2 SAN PEDRO 3

1Yu̶ bairãrẽ bairo caãna, yu̶ camairã, ati carta niña cabero macãã carta mu̶jãã yu̶ cawoajonemorĩ carta majũ. Caãnijũ̶gorica carta, bairi ati carta cũ̶ãrẽ cariape mu̶jããrẽ ñi quetibu̶ju̶ woajoya, Dios yaye quetire mu̶jãã camasiritietiparore bairo ĩ. Pu̶ga cartapu̶rea yu̶ quetibu̶ju̶ woajoya, tunu bairoa cariape mu̶jãã catũ̶goñamasĩparore bairo ĩ. 2Tũ̶goñamasĩña tirũ̶mu̶pu̶ macããna cañurã camasĩrã profeta majã na caĩquetibu̶ju̶yariquere. Tunu bairoa marĩ Quetiupau̶, marĩrẽ canetõõrĩcũ̶ cũ̶ caroticũrĩqũẽrẽ masiritieticõãña. Jãã, Jesucristo cũ̶ cabuericarã, apóstolea majã jãã caquetibu̶ju̶netõrĩqũẽ cũ̶ãrẽ masiritieticõãña. Tiere tũ̶goñanemocõãña. 3Bairãpu̶a, atie cũ̶ãrẽ mu̶jãã tũ̶goña masĩmajũcõãgarã. Catu̶sari yu̶tea caãno atígarãma camasã caĩtopairi majã majũ. Na rupau̶ caborore bairo carorije jeto caátiãni majã ũna nigarãma. Dios yaye quetire roro caĩboyetieperã capããrã nigarãma. 4Bairo caĩeperi majã ãnirĩ atore bairo ĩ jẽniña epegarãma: “¿Dope cũ̶ baiyupari Cristo, ‘Yu̶ tunuatígu̶,’ caĩmirĩcũ̶? Marĩ ñicũ̶jãã na caãni rũ̶mu̶, ati u̶mu̶recóo caãnijũ̶goripau̶pu̶a caãnatõrẽã bairo nicõãña mai,” ĩ epegarãma. 5Bairo caĩrã ãnirĩ Dios cũ̶ carotimasĩrĩpau̶ u̶mu̶recóo tirũ̶mu̶pu̶a caãnicõãjũ̶goatajere masĩẽtĩñama. Marĩ Pacu̶ Dios pu̶ame cũ̶ carotimasĩrĩjẽ mena ati u̶mu̶recóore jẽñoñupĩ, oco mena jũ̶gori. Tie oco mena jũ̶gori niña ati u̶mu̶recóo ãme cũ̶ãrẽ. 6Cũ̶ cabairotiricarorea bairo ati u̶mu̶recóo cũ̶ãrẽ rurocacõãñupĩ Dios. Tie oco jũ̶gorina ati yepare rurocacõãñupĩ. 7Ãme caãni u̶mu̶recóo, ati yepa cũ̶ã Dios cũ̶ carotirore bairo cabaipee cũ̶ cacũrĩqũẽ niña. Ati u̶mu̶recóo, ati yepa cũ̶ã ũ̶peticoagaro cũ̶ cabairotirore bairo yua. Peero mena yasigaro ati u̶mu̶recóo, ati yepa mena yua. Dios camasãrẽ cũ̶ caĩñabeseri rũ̶mu̶ caãno majũ ti peero pu̶ame ati yepa nipetiropu̶re joerepeticoagaro. Ti rũ̶mu̶ caãno Diore catũ̶gou̶saetana cũ̶ã yasicoagarãma. 8Bairi yu̶ bairãrẽ bairo caãna, yu̶ camairã, atiere masiritieticõãña: Marĩ Quetiupau̶ Jesucristo patowãcãẽtĩñami. Cũ̶rã, jĩcã rũ̶mu̶ pu̶ame mil cũ̶marĩ netõbauya. Mil cũ̶marĩ majũ jĩcã rũ̶mu̶rẽ bairo etabauya. 9Mai, marĩ Quetiupau̶ pu̶ame caroa wãme cũ̶ caátipeere cũ̶ caĩjũ̶goyeticũrĩcãrõrẽ átiwẽpũ̶ẽcũ̶ mee baiyami. “¿Dopẽĩ tãmurĩ cũ̶ tunuapériyati Jesús?” ĩ bu̶su̶nucũñama jĩcããrã camasã. Bairo na caĩbu̶su̶nucũmiatacũ̶ãrẽ, bairo pu̶ame roque boyami Dios: Mu̶jãã nipetiro Jesucristore tũ̶gou̶sari bero cũ̶ yarã mu̶jãã caãnipeere boyami. Bairi patowãcãrĩcãrõ mano caroaro ĩñajocõãcũ̶ baiyami. Mu̶jãã cotei átiyami. Dios pu̶ame ni jĩcãũ̶ ũcũ̶ cũ̶ cayasirore boetiyami. Nipetiro camasã na carorije wapare yapapuari cũ̶rẽ na cajẽnirõ boyami. Bairo jẽnirĩ bero yua, cũ̶ yarã majũ na caãnorẽ boocotei baiyami. 