1 Yu̶, Simón Pedro cawãmecu̶cu̶, Jesucristore paabojari majõcu̶ cũ̶ caquetibu̶ju̶rotijoricu̶ apóstol majũ yu̶ ãniña ati cartare mu̶jããrẽ cawoajou̶. Jesucristo yarã majũrẽ mu̶jãã yu̶ woajoya. Mu̶jãã cũ̶ã jããrẽã bairo Jesucristo mena mu̶jãã tũ̶goñatutuajũ̶goyupa. Marĩ Quetiupau̶ Dios, bairi Jesucristo cariape caácu̶, marĩrẽ canetõrĩcũ̶ majũ cũ̶ã, jĩcãrõ tũ̶nia marĩ joyupi cũ̶ mena marĩ catũ̶goñatutuapeere. 2 Bairi mu̶jããrẽ ñiña: Dios, marĩ Quetiupau̶ Jesucristo mena na caquetibu̶ju̶cũrĩqũẽrẽ mu̶jãã camasĩnemorõ jũ̶gori nocãrõ pairo caroare mu̶jããrẽ na jonemoáto. Caroa yericu̶taje cũ̶ãrẽ mu̶jãã na jonemoáto. 3 Dios ñe ũnie caru̶saecu̶ ãnirĩ cũ̶ camasĩrĩjẽ mena marĩ jowĩ nipetirije caroa macããjẽ marĩ caátiãnipeere. Tunu bairoa cũ̶rẽ marĩ camaimasĩpee cũ̶ãrẽ marĩ jowĩ marĩ Pacu̶ Dios. Tore bairo marĩ jowĩ, nocãrõ pairo cũ̶ macũ̶ marĩrẽ cabesericu̶ cũ̶ caátiãnimasĩrĩjẽrẽ, cũ̶ carotimasĩrĩjẽ cũ̶ãrẽ marĩ camasĩparore bairo ĩ. “Yu̶re bairo caroaro na átiãnimasĩáto,” ĩ caroare marĩ jowĩ. 4 Caroaro cũ̶ camasĩrĩjẽ jũ̶gori caroa wãme marĩ cũ̶ caátipee cũ̶ caĩjũ̶goyeticũrĩqũẽrẽ marĩ masĩõwĩ. Tie pu̶ame nocãrõ majũ pairo cũ̶ caátipee niña. Cawapapacarijere bairo caãnie niña. Tie jũ̶gori marĩ, ati u̶mu̶recóo macããna roro marĩ rupau̶ caborore bairo caána, tiere marĩ majũã caátijãnamasĩrã marĩ ãnio joroque marĩ ásupi. Bairo marĩ caáto, Dios cũ̶ caãnajẽ cu̶tiere bairo marĩ ãnio joroque marĩ ásupi. 5 Bairi caroaro tũ̶goñatutuanemoña marĩ Pacu̶ Dios mena. Caroaro átiãña caroa macããjẽrẽ. Bairo caroaro átiãna, caroaro mu̶jãã tũ̶gou̶sagarã cũ̶ yaye quetire. 6 Bairo caroaro tũ̶gou̶sarã yua, mu̶jãã rupau̶ macããjẽ carorije mu̶jãã caátigarije ũnierẽ mu̶jãã ẽñotamasĩgarã. Bairo roro caáperã ãnirĩ, caroaro yerijõrõ mu̶jãã ãnimasĩgarã. Bairo caroaro yerijõrõ ãna yua, Diore caroaro mu̶jãã maimasĩgarã. 7 Bairo cũ̶ maimasĩrĩ yua, mu̶jãã yarãrẽ na mu̶jãã ĩñamaigarã. Na mu̶jãã ju̶átinemogarã. Bairo na mairã, nipetiro camasã cũ̶ãrẽ na mu̶jãã mainemomajũcõãgarã yua. 8 Tie nipetirije caroaro ãnajẽ cu̶tajere mu̶jãã caátimasĩpeyoata, cañurã majũ mu̶jãã ãnigarã. Camasãrẽ caju̶ána majũ mu̶jãã ãnigarã. Bairi marĩ Quetiupau̶ Jesucristore cabu̶goro mee cũ̶ mu̶jãã masĩña. Cũ̶rẽ mu̶jãã camasĩrĩjẽ wapacu̶timajũcõãña, nemojãñurõ tiere mu̶jãã caátimasĩpeyoata. 9 Noa ũna aperã camasã tie caroaro ãnajẽ cu̶tajere na caápericõãta, camasĩẽtĩmajũcõãrã nibujiorãma. Cacaapee mána caĩñamasĩẽnarẽ bairo tuabujiorãma. Tunu bairoa na carorije wapa caãnimirĩqũẽrẽ Jesucristo cũ̶ canetõõbojarique cũ̶ãrẽ masiritipeticõãbujiorãma. 