2 TESALONICENSES 2

1Apeyera tunu yu̶ yarã, yu̶ bairãrẽ bairo caãna, mu̶jããrẽ yu̶ quetibu̶ju̶nemoña. Marĩ Quetiupau̶ Jesucristo nemo cũ̶ catunuetapa rũ̶mu̶, marĩrẽ nei acú̶ cũ̶ cabaipeere, cũ̶ mena marĩ caneñapa rũ̶mu̶rẽ mu̶jãã yu̶ quetibu̶ju̶nemoña: 2Mu̶jãã catũ̶goña ãninucũrõrẽã bairo tũ̶goñacõã ninucũña. Ape wãmerẽ tũ̶goñamawijiaeticõãña. “Merẽ etaya Jesús cũ̶ catunuetari rũ̶mu̶,” aperã ricaati na caĩquetibu̶ju̶rijere caãnorẽ bairo tũ̶goeticõãña. Bairi aperã, “Espíritu Santo cũ̶ camasĩõrĩjẽ jũ̶gori jãã ĩña,” o “Aperã camasĩrã na caquetibu̶ju̶rije jũ̶gori jãã ĩña,” o “Carta mena na caquetibu̶ju̶ro jũ̶gori jãã ĩña,” na caĩata, caãnorẽ bairo na tũ̶goeticõãña. Jĩcããrã, “Pablojãã bairo woatu quetibu̶ju̶joupa,” caĩrã nimirãcũ̶ã, caĩtopairã niñama. 3Petoaca queti mena tũ̶gomawijiaeticõãña. Bairo pu̶ame baigaro: Marĩ Quetiupau̶ nemo cũ̶ caetapa rũ̶mu̶ jũ̶goye, capããrã majũ Diore cabaibotiori majã nigarãma. Bairo na cabairipau̶a na mena macããcũ̶ jĩcãũ̶ rorije caátipai cañuecũ̶ majũ buiaetagu̶mi, cabero peero caũ̶petietopu̶ caápáu̶ pu̶ame. 4Cũ̶ pu̶ame Diore caĩñatei ãnirĩ Dios yaye macããjẽ nipetirije caroa tũ̶goñarĩqũẽrẽ boetigu̶mi. Diore marĩ caĩroarije ũnie cũ̶ãrẽ boetigu̶mi. Templo Dios ya wiipu̶ cũ̶ãrẽ trono quetiupau̶ ruiricaropu̶ jããnumugu̶mi, “Diore bairo caãcũ̶ yu̶ ãniña,” caĩ ãnirĩ. Tunu bairoa camasãrẽ, “Dios niñami,” na ĩõ joroque na baitogu̶mi. 5Merẽ mu̶jãã mena ãcũ̶, atorea bairo mu̶jããrẽ yu̶ quetibu̶ju̶wu̶. Tiere mu̶jãã masĩrã. 6Mu̶jãã pu̶ame merẽ mu̶jãã masĩña rorije caátipai tãmurĩ cũ̶ caapériere. “Dios cũ̶ caĩcũrĩcã rũ̶mu̶ caetaparo jũ̶goye etabuia masĩẽtĩñami,” mu̶jãã ĩ masĩña. 7Bairo tãmurĩ cũ̶ caapérimiatacũ̶ãrẽ, merẽ roro camasãrẽ cũ̶ caátipee cõñarõ majũ baiya. Bairi cũ̶rẽ caẽñotau̶ cũ̶ capitiwiyoparo jeto ru̶saya cũ̶ cabuiaetaparo jũ̶goye. 8Bairo cũ̶ capitiwiyoro bero buiaetagu̶mi rorije caátipai pu̶ame. Bairo cũ̶ cabuiaetamiatacũ̶ãrẽ, marĩ Quetiupau̶ Jesús pu̶ame cũ̶ camasĩrĩjẽ jũ̶gori cũ̶ pajĩãrocacõãgu̶mi. Tunu bairoa nemo cũ̶ caetari rũ̶mu̶ caãno cũ̶ caasiyarije jũ̶gori cũ̶ yasio rocacõãgu̶mi. 9Mai, Jesús cũ̶rẽ cũ̶ capajĩãparo jũ̶goye, capee camasãrẽ ĩtori átijẽño ĩñogu̶mi rorije caácu̶ pu̶ame. Wãtĩã quetiupau̶, Satanás cũ̶ camasĩõrĩjẽĩ jũ̶gori capee átijẽño ĩñogu̶mi cariape mee macããjẽrẽ. 