2 TIMOTEO 1

1Yu̶, Pablo, Dios cũ̶ caboro jũ̶gori Jesucristo cũ̶ caquetibu̶ju̶rotijoricu̶ cũ̶ yau̶ apóstol majũ yu̶ ãniña. Jesucristo mena caroaro na caãnicõãninucũpeere caãnijũ̶goripau̶pu̶a cũ̶ cabojũ̶goricarorea bairo nipetiro camasã ati u̶mu̶recóo macããnarẽ yu̶ quetibu̶ju̶o joroque ĩ, yu̶ jowĩ. 2Bairi yu̶ yau̶, Timoteo, yu̶ macũ̶rẽ bairo caãcũ̶ mu̶ caãnoi, mu̶ quetibu̶ju̶ woajou̶ yu̶ átiya ati carta mena. Tunu bairoa marĩ Pacu̶ Dios, marĩ Quetiupau̶ Jesucristo mena caroare, bairi ãmeo ĩñamairĩqũẽ, yerijõrõ ãnajẽ cu̶taje cũ̶ãrẽ cũ̶ jonemoáto mu̶rẽ. 3Yu̶ pu̶ame Diore yu̶ cajẽnirõ cãrõ, mu̶rẽ yu̶ tũ̶goñanucũña. Bairo mu̶rẽ tũ̶goñarĩ yua, tocãnacãnia Diopu̶re jẽnibojari, “Yu̶ mena mu̶ ñumajũcõãña,” cũ̶ ñi jẽninucũña. Cũ̶, Diore, yu̶ pu̶ame caroaro jĩcãrõ tũ̶ni tũ̶goñarĩqũẽ mena yu̶ ñicũ̶jãã ãnanarẽã bairo tocãnacãnia cũ̶ yu̶ jẽninucũña. 4Tunu bairoa, Timoteo, mu̶rẽ yu̶ caáweyoro ĩñarĩ otirique mena bu̶tioro mu̶ cayapapuariquere tocãnacãnia yu̶ tũ̶goñanucũña. Bairo tiere tũ̶goñarĩ yua, tãmurĩã mu̶rẽ ñiñau̶ áganucũña, mu̶ mena caroaro u̶seanirõ tunu yu̶ caãniparore bairo ĩ. 5Merẽ caroaro ĩtoricaro mano cariape Jesucristo mena mu̶ catũ̶goñatutuarijere yu̶ masĩña. Mu̶ jũ̶goyere mai mu̶ ñicõ Loida, mu̶ paco Eunice cũ̶ã Jesucristo mena catũ̶goñatutuarã majũ nijũ̶goyupa. Bairi yu̶ pu̶ame narẽã bairo cariapea Jesucristo mena mu̶ catũ̶goñatutuarijere yu̶ masĩcõã ninucũña. 6Bairi atore bairo mu̶rẽ yu̶ átirotiya: Mu̶ ru̶poa bui yu̶ wãmorĩrẽ mu̶ yu̶ cañigãpeorica watoa caroa mu̶ caátimasĩpeere Dios cũ̶ cajoriquere nemojãñurõ to bu̶tio joroque átiãnijũ̶goyecu̶sa. 7Mai, Dios pu̶ame cũ̶ Yeri Espíritu Santo marĩ tũ̶goña uwio joroque caácu̶ meerẽ marĩ jowĩ. Cũ̶ Yeri Espíritu Santo nocãrõ catutuau̶ majũ roquere marĩ jowĩ. Ãmeo mairĩqũẽ, caroaro átiãnimasĩrĩqũẽrẽ cajou̶ majũrẽ marĩ jowĩ Dios. 8Torecu̶, Timoteo, marĩ Quetiupau̶ yaye macããjẽrẽ na quetibu̶ju̶boboeticõãña camasãrẽ. Tunu bairoa cũ̶ yaye quetire yu̶ caquetibu̶ju̶bojarije jũ̶gori ato presopu̶ yu̶ caãnie cũ̶ãrẽ tũ̶goñaboboeticõãña. Atore bairo pu̶ame roque ása: Nocãrõ tũ̶goñatutuawẽpũ̶rĩqũẽ Dios mu̶ cũ̶ cajorije mena tũ̶goñatutuari, camasãrẽ cũ̶ canetõõrĩqũẽ quetire mu̶ caquetibu̶ju̶rije jũ̶gori popiye mu̶ cabairijere cariapea tũ̶goñanetõcõãña. 