10Bairi tunu marĩ Quetiupau̶ cũ̶ caatípa rũ̶mu̶rẽ marĩ quetibu̶ju̶etiyami. “Ti rũ̶mu̶ majũ yu̶ etagu̶,” ĩẽtĩñami. Bairi cayajari majõcu̶ cũ̶ caetarore bairo marĩ camasĩẽtĩ rũ̶mu̶ ũno majũ etagu̶mi ati yepapu̶re. Ti rũ̶mu̶ cũ̶ caetari rũ̶mu̶ pu̶ame bu̶tioro acu̶orije bu̶su̶garo. Tocãrõã yua ati u̶mu̶recóo yasicoagaro. Ati yepa cũ̶ã ũ̶peticoagaro. Nocãrõ caãniepu̶ cãrõ nipetirije ũ̶peticoagaro. Manigaro yua ati yepa. 11Tore bairo Dios ati u̶mu̶recóore cũ̶ caátiyasiopeere tũ̶goñarĩ mu̶jãã pu̶ame cũ̶ caquetibu̶ju̶cũrĩqũẽrẽ caroaro mu̶jãã catũ̶gou̶sacõã ninucũrõ boya. ¡Caroarã cañurã majũ mu̶jãã caãnicotero boya, Dios cũ̶ carotirore bairo! 12Dios cũ̶ catunuetari rũ̶mu̶ caãno caroaro mu̶jãã ãnicoteyugarã. Bairi tunu cũ̶ carotirore bairo caroaro ása, tãmurĩ nemo cũ̶ tunuatío joroque ĩrã. Ti rũ̶mu̶ caãno ati u̶mu̶recóo pu̶ame ũ̶yasipeticoagaro. Nocãrõ caãniepu̶ cãrõ nipetirije ũ̶repeticoagaro. 13Torena, marĩ roque cawãma u̶mu̶recóo, cawãma yepare coterã marĩ baiya. Marĩ Pacu̶ pu̶ame, “Ti u̶mu̶recóore rocari bero, ape u̶mu̶recóo yu̶ qũẽnogu̶ tunu. Topu̶ nigarãma yu̶ yarã,” cũ̶ caĩjũ̶goyeticũrĩcãrõrẽ bairo cũ̶ caátipeere cayurã ãnirĩ marĩ uwietigarã ti rũ̶mu̶ caetaro. Cawãma u̶mu̶recóo pu̶ame cañurĩ u̶mu̶recóo caroaro jeto ãna u̶mu̶recóo nigaro. 14Bairi yu̶ yarã, yu̶ bairãrẽ bairo caãna, yu̶ camairã, marĩ Quetiupau̶ cũ̶ catunuetaparo jũ̶goye caroaro caroa wãmerẽ marĩ áticõã ninucũgarã. Ñe ũnie wapa cacũ̶goena, cañurã, caroaro yerijõrõ caãnimasĩrã majũrẽ marĩ etari cũ̶ u̶seanio joroque caroaro marĩ átiãnigarã cũ̶ jũ̶goye mai. 15Tũ̶gopeoya: Marĩ Quetiupau̶ patowãcãrĩcãrõ mano marĩ cũ̶ cacoteata, marĩ cũ̶ canetõpeerea cotei átiyami. Nipetiro marĩ canetõpetirore bori cotei átiyami. Ato yu̶ caquetibu̶ju̶rore bairoa mu̶jãã quetibu̶ju̶ woajoyupi marĩ yau̶ Pablo cawãmecu̶cu̶ cũ̶ã. Marĩ Pacu̶ Dios, cũ̶ camasĩõrĩjẽ jũ̶gori tore bairo ĩ quetibu̶ju̶ woajoyupi marĩ yau̶ Pablo. 16Tocãnacã cartapu̶a tore bairo Pablo cũ̶ã mu̶jããrẽ ĩ quetibu̶ju̶ woajonucũñami. Bairopu̶a, jĩcã wãmerĩ cũ̶ caquetibu̶ju̶rije masiriyo jãñunucũña, bueata. Bairi aperã camasã catũ̶gomasĩẽna, Dios mena catũ̶goñatutuajũ̶gomasĩẽna pu̶ame cariape tũ̶goetiyama. Bairo tũ̶gomasĩẽtĩrĩ yua, Pablo yaye quetire quetibu̶ju̶ mawijiocõãnucũñama. Tore bairo átinucũñama nipetirije Dios yaye cũ̶ caquetibu̶ju̶cũrĩqũẽrẽ. Tie wapa popiye na baio joroque na átigu̶mi marĩ Pacu̶ Dios. 17Bairi yu̶ bairãrẽ bairo caãna yu̶ camairã, merẽ atiere caroaro majũ mu̶jãã masĩña yu̶ caquetibu̶ju̶rijere. Bairi caroaro tũ̶goñamasĩña. Maijũ̶goya mu̶jãã yerire. Mu̶jããpu̶ caĩtorã na caĩquetibu̶ju̶rijere mu̶jãã tũ̶gou̶sare. Narẽ mu̶jãã ĩtoecore carorã na caquetibu̶ju̶rijere. Diore catũ̶gou̶sarã nimirãcũ̶ã, yasirique macããjẽrẽ mu̶jãã tũ̶gou̶sare. 18Bairo pu̶ame roque ása: Marĩ Quetiupau̶, marĩrẽ canetõõrĩcũ̶ Jesucristore jõjãñurõ nemorõ cũ̶ camasĩnemopee niña mu̶jããrẽ nipetiri wãme cũ̶ camasã cu̶tiãnierẽ. Tunu bairoa nemojãñurõ ãmeo mainemoña. Bairi yua, cũ̶rẽ marĩ cabasapeorije petietigaro. Ãme, ape rũ̶mu̶ cũ̶ãrẽ nicõã ninucũgaro. Bairoa to baiáto. Tocãrõã niña atie queti yu̶ cawoaturije.

will be added

X\