátiãmanie majũ niña. Tie na cabu̶su̶rijere noa ũna catũ̶gori majã pu̶amerẽ roro na tũ̶gomawijiao joroque caátie ũnie majũ niña. 15Jĩcãũ̶ paabojari majõcu̶ nipetiro átijĩãtipetiri, cũ̶ quetiupau̶re cũ̶ caetarore bairo mu̶ cũ̶ã nipetiro caroaro átijĩãtipetiya Dios cũ̶ caĩñajoropu̶ yua. Tore bairo caroaro áticõã ninucũña ñe ũnie jũ̶gori Dios mena mu̶ catũ̶goñaboboetiparore bairo. Cũ̶ yaye caroa quetibu̶ju̶riquere jĩcãrõ tũ̶ni quetibu̶ju̶cõãña camasãrẽ. 16Timoteo, mu̶ roque aperã cabu̶goro macããjẽ dope caátiãmanie bu̶su̶riquere quetibu̶ju̶gari na caãmeobu̶su̶rique netõnucũrĩjẽ ũnierẽ di rũ̶mu̶ ũno tũ̶gopeoeticõãña. Tie ũnierẽ cabu̶su̶painucũrã nemojãñurõ Diore cũ̶ tũ̶gou̶sajãnarĩ, carorije macããjẽ pu̶amerẽ jõpu̶ame átijũ̶gonutuayama. 17Tunu bairoa na yaye na cabuenucũrĩjẽ pu̶ame riaye gangrena camasãrẽ carupau̶ u̶garijere bairo cañuetie majũ ninucũña. Tore bairo tãmu̶orã baiyama Himeneo, apei Filetojãã pu̶ame yua. 18Bairo na pu̶ame cariape quetire tũ̶gou̶sajãnarĩ, ricaati tũ̶gomawijiarã baiyama. Tore bairo tũ̶gomawijiari yua, “Merẽ Dios camasã cariaricarãrẽ cũ̶ cacatiobujiorica rũ̶mu̶ netõcoasupa,” ĩ quetibu̶ju̶nucũñama. Bairo na caĩquetibu̶ju̶rije mena yua jĩcããrã camasãrẽ Jesucristo mena na catũ̶goñatutuarijere na átimawijiorã átiyama. 19Tore bairo na caátimiatacũ̶ãrẽ, Dios pu̶ame roque wii qũẽnorã, ũ̶tãpãĩ na cacũjũ̶gomajũrĩpãĩrẽ bairo capetietipeere marĩ cũñupĩ. Bairi torea bairo cũ̶ ya tutipu̶ cariapea ĩ woatuyupa: “Marĩ Quetiupau̶ cũ̶ yarã cariapea caãnarẽ na masĩcõãñami.” Aperopu̶ cũ̶ãrẽ bairo ĩ woatuyupa: “Tocãnacãũ̶pu̶a, ‘Dios yarã jãã ãniña,’ caĩrã carorije átaje macããjẽrẽ na jãnacõãto,” ĩ woatuyupa ti tutipu̶. 20Ape wãme ĩrĩcãrõ pu̶amata, jĩcã wii capairi wiipu̶re oro, o plata mena na caqũẽnorĩqũẽ jeto mee, jotu̶u̶ niña. Ape wãme, ríi, bairi yucu̶ mena na caqũẽnorĩcãru̶ri cũ̶ã ninucũña. Jĩcãru̶ jotu̶ bose rũ̶mu̶ macããru̶ majũ niña. Aperu̶ pu̶ame cabu̶goro macããru̶, tocãnacã rũ̶mu̶a na cacũ̶goriru̶ ninucũña. 21Torea bairo marĩ cũ̶ã tocãnacã wãme carorije macããjẽrẽ marĩ caápericõãta, oro, o plata jotu̶re bairo caãna majũ marĩ tuagarã. Tore bairo marĩ caãmata, marĩ Quetiupau̶ caãnimajũrĩjẽ cũ̶ caátigarijere caátibojaparã majũ marĩ tuagarã. 22Torecu̶, mu̶ roque aperã cawãmarã roro na rupau̶ caborore bairo na caátie ũnierẽ di rũ̶mu̶ átiga tũ̶goñaeticõãña. Atore bairo pu̶ame ása: Caroaro cariape átiãnajẽ cu̶sa. Jesucristo mena tũ̶goñatutuacõã ninucũña. Diore, bairi aperã camasã cũ̶ãrẽ na maicõã ninucũña. Dios yarã caroarã ñe ũnie na yeripu̶ carorije mána caãna mena caroaro yerijõrõã nicõã ninucũña. 23Aperã cabu̶goro macããjẽ dope caátiãmanie bu̶su̶riquere quetibu̶ju̶gari na caãmeobu̶su̶rique netõnucũrĩjẽ ũnierẽ di rũ̶mu̶ ũno tũ̶gopeoeticõãña. Tie ũnie pu̶ame marĩ ãmeo teeo joroque caátie niña. Tiere merẽ caroaro mu̶ masĩña. 24Bairi marĩ Quetiupau̶ cũ̶ carotirijere capaabojari majõcu̶ cũ̶ yau̶ caãcũ̶ pu̶ame aperã mena roro caãmeo bu̶su̶rique netõñesẽãpau̶ ũcũ̶ mee niñami. Bairo pu̶ame roque cũ̶ caáto ñuña: Nipetiro mena caroaro caátiãnimasĩ niñami. Tunu bairoa camasãrẽ caroaro caquetibu̶ju̶ ãmoqũẽmasĩ niñami. Tunu bairoa camasãrẽ yerijõrõ Dios yaye quetire caquetibu̶ju̶masĩ ñuñami. 25Tunu bairoa aperã cabotiorã cũ̶ãrẽ yeri ñurĩqũẽ mena cabeyomasĩ ũcũ̶ cũ̶ caãno ñuña. Cũ̶ pu̶ame, “Roro na caátiere tũ̶goñawasoari, cariape quetire tũ̶gori bero Dios pu̶amerẽ tũ̶gou̶sabujiorãma,” ĩ, tore bairo caroaro mena cũ̶ caquetibu̶ju̶ro ñuña. 26Tore bairo cũ̶ caquetibu̶ju̶masĩata yua, wãtĩ roro na cũ̶ caĩtorijere tũ̶goñamasacatigarãma. Bairo tũ̶goñamasacatiri yua, roro wãtĩ narẽ cũ̶ caboro cũ̶ caátiãniganucũrĩjẽrẽ átiecoetigarãma.

will be added

X\