10 Bairi yu̶ yarã, yu̶ bairãrẽ bairo caãna, nipetirije atiere caroaro ása. Jãnaeticõãña. Jesucristo cũ̶ caborore bairo jeto caroaro ása. “Jesucristo yarã caãniparã Dios cũ̶ cabesericarã ãnirĩ caroaro marĩ átiãnigarã,” ĩ tũ̶goñaña. Tore bairo mu̶jãã caátiãnimasĩata, di rũ̶mu̶ ũno mu̶jãã yasietigarã. Wãtĩ cũ̶ã mu̶jãã yasio joroque mu̶jãã áperigu̶mi. 11 Bairi tunu caroaro mu̶jãã ãnicõã nigarã. U̶mu̶recóopu̶ mu̶jãã caetari rũ̶mu̶ caãno marĩ Quetiupau̶ Jesucristo marĩrẽ canetõõrĩcũ̶ cũ̶ Pacu̶ mena caroaro mu̶jãã bocágarãma. Topu̶ marĩ Quetiupau̶ cũ̶ carotimasĩrĩpau̶ capetietopu̶ cũ̶ mena mu̶jãã ãnicõã ninucũgarã yua. 12 Bairi mai, atie yu̶ caquetibu̶ju̶rijere mu̶jãã yu̶ quetibu̶ju̶nemocõã ninucũgu̶, tiere mu̶jãã camasĩnemoparore bairo ĩ. Merẽ mu̶jããrẽ, cariape macããjẽ quetire na caquetibu̶ju̶ricaro bero caãnimiatacũ̶ãrẽ, mu̶jãã yu̶ quetibu̶ju̶nemogu̶ tunu. Tunu bairoa Jesucristo mena tũ̶goñatutuari caroaro cũ̶ caborore bairo mu̶jãã caátiãnimiatacũ̶ãrẽ, yu̶ quetibu̶ju̶nemocõã nigu̶ mai. 13 Tore bairo mu̶jããrẽ yu̶ quetibu̶ju̶ ãnigu̶ yu̶ cacatiri rũ̶mu̶ ũno mai. Merẽ yu̶ masĩña baipu̶a. Yu̶a, mu̶jããrẽ caquetibu̶ju̶nemopau̶ ũcũ̶ã ãnirĩ atiere mu̶jãã yu̶ quetibu̶ju̶ya. 14 Apeyera merẽ marĩ Quetiupau̶ Jesucristo pu̶ame “Pedro, nocãrõ mea mu̶ riacoagu̶,” ñi quetibu̶ju̶ masĩõwĩ. Torecu̶, yu̶ pu̶ame yu̶ beri caãnopu̶ cũ̶ãrẽ atie yu̶ caquetibu̶ju̶rijere mu̶jãã masĩnemocõã ninucũõ joroque yu̶ áticũña. Noo yu̶ camasĩrõ cãrõ tiere yu̶ quetibu̶ju̶cũña ati yepapu̶re. 16 Tunu apeyera, Jesucristo, marĩ Quetiupau̶, ati yepapu̶ tunu cũ̶ caatípee, cũ̶ carotimasĩrĩpau̶ macããjẽ cũ̶ãrẽ caroa cariape macããjẽrẽ jãã quetibu̶ju̶wu̶. Jãã majũã ĩ tũ̶goñamacãrĩ jãã caĩquetibu̶ju̶rique mee ãmu̶. Jãã majũpu̶a cũ̶rẽ jãã ĩñawũ̶. Nocãrõ cũ̶ carotimasĩrĩjẽ, cũ̶ catutuarije cũ̶ãrẽ jãã ĩñamajũcõãwũ̶. 17 Jãã ĩñawũ̶ jĩcã rũ̶mu̶ Dios, cũ̶ Pacu̶ cũ̶rẽ nu̶cũ̶bu̶gorique mena cũ̶ caĩbu̶su̶rore. Atore bairo ĩ bu̶su̶ocajowu̶ nocãrõ carotimasĩ Dios cũ̶ caĩrĩjẽ bu̶su̶rique: “Ãni yu̶ macũ̶, yu̶ camai, yu̶ cabesericu̶ majũ ñiñami. Cũ̶ mena bu̶tioro majũ yu̶ u̶seaniña,” ĩ bu̶su̶ocajowĩ Dios. 18 Jãã majũpu̶a tie bu̶su̶rique u̶mu̶recóopu̶ caatíere jãã tũ̶gowu̶. Jãã pu̶ame marĩ Quetiupau̶ Jesucristo mena jãã ãmu̶ ti watoare ũ̶tãũ̶ cañurĩcu̶pu̶. 19 Masĩrĩ majã profeta majã na caĩquetibu̶ju̶ jũ̶goyeticũrĩcãrõrẽ bairo cariapea baiwĩ Jesucristo. Bairi mu̶jãã roque tiere camasĩmajũcõãrã ãnirĩ tiere caroaro cariape tũ̶goñanemoña. Tie caroa queti profeta majã na caquetibu̶ju̶cũrĩqũẽ pu̶ame canaitĩãrõrẽ jĩñaworiquere bairo niña. Tiere nemojãñurõ mu̶jãã cabuenemoata, mu̶jãã camasĩpeyoetiere mu̶jãã masĩnemogarã. Bairi Jesucristo, busuri ñocõrẽ bairo caãcũ̶, cũ̶ catunuetari rũ̶mu̶ caãno tiere mu̶jãã masĩ peticoagarã. 20 Cajũ̶goye mai atiere caroaro tũ̶goña masĩña: Dios ya tutipu̶ ape rũ̶mu̶ cabaipeere na caquetibu̶ju̶woatucũrĩqũẽ pu̶ame jĩcãũ̶ camasocu̶ cũ̶ majũã cũ̶ caboro masĩrĩ cũ̶ cawoatu quetibu̶ju̶rique mee niña. Bairi profeta majã cũ̶ã na majũ na camasĩrĩjẽ mena na caborore bairo na caquetibu̶ju̶rique mee niña. Na roque Dios cũ̶ caquetibu̶ju̶ rotijoricarã ãnirĩ, Dios na cũ̶ caĩrĩjẽrẽ Espíritu Santo cũ̶ camasĩõrõ jũ̶gori quetibu̶ju̶ masĩñupã Dios ya tutipu̶.