10Bairi capee wãme na ĩtomasĩgu̶mi peeropu̶ caápárãrẽ. Na pu̶ame cariape quetibu̶ju̶riquere caboena ãnirĩ, tunu Jesucristo camasã na carorije wapare cũ̶ canetõõrĩqũẽ cũ̶ãrẽ caboena ãnirĩ peeropu̶ caápárã majũ nigarãma. 11Bairi Dios pu̶ame ricaati na catũ̶gou̶sarije jũ̶gori wãtĩ narẽ cũ̶ caĩtorijere na ẽñotabojaetigu̶mi. 12Bairo na cabairoi, “Peeropu̶ na yu̶ jogu̶,” na ĩgu̶mi Dios, nipetiro cariape quetibu̶ju̶riquere catũ̶gogaenarẽ, carorije jetore caátijesorã na caãno jũ̶gori. 13Cabaimiatacũ̶ãrẽ, jãã pu̶ame tocãnacãnia marĩ Pacu̶ Diore, “Mu̶ ñujãñuña jãã mena,” caĩparã jãã ãniña, jãã yarãrẽ bairo caãna Jesucristo cũ̶ camairã mu̶jãã caãno jũ̶gori. Dios pu̶ame mu̶jããrẽ besejũ̶goyupi caãnijũ̶goripau̶pu̶a, cũ̶ yarã cũ̶ canetõõparã mu̶jãã caãniparore bairo ĩ. Tunu bairo cũ̶ yaye queti caãnorẽ bairo cariape quetibu̶ju̶riquere mu̶jãã catũ̶gou̶saro jũ̶gori, cũ̶ Yeri Espíritu Santo pu̶ame cañurã Dios mena jĩcãrõ caãniparã mu̶jãã ãnio joroque mu̶jãã átiyami. 14Dios camasã na carorije wapare cũ̶ canetõõrĩqũẽ macããjẽ mu̶jããrẽ jãã caquetibu̶ju̶rique mena jũ̶gori mu̶jããrẽ piire bairo mu̶jãã ásupi, cũ̶ canetõõrĩcãrã mu̶jãã caãnijĩãtiparore bairo ĩ. Marĩ Quetiupau̶ Jesucristo mena jĩcãrõrẽ bairo nocãrõ caroaro caãnopu̶ mu̶jãã caãnimasĩparore bairo ĩ, tie jũ̶gori piire bairo mu̶jãã ásupi mu̶jãã cũ̶ãrẽ. 15Bairi yu̶ yarã, yu̶ bairãrẽ bairo caãna, Dios yaye quetire tũ̶goña jãnaeticõãña. Caroaro átiãnajẽ ũnie jetore áticõãña. Mu̶jããtu̶ ãna, mu̶jããrẽ jãã caquetibu̶ju̶riquere masiritieticõãña. Tunu bairoa mu̶jããrẽ jãã cawoatuquetibu̶ju̶jorique cũ̶ãrẽ masiritieticõãña. 16Bairi yua, marĩ Quetiupau̶ Jesucristo, marĩ Pacu̶ Dios cũ̶ã marĩrẽ ĩñamairĩ marĩ beseyupi. Bairo marĩ beseri popiye cabairicarã marĩ caãno jũ̶gori caroa yericu̶taje capetietiere marĩ joyupi. Nipetiri wãme caroaro marĩ cũ̶ caátigariquere caãnorẽ bairo caroaro marĩ cacotemasĩpee cũ̶ãrẽ marĩ joyupi. 17Tore bairo mu̶jãã joyupi, yeri tutuaro mena mu̶jãã ãnimasĩõ joroque ĩ. Tunu bairo caroaro átiãnajẽ jetore mu̶jãã átiãnimasĩõ joroque ĩ, mu̶jãã joyupi. Bairo caãna ãnirĩ mu̶jãã cabu̶su̶rije tocãnacã wãme caroa jetore mu̶jãã ĩ masĩgarã. Mu̶jãã caátie cũ̶ã caroa jeto nigaro.

will be added

X\