9Dios pu̶ame roque merẽ cũ̶ canetõrĩcãrã marĩ ãniña. Bairo marĩ netõrĩ yua, cũ̶ yarã caroarã caãniparã majũ marĩ beseyupi. Marĩ caroaro marĩ caátie jũ̶gori mee, cũ̶ pu̶ame jĩcã nu̶gõã caãnijũ̶goripau̶pu̶a cũ̶ cabojũ̶goricaro jũ̶gori marĩ beseyupi. Tunu bairoa Jesucristo jũ̶gori bu̶tioro marĩ mairĩ, marĩ beseyupi. Merẽ ati u̶mu̶recóo caãniparo jũ̶goyepu̶a marĩrẽ camaijũ̶goricu̶ niñami Dios. 10Bairi ãmerẽ marĩrẽ canetõpau̶ Jesucristore marĩ tu̶pu̶ cũ̶ cajorique jũ̶gori cariapea marĩ cũ̶ camairĩjẽrẽ marĩ masĩõ joroque átiyami Dios. Cũ̶, Jesucristo pu̶ame marĩ cũ̶ yarã roro peeropu̶ marĩ cayasibujiopeere marĩ netõñupĩ. Bairo átiri yua, “Yu̶ mena catũ̶goñatutuarã yu̶ Pacu̶ Dios mena nicõã ninucũgarãma tocãnacã rũ̶mu̶a,” ĩ, caroa quetire marĩ quetibu̶ju̶gu̶ asúpi Jesús ati yepapu̶re. Cariaricarãrẽ bairo caãna marĩ caãnimiatacũ̶ãrẽ, caroaro cabusuropu̶ caãna majũ marĩ ãnio joroque marĩ ásupi. 11Torecu̶, Dios pu̶ame roque atie nipetirije cũ̶ yaye quetire yu̶ quetibu̶ju̶ roticũwĩ camasãrẽ. Bairo camasãrẽ yu̶ quetibu̶ju̶ rotijori yua, cũ̶ yau̶ apóstol majũ yu̶ cũwĩ. 12Tore bairo yu̶re Jesucristo cũ̶ caquetibu̶ju̶roticũrĩqũẽ jũ̶gori ãmerẽ roro popiye ato preso jorica wiipu̶ yu̶ tãmu̶oña. Bairo roro popiye tãmu̶omicũ̶ã, tie mena yu̶ tũ̶goñaboboetiya. Merẽ cariapea yu̶ masĩcõãña Jesucristo mena yu̶ catũ̶goñatutua jũ̶goriquere. Jesucristo cariapea catutuau̶ majũ niñami. Bairi cũ̶ yaye queti yu̶re cũ̶ caquetibu̶ju̶roticũrĩqũẽ to ãnicõã ninucũõ joroque átigu̶mi nemo ati yepapu̶ cũ̶ catunuetari rũ̶mu̶pu̶. Tiere caãnorẽ bairo cariape majũã yu̶ masĩcõãña. 13Bairi mu̶ pu̶ame caroa queti mu̶ yu̶ caquetibu̶ju̶riquere bairo cariape áticõã ninucũña. Jesucristo mena tũ̶goñatutuaya. Jesucristo mena jĩcãrõ marĩ caãnimasĩrĩjẽ jũ̶gori marĩ caãmeomaiãnie mena camasãrẽ na maiãninucũña. 14Tunu bairoa Espíritu Santo marĩrẽ caju̶átipau̶, cũ̶ cajoricu̶ cũ̶ catutuarije mena caroa buerique macããjẽ Dios mu̶ cũ̶ cajoriquere quetibu̶ju̶ ãnijãnaeticõãña. Tie quetire tũ̶gou̶sajãnaeticõãña. 15Tunu atie apeyera merẽ mu̶ masĩña: Nipetiro Asia yepa macããna yu̶ mena atopu̶ caatána marĩ yarã yu̶ tunuweyo peticoámá. Bairi na mena macããna Figelo, apei Hermógenejããpu̶ cũ̶ã yu̶re tunuweyocoámá. 16Apei Onesíforo roque capee majũ yu̶ yeri tũ̶goña u̶seanio joroque ámi preso jorica wiipu̶ yu̶ cũ̶ caĩñau̶etanucũrĩjẽ jũ̶gori yua. Tunu bairoa preso jorica wiipu̶ yu̶ caãnie cũ̶ãrẽ tũ̶goñaboboricaro mano yu̶re ĩñau̶ etanucũwĩ. Yu̶ pu̶ame tiere tũ̶goñarĩ, “Marĩ Quetiupau̶ bu̶tioro cũ̶ ya poa macããna cũ̶ãrẽ qũĩñamaiáto,” ñinucũña. 17Tunu bairoa Onesíforo yu̶ cabairijere tũ̶goñaboboricaro ũnorẽã, Roma cũ̶ caetari rũ̶mu̶ caãno yoaro coteri mee, yerijãrĩcãrõ mano yu̶re macãñesẽãñupĩ Romapu̶re. Bairo yu̶ macãmajũcõãrĩ yua, yu̶ bócaripu̶ yu̶ macãjãnawĩ. 18Torecu̶, Jesucristo nemo ati yepapu̶ cũ̶ catunuetari rũ̶mu̶ caãno, marĩ Quetiupau̶ cũ̶rẽ ĩñamairĩ caroa majũ cũ̶ yaye macããjẽrẽ cũ̶ cũ̶ joáto. Efesopu̶ marĩ caãno, bu̶tioro majũ marĩ ju̶átinemowĩ Onesíforo. Tiere caroaro merẽ mu̶ masĩña.

will be added

X\