2 TESALONICENSES 3

1Yu̶ yarã, yu̶ bairãrẽ bairo caãna, catu̶sari wãme mu̶jããrẽ ñiña: Jãã cũ̶ãrẽ Diopu̶re jãã mu̶jãã cajẽnibojaro jãã boya. Tãmurĩ marĩ Quetiupau̶ yaye queti nipetiropu̶ cajesanu̶cãpetiparore bairo ĩrã, jããrẽ mu̶jãã jẽnibojagarã. Tunu bairoa nipetiro camasã tiere tũ̶gorã, na caĩroaparore bairo ĩrã mu̶jãã jẽnibojagarã. Mu̶jãã, Jesucristo yaye quetire mu̶jãã caĩroajũ̶goricarorea bairo na cũ̶ã na caĩroapeere jãã boya. 2Tunu ati yepapu̶ rorije caána, bairi ricaati catũ̶goñanucũrã cũ̶ã niñama. Na ũna Dios mena tũ̶goñatutuaetiyama. Bairi na ũna jããrẽ roro na caátigaro, Dios cũ̶ caẽñotaparore bairo ĩrã, jããrẽ mu̶jãã jẽnibojagarã Diopu̶re. 3Marĩ Quetiupau̶ pu̶ame cariape caácu̶ niñami. Bairi mu̶jãã ju̶átigu̶mi cũ̶ yaye quetire mu̶jãã catũ̶goñajãnaetiparore bairo ĩ. Roro wãtĩ jũ̶gori mu̶jãã cabainucũrĩjẽ cũ̶ãrẽ mu̶jãã ẽñotabojagu̶mi. 4Bairi mu̶jãã, Jesucristore catũ̶gou̶sarã ãnirĩ, “Marĩ caátirotiricarore bairo átinucũñama. Bairo jeto áticõã ninucũgarãma tocãnacã rũ̶mu̶a,” jãã ĩ tũ̶goñatutuacõãña mu̶jãã caátiãnierẽ. 5Bairi marĩ Quetiupau̶ pu̶ame, Dios mu̶jããrẽ cũ̶ camainucũrõrẽã bairo mu̶jãã cũ̶ã mu̶jãã ãmeo maimasĩõ joroque cũ̶ áparo. Tunu bairoa popiye cabairã mu̶jãã caãnimiatacũ̶ãrẽ, Jesucristo cũ̶ canu̶cãmasĩrĩcãrõrẽã bairo mu̶jãã cũ̶ã tũ̶goñaenarẽ bairo tiere mu̶jãã tũ̶goñanetõmasĩõ joroque cũ̶ áparo. 6Yu̶ yarã, yu̶ bairãrẽ bairo caãna, marĩ Quetiupau̶ Jesucristo cũ̶ catutuarije mena atore bairo jãã átirotiya mu̶jããrẽ: Ni ũcũ̶ capaagaecu̶ menarẽ bapacu̶pericõãña. “Dios yau̶ yu̶ ãniña,” caĩ cũ̶ caãnimiatacũ̶ãrẽ, jãã caquetibu̶ju̶cũrĩqũẽrẽ cũ̶ catũ̶gou̶sagaeticõãta, cũ̶ mena ãmerĩcõãña. 7Mu̶jãã mena ãna, jãã caátajere caĩñarĩcãrã ãnirĩ merẽ mu̶jãã masĩña caroaro paari mu̶jãã caátiãnipeere. Mu̶jãã mena ãna, paaena jãã ãmewũ̶. 8Ni jĩcãũ̶ ũcũ̶rẽ u̶gariquere wapatiena, jãã u̶gaepu̶. Wapatiri jeto jãã u̶ganucũwũ̶. Ni ũcũ̶ mu̶jãã mena macããcũ̶rẽ patowãcõgaena, ñamii, u̶mu̶recóo jãã paawu̶. 9Jãã cabuerije wapa mu̶jãã yaye u̶gariquere cajẽnimasĩparã nimirãcũ̶ã, mu̶jããrẽ jãã jẽnipato wãcõẽpũ̶. Caroaro jãã paaĩñowũ̶, jãã caátiere mu̶jãã caĩñacõparore bairo ĩrã. 10Mu̶jãã mena ãna, atore bairo mu̶jããrẽ jãã ĩ quetibu̶ju̶cũwũ̶: “Ni jĩcãũ̶ ũcũ̶ capaagaecu̶ u̶garique cũ̶ãrẽ cũ̶ u̶gaeticõãto,” jãã ĩ cũwũ̶. 11Bairo jãã caĩrĩqũẽ caãnimiatacũ̶ãrẽ, mu̶jããtu̶ caatíatana atore bairo jãã ĩnucũñama: “Tesalónica macããna jĩcããrã paaena ãninucũñama. Ñerẽ caáperã ãnirĩ aperã tu̶ripu̶ patowãcõ ñesẽãnucũñama,” jãã ĩ quetibu̶ju̶nucũñama. 12Bairi marĩ Quetiupau̶ Jesucristo cũ̶ carotimasĩrĩjẽ mena atore bairo na ũna capaagaenarẽ jãã ĩña: Caroaro paaya mu̶jãã cũ̶ã, mu̶jãã cabopacarijere mu̶jãã cawapata ãnimasĩparore bairo ĩrã. 13Yu̶ yarã, yu̶ bairãrẽ bairo caãna, caroaro mu̶jãã caátiãnierẽ átiju̶tiri jãnaeticõãña. 14Ni jĩcãũ̶ ũcũ̶ ati carta mena mu̶jããrẽ jãã caquetibu̶ju̶rijere cũ̶ catũ̶gou̶saeticõãta, roro cũ̶ caátiere ĩñaposeroya. Cũ̶ mena bapacu̶pericõãña, roro cũ̶ cabairijere tũ̶goñabobori cũ̶ yeri cũ̶ catũ̶goñawasoaparore bairo joroque ĩrã. 15Bairãpu̶a, mu̶jãã pesure bairo qũĩñaeticõãña. Mu̶jãã baire bairo caãcũ̶ cũ̶ caãnoi, caroaro mena cũ̶ beyoya. 16Marĩ Quetiupau̶ caroa yeri cu̶tajere cajoãninucũũ̶ pu̶ame tocãnacã rũ̶mu̶a noo mu̶jãã caãno cãrõrẽ caroa yericu̶taje, tocãnacã wãmerẽ cũ̶ jonemoáto. Mu̶jãã nipetiro mena cũ̶ ãmarõ marĩ Quetiupau̶ Jesús. 17Yu̶, Pablo, atie yu̶ cañurotijorijere yu̶ majũpu̶a woatujou̶ yu̶ átiya. Atore bairo jeto yu̶ átinucũña nipetirije camasãrẽ yu̶ caquetibu̶ju̶woajonucũrĩ cartaarire. 18Marĩ Quetiupau̶ Jesucristo caroare cũ̶ jonemoáto mu̶jãã nipetirore. Tocãrõã niña atie queti yu̶ cawoaturije.

will be added

X\